• OMUMVO A VALWA: 1981
  • OSHILONGO MOKA A VALELWA: UNITED STATES
  • ONDJOKONONA: OMUMATI OMUTANGALALI

ONAKUZIWA YANDJE:

Onda valelwa moMoundsville, okalando ka mwena ke li pomulonga gwaOhio kuumbugantu waWest Virginia, U.S.A. Molwaashoka otwa li twa valwa yane, onkalamwenyo megumbo oya li yi tuntula, katwa li nando hatu kala tu uvite uuza. Aavali yetu oya li ye hole iilonga, aanashili noye hole aantu. Katwa li tu na iinima oyindji yopamaliko, ihe otwa li hatu kala aluhe tu na shoka twa pumbwa. Molwaashoka aavali yandje oya li Oonzapo dhaJehova oya li ya ningi oonkambadhala dha mana mo ya thindile omakotampango gOmbiimbeli mutse okuza kuunona wetu.

Sho nda thiki mepipi lyuugundjuka, onda tameke inaandi itula mo we mwaashoka nda li nda longwa. Onda li handi ipula ngele onkalamwenyo tayi wilikwa komakotampango gOmbiimbeli oyi na ngaa omupondo nenge otayi mbilipaleke ngaa. Onda li handi dhiladhila kutya opo ndi kale nda manguluka nonda nyanyukwa shili, ondi na okuninga kehe shimwe nda hala. Konima yethimbo, onde etha po okuya kokugongala kwopaKriste. Aamwameme yaali nayo oya landula okwaavulika kwandje. Aavali yetu oya ningi kehe shimwe taya vulu ye tu kwathele, ihe inatu pulakena.

Onda ka mona kutya emanguluko ndyoka nda hala otali vulu okufala ndje muupika. Esiku limwe manga te zi kosikola ndu uka kegumbo, kuume kandje okwa pe ndje ekaya e tandi li taamba. Okuza kesiku ndyono onda kala handi ningi iinima oyindji mbyoka tayi vulu okuteya po onkalamwenyo yandje. Konima yethimbo, onda tameke okulongitha nayi iingangamithi niikolitha nonda tameke okuya momilalo dha nyata. Momukokomoko gwoomvula dha ka landula ko, onda tameke okulongitha iingangamithi yilwe mbyoka yi na oonkondo noyindji yomuyo oya li ya pika ndje. Onde ende tandi pikwa noonkondo sigo nda tameke okulanditha iingangamithi ndi vule okukala ndi na oshimaliwa shoku yi ilandela.

Nando onda kala handi kambadhala okwiipwililika omaiyuvo gandje, onda li natango handi dhimbulukwa aluhe kutya ondjila ndjoka nda landula oya puka. Ihe onda li ndu uvite kutya kandi na we siku ndi lunduluke. Nonando onda li handi kala ndi li mokati kaantu piituthi nosho wo mpoka tapu hikwa oongalo, olundji onda li owala handi kala ndu uvite uuwike nonda li nda polimana. Omathimbo gamwe onda li handi kala te dhiladhila kaavali  yandje mboka ye li nawa nonda li handi ipula kutya oshe ende ngiini ndi kale inaandi ya fa.

NKENE OMBIIMBELI YA LUNDULULA ONKALAMWENYO YANDJE:

Nonando kanda li ndi na we etegameno lyasha, yalwe oya li ye na einekelo mungame. Mo 2000, aavali yandje oya li ya hiya ndje koshigongi shoshikandjo shOonzapo dhaJehova. Onda yi nonando onda li inaandi hala ko nawa. Onda li nda kumwa sho nda mono aamwameme yaali mboka nayo ya li ya za mo mondjila.

Sho ndi li poshigongi, onda dhimbulukwa kutya pehala mpoka onda li po omumvo gwa pita tapu hikilwa oongalo. Eyooloko ndyoka nda mono olya gumu ndje komutima. Sho pwa li tapu hikilwa oongalo, ehala olya li lya kaka naantu oya li taya hili omakaya. Aantu mboka ya li po kaya li aanambili, netumwalaka lyoongalo olya li tali polimanitha. Ihe poshigongi onda li nda kundukidhwa kaantu ya nyanyukwa, mboka ya li ya taamba ndje ko nenyanyu nonando opwa li pwa pita oomvula inaandi ya mona. Ehala olya li lya yela netumwalaka olya li tali gandja etegameno. Sho nda mono iizemo mbika iiwanawa ye etithwa koshili yOmbiimbeli, ondi ipula kutya onde ye ethele po shike. —  Jesaja 48:17, 18.

“Ombiimbeli oya kwathela ndje ndi ethe po okulongitha nokulanditha iingangamithi e tandi ningi omuntu e li nawa”

Nziya konima yoshigongi, onda tokola okushuna kegongalo lyopaKriste. Aamwameme nayo oya li ya gumwa kwaashoka yu uvu poshigongi e taya tokola nayo ya galukile kegongalo. Atuhe yatatu otwa taamba ko ekonakonombiimbeli.

Onda li ndi inyengithwa unene kenyolo lyaJakob 4:8 ndyoka tali ti: “Hedheni kuKalunga, oye nota hedha kune.” Onda li nda mono kutya ngele onda hala okuhedha popepi naJehova, ondi na okwoopaleka onkalamwenyo yandje. Gamwe gomomalunduluko ngoka nda li ndi na okuninga, okweetha po okuhila omakaya, okulongitha nayi iingangamithi niikolitha. —  2 Aakorinto 7:1.

Onde etha po ookuume kandje aakulu e te panga uukuume naamboka ye li aalongeli yaJehova. Omukuluntugongalo ngoka a konakona nangame Ombiimbeli oye a li unene ekwatho kungame. Okwa li ha dhengele ndje aluhe nokuya a tale kutya ondi li po ngiini. Sigo onena, oku li gumwe gwomookuume kandje kopothingo.

Onda li ndi igandjele Kalunga okupitila meninginitho mo 2001, naamwameme yaali oya li wo ya ninginithwa. Dhiladhila owala kenyanyu ndyoka aavali yandje ya li yu uvite nosho wo okamwamememati hoka ka kala okadhiginini sho egumbo lyetu ngashingeyi lya li lya hangana mokulongela Jehova!

NKENE OMBIIMBELI YA LUNDULULA ONKALAMWENYO YANDJE:

Onda kala handi dhiladhila kutya omakotampango gOmbiimbeli ohaga ngambeke unene, ihe ngashingeyi onde ga tala ko ge li egameno enene. Ombiimbeli oya kwathela ndje ndi ethe po okulongitha nokulanditha iingangamithi e tandi ningi omuntu e li nawa.

Ondi na uuthembahenda wokukala oshitopolwa shuumwayinathana womuuyuni auhe waalongeli yaJehova. Aantu mbaka oye holathane shili noya hangana mokulongela Kalunga. (Johannes 13:34, 35) Mokati kaantu mbaka onda mona mo eyambeko enene, omukulukadhi gwandje, Adrianne, ngoka ndi hole noonkondo nonde mu lenga. Ohashi tu nyanyudha okulongela Omushiti gwetu pamwe.

Pehala lyokulalakanena onkalamwenyo yokwiihola mwene, ngashingeyi ondi li omukalele gwethimbo lyu udha, te longo aantu nkene nayo taya vulu okumona uuwanawa mOohapu dhaKalunga. Iilonga mbika oye etela ndje enyanyu tali hunga. Otandi vulu okupopya neinekelo kutya Ombiimbeli oya lundulula onkalamwenyo yandje. Ngashingeyi onda manguluka shili.