Inda koshikalimo

Inda koshikalimo

Oonzapo dhaJehova

Hogolola elaka Oshindonga

Ehokololo 15: Omukiintu gwaLot A Tala Konima

Ehokololo 15: Omukiintu gwaLot A Tala Konima

LOT nuukwanegumbo we oya kala pamwe naAbraham moshilongo shaKanaan. Esiku limwe Abraham okwa ti kuLot: ‘Kapu na mpaka oshilongo sha gwanena iimuna yetu ayihe. Alikana, tu topoke. Ngele ngoye to ka ya nombinga yimwe ngame otandi ka ya nonkwawo.’

Lot okwa tala oshilongo akuhe. Okwa mono oshitopolwa oshiwanawa unene shoshilongo shoka sha li shi na omeya nomwiidhi omwaanawa ogundji gwiimuna. Shika osha li Esilukuti lyaJordan. Ano Lot nuukwanegumbo we niimuna ye oya tembukile hoka. Lwahugunina oya ningi ehala lyawo lyokukala moshilongo shaSodom.

Aantu yomuSodom oya li aawinayi noonkondo. Shika oshu uvitha nayi Lot, oshoka ye okwa li omulumentu omwaanawa. Kalunga wo okwa li e uvite nayi. Lwahugunina Kalunga okwa tumu aayengeli okulondodha Lot kutya ye ota ka hanagula po Sodom noshilando shomuushiinda Gomorra molwuuwinayi wayo.

Aayengeli oya lombwele Lot: ‘Endelela! Kutha omukiintu gwoye naamwoyekadhona yaali nomu ze mo mehala ndika!’ Lot nuukwanegumbo we oya li taa kakadhala okuya, onkee ano aayengeli oye ya kwata moshikaha noye ya kutha mo moshilongo. Nopo nduno gumwe gwomaayengeli okwa ti: ‘Fadhukii po omolwoomwenyo dheni! Inamu tala konima. Matukileni koondundu, opo mwaa dhipagwe.’

Lot noyanakadhona oya vulika noya fadhuka po okuza muSodom. Yo inaa thikama nando oko okathimbo, noinaa tala konima. Ihe omukiintu gwaLot okwa li inaa vulika. Konima sho ya yi oshikako okuza muSodom, ye okwa thikama nokwa tala konima. Nopo nduno omukiintu gwaLot okwa ningi oshaanda shomongwa. Oto vulu mbela oku mu mona mpaka mefano?

Tse otatu vulu okwiilonga oshilongwa oshiwanawa mushika. Otashi tu ulukile kutya Kalunga oha hupitha mboka haa vulika kuye, ihe mboka itaa vulika kuye otaa ka kanitha oomwenyo dhawo.

Genesis 13:5-13; 18:20-33; 19:1-29; Lukas 17:28-32; 2 Petrus 2:6-8.

Lot ta zi muSodom


Omapulo

  • Omolwashike Abraham naLot ya li ya topoka?
  • Omolwashike Lot a li a hogolola okukala muSodom?
  • Aantu yomuSodom oya li ngiini?
  • Elondodho lini aayengeli yaali ya li ya pe Lot?
  • Omolwashike omukiintu gwaLot a li a shituka oshaanda shomongwa?
  • Oshiilongomwa shini tatu vulu okwiilonga moshinima shomukiintu gwaLot?

Omapulo ga gwedhwa po

  • Lesha Genesis 13:5-13.

    Shi na ko nasha nokukandula po omaupyakadhi pokati kaantu, oshiilongomwa shini tatu vulu okwiilonga kuAbraham? (Gen. 13:8, 9; Rom. 12:10; Fil. 2:3, 4)

  • Lesha Genesis 18:20-33.

    Ongiini okweendathana kwaJehova naAbraham taku tu pe einekelo kutya Jehova naJesus otaya ka pangula pauyuuki? (Gen. 18:25, 26; Mat. 25:31-33)

  • Lesha Genesis 19:1-29.

    Ehokololo lyOmbimbeli ndika otali ulike shike kombinga yetaloko lyaKalunga okutala ko uushenge? (Gen. 19:5, 13; Lev. 20:13)

    Eyooloko lini tu wete momikalo ndhoka Lot naAbraham ya li yi inyenge kewiliko lyaKalunga, noshike tatu vulu okwiilonga mwaashika? (Gen. 19:15, 16, 19, 20; 22:3)

  • Lesha Lukas 17:28-32.

    Iikala yomutima yini omukulukadhi gwaLot a li e na yi na ko nasha niinima yopamaliko, nongiini shoka shi li elondodho kutse? (Luk. 12:15; 17:31, 32; Mat. 6:19-21, 25)

  • Lesha 2 Petrus 2:6-8.

    Mokuholela Lot, iikala yetu oyi na okukala ya tya ngiini shi na ko nasha nuuyuni waa na Kalunga moka tu li? (Hes. 9:4; 1 Joh. 2:15-17)