Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 6: Omumati Omwaanawa, naGumwe Omwiinayi

Ehokololo 6: Omumati Omwaanawa, naGumwe Omwiinayi

TALA ngashingeyi kuKain naAbel. Ayehe yaali oya koka. Kain okwa ningi omunamapya. Ye okwa meneke iilya niiyimati niikwamboga.

Kain naAbel taya ningile Kalunga omafikiloyambo

Abel okwa ningi omusita gwoonzi. Ye oku hole okutonatela uunzi uushona. Wo otau koko tau ningi oonzi oonene, onkene ano mbala Abel oku na uusita owindji woonzi okutonatela.

Esiku limwe Kain naAbel otaye eta omagano kuKalunga. Kain ote eta yimwe yomiikulya mbyoka ye a meneke. Abel note eta onzi ombwanawa lela. Jehova ota hokwa Abel nomagano ge. Ihe ita hokwa Kain nomagano ge. Owa tseya kutya omolwashike?

Hamolwashono owala omagano gaAbel omawanawa ge vule gaKain. Osho molwashono Abel omulumentu omwaanawa. Ye oku hole Jehova nomumwayina. Ihe Kain omwiinayi; ye ke hole nando omumwayina.

Ano Kalunga ota lombwele Kain kutya oku na okulundulula omikalo dhe. Ihe Kain ita pulakene nando. Ye okwa geye noonkondo omolwashoka Kalunga oku hole Abel unene. Ano Kain ota ti kuAbel: ‘Tu ye mokuti.’ Mwiyaka, sho ye li oyo ayeke, Kain ota dhenge omumwayina Abel. Ote mu dhenge ngawo a dhiginina kutya e mu dhipage. Shino kasha li mbela oshinima oshitilithi okulongwa kuKain?

Kain ta fadhuka po sho a dhipaga Abel

Nokuli nonando Abel okwa sa, Kalunga ote mu dhimbulukwa natango. Abel okwa li omwaanawa, na Jehova ita ka dhimbwa nando omuntu a tya ngawo. Ano esiku limwe Jehova Kalunga ota ka ninga ishewe Abel omunamwenyo. Pethimbo ndyoka Abel ita ka sa we nando. Ye ota ka vula okukala nomwenyo sigo aluhe mpaka kombanda yevi. Itashi ka kala mbela oshiwanawa okutseya aantu ya fa Abel?

Ihe Kalunga ita hokwa nando aantu ya fa Kain. Ano konima sho Kain a dhipaga omumwayina, Kalunga okwe mu geele moku mu tuma po kokule noshihupe shuukwanegumbo we. Sho Kain a yi oku ka kala moshitopolwa shilwe shevi, okwa kutha gumwe gwomaamwayina aakadhona a ye pamwe naye, nokwa ningi omukiintu gwe.

Mepitathimbo Kain nomukiintu gwe oya tameke okumona aanona. Aamati naakadhona yalwe yaAdam naEva oya hokana, nayo wo oya li ye na aanona. Mbala kombanda yevi okwa kala aantu oyendji. Natu ilonge kombinga yayamwe yomuyo.

Genesis 4:2-26; 1 Johannes 3:11, 12; Johannes 11:25.



Omapulo

  • Iilonga yini Kain naAbel ya li haya longo?
  • Kain naAbel oya li ye etele Jehova omagano gashike?
  • Omolwashike Jehova a li a hokwa omagano gaAbel, nomolwashike a li inaa hokwa ngoka gaKain?
  • Kain okwa li omuntu a tya ngiini, nongiini Jehova a li a kambadhala oku mu pukulula?
  • Kain okwa li a ningi shike sho ya li oyo ayeke nomumwayina mokuti?
  • Yelitha shoka sha li sha ningilwa Kain sho a dhipaga omumwayina.

Omapulo ga gwedhwa po

  • Lesha Genesis 4:2-26.

    Jehova okwa li a hokolola ngiini onkalo ya nika oshiponga moka Kain a li? (Gen. 4:7)

    Kain okwa li u ulike ngiini iikala yomomutima gwe? (Gen. 4:9)

    Jehova okwa tala ko ngiini okutilahi ombinzi kaayi na ondjo? (Gen. 4:10; Jes. 26:21)

  • Lesha 1 Johannes 3:11, 12.

    Omolwashike Kain a li a geya noonkondo, nongiini shoka shi li elondodho kutse nena? (Gen. 4:4, 5; Omayel. 14:30, OB-1986; 28:22)

    Ombimbeli oyu ulike ngiini kutya nokuli nonando iilyo yuukwanegumbo wetu ayihe oyi tu pataneke shi na ko nasha naJehova, tse otatu vulu okukala twa kakatela natango uudhiginini wetu? (Eps. 27:10; Mat. 10:21, 22)

  • Lesha Johannes 11:25.

    Jehova okwa gandja eshilipaleko lini li na ko nasha naayehe mboka taya si molwuuyuuki? (Joh. 5:24)