Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 31: Moses naAaron Taa Yi kuFarao

Ehokololo 31: Moses naAaron Taa Yi kuFarao

SHO Moses a galukile kuEgipiti, okwa hokololele omumwayina Aaron ayihe kombinga yiikumithalonga mbyoka. Naashono Moses naAaron yu ulukile Aaisrael iikumithalonga mbika, aantu ayehe oyi itaale kutya Jehova oku li pamwe nayo.

Opo nduno Moses naAaron oya yi ya ka talele po Farao. Oya ti kuye: ‘Jehova Kalunga kaIsrael ota ti: “Etha oshigwana shandje shi ye omasiku gatatu, opo shi vule okugalikana ndje mombuga.” ’ Ihe Farao okwa yamukula: ‘Ngame inandi itaala muJehova. Noitandi ke etha Israel sha ye.’

Farao okwa li a geya, omolwashoka aantu oya li ya hala ya mone efudho pethimbo lyiilonga ya galikane Jehova. Ano okwe ya thiminike ya longe nokuli noonkondo adhihe. Aaisrael oya pe Moses uusama molweningwo lyawo lyonayi, naMoses okwa li a sa oluhodhi. Ihe Jehova okwe mu lombwele kaa nike uuthigwa. ‘Otandi ka thiminika Farao e ethe oshigwana shandje shi ye,’ Jehova osho a ti.

Moses naAaron ya thikama koshipala shaFarao

Moses naAaron oya yi ishewe kuFarao. Oshikando shino oya longo oshikumithalonga. Aaron oku umbile ondhimbo ye pevi, noya ningi eyoka. Ihe aalumentu aanongo yaFarao nayo oyu umbile oondhimbo dhawo pevi, nopwa holoka omayoka. Ihe tala! Eyoka lyaAaron otali li po omayoka gaalumentu aanongo. Natango Farao ina hala e ethe Aaisrael ya ye.

Ano ethimbo olya thikana kuJehova a longe Farao oshilongwa. Owa tseya kutya oshike ye a ningi po? Ye okwe eta omageelo nenge omaupyakadhi omanene 10 kuEgipiti.

Konima yomageelo gontumba, Farao okwa tumu kuMoses e ta ti: ‘Hulitha po egeelo, ngame notandi ke etha Aaisrael ya ye.’ Ihe sho egeelo lya hulu po, Farao okwa lundulula edhiladhilo lye. Ye ine etha nando oshigwana shi ye. Ihe lwahugunina, konima yegeelo eti-10, Farao okwa tumu Aaisrael ya ye.

Owa tseya tuu kehe limwe lyomomageelo 10 kutya olya li shike? Yanuna ko nou tale kutya oga li shike.

Eksodus 4:27-31; 5:1-23; 6:1-13, 26-30; 7:1-13.



Omapulo

  • Iikumithalonga mbyoka ya li ya longwa kuMoses naAaron oya li yi itaalitha Aaisrael shike?
  • Moses naAaron oya li ya lombwele Farao shike, na Farao okwa li a yamukula ngiini?
  • Ngaashi shu ulikwa mefano moka, oshike sha li sha ningwa po sho Aaron u umbile ondhimbo ye pevi?
  • Jehova okwa li a longo ngiini Farao oshiilongomwa, nongiini Farao a li i inyenge?
  • Oshike sha li sha ningwa po konima yegeyelo etimulongo?

Omapulo ga gwedhwa po

  • 1. Lesha Eksodus 4:27-31 nosho wo 5:1-23.

    Farao okwa li a hala okutya shike sho a ti: “Jehova kandi mu shi nandonando”? (Eks. 5:2, NW; 1 Sam. 2:12; Rom. 1:21)

  • Lesha Eksodus 6:1-13, 26-30.

    Omondunge yini Jehova a li ini ihololela Abraham, Isaak naJakob? (Eks. 3:13, 14; 6:3, NW; Gen. 12:8, NW)

    Otashi tu uvitha ngiini sho twa tseya kutya Jehova okwa li a longitha Moses nokuli nonando Moses okwa li e wete inaa gwana okulonga oshilonga she? (Eks. 6:12, 30; Luk. 21:13-15)

  • Lesha Eksodus 7:1-13.

    Sho Moses naAaron ya li ya lombwele Farao nuulaadhi shi na ko nasha nokupangulwa kuJehova, oshiholelwa shini ya tulile po aapiya Ye nena? (Eks. 7:2, 3, 6; Iil. 4:29-31)

    Jehova okwa li u ulike ngiini oonkondo dhe kiikalunga yaEgipiti? (Eks. 7:12; 1 Ondjal. 29:12)