Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 27: Omukwaniilwa omwiinayi ta pangele muEgipiti

Ehokololo 27: Omukwaniilwa omwiinayi ta pangele muEgipiti

AALUMENTU mbaka otaya thiminike aantu ya longe. Tala komulumentu ngoka ta dhenge gumwe gwomaalongi nongola! Aalongi oyo aakwanezimo lyaJakob, noyi ithanwa Aaisrael. Naalumentu mboka taye ya thiminike ya longe oyo Aaegipiti. Aaisrael oya ningi aapika yAaegipiti. Ongiini shika sha ningwa?

Aagepiti taya hepeke Aaisraeli

Uule woomvula odhindji uukwanegumbo waJakob owa kala nombili muEgipiti. Josef, ngoka a li omulumentu a simana unene muEgipiti kakele komukwaniilwa Farao, okwa li e ya sile oshimpwiyu. Ihe opo tuu mpono Josef okwa si. Farao omupe, ngoka kee hole Aaisrael, nokwa ningi omukwaniilwa muEgipiti.

Ano Farao nguka omwiinayi okwa ningi Aaisrael aapika. Nokwa tula po aalumentu aawinayi naakwanyanya ye ya tonatele. Yo oya thiminike Aaisrael ya longe noonkondo okutungila Farao iilando. Ihe Aaisrael oya tsikile nokwiindjipala. Konima yokathimbo Aaegipiti oya tila kutya Aaisrael otayi indjipala noonkondo notaya nkondopala unene.

Aagepiti taya hepeke Aaisraeli

Owa tseya mbela shoka Farao a ningi po? Okwa popi naakiintu mboka haa kwathele aakulukadhi Aaisrael uuna taa mono aanona, nokwa ti: ‘Omu na okudhipaga okamati kehe taka valwa.’ Ihe oya li aakiintu aawanawa, yo inaya dhipaga uuhanona.

Ano Farao okwa lombwele oshigwana she ashihe: ‘Kutheni uuhanona uumati Uuisrael noku wu dhipaga. Uuhanona uukadhona auke u kale u na omwenyo.’ Mbela kasha li nando elombwelo enyanyalithi? Natu tale nkene kamwe komuuhanona uumati ka hupithwa.

Eksodus 1:6-22.



Omapulo

  • Omulumentu ngoka e na ongola mefano moka oye lye, nota dhenge lye?
  • Sho Josef a si, oshike sha li sha ningilwa Aaisrael?
  • Omolwashike Aaegipiti ya li ya tila Aaisrael?
  • Oshipango shini Farao a li a pe aakiintu mboka ya li ya kwathele okuvalitha aakiintu Aaisrael?

Omapulo ga gwedhwa po

  • Lesha Eksodus 1:6-22.

    Omomukalo guni Jehova a li a tameke okugwanithila Abraham euvaneko lye? (Eks. 1:7; Gen. 12:2; Iil. 7:17)

    Aavalithi Aaheberi oya li yu ulike ngiini kutya oya simaneka uuyapuki womwenyo? (Eks. 1:17; Gen. 9:6)

    Aavalithi oya li ya pewa ngiini ondjambi molwuudhiginini wawo kuJehova? (Eks. 1:20, 21; Omayel. 19:17)

    Satana okwa kambadhala ngiini okuya moshipala elalakano lyaJehova li na ko nasha nOluvalo lwaAbraham lwu uvanekwa? (Eks. 1:22; Mat. 2:16)