Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 29: Molwashike Moses A Yi Ontuku

Ehokololo 29: Molwashike Moses A Yi Ontuku

TALA nkene Moses ta yi ontuku okuza muEgipiti. Oto vulu mbela okumona aalumentu mboka taye mu tidha? Owa tseya kutya omolwashike yo ya hala okudhipaga Moses? Natu tale ngele otatu vulu oku shi mona mo.

Moses ta yi ontuku

Moses okwa kokela megumbo lyaFarao, omupangeli gwaEgipiti. Ye okwa ningi omulumentu omunandunge noonkondo nokwa simana unene. Moses okwa li a tseya kutya ye ke shi Omweegipiti, ihe aakuluntu ye yolela oyo ya li aapika Aaisrael.

Esiku limwe, sho a li e na oomvula 40, Moses okwa tokola okuya a ka tale nkene oshigwana she shi li po. Yo oya li ya ningwa nayi oshitilithi. Ye okwa mono nkene Omweegipiti ta dhenge omupika Omwiisrael. Moses okwa lengalenga, naashono a mono kutya kapu na gumwe e mu wete, ye okwa dhenge Omweegipiti, Omweegipiti nokwa si. Opo nduno Moses okwa file olutu lwe mehekevi.

Esiku lya landula Moses okwa yi a ka talele po ishewe oshigwana she. Ye okwa li ta dhiladhila kutya ota vulu oku ya kwatha opo yaaha kale we aapika. Ihe ye okwa mono aalumentu yaali Aaisrael taa kondjo, ano Moses okwa ti kugumwe ngoka a li e na ondjo: ‘Omolwashike to dhengele omu-mwaho?’

Omulumentu okwa ti: ‘Olye e ku ningi omupangeli nomutokoli gwetu? Wa hala u dhipage ndje naanaa ngaashi wa dhipaga Omweegipiti ngwiyaka?’

Opo nduno Moses okwa tila. Okwa tseya kutya aantu oye shi mona shoka ye a ningile Omweegipiti. Nokuli Farao oku uvu kombinga yaashono nokwa tumu aalumentu ya ka dhipage Moses. Osho molwashono Moses a li e na okuya ontuku okuza muEgipiti.

Sho Moses a thigi po Egipiti, okwa yi kokule koshilongo shaMidian. Hoka ye okwa tsakanene nuukwanegumbo waJetro, nokwa hokana nagumwe gwomaakadhona ye Sipora. Moses okwa ningi omusita gwoonzi nokwa tonatele oonzi dhaJetro. Ye okwa kala uule woomvula 40 moshilongo shaMidian. Pethimbo ndyono ye okwa li e na oomvula 80. Opo nduno esiku limwe manga Moses a tonatele oonzi dhaJetro, oshinima oshikumithi osha ningwa po shoka sha lundulula onkalamwenyo yaMoses ayihe. Natu tale oshinima shika oshikumithi kutya oshike.

Eksodus 2:11-25; Iilonga 7:22-29.



Omapulo

  • Moses okwa kokele peni, ihe okwa li e shi shike kombinga yaakuluntu ye?
  • Moses okwa li a ningi shike sho e na oomvula 40?
  • Oshike Moses a li a lombwele omulumentu Omwiisrael ngoka a li ta dhenge omukwawo, nomulumentu okwa li a yamukula ngiini?
  • Omolwashike Moses a li a yi ontuku kuEgipiti?
  • Openi Moses a li a yi ontuku, nolye a li a tsakaneke hono?
  • Moses okwa li a ningi shike sho a li e na oomvula 40 konima sho a thigi po Egipiti?

Omapulo ga gwedhwa po

  • Lesha Eksodus 2:11-25.

    Moses okwa li u ulike ngiini uudhiginini kuJehova nokoshigwana she, nonando okwa kala uule woomvula ta longwa uunongo wAaegipiti? (Eks. 2:11, 12; Heb. 11:24)

  • Lesha Iilonga 7:22-29.

    Oshiilongomwa shini tatu vulu okwiilonga mokukambadhala kwaMoses okuhupitha oye awike Aaisrael muupika wAaegipiti? (Iil. 7:23-25; 1 Pet. 5:6, 10)