Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo  |  Septemba 2015

 IITOPOLWA YI IKOLELELA KOSHIPALANYOLO SHOKOMBANDA | AASI OTAYA KA YUMUKA NGAA?

Oonakusa oye na ngaa etegameno lyasha?

Oonakusa oye na ngaa etegameno lyasha?

Mbela aasi otaya ka yumuka ngaa?

SHOKA OMBIIMBELI TAYI TI: “Ethimbo otali ya, uuna oonakusa ayehe mboka ye li moombila, taa ka uva ewi [lyaJesus]. Yo notaa ka za mo.” — Johannes 5:28, 29.

Jesus okwa li ta popi kombinga yonakuyiwa, uuna Uukwaniilwa we tawu pangele, kutya oombila otadhi ka kala owala. Fernando ngoka a tumbulwa moshitopolwa sha tetekele okwa ti: “Oshikando shotango nda lesha Johannes 5:28, 29 onda li nda kumwa. Enyolo ndyoka olya li lya pe ndje etegameno lyashili e tandi tameke okudhiladhila kombinga yonakuyiwa ndi na omukumo.”

Job, omulumentu omudhiginini gwonale, okwa li e na einekelo kutya ngele a si Kalunga ote ke mu yumudha. Okwa pula a ti: “Omuntu ngele okwa si, ota kala ishewe e na omwenyo?” Okwa zimine e na einekelo a ti: “Momasiku guudhigu wandje [sho ndi li mOshaasi] otandi tegelele, sigo emanguluko lyandje lya thiki. Oto ka ithana ndje notandi ku itaale.” —  Job 14:14, 15.

Eyumuko lyaLasarus otali tu pe etegameno lyonakuyiwa

Marta, omumwayina gwaLasarus, naye okwa kala e shi kutya oku na eyumuko. Sho Lasarus a si, Jesus okwa lombwele Marta a ti: “Omumwanyoko ota ka yumuka.” Marta okwa ti: “Ondi shi shi kutya ota ka yumuka mesiku lyahugunina.” Opo nduno Jesus okwe mu lombwele a ti: “Ongame eyumuko nomwenyo. Oongoka i itaala ndje, ota kala e na omwenyo, nando ona se.” (Johannes 11:23-25) Konima yaashono, Jesus okwa yumudha nziya Lasarus. Ehokololo ndyoka linyanyudha otali tu ulukile kutya monakuyiwa otamu ka ningwa iiningwanima iikumithi. Dhiladhila owala nkene tashi ka kala sho aantu taya ka yumudhwa kongonga yevi alihe!

Opu na mbela yamwe mboka taya ka yumudhwa ya ye megulu?

SHOKA OMBIIMBELI TAYI TI: Oohapu dhaKalunga otadhi tu lombwele kutya eyumuko lyaJesus olya yooloka ko komayumuko galwe gahetatu ngoka ga popiwa mOmbiimbeli. Aantu yahetatu mboka ya yumudhilwe oya kala nomwenyo kombanda yevi. Ihe otatu lesha kombinga yeyumuko lyaJesus taku ti: ‘Jesus Kristus oku li kolulyo lwaKalunga megulu.’ (1 Petrus 3:21, 22) Mbela Jesus oye owala awike a yumudhwa a kale nomwenyo megulu? Jesus okwa li a lombwele aayapostoli ye a ti: ‘Ngele nda yi e tandi mu longekidhile ehala, otandi ka galuka ishewe, ndi mu ile, opo mu ka kale wo nkoka ndi li.’ —  Johannes 14:3.

 Kristus okwa yi megulu a ka longekidhile aalongwa ye ehala. Mboka taya yumudhwa ya ka kale nomwenyo megulu oye li 144 000. (Ehololo 14:1, 3) Mbela aalanduli yaJesus mboka yopothingo otaya ka ninga shike megulu?

Otaya ka longa mo oshilonga sha simana. Ombiimbeli otayi ti: “Aanelago naalalekwa nuuyamba oomboka taa mono ompito yokuyumudhwa meyumuko ndika lyotango. Eso etiyali itali vulu nando oku ya pangela, ihe otaa ka ninga aayambi yaKalunga noyaKristus notaa ka pangela pamwe naKristus uule woomvula eyovi limwe.” (Ehololo 20:6) Mboka taya ka yumudhwa oku ka kala megulu otaya ka pangela ombanda yevi pamwe naKristus ye li aakwaniilwa naasaaseri.

Oolye ishewe taya ka yumudhwa?

SHOKA OMBIIMBELI TAYI TI: Oohapu dhaKalunga otadhi ti: “Ondi na wo etegameno limwe pamwe nayo kutya Kalunga ota ka yumudha aantu ayehe kuusi, naawanawa naawinayi.” —  Iilonga 24:15.

Oohapu dhaKalunga otadhi tu shilipaleke kutya aantu omamiliyona ogendji mboka ya sa nale otaya ka kala ishewe nomwenyo

Aantu ‘aawanawa’ mboka taya popiwa kuPaulus oyo oolye? Tala koshiholelwa tashi landula. Omulumentu omudhiginini, Daniel, okwa li a lombwelwa lwopehulilo lyonkalamwenyo ye taku ti: “Oto ka sa, ihe oto ka yumukila okutaamba oshipewa shoye pehulilo lyomasiku.” (Daniel 12:13) Daniel ota ka yumuka a ka kale peni? Ombiimbeli otayi ti: “Aayuuki otaa ka thigulula evi e taa kala mo sigo aluhe.” (Episalomi 37:29) Jesus okwa hunganeka a ti: “Aanelago oomboka aayifupipiki, oshoka oyo taa ka thigulula evi.” (Mateus 5:5) Daniel nosho wo aalumentu naakiintu aadhiginini otaya ka yumudhwa ya kale ishewe nomwenyo kombanda yevi sigo aluhe.

Oolye ya kwatelwa mongundu yaamboka Paulus i ithana ‘aawinayi’? Aantu omamiliyona ogendji mboka ya li ko e taya si, ihe inaya mona nando onale ompito yokuuva oshili yOmbiimbeli noku yi tula miilonga. Uuna ya yumudhwa, otaya ka longwa kombinga yaJehova naJesus notaye ke ya tseya. * (Johannes 17:3) Ayehe mboka ya hala okulongela Kalunga otaya ka gamenwa ya kale nomwenyo sigo aluhe.

Ayehe mboka ya hala okulongela Kalunga oye na etegameno lyokukala nomwenyo sigo aluhe ye na uukolele nombili

Onkalo otayi ka kala ya tya ngiini kombanda yevi?

SHOKA OMBIIMBELI TAYI TI: ‘Kalunga ota ka theta po omahodhi agehe momeho gawo. Oko noitaku ka kala we eso, oluhodhi, elilo nenge uuwehame.’ (Ehololo 21:4) “Otaa ka tunga omagumbo, opo ya kale mo yo yene. Otaa ka tsika omiviinu, opo ya lye iiyimati yadho yo yene.” —  Jesaja 65:21.

Dhiladhila ando wu li monkalo ya tya ngawo pamwe naantu mboka wu hole ya yumuka. Ihe oto shi tseya ngiini kutya eyumuko otali ka ningwa shili?

^ okat. 15 Jehova olyo edhina lyaKalunga ndyoka tali adhika mOmbiimbeli.

Tseya oshindji

ONKUNDANA OMBWANAWA YA ZA KUKALUNGA

Elalakano lyaKalunga li na ko nasha nevi olini?

Ombiimbeli otayi yelitha elalakano lyaKalunga lyokushita evi, kutya okumona iihuna otaku hulu uunake nosho wo nkene onkalamwenyo tayi ka kala kombanda yevi.