Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo  |  No. 1 2016

 AALESHI YOSHIFO SHETU TAYA PULA . . .

Iinima oyindji yini ya puka hayi ningwa poKrismesa?

Iinima oyindji yini ya puka hayi ningwa poKrismesa?

Okuza nale Aakriste oya kala haya dhana Okrismesa, taya ti kutya otaya dhana evalo lyaJesus. Iinima mbyoka hayi ningwa pOkrismesa ohayi tu ningitha tu kale tatu ipula kutya oshe ende ngiini yi kale yi na ekwatathano nevalo lyaJesus.

Oshinima shotango, opu na omahokololo giifundja kombinga yaFather Christmas, omusamane e na oombenzi oontokele, a zala oonguwo oontiligane noha kala aluhe ta yolo. Okwa tseyika nawa he shi pondola momatseyitho giipindi ngoka ga li haga ningilwa ehangano lyokuhanga iikunwa moAmerika lyokuumbangalantu pOkrismesa mo 1931. Mo 1950 nasha Aabrasilia yamwe oya kambadhala okupingena po Father Christmas nomusamane gumwe a tseyika nawa Grandpa Indian. Mbela oya pondola ngaa? Father Christmas okwa li a pondola okukala a simana e vule Grandpa Indian. Omuprofesoli Carlos E. Fantinati okwa ti: “Okwa kala wo a simana e vule okanona Jesus, nokwa kala oye ha simanekwa mo 25 Desemba.” Mbela omahokololo giifundja kombinga yaFather Christmas ogo owala ge li uupyakadhi wu na ko nasha nOkrismesa? Opo tu mone eyamukulo, natu tale kwaashoka sha li hashi ningwa kAakriste yonale.

O-Encyclopedia Britannica oya ti: “Momukokomoko gwoomvula 200 sho Uukwakriste wa tameke, opwa li pwa holoka oontamanana dha kwata miiti dhi na ko nasha nomasiku gomavalo gaamboka ya dhipagwa molweitaalo lyawo, mwa kwatelwa nevalo lyaJesus.” Omolwashike mbela? Aakriste oya li ya tala ko okudhana omavalo ku li omukalondjigilile gwoshipagani, noya li yu uvite kutya kaye na okukutha ombinga mugo. Shimwe ishewe, Ombiimbeli inayi popya esiku ndyoka Jesus a valwa.

Oomvula dhi vulithe 300 lwaampono konima yeso lyaJesus, ongeleka yaKatoolika oya li ya toto po Okrismesa, nonando Aakriste yonale oya li ompinge nomukalondjigilile gwoku yi dhana. Ongeleka oya li ya hala yi kale ya tseyika apuhe, yi vule okunwetha mo aantu oyendji, yo yi kuthe po oshinima shoka tashi yi imbi yi hume komeho. Kaya li ya hala omalongelokalunga goshipagani gaRoma niituthi mbyoka haga dhana pethimbo lyokufu, yi kale ya tseyika nawa apuhe. Embo lyedhina Christmas in America, lya nyolwa kuPenne L. Restad olya ti kutya omumvo kehe okuza 17 Desemba sigo 1 Januali, “Aaroma oyendji oya li haya li nohaya nu, haya kutha ombinga momaudhano, haya endaenda momapandaanda nohaya dhana wo iituthi yilwe ya simaneke iikalunga yawo.” Mo 25 Desemba, oya li haya dhana oshituthi shevalo lyetango. Ongeleka yaKatoolika sho ya toto po Okrismesa mesiku ndyoka, oya heke Aaroma oyendji ya kale haya dhana evalo lyaJesus pehala lyokudhana evalo lyetango. Embo lyedhina Santa Claus, a Biography, lya nyolwa kuGerry Bowler olya ti kutya Aaroma “oya li natango haya vulu okunyanyukilwa iituthi mbyoka hayi dhanwa pethimbo lyokufu.” Nonando ongawo, “osha yela kutya oya li natango haya dhana iituthi yoshipagani.”

Osha yela kutya shoka tashi ningitha Okrismesa yi kale ya puka osho kutya oya za komikalondjigilile dha nyata. Embo lyedhina The Battle for Christmas, lya nyolwa kuStephen Nissenbaum olya ti kutya Okrismesa “oya totwa po owala yi heke Aakriste ya dhane oshituthi shaapagani.” Onkee ano, Okrismesa itayi simanekitha nando Kalunga nOmwana, Jesus Kristus. Mbela oshi na ngaa uupyakadhi uuna tatu kutha ombinga miituthi yoshipagani? Ombiimbeli otayi pula tayi ti: “Shoka shi li mondjila naashoka sha puka, otayi vulu ngiini okukala kumwe? Uuyelele nomilema otayi vulu ngiini okukala mumwe?” (2 Aakorinto 6:14) Ngele omuti ogwa mene gwe endama, itagu vulu we okuukililithwa. Sha faathana, Okrismesa oya za komalongelokalunga giifundja noinayi hokiwa kuKalunga. Ombiimbeli otayi ti: “Shoka sha goyoka, itashi vulu okuuthwa.” — Omuuvithi 1:15.