Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo  |  Mei 2015

 ONDJOKONONA

Jairo oha longele Kalunga nomeho ge

Jairo oha longele Kalunga nomeho ge

Dhiladhila owala iho vulu okupangela omainyengo golutu lwoye, kakele komeho. Omumwamememati Jairo oku li monkalo ya tya ngawo. Ihe oku na onkalamwenyo tayi ti sha. Manga inaandi mu hokololela kutya omolwashike onkalamwenyo ye yi na eityo, nandi mu kuthile ko manga kondjokonona ye.

Jairo okwa valwa nomukithi gwomuuluyi (cerebral palsy [CP]) hagu kanithitha omainyengo gomuntu momaako nomagulu. * Omolwomukithi ngoka, iha vulu okupangela olutu lwe. Uuluyi we ihawu vulu okutuma omalombwelo ga yela koontumba dhe. Onkee ano, omaako nomagulu ge ohagi itonyagula nopwaahe na eipangelo. Omathimbo gamwe, omainyengo gaJairo ge endelela noinaga tegelelwa ohage mu ningitha nokuli i iyehameke. Aantu mboka ye li popepi naye ohashi vulika wo ye ehamekwe ngele inaya kotoka. Olundji omaako nomagulu ge ohaga kala ga mangwa uuna e li mokatemba ke, opo ki imonithe oshiponga nosho wo yalwe.

JAIRO OKWA KOKO NUUDHIGU

Jairo okwa koko lela nuudhigu. Sho a li e na oomwedhi ndatu, okwa tameke okukala ha kambuka. Olundji, Meme okwa li he mu kwata nawa e te mu fala nziya koshipangelo, ta dhiladhila kutya okwa sa.

Omolwokwiitonya nokwiinananana hoka, mokweendela ko kwethimbo omasipa gaJairo oga zi pomahala. Sho e na oomvula 16 esipa lye lyekalo olya zi pehala nokwa li a pumbwa okutandwa etando enene monto, metundji nomekalo. Otandi dhimbulukwa nawa sho a li ha kala ta lili uusiku kehe kuuwehame konima yetando.

Omolwuunkundi we, Jairo oha kala owala i ikolelela muyalwe oyo ye mu ningile iinima ngaashi okulya, okuzala nosho wo okulala. Olundji Meme naTate oyo ya li haye mu ningile iinima mbyoka. Ohaye mu dhimbulukitha aluhe kutya onkalamwenyo ye inayi ikolelela owala kaantu, ihe nokuKalunga wo.

OKWA TAMEKE OKUPOPYA NOMEHO

Tate naMeme Oonzapo dhaJehova. Oya kala haya leshele Jairo omahokololo gOmbiimbeli okuza kuuhanona we. Oya kala aluhe ye shi kutya onkalamwenyo yomuntu e na ekwatathano naKalunga oyi na eityo lela. Jairo iha vulu okuninga sha omolwolutu lwe ndoka inaalu kola halu kala talu inananana nopwaahe na oluthuwo, ihe oku na etegameno ewanawa lyonakuyiwa. Tate naMeme oya li haya kala tayi ipula ngele Jairo ota vulu ngaa okuuva ko ontseyo yOmbiimbeli.

Esiku limwe, sho Jairo a li okanona, Tate okwe mu lombwele a ti: “Jairo, kwatha ndje wu popye nangame.” Opo nduno okwa gwedha ko a ti: “Ngele owu hole ndje shili, oto shi ningi!” Sho Tate e mu indile a popye nando oshitya shimwe owala, omeho gaJairo oga li gu udha omahodhi. Nonando okwa li ta kambadhala okuholola omaiyuvo ge noohapu, okwa li owala ta gonene  pothingo. Tate okwa li u uvite nayi sho a lilitha Jairo. Ihe einyengo ndyoka olya li lyu ulike kutya oku uva ko shoka Tate a ti. Uupyakadhi owa li owala mpoka kutya ka li ta vulu okupopya.

Omathimbo hamale, Tate naMeme oya ndhindhilike kutya poompito dhimwe Jairo oha wangula omeho neendelelo, opo a holole omadhiladhilo nomaiyuvo ge. Osha li hashi uvitha nayi Jairo sho e wete kutya aantu ihaye mu uvu. Tate naMeme oyi ilongo okuuva ko omandhindhiliko gomeho ge noku mu pa shoka a pumbwa, nenyanyu olya li hali imonikila moshipala shaJairo. Ngoka ogu li omukalo gwe gwokutya onda pandula.

Omudheuli gwokupopya gwaJairo, okwa ningi eetopo, opo tu kale hatu uvathana naye nuupu. Okwa ti kutya natu kale hatu yelutha iikaha ayihe mombanda uuna tatu pula epulo ndyoka a pumbwa owala okutya eeno nenge aawe. Oshikaha shokolulyo otashi ti eeno, omanga shokolumoho otashi ti aawe. Kungawo, okwa li ha dhamene mo omeho koshikaha hoka ku na eyamukulo lye.

JAIRO TA NINGINITHWA

Oonzapo dhaJehova ohadhi ningi iigongi iinene niishona lutatu momumvo, mpoka iipopiwa yopaMbiimbeli hayi pulakenwa komangungo gaantu. Jairo okwa li aluhe ha kala a nyanyukilwa oshipopiwa sheninginitho. Esiku limwe, manga Jairo a li e na oomvula 16, Tate okwe mu pula a ti: “Jairo, owa hala okuninginithwa?” Mbalambala, okwa dhamene omeho koshikaha shaTate shokolulyo okuulika kutya okwa tokola toko okukatuka onkatu ndjoka. Opo nduno Tate okwa gwedha ko a ti: “Owu uvanekela ngaa Kalunga megalikano kutya oto mu longele sigo aluhe?” Natango, Jairo okwa dhamene omeho koshikaha shaTate shokolulyo. Osha li sha yela kutya Jairo okwa yapulila nale Jehova onkalamwenyo ye.

Konima yoonkundathana dhontumba dhopaMbiimbeli, osha li wo sha yela kutya Jairo oku uvite ko eityo lyeninginitho lyopaKriste. Onkee ano, mo 2004, okwa li a yamukula epulo lya simanenena monkalamwenyo ye, ndyoka tali ti: “Mbela owi iyapulila Kalunga nowa tokola okulonga ehalo lye?” Jairo okwa yamukula epulo ndika mokuyelutha omeho ge pombanda. Omalongekidho oga ningwa komeho yethimbo, opo u ulike oeeno ye momukalo ngoka. Kungawo, sho e na oomvula 17, okwa ninginithwa e li gumwe gwomOonzapo dhaJehova.

JAIRO TA GANDJA EITULOMO KIINIMA YOPAKALUNGA

Mo 2011, Jairo okwa li a mono omukalo omupe gwokupopya nayalwe, ano okakompiuta haka longo nomeho. Oshikwaelektronika shika ohashi mono omainyengo gongala yeho lye, opo a patulule uuthano mboka wu li kosikilina. Okupakuma nenge okutala itaa pakuma kokathano okwa fa okuthinda kokompiuta nokambuku  (mouse). Opwa li pwa ningwa okapelende ke na omandhindhilikothano nenge iitya, opo ka kwathele Jairo a vule okupopya nayalwe. Uuna a pathimine okathanondhindhiliko kamwe, opolohalama yomokakompiuta hoka ohayi lundululile etumwalaka lye mewi.

Jairo okwa kala a hala okukwathela yalwe pambepo, sho euvoko lye lyOmbiimbeli tali koko. PEkonakonombiimbeli lyuukwanegumbo lyokoshiwike, olundji oha tala ndje ye ta tala kokakompiuta ke. Ngoka ogwo omukalo gwe gwokudhimbulukitha ndje kutya nandi nyole omatyokosha ngoka ta ka ninga pokugongala kwetu miitopolwa yomapulo nomayamukulo.

Pokugongala oha kongo kosikilina i itegelela a thinde pokathano hoka a hala, sho oshikwaelektronika tashi lundululile etumwalaka lye mewi ndyoka tali uvika kwaayehe. Uuna a gandja eyamukulo megongalo, ohi imemeha aluhe. Alex, gumwe gwomookuume kaJairo, okwa ti: “Ohashi fuula ndje aluhe uuna ndu uvu omatyokosha gaJairo kombinga yOmbiimbeli.”

Jairo oha longitha okakompiuta ke hoka haka longo nomeho nosho wo newi, opo a ninge omatyokosha pokugongala nokulombwele yalwe kombinga yeitaalo lye

Jairo oha longitha wo omeho ge a lombwele yalwe kombinga yeitaalo lye. Omukalo gumwe he shi ningi, omokupathimina ethano ndyoka li na oshikunino moka mu na iinamwenyo naantu yomihoko adhihe taya nyanyukilwa onkalamwenyo kaayi na omaupyakadhi. Uuna a patulula ethano, okakompiuta ohaka zi ewi tali ti: “Etegameno ndyoka li li mOmbiimbeli olyo kutya evi otali ka ninga oparadisa moka itaamu ka kala we omauwehame neso, Ehololo 21:4.” Ngele omupulakeni oku ulike ohokwe, uuna a pathimine po ishewe, okakompiuta ohaka ti: “Owa hala okukonakona Ombiimbeli nangame?” Tatekulu okwa li a zimine. Osha li shinyanyudha okumona Jairo, te mu longo Ombiimbeli kashona nakashona pakwatho lyOnzapo yilwe. Shinyanyudha, Tatekulu okwa li a ninginithwa poshigongi shoshitopolwa moMadrid muAuguste 2014.

Okukala kwaJairo i igandja muKalunga okwa konekwa wo nokaalongisikola ye. Rosario, ngoka he mu pe omadhewo gokupopya, okwa tile: “Ngele ando ondi kale nda hala okuya melongelokalunga lyontumba, otandi ningi gumwe gwomOonzapo dhaJehova. Onda mona nkene eitaalo lyaJairo lye mu ningitha a kale e na onkalamwenyo yi na lela eityo, nonando onkalo ye kayi shi ompu.”

Omeho gaJairo ohaga kala gu udha enyanyu uuna nde mu leshele euvaneko lyOmbiimbeli ndika tali ti: “Oshitiningili otashi ka nuka ngomenye, nelaka lyoshikokoma otali imbi kenyanyu.” (Jesaja 35:6) Nonando oha kala a teka omukumo omathimbo gamwe, olundji oha kala a nyanyukwa. Shika ohashi vulika owala, molwaashoka onkalamwenyo ye oyi ikolelela kuKalunga nosho wo kookuume ke Aakriste. Okukala kwe e na etaloko ewanawa nosho wo eitaalo lya kola otaku gandja uunzapo kutya okulongela Jehova ohaku ningitha onkalamwenyo ondhigu yi kale yi na eityo.

^ okat. 5 Cerebral palsy (CP) owo uutumbulilo mboka hawu longithwa okufatulula omikithi dhopamadhiladhilo ndhoka hadhi gumu omainyengo gomuntu. Ohadhi vulu wo okweeta ekambuko, uupyakadhi wokulya nosho wo uunkundi wokupopya. Spastic quadriplegia ogwo omukithi gwa kwata miiti, nohagu vulu okukukutika omagulu nomaako gomuntu, nokuningitha othingo ye yi kale kaayi na oonkondo.