Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Ehokololo 1: Kalunga Ta Tameke Okushita Iinima

Ehokololo 1: Kalunga Ta Tameke Okushita Iinima

IINIMA iiwanawa mbyoka tu na oya za kuKalunga. Ye okwa shita etango oku tu pa uuyelele omutenya, nomwedhi noonyothi opo tse tu vule okukala tu na uuyelele uushona uusiku. Na Kalunga okwe tu shitile evi okukala ko.

Ihe etango, omwedhi, oonyothi nevi kaya li iinima mbyoka Kalunga a shiti tango. Ou shi shoka sha shitwa tango? Tango Kalunga okwa shiti aantu ye mu fa. Tse itatu vulu okumona aantu mbaka, ongaashi owala itaatu vulu okumona Kalunga. MOmbimbeli aantu mbano otayi ithanwa aayengeli. Kalunga okwa shiti aayengeli okukala pamwe naye megulu.

Omuyengeli gwotango ngoka Kalunga a shiti okwa li i ili noonkondo. Ye okwa li Omwana gwotango gwaKalunga, nokwa longo pamwe naHe. Ye okwa kwatha Kalunga okushita iinima yilwe ayihe. Ye okwa kwatha Kalunga okushita etango, omwedhi, oonyothi nosho wo evi lyetu.

Evi olya li lya fa peni nduno? Petameko hagumwe a li a vulu okukala kevi. Okwa li ku na owala efuta limwe enene lyomeya kombanda yevi alihe. Ihe Kalunga okwa halele aantu ya kale kevi. Ano ye okwa tameke oku tu longekidhila iinima. Ye okwa ningi po shike?

Tangotango evi olya li lya pumbwa uuyelele. Ano Kalunga okwa ningi uuyelele okuza ketango tau minikile kevi. Ye okwe li shiti opo pu vule okukala uusiku nomutenya. Konima Kalunga okwa ningitha po evi li ye kombanda yomeya gefuta.

Tango kakwa li sha kevi. Olya li tali monika lya fa efano ndyoka u wete mpaka. Kakwa li nando oongala nenge omiti nenge iinamwenyo. Kamwa li nando oohi dhasha mefuta. Kalunga okwa li natango e na iilonga oyindji okulongekidhila nawa lela aantu niinamwenyo evi opo ya kale kulyo.

Jeremia 10:12; Aakolossa 1:15-17; Genesis 1:1-10.

Evi sho lya li petameko


Omapulo

  • Mbela openi pwa za iinima ayihe mbyoka iiwanawa, noto vulu mbela okugandja oshiholelwa?
  • Kalunga okwa shiti shike tango?
  • Omolwashike omuyengeli gwotango a li i ikalekelwa?
  • Hokolola kutya evi olya li ngiini petameko. (Tala kefano.)
  • Kalunga okwa tameke ngiini okulongekidhila iinamwenyo naantu evi?

Omapulo ga gwedhwa po

  • Lesha Jeremia 10:12.

    Omaukwatya gaKalunga geni tagu ulikwa meshito lye alihe? (Jes. 40:26; Rom. 11:33)

  • Lesha Aakolossa 1:15-17.

    Onkandangala yini Jesus a dhana meshito, nongiini shoka shi na okunwetha mo etaloko lyetu oku mu tala ko? (Kol. 1:15-17)

  • Lesha Genesis 1:1-10.

    Olye a shiti evi? (Gen. 1:1)

    Oshike sha li sha ningwa po mesiku lyotango lyokushita? (Gen. 1:3-5)

    Hokolola shoka sha li sha ningwa po mesiku etiyali lyokushita. (Gen. 1:7, 8)