Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 14: Kalunga Ta Makele Eitaalo lyaAbraham

Ehokololo 14: Kalunga Ta Makele Eitaalo lyaAbraham

OTO vulu mbela okumona shoka Abraham ta ningi mpaka? Ye oku na oshimbele, notashi monika a fa a hala okudhipaga omwanamati. Omolwashike mbela ye a hala okuninga oshinima sha tya ngawo? Tango, natu tale nkene Abraham naSara ya mono okamwanamati kawo.

Abraham ta gandja Isaak efikiloyambo

Dhimbulukwa, Kalunga okwe ya uvanekele kutya otaa ka mona okamati. Ihe osha li sha fa itaashi vulika, oshoka Abraham naSara oya li ya kulupa ngawo. Nonando ongawo, Abraham okwi itaala kutya Kalunga iha nyengwa kusha. Ano oshike sha ningwa po?

Konima sho Kalunga a ningi euvaneko lye, opwa piti uule womvula. Nopo nduno, sho Abraham a li e na oomvula 100 naSara oomvula 90, oya mono okahanona okamati kedhina Isaak. Kalunga okwa gwanitha euvaneko lye!

Ihe Isaak sho a koko, Jehova okwa makele eitaalo lyaAbraham. Ye okwi ithana: ‘Abraham!’ Abraham nokwi itaale: ‘Ongame nguka!’ Nopo nduno Kalunga okwa ti: ‘Kutha omumwoye, omumwoye epona, Isaak, e to yi kondundu ndjoka tandi ke ku ulukila. Dhipaga hoka omumwoye noku mu yamba oye eyambo.’

Alikana oohapu ndhika odha li dhe ehameke Abraham ngiini, oshoka Abraham okwa li e hole omwanamati noonkondo. Dhimbulukwa wo, Kalunga oku uvaneke kutya aanona yaAbraham otaya ka kala moshilongo shaKanaan. Ihe osha li tashi vulu okuningwa ngiini ngele Isaak okwa si? Abraham ka li e shi uvite ko, ihe natango okwa vulika kuKalunga.

Sho e ya pondundu, Abraham okwa manga Isaak nokwe mu tula kondjambelo ndjoka ye a tungu. Nopo nduno ta kutha mo oshimbele okudhipaga omwanamati. Ihe pokathimbo oko tuu hono omuyengeli gwaKalunga okwi ithana: ‘Abraham, Abraham!’ Abraham nokwi itaale: ‘Ongame nguka!’

‘Ino ehameka omumati nenge u mu ningile sha,’ Kalunga osho a ti. ‘Ngashingeyi onda tseya kutya owi itaala ndje, molwashoka ino indikila ndje omumwoye, epona lyoye.’

Alikana eitaalo oli thike peni Abraham a li e na muKalunga! Ye okwi itaala kutya kapwa li sha tashi vulu okunyenga Jehova, nonokutya Jehova ota vulu nokuli okuyumudha Isaak kuusi. Ihe Kalunga ka li a hala lelalela Abraham a dhipage Isaak. Ano Kalunga okwa patekenitha onzi moshihwa shimwe sha li popepi, nokwa lombwele Abraham oku yi yamba pehala lyomwanamati.

Genesis 21:1-7; 22:1-18.



Omapulo

  • Euvaneko lini Kalunga a li u uvanekele Abraham, nongiini Kalunga a li a gwanitha euvaneko lye?
  • Ngaashi shu ulikwa mefano moka, Kalunga okwa li a makele ngiini eitaalo lyaAbraham?
  • Abraham okwa li a ningi shike, nokuli nonando ka li u uvite ko etompelo lyoshipango shaKalunga?
  • Oshike sha li sha ningwa po sho Abraham a kutha mo oshimbele a dhipage omwana?
  • Eitaalo lyaAbraham muKalunga olya li lya kola shi thike peni?
  • Kalunga okwa li a pe shike Abraham osho a yambe po, nongiini?

Omapulo ga gwedhwa po

  • Lesha Genesis 21:1-7.

    Omolwashike Abraham a li a pititha omwana etanda mesiku etihetatu? (Gen. 17:10-12; 21:4)

  • Lesha Genesis 22:1-18.

    Isaak okwa li u ulike ngiini evuliko kuhe, Abraham, nongiini shoka sha li sha thaneke oshiningwanima shomonakuyiwa shi na unene oshilonga? (Gen. 22:7-9; 1 Kor. 5:7; Fil. 2:8, 9)