Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo  |  Mei 2015

 AALESHI YOSHIFO SHETU TAYA PULA . . .

Mbela o-Easter oyi li edhano lyopaKriste?

Mbela o-Easter oyi li edhano lyopaKriste?

O-Easter oya popiwa mo-Encyclopædia Britannica yi li “oshituthi sha simana shOongeleki dhopaKriste ndhoka hadhi dhana Eyumuko lyaJesus Kristus” aniwa. Ihe mbela Aakriste oye na ngaa shili oku yi dhana?

Opo omuntu a hokolole oshinima paushili, osha simana a gandje eitulomo kuuyelele mboka wa kwatelwa mo. Sha faathana, opo tu mone ngele o-Easter oyi li edhano lyopaKriste, osha simana tu tale kuuyelele mboka wa pamba o-Easter.

Shotango, Jesus okwa li a lombwele aalanduli ye ya kale haya dhimbulukwa eso lye, ihe hayumuko lye. Omuyapostoli Paulus okwi ithana edhimbuluko lyeso lyaJesus, “Uulalelo wOmuwa.” — 1 Aakorinto 11:20; Lukas 22:19, 20.

Shimwe ishewe, o-Britannica oya ti kutya iinima oyindji mbyoka hayi ningwa po-Easter “inayi pambathana lela” neyumuko lyaJesus, “ihe o-Easter oya za komithigululwakalo dhaantu.” Embo The Encyclopedia of Religion olya yelitha omandhindhiliko goshituthi sho-Easter tali ti: ‘Eyi otali thaneke onkalamwenyo ompe ndjoka hayi ya po uuna eyi lya tendulwa.’ Olya gwedha ko tali ti: “Okalimba oke shiwike ke li oshinamwenyo hashi vala nawa, nokungawo, otaka thaneke okuya kokwenye.”

Omuprofesoli gwiileshomwa yomoomvula dhopokati, Philippe Walter, okwa yelitha nkene omikalondjigilile ndhoka dha ningi oshitopolwa shedhano lyo-Easter. Okwa ti kutya “mokwiitedhululitha omalongelokalunga goshipagani ga ninge gopaKriste,” osha li oshipu okukwatakanitha oshituthi shoshipagani shoka sha li hashi dhanwa shi li “olweendo lwokuza meso lyokufu okuya momwenyo gwethimbo lyokwenye” neyumuko lyaJesus aniwa. Walter okwa gwedha ko ta ti kutya osha li onkatu ya simana okutula “edhano lyopaKriste” mokalindeli koshipagani, shoka she shi ningi oshipu, opo aantu oyendji yi itedhulule.

Omukalo nguka ‘gwokwiitedhululitha aantu ya ninge Aakriste’ kagwa li po sho aayapostoli ye na omwenyo, molwaashono oya li ya ‘keelele’ omalongo goshipagani. (2 Aatessalonika 2:7) Omuyapostoli Paulus okwa li a londodha kutya konima ‘ngele a zi po,’ aalumentu yamwe oya li taya “ka kala nokupopya iifundja, yi ihilile aalongwa.” (Iilonga 20:29, 30) Pehulilo lyethelemumvo lyotango, omuyapostoli Johannes okwa nyola kutya aalumentu yamwe oya li nale taya pukitha Aakriste. (1 Johannes 2:18, 26) Ompito yokutaamba ko omikalondjigilile dhoshipagani oya li ye ya egulukila.

“Inamu kambadhala okulongela kumwe naamboka yaa shi ooitaali.” — 2 Aakorinto 6:14

Onkee ano, yamwe otashi vulika ya li yu uvite kutya okutaamba ko omikalondjigilile dhimwe dho-Easter kakwa li kwa puka. Okwa li owala kwa pe “aapagani” euvoko li li hwepo li na ko nasha neityo lyeyumuko lyaJesus. Osha yela kutya, ando Paulus opo a li, andola ye ina taamba ko nando omikalondjigilile ndhoka dhoshipagani. Nonando okwa li a kundukidhwa komikalondjigilile odhindji dhoshipagani, manga a li molweendo mUukwaniilwa waRoma, ina taamba ko nando omikalondjigilile ndhoka, opo ando a longe nawa aantu kombinga yaJesus. Ombiimbeli otayi londodha Aakriste tayi ti: “Inamu kambadhala okulongela kumwe naamboka yaa shi ooitaali, oshoka shika itashi vulika. Shoka shi li mondjila naashoka sha puka, otayi vulu ngiini okukala kumwe? Uuyelele nomilema otayi vulu ngiini okukala mumwe? ‘Onkee Omuwa ota ti: Zii mo mokati kawo, ne mu iyoolole mo muyo. Inamu kala mu na ekwatathano naashoka sha nyata.’” — 2 Aakorinto 6:14, 17.

Sho wa konakona paufupi uuyelele mbuno owi ilongo mo shike? Owi ilongo mo kutya o-Easter kayi li shili edhano lyopaKriste.