Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 23: Oondjodhi dhaFarao

Ehokololo 23: Oondjodhi dhaFarao

OOMVULA mbali otadhi piti po, naJosef natango onkene ngaa e li mondholongo. Omupindi omukuluntu ine mu dhimbulukwa. Opo nduno uusiku wumwe Farao ota yaguma oondjodhi mbali dhi ili lela, nokwa kumwa kutya otadhi ti shike. Ou mu wete mpano ta kotha? Ongula ya landula Farao oti ithanitha aalumentu ye aanandunge note ya hokololele iinima mbyoka ye a yaguma. Ihe yo itaa vulu oku mu fatululila oondjodhi dhe.

Lwahugunina omupindi omukuluntu opo ta dhimbulukwa Josef. Ye ota ti kuFarao: ‘Sho nda li mondholongo, omwa li omulumentu ngoka ha vulu okufatulula oondjodhi.’ Farao ota ka talitha mo Josef mondholongo mbalambala.

Farao ota hokololele Josef oondjodhi dhe: ‘Onda mono oonzinzi heyali dho ondoka noombwanawa. Opo nduno onda mono oonzinzi heyali dha nanga noombwinayi. Naandhoka dha nanga odha li po oonzinzi heyali ndhoka dho ondoka.

Farao ta tsu ondjodhi

‘Mondjodhi yandje ontiyali onda mono oonyapi heyali dha vala nawa dha mena moshihenguti shimwe. Opo nduno onda mono oonyapi heyali dha nanga nodha pela. Noonyapi dha nanga odha tameke okuninagula po oonyapi ndhoka heyali oombwanawa.’

Josef ota ti kuFarao: ‘Oondjodhi mbali odhi na eityo lya faathana. Oonzinzi dho ondoka heyali noonyapi heyali oombwanawa otashi ti oomvula heyali, noonzinzi heyali dha nanga noonyapi heyali dha nanga otashi ti oomvula heyali natango. Otapu ka kala oomvula heyali uuna iikulya oyindji tayi ka mena muEgipiti. Opo nduno otapu ka kala oomvula heyali uuna tamu ka mena iikulya iishona noonkondo.’

Ano Josef ota lombwele Farao: ‘Hogolola omulumentu omunandunge noku mu tula metonatelo lyokugongela iikulya pethimbo lyoomvula heyali oombwanawa. Opo nduno aantu itaa ka sa ondjala pethimbo lyoomvula heyali oondhigu tadhi ka landula sho tapu ka mena iikulya iishona.’

Farao edhiladhilo okwe li panda. Nota hogolola Josef a gongele iikulya, noku yi pungula miigandhi. Kakele kaFarao Josef ota ningi omulumentu a simana muEgipiti.

Konima yoomvula hetatu, pethimbo lyondjala onene, Josef ota mono aalumentu yontumba taye ya. Owa tseya kutya oyo oolye? Tala, oyo aamwahe aakuluntu 10! He yawo Jakob okwe ya tumu kuEgipiti oshoka iikulya yawo muKanaan oya li pokupwa po. Josef ota dhimbulula aamwahe, ihe yo itaye mu dhimbulula. Owa tseya kutya omolwashike? Osho molwashoka Josef okwa koka nokwa li a zala oonguwo dholudhi lumwe lwi ili.

Josef ota dhimbulukwa kutya sho a li okamati, okwa yagumine ondjodhi nkene aamwahe taye ya okwiisizimika kuye. Oto dhimbulukwa kutya owe shi lesha? Ano Josef ota vulu okumona kutya oye Kalunga ngoka e mu tumu kuEgipiti, nonetompelo ewanawa. Ngoye oto dhiladhila mbela kutya Josef ota ningi po shike? Natu tale.

Genesis 41:1-57; 42:1-8; 50:20.



Omapulo

  • Oshike sha li sha ningilwa Farao ongulohi yimwe?
  • Omolwashike omupindi lwahugunina a li a dhimbulukwa Josef?
  • Ngaashi shu ulikwa mefano moka, oondjodhi mbali dhini Farao a li a yaguma?
  • Josef okwa li a ti kutya oondjodhi otadhi ti shike?
  • Josef okwa li a ningi ngiini omulumentu a simana noonkondo muEgipiti a landula Farao?
  • Omolwashike aamwahe yaJosef ya li ye ya kuEgipiti, nomolwashike inaaye mu dhimbulula?
  • Ondjodhi yini Josef a li a dhimbulukwa, noya li ye mu kwathele okuuva ko shike?

Omapulo ga gwedhwa po

  • Lesha Genesis 41:1-57.

    Josef okwa li u ukitha ngiini eitulomo kuJehova, nomomukalo guni Aakriste nena taya vulu okulandula oshiholelwa she? (Gen. 41:16, 25, 28; Mat. 5:16; 1 Pet. 2:12)

    Ongiini omimvo dheloolo muEgipiti ndhoka dha li dha landulwa komimvo dhondjala tadhi ulike lelalela ekondjithathano pokati konkalo yopambepo yoshigwana shaJehova nena naandjoka yUukwakriste? (Gen. 41:29, 30; Amos 8:11, 12)

  • Lesha Genesis 42:1-8 nosho wo 50:20.

    Mbela osha puka kaalongeli yaJehova okutsila omuntu oongolo moku mu simaneka nosho wo okusimaneka ondondo ye ngele osho omukalondjigilile gwoshilongo shawo? (Gen. 42:6)