Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 13: Abraham—Kuume kaKalunga

Ehokololo 13: Abraham—Kuume kaKalunga

LIMWE lyomomahala moka aantu ya yi ya ka kale konima yEyelu olya li lyi ithanwa Ur. Olya ningi oshilando sha simana shi na omagumbo omawanawa musho. Ihe aantu mono oya li haa galikana iikalunga. Shika osho wo ya li ya ningi muBabel. Aantu yomuUr naBabel kaya li nando ngaashi Noa nomwanamati Sem, mboka ya li ya tsikile nokulongela Jehova.

Lwahugunina, oomvula 350 konima yeyelu, Noa omudhiginini okwa si. Osha li owala konima yoomvula mbali sho omulumentu ngoka u wete mefano ndika a valwa. Ye okwa li omuntu i ili lela kuKalunga. Edhina lye olya li Abraham. Ye okwa kala nuukwanegumbo we moshilando shaUr.

Abraham ta tala oonyothi

Esiku limwe Jehova okwa lombwele Abraham: ‘Thiga po Ur naakweni, na inda koshilongo shoka tandi ke ku ulukila.’ Mbela Abraham okwa vulika ngaa kuKalunga nokuthiga po omauwanawa agehe gomuUr? Eeno, ye osho a ningi. Nosha li molwashoka Abraham aluhe okwa li a vulika kuKalunga ye okwa tseyika ngashingeyi oye kuume kaKalunga.

Yamwe yomaakwanegumbo lyaAbraham oya yi pamwe naye sho a thigi po Ur, muyo omwa li he Tarah nomutekulu Lot. Nopwaa na omalimbililo, nomukiintu gwaAbraham Sara okwa yi wo pamwe nayo. Mepitathimbo yo ayehe oye ya pehala lyi ithanwa Haran, moka Tarah a sile. Oya li kokule naUr.

Konima yethimbo Abraham nuukwanegumbo we oya thigi po Haran noya yi koshilongo shi ithanwa Kanaan. Hoka Jehova okwa ti: ‘Shika osho oshilongo tandi ke shi pa aanona yoye.’ Abraham okwa kala muKanaan nokwa kala metsali.

Kalunga okwa tameke okukwatha Abraham opo a ninge uusita uunene woonzi niinamwenyo yilwe naapika omathele. Ihe ye naSara kaya li ye na aanona yawo yene.

Sho Abraham a li e na oomvula 99, Jehova okwa ti: ‘Otandi ku uvanekele kutya ngoye oto ka ninga he yaantu yiigwana oyindji.’ Ihe ongiini shika tashi vulu okuningwa, molwashoka Abraham naSara oya li pethimbo ndyono ya kulupa noonkondo okumona aanona?

Genesis 11:27-32; 12:1-7; 17:1-8, 15-17; 18:9-19.



Omapulo

  • Moshilando shaUr omwa li mwa kala aantu ya tya ngiini?
  • Omulumentu ngoka e li mefano moka oye lye, okwa valwa uunake nokwa li ha kala peni?
  • Jehova okwa li a lombwele Abraham a ninge shike?
  • Omolwashike Abraham a li i ithanwa kuume kaKalunga?
  • Oolye ya li ya yi pamwe naAbraham sho a zi muUr?
  • Jehova okwa li a lombwele Abraham shike sho a thiki koshilongo shaKanaan?
  • Euvaneko lini Jehova a li u uvanekele Abraham sho a li e na oomvula 99?

Omapulo ga gwedhwa po

  • Lesha Genesis 11:27-32.

    Abraham naLot oya li ya pambathana ngiini? (Gen. 11:27)

    Nonando otaku tiwa kutya Tarah okwa li a tembudhile uukwanegumbo we kuKanaan, otu shi shi ngiini kutya Abraham oye lela a li a katuka tango onkatu mokutembuka hoka, nomolwashike e shi ningile? (Gen. 11:31; Iil. 7:2-4)

  • Lesha Genesis 12:1-7

    Jehova okwa li a nenepeke ngiini ondjuvanena ye ndjoka a ninga naAbraham konima sho Abraham a thiki moshilongo shaKanaan? (Gen. 12:7)

  • Lesha Genesis 17:1-8, 15-17.

    Edhina lyaAbram olya li lya lundululwa li ninge lye sho a li e na oomvula 99, nomolwashike? (Gen. 17:5, OB-1986)

    Omalaleko nuuyamba gomonakuyiwa geni Jehova a li u uvanekele Sara? (Gen. 17:15, 16)

  • Lesha Genesis 18:9-19.

    MuGenesis 18:19, iinakugwanithwa yini ya tulilwa po ootate? (Deut. 6:6, 7; Ef. 6:4)

    Oshimoniwa shini shaSara tashi ulike kutya itatu vulu okuholeka sha Jehova? (Gen. 18:12, 15; Eps. 44:22 [44:21, OB-1986])