Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 20: Dina Ta Yi mUudhigu

Ehokololo 20: Dina Ta Yi mUudhigu

OU WETE mbono Dina ta yi a ka talele po? Ota yi a ka talele po yamwe yomaakadhona mboka ya kala moshilongo shaKanaan. He Jakob mbela okwa li ngaa e uvite enyanyu kombinga yaashino? Okuyamukula epulo ndino, kambadhala okudhimbulukwa shoka Abraham naIsaak ya li ya dhiladhila kombinga yaakiintu yomuKanaan.

Dina ta talele po aakadhona aakanaan

Mbela Abraham okwa li ngaa a hala omwanamati Isaak a hokane nomukadhona gwomuKanaan? Aawe, ka li a hala. Isaak naRebeka oya li ya hala tuu omwanamati gwawo Jakob a hokane nomukadhona Omukanaan? Aawe, kaya li ya hala. Owa tseya kutya omolwashike?

Osha li omolwashoka aantu mbaka yomuKanaan ohaya galikana iikalunga. Kaya li aantu aawanawa okukala oyo aalumentu aahokani naakiintu aahokanwa, nokaya li nando aantu aawanawa okukaliwa nayo oyo ookuume yopothingo. Ano otatu vulu okukala nuushili kutya Jakob ka li a nyanyukwa sho omwanakadhona a ningi uukuume naakadhona mbano Aakanaan.

Uushili owo kutya, Dina okwa yi muudhigu. Oto vulu mbela okumona omulumentu ngono Omukanaan mefano ngono ta tala kuDina? Edhina lye oSikem. Esiku limwe sho Dina a ka talela po hono, Sikem okwa kwata Dina nokwe mu thiminike ya lale naye. Shika osha li sha puka, molwashoka aalumentu naakiintu owala mboka ya hokana taa vulu okulala pamwe. Oshinima shika sha puka shoka Sikem a ningile Dina oshe eta uudhigu uunene.

Sho aamwayinamati yaDina yu uvu shoka sha ningwa po, oya li ya geya noonkondo. Yaali yomuyo, Simeon naLevi, oya li ya geya ngawo opo ihe oya yi nomagongamwele koshilando noya kwata aalumentu ye ya akele. Yo naamwayina aalumentu oya dhipaga Sikem naalumentu yalwe. Jakob okwa li a geya molwashoka oyanamati ya longo oshinima shika oshiwinayi.

Oshike sha li she etitha po uudhigu auhe mbuno? Osha li omolwashoka Dina a ningi uukuume naantu mboka inaaya vulika koompango dhaKalunga. Tse inatu hala ookuume ya tya ngawo, nenge hasho mbela?

Genesis 34:1-31.



Omapulo

  • Omolwashike Abraham naIsaak ya li inaaya hala aanona yawo ya hokane naantu yokoshilongo shaKanaan?
  • Mbela Jakob okwa li e shi hokwa sho omwana a ningi uukuume naakadhona yokuKanaan?
  • Omulumentu ngoka ta tala kuDina mefano moka oye lye, noshinima oshiiwinayi shini a li a ningi?
  • Aamwayinamati yaDina, Simeon naLevi, oya li ya ningi shike sho yu uvu shoka sha ningwa po?
  • Mbela Jakob okwa li e uvitile ombili shoka sha ningwa kuSimeon naLevi?
  • Uudhigu owa li wa tameke ngiini muukwanegumbo we?

Omapulo ga gwedhwa po

  • Lesha Genesis 34:1-31.

    Omolwashike Dina naye a li e na okupewa ondjo molwokukanitha uukadhona we? (Gal. 6:7)

    Ongiini aagundjuka nena tayu ulike kutya oyu uva ko oshiholelwa shaDina tashi londodha? (Omayel. 13:20; 1 Kor. 15:33; 1 Joh. 5:19)