Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Embo lyandje lyomahokololo gOmbiimbeli

Embo Lyandje lyOmahokololo gOmbimbeli

Embo Lyandje lyOmahokololo gOmbimbeli
Jesus ta popi naanona

NDIKA olyo embo lyomahokololo goshili. Oga kuthwa membo enenenene muuyuni, Ombimbeli. Omahokololo otage ku pe ondjokonona yuuyuni okuza sho Kalunga a tameke okushita shu ukilila sigo okethimbo lyetu. Nokuli otaga hokolola kombinga yaashoka Kalunga u uvaneke okuninga monakuyiwa.

Embo ndika otali ku pe ondunge yetumwalaka lyOmbimbeli. Otali hokolola kombinga yaantu yomOmbimbeli niinima mbyoka yo ya ningi. Otali ulike wo etegameno enene lyomwenyo gwaaluhe meviparadisa ndyoka Kalunga a gandja kaantu.

Membo ndika omu na omahokololo 116. Go oga topolwa miitopolwa yi li ihetatu. Epandja petameko lyoshitopolwa kehe otali hokolola paufupi shoka tashi monika moshitopolwa moka. Omahokololo otaga holoka melandulathano moka iiningomwa ya ningwa mondjokonona. Shika otashi ku kwatha okwiilonga kutya uunake iiningomwa ya ningwa, mekwatathano niinima yimwe mondjokonona.

Omahokololo oga hokololwa melaka lya nathangwa. Oyendji yomune aanona aashona otamu ka vula oku ga lesha kune yene. Ne aakuluntu otamu ka mona kutya aanona yeni aashona otaa ka hokwa omahokololo ngaka oku ga leshelwa noku ga leshululilwa ishewe. Ne otamu ka mona kutya embo ndika olya kwatela mo oshindji shi hokitha kaanona nosho wo kaakulupe.

Omaulikilo gOmbimbeli oga gandjwa kehulilo lyehokololo kehe. Ne otamu ladhipikwa okulesha iitopolwa mbika yOmbimbeli hoka omahokololo ga kankamena. Ngele wa mana okulesha ehokololo, tala wo omapulo gekonakono gehokololo ndyoka, ngoka taga adhika konima yEhokololo 116 nokukambadhala oku ga monena omayamukulo.

Iitothwamo yOmbimbeli membo ndika inayi kuthwa oshitya noshitya. Oya tulwa melaka lya nathangwa opo aanona aashona ya vule oku li uva ko. Omanyolo kehulilo lyehokololo kehe otagu ulike mpoka ehokololo ndyoka lya za mOmbimbeli. Kakele kaambyoka yu ulikwa shimwe shi ili, iitothwamo yOmanyolo membo ndika oya kuthwa mOmbimbeli yOshindonga yomo 1954 noyomo 1986 (OB-1954, OB-1986), nomOmbimbeli yOshikwanyama (KB). Mpoka NW ya landula oshitothwamo, otashi ulike kutya etoloko olya ningwa okuza moNew World Translation of the Holy Scriptures—With References melaka lyOshiingilisa.