Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 3: Omulumentu nOmukiintu Yotango

Ehokololo 3: Omulumentu nOmukiintu Yotango

EYOOLOKO olyashike mefano muno? Eeno, olyo aantu mulyo. Oyo omulumentu nomukiintu yotango. Olye e ya shiti? Oye Kalunga. Edhina lye ou li shi? Olyo Jehova. Nomulumentu nomukiintu oyi ithanwa Adam naEva.

Adam naEva ye li moshikunino shaEden

Jehova Kalunga okwa shiti Adam ngaashi tashi landula: Okwa kutha ontsi mevi noku umbu nayo olutu lwu udhithwa, olutu lwomulumentu. Opo nduno okwa fudhile momayulu gomulumentu, Adam nokwa ningi omwenyo.

Jehova Kalunga okwa li e nine Adam iilonga. Okwa lombwele Adam a luke iinamwenyo ayihe yomaludhi gi ili nogi ili omadhina. Ngiika Adam okwa kala ethimbo ele ta tala iinamwenyo opo a vule okuhogolola omadhina omawanawa kuyo ayihe. Manga Adam a li ta luku iinamwenyo omadhina, ye okwa ndhindhilike sha. Ou shi kutya osha li shike?

Iinamwenyo ayihe oya li yi na ookuume. Opwa li ootatendjamba noomemendjamba, ootatenkoshi noomemenkoshi. Ihe Adam ka li e na gumwe ngoka ta ningi kuume ke. Ano Jehova okwa kotheke Adam oomposi oondhigu, nokwa kutha olupati moombati dhe. Mokulongitha olupati nduka Jehova okwa shitile Adam omukiintu, oye nokwa ningi omukiintu gwe.

Adam okwa li a nyanyukwa ngiini! Dhiladhila wo nkene Eva a li e na okukala e uvite okutulwa a kale moshikunino oshiwanawa sha tya ngeyi! Ngashingeyi oya li taa vulu okukala ye na aanona nokukala pamwe nayo melago.

Jehova okwa halele Adam naEva ya kale nomwenyo sigo aluhe. Ye okwa halele yo ya ninge evi alihe ewanawa ngaashi oshikunino shaEden. Adam naEva oya li ye na okukala ya nyanyukwa ngiini uuna taa dhiladhila kombinga yokuninga shika! Mbela ando ngoye owa halele tuu okulonga evi pamwe nayo li ninge oshikunino oshiwanawa? Ihe elago lyaAdam naEva inali kala olule. Natu taleni kutya omolwashike.

Eksodus 15:2, 3; Genesis 1:26-31; 2:7-25.



Omapulo

  • Efano lyomEhokololo eti-3 olya yooloka ko ngiini kefano lyomEhokololo eti-2?
  • Olye a shiti omulumentu gwotango, nedhina lyomulumentu ngoka olya li lye?
  • Iilonga yini Kalunga a li a pe Adam e yi longe?
  • Omolwashike Kalunga a li a kotheke Adam oomposi oondhigu?
  • Adam naEva oya li taya vulu okukala nomwenyo uule wethimbo li thike peni, niilonga yini Kalunga a li a hala ya longe?

Omapulo ga gwedhwa po

  • Lesha Eksodus 15:2, 3.

    Edhina lyaKalunga olye, nondondo yi ikalekelwa yini e na kombanda yevi? (Eks. 15:2, 3; Dan. 4:14 [4:17, OB-1986])

  • Lesha Genesis 1:26-31.

    Kalunga okwa shiti shike hugunina mesiku etihamano, nongiini oshishitwa shoka sha li sha yooloka ko kiinamwenyo? (Gen. 1:26)

    Esiloshimpwiyu lini Jehova a li a ningile aantu nosho wo iinamwenyo? (Gen. 1:30)

  • Lesha Genesis 2:7-25.

    Oshilonga shaAdam shokuluka iinamwenyo osha li sha kwatela mo shike? (Gen. 2:19)

    Genesis 2:24 ote tu kwathele ngiini okuuva ko nkene Jehova ha tala ko ondjokana, etopoko nehengathano? (Mat. 19:4-6, 9)