Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo  |  Novomba 2015

 ONDJOKONONA

Nda mono sha shi vule esimano

Nda mono sha shi vule esimano

Ongulohi yimwe momumvo 1984, onda zi konima yesiga nondi iningile edhina. Onda zalekwa oshishani shokakadhona dhingi moHong Kong. Ethano lyandje olya li tali monika kombanda yiifo nosho wo yiifokundaneki. Onda kala handi imbi, handi ndanisa, handi popi komeho gaantu, nohandi kwatele komeho oopolohalama ko-TV. Onda li wo handi zala oonguwo tadhi fuula. Kanda li we handi topoka naanenentu, unene tuu ngoloneya gwaHong Kong.

Momumvo 1985 onda tameke okudhana oomuvi, nodhindji, ongame tandi dhana onkandangala. Esiku nesiku iikundaneki oya hala owala oku uva sha kungame. Yo aathaneki ongame ngaa taya kongo ya thaneke. Uuna pu na sha tashi egululwa, natango ongame ngaa tandi pulwa. Ngele tashi ya piitendele ya simana, kanda li handi thigwa ko. Kehe pamwe, ongame owala Kamana kaNdongo.

Mina ta dhana omuvi

Petameko onda li ndi wete uuyuni nde wu lala, ihe lwanima onda ka mona kutya nani hasho. Onda li handi dhana oomuvi dha nika oshiponga. Aanyandi yoomuvi moshilongo shetu ihaya longitha omikalo ndhoka hadhi longithwa olundji kaanyandi yoomuvi mo-Hollywood. Onkee onda li nda toto po omikalo dhandje mwene ndi igamene, ngaashi ngele nda fa tandi hingi omota tayi nuka oshihauto. Onda dhana oomuvi odhindji tadhi humitha komeho ohole yiipala, elongithonkondo nosho wo uumpulile.

Onda hokanwa komutoti gwoomuvi mo 1995. Nesimano lyandje kothingo, onda li nda polimana nonda lulilwa. Onda li omuyamba nondi na omusamane ngoka e hole ndje. Iinima mbyoka pakutala otayi vulu oku etela omuntu enyanyu, ihe ngame inayi li etela ndje. Osho nda tokola ndi ethe po okudhana oomuvi.

ONDA DHIMBULUKWA EITAALO LYANDJE

Osho nda dhimbulukwa eitaalo lyandje sho nda li okanona. Ngame nokamwamemekadhona otwa li hatu talele po egumbo lyatate Joe McGrath. Yo Oonzapo dhaJehova, natate Joe okwa li ha lesha natse Ombiimbeli pamwe noyanakadhona yatatu. Aanegumbo ye ayehe oye holathane noye hole aantu. “Tate Joe” okwa li e hole omukulukadhi gwe noyana. Onda li ndi hole okuya nayo kokugongala kwawo. Omathimbo gamwe otwa li hatu yi pamwe nayo kiigongi yawo iinene. Sigo onena ohandi shi dhimbulukwa. Shampa ndi li nOonzapo, ohandi kala ndu uvite nda gamenwa.

Maandjetu onda li ha ndi tala omalwa. Meme okwa li ha kala ta lili olundji, sigo a polimana nokuli. Shoka she etitha ayihe mbika, iikala yatate. Sho ndi na oomvula  omulongo lwaampono, meme kali we he endathana nOonzapo dhaJehova. Ngame onda tsikile ngaa nonando kanda li we ndi itula mo nawa. Onda ninginithwa mepipi lyoomvula 17. Ihe konima owala yokathimbo, onda kondwa mo megongalo omolweihumbato lyandje ewinayi.

ONDA TOKOLA NDI GALUKILE KEGONGALO

Konima owala sho nda hokanwa, aakuluntugongalo yaali, yOonzapo dhaJehova megongalo moka nda li, oye ya okutalela ndje po. Oya yelithile ndje shoka ndi na okuninga ndi galukile megongalo. Oya ningi elongekidho, opo omumwameme pambepo Cindy a kwathele ndje. Pethimbo mpono, onda adhika nda kanitha eitaalo thiluthilu. Onkee ano, onda li nda pula omumwameme Cindy a shilipaleke ndje kutya Ombiimbeli oyi li shili Oohapu dhaKalunga. Oku ulukile ndje nkene omahunganeko gOmbiimbeli ga kala taga gwanithwa. Kashona nakashona, okwa ningi kahewa kandje kopothingo. Okwa pula ndje tu zuulule ko ishewe tatu konakona Ombiimbeli naye, e tandi zimine. Opo ihe onde shi koneke lwotango kutya nani Jehova oku li Kalunga omunahole, nokwa hala ndi kale ndi na ombili yokomwenyo.

Sho nda tameke okuya kokugongala kwOonzapo dhaJehova, onda kala handi ku nyanyukilwa unene shi vulithe okukala pamwe naantu mboka hatu dhana nayo oomuvi. Ihe onda li nda kanitha einekelo maantu yalwe noka nda li we ndi isimaneka. Oshike she etitha omaiyuvo ngano? Eputuko lyandje, megumbo lyaahe na ombili. Onda li nda kwathelwa komumwameme gumwe megongalo. Oku ulukile ndje mOmbiimbeli nkene ndi na okuungaunga nomaiyuvo ngoka. Ondi ilongo wo okukala ndi inekela aantu ooyakwetu.

NDA MONO SHA SHI VULE ESIMANO

Otwa tembukile koAmerika momumvo 1997 pamwe nomusamane gwandje. Sho tu li hono, onda tameke okukwathela unene aantu ya mone uuwanawa mboka wu li mOohapu dhaKalunga. Okulonga aantu Ombiimbeli okwe etele ndje ombili, shi vulithe okudhana oomuvi. Mo 2002, onda tsakanene nomukiintu gwedhina Cheri, ngoka tu shaathane naye okuza koHong Kong. Tse naye otwa pita moonkalo dha faathana monkalamwenyo. Cheri okwa li okakadhonadhingi moHong Kong mo 1983. Oye nokuli a li a zaleke ndje oshishani sho nda sindana. Okwa ka dhana wo oomuvi nokonima yethimbo okwa ningi omutoti gwadho. Okwa kala ha longo pamwe naanamadhina oyendji, ihe nani naye okwa ka tembukila koAmerika.

Onda li ndi uvitile Cheri uukwawo wanankali sho ndu uvu kutya omuyaleki gwe okwa si eso lyombadhilila kethikamo lyomutima. Ina mona ehekeleko lyasha meitaalo lyOshibuddha moka e li. Aantu ohaya kala ye mu tsila ondumbo omolwesimano lye, ihe ye ka li e na ombili noka li i inekela nando omuntu gumwe, ngaashi ngame nda li. Onda tameke oku mu lombwela shoka ndi ilonga mOmbiimbeli. Ihe osha li oshidhigu kuye okwiitaala shoka tandi mu lombwele omolweitaalo lye.

Kahewa kandje, Cheri e li moonguwo dhomuvi

Esiku limwe, mo 2003, Cheri okwa dhengele ndje e li moKanada moka a li ta toto ofilima. Okwa popi a nyanyukwa ta lombwele ndje kutya ota hingi, nokwa fuulwa kiitopolwa yokuushayi moshilongo shoka. Okwa tameke okugalikana mokule e li oye awike ta ti: “Lombwela ndje kutya Kalunga kashili olye? Edhina lyoye olye?” Konima yokathimbo okwi itsu metungo lya nyolwa Oshinyanga shUukwaniilwa, hoka a mono edhina Jehova. Cheri okwa li u uvite kutya Kalunga oye a yamukula egalikano lye, nokwa li a hala okumona Oonzapo dhaJehova  nziya. Onda ningi omalongekidho, nomuule womasiku omashona, Cheri okwa yi kokugongala kwadho melaka lyOshichiina mondolopa yedhina Vancouver, moKanada.

Konima yethimbo Cheri okwa lombwele ndje ta ti: “Aantu mbaka oye na ko nasha lela nangame. Ohandi vulu oku ya lombwela omaiyuvo gandje.” Meme Mina okwa li a nyanyukwa sho e shi uvu, molwaashoka pethimbo sho Cheri ha dhana oomuvi ina panga nando uukuume nomuntu. Cheri okwa tsikile nokugongala. Momumvo 2005, Cheri okwa li a shaina euvathanotsokumwe a ka tote oofilima mbali dha dhenga mbanda moChina. Opo e shi ninge, okwa li e na okushuna koHong Kong. Manga e li hoka, Cheri okwi iyapulile Jehova mo 2006 nokwa ninginithwa poshigongi shOonzapo dhaJehova moHong Kong. Okwa kala a hala okulongitha ethimbo lye olindji mokulongela Jehova. Mbela oshike sha li tashi mu imbi? Iilonga yokuninga oomuvi mbyoka inaayi mu etela ombili yasha.

OKUKWATHELA YALWE OKWE ETELA NDJE ENYANYU

Mo 2009 meme Cheri okwe etha po okudhana oomuvi, opo a longela Kalunga ke ethimbo olindji. Okwa panga uukuume naantu oyendji megongalo. Olundji okwa kala hu uvithile yalwe onkundana ombwanawa yUukwaniilwa waKalunga. Okwe li a mono enyanyu enene shili, sho tu uvithile aantu. — Mateus 24:14.

Cheri okwa tameke okwiilonga elaka lyOshinepala, hali popiwa moChina, opo a kwathele ongundu yaapopi yelaka ndyoka megongalo, mboka ye li moHong Kong. Aanepala oya dhinika nokaye niwe nayo, shashi ihaya popi nawa Oshiingilisa nenge Oshichiina. Dho noonkuluhedhi dhawo odhi ili lela. Cheri okwa hokololele meme Mina nkene hashi mu nyanyudha sho ta kwathele Aanepala ya tseye Ombiimbeli. Esiku limwe sho Cheri tu uvitha egumbo negumbo, okwa adha omukulukadhi Omunepala ngoka e shi owala kashona kombinga yaJesus, ihe ke na sho u uva kombinga yaKalunga kashili, Jehova. Cheri okwe mu ulukile mOmbiimbeli kutya Jesus okwa li ha galikana kuHe ngoka e li megulu. Sho omukulukadhi u uvu kutya ota vulu okugalikana kuKalunga kashili, Jehova, okwa li a halelela okupulakena onkundana ombwanawa. Omusamane gwe nokamwanakadhona nayo wo oya pula ya longwe Ombiimbeli. — Eksodus 15:3, OB-1954; Lukas 22:41, 42.

Cheri kunena

Sho ndu uvu Cheri hu uvitha ethimbo olindji, ondi ipula te ti: ‘Oshike tashi imbi ndje nangame ndi ninge?’ Pethimbo mpoka nangame onda adhika nda galukila moHong Kong. Onda ningi omalunduluko monkalamwenyo yandje, opo ndi longithe ethimbo lyandje olindji tandi longo aantu oshili yOmbiimbeli. Onde shi mona kutya okukala tandi popi naantu noku ya kwathela ya tseye Ombiimbeli, ohashi nyanyudha ndje lela.

Onde shi mona kutya okukala tandi popi naantu noku ya kwathela ya tseye Ombiimbeli, ohashi nyanyudha ndje lela

Pashiholelwa, onda kwathela wo omukulukadhi Omuvietnam ngoka a li a kanitha ombili noku na aluhe oshizimbi komwenyo. Ngashingeyi omunambili noku hole okugongala pamwe natse.

Ngame naCheri otwa mona sha shoka shi vule esimano ndyoka twa li tu na. Sho hatu dhana oomuvi otwa li hatu li oshimwenyo notwi iningile omadhina. Ihe sho tatu longo aantu Ombiimbeli kombinga yaJehova Kalunga ohashi tu nyanyudha, molwaashoka otashi mu simanekitha. Oohapu dhaJesus ndhoka tadhi ti: “Okugandja oku na elago ku vule okutaamba,” odhe tu gwanithilwa shili. — Iilonga 20:35.