Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo  |  Januali 2013

Kaaleshi yetu

Kaaleshi yetu

Oshifo shika to lesha osha kala nokunyanyangidhwa okuza muJuli 1879. Oonkalo odha lunduluka noonkondo okuza komvula ndjoka, sho noshifo shika osha kala wo tashi lunduluka. (Tala omathano pombanda.) Okutameka noshifo shomwedhi nguka oto ka mona omalunduluko ga gwedhwa po moshifo shika shOshungolangelo. Mbela oshike tashi ka lunduluka?

Miilongo oyindji omwaalu gwaantu mboka ye hole okukonga uuyelele kointaneta otagu ende tagu indjipala. Ohaya vulu okulesha nuupu uuyelele mboka hawu adhika owala kointaneta. Omambo ogendji, iifo nosho wo iifokundaneki ohayi vulu okuleshwa kointaneta.

Molwaashono aantu oyendji oye hole okulesha iinima kointaneta, ehala lyetu lyokointaneta, www.jw.org, otwe li lundulula, opo li kale tali hokitha noli kale epu okulongithwa. Aatalelipo kehala ndika otaya vulu okulesha iileshomwa momalaka ge vulithe 430. Okutameka omwedhi nguka otaya ka vula wo okulesha ko iitopolwa yimwe mbyoka ya kala hayi piti aluhe miifo yetu, ihe ngashingeyi otayi kala owala hayi piti ko-jw.org. *

Molwaashono otatu ka kala hatu nyanyangidha iitopolwa oyindji kointaneta, okutameka noshifo shomwedhi nguka, oshifo shika shOshungolangelo yaayehe itashi ka kala we nomapandja 32, ihe otashi ka kala shi na omapandja 16. Oshungolangelo ohayi piti nale momalaka 204. Molwaashoka omapandja oga shonopekwa, otashi vulika yi ka vule okutolokwa momalaka ge vulithe mpoka. Okutameka nomwedhi nguka, Oshungolangelo yaayehe mOshindonga itayi ka kala we hayi piti konima yoomwedhi ndatu, ihe otayi ka kala hayi piti konima yoomwedhi mbali.

Otwi inekela omalunduluko ngaka otage ke tu kwathela tu uvithile aantu oyendji etumwalaka lyOmbiimbeli lyehupitho. Otwa tokola toko okukala tatu pe aantu uuyelele tawu gandja omayele taga mbilipaleke okupitila miileshomwa ya pilintwa nokointaneta, opo aaleshi yetu oyendjiyendji mboka ya simaneka Ombiimbeli noya hala okutseya shoka tayi ti naanaa ya mone mo uuwanawa.

Aanyanyangidhi

^ okat. 5 Yimwe yomiitopolwa mbyoka tayi kala hayi monika owala kointaneta momalaka ogendji ongaashi: “Oshitopolwa shaagundjuka” shoka tashi ka kala shi na uuyelele wopaMbiimbeli mboka wa nuninwa aagundjuka nosho wo “Ootundi dhandje dhOmbiimbeli,” shoka sha nuninwa okulongithwa kaavali mboka ye na aanona ye li kohi yoomvula ne.