Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo  |  Mei 2015

 OONKUNDATHANA

Omolwashike hatu dhimbulukwa eso lyaJesus?

Omolwashike hatu dhimbulukwa eso lyaJesus?

Mpaka otapu landula oonkundathana ndhoka tashi vulika dhi ningwe kugumwe gwomOonzapo dhaJehova naangoka ta tsakanene naye. Natu tye nduno Onzapo yedhina Megan oye ya pegumbo lyomukiintu gwedhina Shirley.

“SHI NINGENI NOKUDHIMBULUKWA NDJE”

Megan: Wu uhala po, Shirley. Onda li nda pandula oku ku mona pEdhimbuluko lyeso lyaJesus Kristus oshiwike sha zi ko. * Osha li ngiini nee?

Shirley: Onda li nda nyanyukilwa okukala po, ihe kanda li ndi uvite ko thiluthilu iinima ayihe. Ohandi uvu aantu haya dhana evalo lyaJesus pOkrismesa nosho wo eso neyumuko lye popaasa.

Megan: Ee, Okrismesa nopaasa oyi li iituthi ya tseyika nawa apuhe muuyuni. Ihe Oonzapo dhaJehova odhi wete kutya osha simana okudhimbulukwa eso lyaJesus. Ngele owu na okathimbo, otandi ka kala nda nyanyukwa okukundathana nangoye omatompelo gaashika.

Shirley: Eeno, ondi na okathimbo.

Megan: Sho shene, Oonzapo dhaJehova ohadhi dhimbulukwa eso lyaJesus molwaashono okwa li a lombwele aalanduli ye ye shi ninge. Dhiladhila kwaashoka sha li sha ningwa po ongulohi ndjoka, manga Jesus inaa sa. Mbela oto dhimbulukwa uulalelo wi ikalekelwa mboka a lile naalanduli ye aadhiginini?

Shirley: Ee, Uulalelo wahugunina.

Megan: Osho naanaa. Ohawu ithanwa wo Uulalelo wOmuwa. Pethimbo lyuulalelo mboka, Jesus okwa li a pe aalanduli ye omalombwelo ga yela. Kwatha ndje wu leshe oohapu dhe ndhoka dhi li muLukas 22:19.

Shirley: Eewa. “Oye a kutha wo oshikwiila, a hambelele, okwe shi pambula nokwe shi ya pe e ta ti: ‘Shika osho olutu lwandje ndoka talu mú gandjelwa. Shi ningeni nokudhimbulukwa ndje.’”

Megan: Tangi unene. Ndhindhilika omalombwelo gaJesus metumbulo lyahugunina lyovelise ndjoka: “Shi ningeni nokudhimbulukwa ndje.” Manga inaa lombwela aalanduli ye ye mu dhimbulukwe, Jesus okwa li a yelitha shoka ye na okudhimbulukwa kombinga ye. Okwa ti kutya omwenyo gwe ogwa li tagu ka gandjwa pehala lyaalanduli ye. Jesus okwa holola edhiladhilo momukalo gwa faathana naangoka gwa popiwa muMateus 20:28. Ovelise ndjoka otayi ti: ‘Omuna gwOmuntu ine ya okuyakulwa, ihe okuyakula nokugandja omwenyo gwe, a hupithe oyendji.’ Onkee ano, Oonzapo dhaJehova ohadhi gongala omumvo kehe, opo dhi dhimbulukwe ekuliloyambo ndyoka Jesus a gandja. Eso lye otali vulu okutya omwenyo kwaayehe mboka haya vulika.

OMOLWASHIKE EKULILO LYA LI LYA PUMBIWA?

Shirley: Ohandi uvu aantu taya ti kutya Jesus okwa si, opo tu vule okumona omwenyo. Ihe paushili wo wene, kandi shi wo kutya shoka ohashi ende ngiini.

Megan: Hangoye awike. Oshikundathanwa kombinga yekuliloyambo lyaJesus oshomuule. Ihe  osho shimwe shomooshili dhingi ndhoka tadhi adhika mOohapu dhaKalunga. Shitiwa, mbela owu na okathimbo natango?

Shirley: Ondi na ko ngaa ominute dhontumba.

Megan: Oshi li nawa. Opo owala nda li tandi lesha kombinga yekulilo, otandi ka kambadhala ndi shi yelithe momukalo omupu.

Shirley: Eewa.

Megan: Opo tu uve ko ekulilo, otwa pumbwa okutseya tango onkalo ndjoka ye etithwa po kuAdam naEva sho ya yono moshikunino shaEden. Opo tu shi uve ko nawa, natu leshe Aaroma 6:23. Lesha po.

Shirley: Eewa. Otayi ti: “Eso olyo ondjambi yuulunde, ihe omwenyo gwaaluhe ogwo omagano gesilohenda lyaKalunga muukumwe naJesus Kristus, Omuwa gwetu.”

Megan: Tangi unene. Natu konakone oohapu ndhoka. Tango, ndhindhilika nkene ovelise ndjika ya tameke: “Eso olyo ondjambi yuulunde.” Ndjika oyo ompango yanathangwa Kalunga a li a tula po petameko lyondjokonona yaantu kutya ondjambi nenge egeelo lyuulunde olyo eso. Petameko, kapu na ngoka a li omulunde. Adam naEva oya li ya shitwa ya gwanenena, nuunona wawo owa li wu na okuvalwa wa gwanenena. Nomolwaashoka, kapwa li nando etompelo lyasha, opo gumwe a se. Adam naEva nosho wo oluvalo lwawo oya li ye na etegameno lyokukala nomwenyo gwaaluhe ya nyanyukwa. Ihe ngaashi tu shi shi, iinima inayi ka enda we nawa, nenge hasho?

Shirley: Osho. Adam naEva oya li komuti gwi indikwa.

Megan: Owu li mondjila. Sho ye shi ningi, Adam naEva oya hogolola okwaavulika kuKalunga noya yono. Kungawo, oya hogolola okukala inaa ya gwanenena nokuninga aalunde. Ehogololo ndyoka inali etela owala Adam naEva iilanduliko yi yemateka, ihe noluvalo lwawo aluhe wo.

Shirley: Kandi uvite ko nawa.

Megan: Ehee, pamwe nandi longithe ethaneko. Nandi ku pule, owu hole okuteleka?

Shirley: Ee, ondi hole okuteleka.

Megan: Nandi tye ando owu na oshipana oshipe shokuteleka oomboloto. Manga inoo shi longitha, osha gwile pevi e tashi ningi embondokela. Oshike tashi ka ningilwa omboloto kehe ndjoka to ka teleka moshipana shono? Mbela itayi ka kala yi na embondokela?

Shirley: Otayi ka kala yi li na.

Megan: Momukalo gwa faathana, Adam naEva oya hogolola okwaavulika kuKalunga. Oya ningi “embondokela,” kokutya oya ningi aalunde noinaya gwanenena. Uunona wawo awuhe owa li tawu ka valwa “nembondokela” lyuulunde, molwaashono oya yono manga inaa ya mona oluvalo. MOmbiimbeli, oshitya “uulunde” itashi ulike owala koshilonga, ihe nokonkalo wo ndjoka twa thigulula. Iizemo oyo mbyono kutya nonando ngame nangoye inatu ninga sha sha puka, noka twa li twa valwa natango sho Adam naEva ya yono, oye ekelehi oluvalo lwawo lwomonakuyiwa. Moluvalo moka natse otwa kwatelwa mo. Onkee ano, otwa thigulula okwaahagwanenena nuulunde mboka hawu eta eso. Ngele tatu lesha mAaroma 6:23, ondjambi yuulunde oyo eso.

Shirley: Kashi li pauyuuki. Omolwashike aantu ayehe taya mono iihuna omolwuulunde waAdam naEva?

Megan: Owu li mondjila, itashi monika shi li pauyuuki. Ihe opu na oshindji sha kwatelwa mo. Omolwuuyuuki we, Kalunga okwa tokola kutya Adam naEva oye na okusila oondjo dhawo, ihe tse tu li oluvalo lwawo otu na etegameno. Kalunga okwe tu palela ondjila tu ze mo muudhigu. Mpoka opo pwa tamekela ekuliloyambo lyaJesus. Tala natango Aaroma 6:23. Konima sho ovelise ya ti kutya “eso olyo ondjambi yuulunde,” oya tsikile tayi ti: “Ihe omwenyo gwaaluhe ogwo omagano gesilohenda lyaKalunga muukumwe naJesus Kristus,  Omuwa gwetu.” Ano eso lyaJesus olye tu egululila ondjila tu ze mo muulunde nomeso. *

EKULILO OMAGANO DHINGI GAKALUNGA

Megan: Movelise muka omu na natango uuyelele wumwe mboka nda hala wu gandje eitulomo kuwo.

Shirley: Owuni mbela?

Megan: Ndhindhilika ovelise ndjoka tayi ti: “Omwenyo gwaaluhe ogwo omagano gesilohenda lyaKalunga muukumwe naJesus Kristus, Omuwa gwetu.” Ngele Jesus oye mwene a mono iihuna nokwa si omolwetu, a gandja omwenyo gwe pehala lyetu, omolwashike ovelise tayi ti ekulilo oli li “omagano gesilohenda lyaKalunga?” Omolwashike inaayi tya “omagano gesilohenda lyaJesus”? *

Shirley: Hmm. Kandi shiwo nee.

Megan: Eewa, Kalunga okwa shiti Adam naEva, ihe oya yono sho inaaya vulika kuye moshikunino shaEden. Osha li she mu ehameke noonkondo sho oyana ye yotango yopantu ye mu tukulile oshipotha. Ihe Kalunga okwa ningi po elongekidho mbalambala. * Okwa tokola opo Jesus e ye kombanda yevi, e li omuntu a gwanenena. Konima Jesus okwa gandja omwenyo gwe gu li ekuliloyambo. Onkee ano, ekulilo oli li omagano dhingi ga za kuKalunga. Opu na wo omukalo gulwe ngoka tagu ulike kutya ekulilo oli li omagano gaKalunga. Mbela owa dhiladhilile ngaa nale nkene Kalunga a li u uvite sho Jesus a dhipagwa?

Shirley: Aawe, inandi dhiladhila nale ngawo.

Megan: Ondi wete uudhanitho meni lyolugumbo lwoye. Owu na okukala wu na aanona.

Shirley: Eeno, ondi na aanona yaali, omumati nomukadhona.

Megan: Wu li omuvali, mwena po e to dhiladhila kombinga ya nkene He yaJesus gwomegulu, Jehova Kalunga, a li u uvite mesiku ndyoka Jesus a si. Mbela oto dhiladhila kutya okwa li u uvite ngiini sho ta tala okuza megulu Omwana gwe omuholike ta kwatwa, ta shekwa nota dhengwa noongonyo? He okwa li u uvite ngiini sho Omwana ta alelwa koshiti, nota si eso tali uvitha omwenyo omutoye?

Shirley: Oku na okukala a li u uvite nayi. Ihe inandi dhiladhila nale kombinga yaasho.

Megan: Osho naanaa, itashi wapa kutse tushi popye thiluthilu kutya Kalunga okwa li u uvite ngiini mesiku ndyoka. Ihe otu shi shi kutya oku na omaiyuvo, notu shi shi wo kutya omolwashike a pitike ayihe mbyoka yi ningwe. Oshe tu yelithilwa nawa menyolo lya tseyika nawa, muJohannes 3:16. Oto kwatha ndje wu li leshe?

Shirley: Eewa. Otali ti: “Oshoka osho ngeyi Kalunga a kala e hole uuyuni, oye a gandja Omwana awike, opo shaa ngoka te mu itaale, kaa kane, ihe a kale e na omwenyo gwaaluhe.”

Ekuliloyambo oli li euliko lyohole onenenene kaaku na we

Megan: Tangi unene. Tala natango petameko lyovelise ndjoka. Otayi ti: “Kalunga a kala e hole uuyuni.” Shoka sha simanenena osho ohole. Ohole oyo yi inyengitha Kalunga a tume Omwana kombanda yevi a se pehala lyetu. Ekuliloyambo oli li shili euliko lyohole onenenene kaaku na we. Oonzapo dhaJehova ohadhi gongala omumvo kehe dhi dhimbulukwe eso lyaJesus. Mbela shino twa kundathana oshe ku kwathela?

Shirley: Eeno, osha kwathela ndje. Tangi sho wa longitha ethimbo lyoye mokukundathana nangame.

Mbela opu na oshikundathanwa shopaMbiimbeli shoka ho ipula nasho? Mbela oho kala wa hala okuuva oshindji nenge to ipula kombinga yomalongo nenge yiinima yopalongelokalunga mbyoka hayi ningwa kOonzapo dhaJehova? Ngele osho, ino ongaonga okupula gumwe gwomOonzapo dhaJehova. Ota ka kala a nyanyukwa oku shi kundathana nangoye

^ okat. 5 Oonzapo dhaJehova ohadhi gongala lumwe omumvo kehe, dhi dhimbulukwe eso lyaJesus. Nuumvo edhimbuluko ndyoka otali ka kala ko mEtitano mu 3 Apilili.

^ okat. 32 Oshipalanyolo shilwe monakuyiwa otashi ka kundathana nkene ekuliloyambo lyaJesus lyetu kutha muulunde, naashoka tu na okuninga, opo tu mone uuwanawa mekulilo.

^ okat. 36 PaMbiimbeli, Kalunga naJesus aantu yaali ya yooloka. Opo wu mone uuyelele wa gwedhwa po, tala ontopolwa 4 yembo Omalongo gashili gOmbiimbeli ogeni naanaa? lya nyanyangidhwa kOonzapo dhaJehova.

^ okat. 38 Tala Genesis 3:15.

Tseya oshindji

Omalongo gashili gOmbiimbeli ogeni naanaa?

Ekulilo olyo omagano ge li dhingi ga za kuKalunga

Ekulilo oshike? Ongiini to vulu okumona mo uuwanawa mulyo?