Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 33: Etaaguluko lyEfuta Etiligane

Ehokololo 33: Etaaguluko lyEfuta Etiligane

TALA shoka tashi ningwa! Oye Moses ngoka ta ganeke ondhimbo ye kombanda yEfuta Etiligane. Aantu mboka ya gamenwa pamwe naye handiyaka, oyo Aaisrael. Ihe Farao netanga lye lyaakwiita ayehe otaa si omeya mefuta. Natu tale nkene shika sha ningwa.

Aakwiita Aegipiti taa si omeya

Ngaashi twi ilongo, Farao okwa lombwele Aaisrael ya thige po Egipiti konima sho Kalunga e eta egeelo eti-10 kAaegipiti. Aalumentu Aaisrael ye thike lwopo 600 000 oya yi, nosho wo aakiintu naanona oyendji. Osho wo omwaalu omunene gwaantu yalwe, mboka ya tameke okwiitaala muJehova, ogwa yi pamwe nAaisrael. Yo ayehe oya yi pamwe noonzi dhawo niikombo yawo noongombe dhawo.

Manga inaaya ya, Aaisrael oya pula Aaegipiti oonguwo niinima yoshingoli noyoshisiliveli. Aaegipiti oya li ya tila noonkondo molwegeelo lyahugunina ndyoka lye ya adha. Ano oya gandja kAaisrael ayihe mbyoka yo ya pula.

Konima yomasiku gamwe po Aaisrael oye ya pEfuta Etiligane. Oya vululukwa po mpoka. Pethimbo opo tuu mpoka Farao naalumentu ye oya tameke okuuva nayi sho yo ye etha Aaisrael ya ye. ‘Otwe etha aapika yetu ya ye!’ osho yo ya ti.

Ano Farao okwa lundulula ishewe edhiladhilo lye. Mbala ye okwa longekidha omatembalugodhi ge netanga lye lyaakwiita. Nokwa tameke okulandula Aaisrael nomatembalugodhi gi ikalekelwa 600, nosho wo omatembalugodhi agehe galwe gAaegipiti.

Sho Aaisrael ya mono kutya Farao netanga lye lyaakwiita oye ya landula, oya li ya tila noonkondo. Yo oya li ya kondekwa. Efuta Etiligane olya li kombinga yimwe, naahuka kombinga onkwawo otaku zi Aaegipiti. Ihe Jehova okwa tula po oshikogo pokati koshigwana she nAaegipiti. Ano Aaegipiti kaya li taya vulu okumona Aaisrael opo ye ya ponokele.

Opo nduno Jehova okwa lombwele Moses a ganeke ondhimbo ye kombanda yEfuta Etiligane. Sho ye e shi ningi, Jehova okwa pepitha ombepo ondhigu yokuuzilo. Omeya gefuta oga topoka, nomeya oga kala ga kankama koombinga adhihe mbali.

Aaisrael oya tameke nduno okweenda pevi ekukutu okupita mefuta. Osha pula ethimbo ele kaantu omamiliyona pamwe niinamwenyo yawo ya thike nombili kombinga ndjiyaka yefuta. Lwahugunina Aaegipiti oya li taa vulu okumona ishewe Aaisrael. Aapika yawo oya li yi ipyakidhila okuya ontuku! Ano oya mbulukutile mefuta ye ya landule.

Sho ye shi ningi, Kalunga okwa gwitha ko omagulu goma-tembalugodhi gawo. Aaegipiti oya li ya tila noonkondo noya tameke okwiigidha: ‘Jehova ota kondjele Aaisrael oku tu kondjitha. Natu zeni mo muka!’ Ihe kapwa li we ompito.

Shika osha li sho Jehova a lombwele Moses a ganeke ondhimbo ye kombanda yEfuta Etiligane, ngaashi u shi wete mefano. Naashono Moses e shi ningi, omakuma gomeya oga tameke okushuna kumwe noga siikile Aaegipiti nomatembalugodhi gawo. Etanga lyaakwiita alihe olya landula Aaisrael mefuta. Nokapu na nando ogumwe gwomAaegipiti a zi mo nomwenyo!

Alikana oshigwana shaKalunga osha li sha nyanyukwa ngiini sho sha hupithwa! Aalumentu oyi imbile Jehova eimbilo lyepandulo e taa ti: ‘Jehova okwa sindana esindano ekumithi. Okwa dhaadhiga oonkambe naalondi yadho mefuta.’ Omumwayinakadhona gwaMoses Miriam okwa kutha ontunda ye, naakiintu ayehe oye mu landula noontunda dhawo. Nomanga yo taa tanta molwenyanyu, oyi imbi eimbilo lya faathana nolyaalumentu: ‘Jehova okwa sindana esindano ekumithi. Okwa dhaadhiga uukambe naalondi yawo mefuta.’

Eksodus ontopolwa 12 sigo 15.



Omapulo

  • Aalumentu Aaisrael yangapi, pamwe naakiintu naanona, ya li ya zi muEgipiti, noolye ya li ya yi pamwe nayo?
  • Farao okwa li e uvite ngiini konima sho e etha Aaisrael ya ye, noshike a li a ningi po?
  • Jehova okwa li a ningi shike opo Aaegipiti kaaya ponokele oshigwana she?
  • Oshike sha li sha ningwa po sho Moses a ganeke ondhimbo ye kombanda yEfuta Etiligane, nAaisrael oya li ya ningi shike?
  • Oshike sha li sha ningwa po sho Aaegipiti ya matukile mefuta ya landula Aaisrael?
  • Aaisrael oya li yu ulike ngiini kutya oya nyanyukwa noya pandula Jehova sho a li e ya hupitha?

Omapulo ga gwedhwa po

  • Lesha Eksodus 12:33-36.

    Jehova okwa li a si ngiini oshimpwiyu opo a futile po oomvula adhihe ndhoka oshigwana she sha kala muupika wAaegipiti? (Eks. 3:21, 22; 12:35, 36)

  • Lesha Eksodus 14:1-31.

    Oohapu dhaMoses dha nyolwa muEksodus 14:13, 14 odhi na oshizemo shini kaapiya yaJehova nena mboka ya taalela olugodhi talu ya lwaHarmagedon? (2 Ondjal. 20:17; Eps. 91:8)

  • Lesha Eksodus 15:1-8, 20, 21.

    Omolwashike aapiya yaJehova ye na oku mu imbila omahambelelo? (Eks. 15:1, 2; Eps. 105:2, 3; Eh. 15:3, 4)

    Oshiholelwa shini shokuhambelela Jehova Miriam naakiintu mboka ya li pEfuta Etiligane ya tulile po aakiintu Aakriste nena? (Eks. 15:20, 21; Eps. 68:12, KB)