Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 9: Noa Ta Tungu Onguluwato

Ehokololo 9: Noa Ta Tungu Onguluwato
Aantu taya yolo Noa

NOA okwa li e na omukiintu noyana aamati yatatu. Omadhina goyana aamati oga li Sem, Ham, naJafet. Na kehe gumwe gwomaamati mbaka okwa li e na omukiintu. Ano uukwanegumbo waNoa owa li wa thikama maantu yahetatu.

Ngashingeyi Kalunga okwa longitha Noa oshinima inaashi tseyika nale. Okwe mu lombwele a tunge onguluwato onene. Onguluwato ndjika oya li onene ya fa osikepa, ihe oya li tayi monika unene ya fa oshiketha oshinene noshile. ‘Yi tunga oontala ndatu dha londathana,’ Kalunga osho a ti, ‘e to tula mo oondunda mudho.’ Oondunda odha li dhaNoa nuukwanegumbo we, dhiinamwenyo, nodhiikulya ayihe mbyoka tayi ka pumbiwa.

Kalunga okwa lombwele wo Noa a hote onguluwato opo omeya gaa ye meni. Kalunga okwa ti: ‘Ongame otandi ke eta eyelu enene nondi hanagule po uuyuni auhe. Ayehe mbono ya kala pondje yonguluwato, otaa ka sa.’

Noa noyana aamati oya vulika kuJehova noya tameke okutunga. Ihe aantu yalwe oya li owala taa yolo. Yo oya tsikile nokulonga uuwinayi. Nando gumwe a li i itaale Noa sho te ya lombwele shoka Kalunga ta ka ninga.

Uukwanegumbo waNoa tawu tula iinamwenyo niikulya monguluwato

Osha kutha ethimbo ele okutunga onguluwato oshoka oya li onene ngawo. Lwahugunina, konima yoomvula odhindji, yo oya pu. Ngashingeyi Kalunga okwa lombwele Noa e ete iinamwenyo monguluwato. Kalunga okwa ti komaludhi gamwe giinamwenyo oku na okweeta mo owala iyali, oshindume noshikadhi. Ihe komaludhi galwe giinamwenyo, Kalunga okwa lombwele Noa e ete mo iheyali. Kalunga okwa lombwele wo Noa e ete mo omaludhi agehe goondhila gi ili nogi ili. Noa okwa ningi naanaa ngaashi Kalunga a ti.

Konima, Noa nuukwanegumbo we nayo wo oya yi monguluwato. Opo nduno Kalunga okwe edhile omweelo. Meni, Noa nuukwanegumbo we oya tegelele. Idhiladhila owala ando u li pamwe nayo monguluwato wa tegelela. Eyelu oli ile ngaa shili mbela ngaashi Kalunga a ti?

Genesis 6:9-22; 7:1-9.



Omapulo

  • Uukwanegumbo waNoa owa li u na aantu yangapi, nomadhina goyana aamati yatatu oga li geni?
  • Kalunga okwa li a pula Noa a ninge shike inaashi tseyika nale, nomolwashike?
  • Aantu yalwe oya li yi inyenge ngiini sho Noa a li e ya lombwele kombinga yonguluwato?
  • Kalunga okwa li a lombwele Noa a ninge shike niinamwenyo?
  • Konima sho Kalunga e edhile omweelo gwonguluwato, Noa nuukwanegumbo we oya li ya ningi shike?

Omapulo ga gwedhwa po

  • Lesha Genesis 6:9-22.

    Oshike sha li sha ningitha Noa a kale omulongeli gwaKalunga kashili a dhenga mbanda? (Gen. 6:9, 22)

    Jehova ohu uvu ngiini shi na ko nasha nelongithonkondo, nongiini shoka shi na okuguma ehogololo lyetu lyomainyanyudho? (Gen. 6:11, 12; Eps. 11:5, NW)

    Ongiini tatu vulu okuholela Noa ngele tatu pewa omalombwelo okupitila mehangano lyaJehova? (Gen. 6:22; 1 Joh. 5:3)

  • Lesha Genesis 7:1-9

    Uushili kutya Jehova okwa li a tala ko omuntu inaa gwanenena Noa e li omuyuuki otau tu ladhipike nena ngiini? (Gen. 7:1; Omayel. 10:16; Jes. 26:7)