Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 17: Aakwanambwiyu Mboka Ya Yoolokathana

Ehokololo 17: Aakwanambwiyu Mboka Ya Yoolokathana
Esau

AAMATI yaali mbaka oya yoolokathana noonkondo, hasho mbela? Owa tseya tuu omadhina gawo? Omukongo oye Esau, nomumati ngoka ta tonatele oonzi oJakob.

Esau naJakob oya li aamati aakwanambwiyu yaIsaak naRebeka. He yawo, Isaak, okwa li e hole Esau noonkondo, oshoka okwa li omukongo omwaanawa ngoka a li he eta iikulya kegumbo yokuliwa kaakwanegumbo. Ihe Rebeka okwa li e hole unene Jakob, oshoka okwa li omumati omumweni nomunambili.

Hekulu Abraham okwa li natango e na omwenyo, notatu vulu okudhiladhila owala nkene Jakob a kala nenyanyu oku mu pulakena omanga ye ta popi kombinga yaJehova. Lwahugunina Abraham okwa si muukokele woomvula 175, sho aakwanambwiyu ya li ye na oomvula 15.

Sho Esau a li e na oomvula 40, ye okwa hokana naakiintu yaali yokoshilongo shaKanaan. Shika osha nikitha Isaak naRebeka oluhodhi noonkondo, oshoka aakiintu mbaka kaya li haa galikana nando Jehova.

Opo nduno esiku limwe sha osha ningwa po shoka sha geyithitha Esau omumwayina Jakob noonkondo. Ethimbo olya li lya thikana kuIsaak okulaleka nuuyamba omwanamati omukuluntu. Molwashoka Esau okwa li omukuluntu kuJakob, Esau okwa li a tegelela a taambe elaleko nuuyamba ndika. Ihe Esau okwa li a landitha po nale uuthemba okutaamba elaleko nuuyamba kuJakob. Kalunga wo okwa popi nale pevalo lyaamati yaali kutya Jakob ota ka taamba elaleko nuuyamba. Naashoka osho sha ningwa. Isaak okwa gandja elaleko nuuyamba komwanamati Jakob.

Jacob

Konima sho Esau e shi uvu, ye okwa geyele Jakob noonkondo. Okwa li a geya ngaaka sho a ti kutya ye ota yi a ka dhipage Jakob. Sho Rebeka u uvu kombinga yaashino, okwa li a nika uuthigwa. Ano okwa lombwele omulumentu gwe Isaak: ‘Otashi ka kala oshinyanyalithi ngele Jakob naye wo okwa hokana nagumwe gwomaakiintu mbaka yokuKanaan.’

Opo tuu mpoka Isaak okwi ithana omwanamati Jakob nokwe mu lombwele: ‘Ino hokana nomukiintu gwokuKanaan. Pehala lyaashono inda kegumbo lyahokulu Betuel kuHaran. Hokana nagumwe gwomaakadhona yomwanamati Laban.’

Jakob okwa pulakene kuhe, nokwa tameke mbalambala okuya molweendo lwe olule okuya kaakwawo ya kala muHaran.

Genesis 25:5-11, 20-34; 26:34, 35; 27:1-46; 28:1-5; Aaheberi 12:16, 17.



Omapulo

  • Esau naJakob oya li oolye, nongiini ya li ya yoolokathana?
  • Esau naJakob oya li ye na oomvula ngapi sho hekulu Abraham a si?
  • Esau okwa li a ningi shike shoka sha li shu uvitha nayi noonkondo yina nahe?
  • Omolwashike Esau a li a geyela noonkondo omumwayina, Jakob?
  • Isaak okwa li a lombwele omwanamati Jakob a ninge shike?

Omapulo ga gwedhwa po

  • Lesha Genesis 25:5-11, 20-34.

    Jehova okwa li a hunganeke shike shi na ko nasha noyanamati yaali yaRebeka? (Gen. 25:23)

    Ekondjithathano lini lya li pokati kiikala yaJakob naEsau shi na ko nasha nuuthiga wuukuluntu? (Gen. 25:31-34)

  • Lesha Genesis 26:34, 35; 27:1-46; nosho wo 28:1-5.

    Okwaahe na olupandu lwiinima yopambepo kwaEsau okwa li ngiini kwi iwetikile? (Gen. 26:34, 35; 27:46)

    Opo Jakob a lalekwe nuuyamba kuKalunga, Isaak okwa li e mu lombwele a ninge shike? (Gen. 28:1-4)

  • Lesha Aaheberi 12:16, 17.

    Oshiholelwa shaEsau otashi ulike shike shi na ko nasha noshilanduliko shaamboka haya dhini iinima iiyapuki?