Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Novomba 2015

Uukwaniilwa owa kala tawu pangele oomvula ethele!

Uukwaniilwa owa kala tawu pangele oomvula ethele!

“Kalunga kombili ne mu pe ayihe mbyoka mwa pumbwa, opo mu vule okugwanitha ehalo lye.” — AAHEBELI 13:20, 21.

OMAIMBILO: 136, 14

1. Iilonga yokuuvitha oya li ya simana shi thike peni kuJesus? Shi yelitha.

JESUS okwa li e hole okupopya kombinga yUukwaniilwa waKalunga. Sho a li kombanda yevi, okwa li a popi kombinga yUukwaniilwa iikando oyindji shi vulithe iinima yilwe. Okwa li a popi Uukwaniilwa iikando yi vulithe 100 pethimbo lyuukalele we. Oshoshili kutya Uukwaniilwa owo wa li oshinima sha simanenena kuJesus. — Lesha Mateus 12:34.

2. Yangapi yu uvile elombwelo ndjoka li li muMateus 28:19, 20, nomolwashike tatu tile ngawo?

2 Konima sho Jesus a yumudhwa, okwa li a tsakanene nongundu yaalongwa ye ye vulithe 500. (1 Aakorinto 15:6) Shika otashi vulika sha li sha ningwa sho Jesus a gandja elombwelo ku uvithilwe “aantu ayehe.” Oshilonga shika itashi ka kala oshipu. *  Okwe ya lombwele kutya oshilonga shokuuvitha oshi na okutsikila ethimbo ele sigo “ehulilo lyuuyuni.” Kunena sho to uvitha onkundana ombwanawa, kungawo oto kwathele opo ehunganeko li gwanithwe. — Mateus 28:19, 20.

3. Iinima itatu yini ya kala tayi tu kwathele tu uvithe onkundana ombwanawa?

3 Konima sho Jesus a gandja elombwelo lyokuuvitha, okwa ti: “Ngame otandi kala pamwe nane.” (Mateus 28:20) Jesus oku uvanekele aalanduli ye kutya ota ka wilika iilonga yokuuvitha note ke ya kwathela sho taya uvithile uuyuni awuhe koonono. Jehova oku li wo pamwe natse. Okwe tu pa ‘ayihe mbyoka twa pumbwa’ yi tu kwathele sho tatu uvitha. (Aahebeli 13:20, 21) Moshileshwa shika, otatu ka kundathana itatu yomiinima mbyoka ya simana: (1) iilongitho mbyoka twa pewa, (2) omikalo ndhoka hatu longitha nosho wo (3) edheulo ndyoka hatu pewa. Tango natu ka kundathaneni yimwe yomiilongitho mbyoka twa kala nokulongitha muule woomvula 100 dha ka pita.

IINIMA MBYOKA HAYI KWATHELE AAPIYA YAKALUNGA YU UVITHE

4. Iilongitho yi ili noyi ili oye tu kwathela ngiini mokuuvitha?

4 Jesus okwa yelekanitha etumwalaka lyUukwaniilwa nombuto ndjoka ya kunwa mevi lya yoolokathana. (Mateus 13:18, 19) Opo omukuni a longekidhe evi, oha longitha iilongitho yi ili noyi ili. Momukalo gwa faathana, Omukwaniilwa gwetu okwe tu pa iilongitho mbyoka tatu vulu okulongitha tu kwathele aantu ya taambe ko etumwalaka lyetu. Yimwe oya longithwa owala uule wokathimbo, omanga yimwe tayi longithwa sigo onena. Ihe iilongitho ayihe oye tu kwathela tu kale tu shi okuuvitha.

Okakalata kokugandja uunzapo oka li ka kwathele oyendji ya tameke okuuvitha

5. Okakalata kokugandja uunzapo oshike, noka li haka longithwa ngiini?

5 Mo 1933, aauvithi oya tameke okulongitha okakalata kokugandja uunzapo, hoka ka kwathele oyendji ya tameke okuuvitha. Okakalata haka oka li okashona, ke na etumwalaka lyOmbiimbeli efupi nolya yela nawa. Omathimbo gamwe opwa li hapu piti uukalata uupe. Omumwatate Erlenmeyer okwa li e na oomvula 10 sho a longitha okakalata lwotango. Okwa ti: “Olundji otwa li hatu ti owala: ‘Ondi na okakalata haka, onda hala wu leshe mo.’ Uuna omunegumbo e ka lesha, otwa li hatu mu pe iileshomwa e tatu yi.”

6. Okakalata kokugandja uunzapo oka kwathele ngiini aauvithi?

6 Okakalata kokugandja uunzapo oka kwathelele aauvithi momikalo dhi ili nodhi ili. Pashiholelwa, aauvithi yamwe oya li ye na ohoni. Nonando oya li ya hala okuuvitha, kaya li ye shi nkene ye na okutameka. Yamwe oya li ye na omukumo. Oya li haya lombwele omunegumbo muule wominute omishona ashihe shoka ye shi, ihe kaya li haye shi ningi aluhe momukalo omwaanawa. Okakalata oka li ka kwathele aauvithi ya gandje etumwalaka lya yela noli uvitiwe ko nawa.

7. Opwa li pu na omashongo geni sho okakalata kokugandja uunzapo ka li haka longithwa?

7 Opwa kala pu na wo omashongo. Omumwameme Grace Estep okwa ti: “Omathimbo  gamwe, otwa li hatu pulwa kutya: ‘Mokakalata omwa popiwa shike? Ito vulu owala okulombwela ndje shoka shi li mo?’” Aanegumbo yamwe oya li haya nyengwa oku ka lesha. Yamwe oya li owala haye ka kutha ko e taye ku edhilile pondje. Omanga mboka kaaye hole etumwalaka lyetu, ya li haye ka tuula po. Nonando opwa li omashongo ngoka, okakalata kokugandja uunzapo oka li ka kwathele aauvithi yu uvithile aantu noya li ya talika ko kutya yo aauvithi yUukwaniilwa.

8. Ongalamathona oya li hayi longithwa ngiini? (Tala kethano lyopetameko.)

8 Oshilongitho shimwe sha li hashi longithwa mo 1930 nasha osho ongalamathona. Oonzapo dhimwe odha li dhe yi luka Aaron, oshoka oyo ya li hayi ya popile ko. (Lesha Eksodus 4:14-16.) Shampa omunegumbo a zimine okupulakena, omuuvithi okwa li he mu tulile ko oshipopiwa shopaMbiimbeli oshifupi. Konima yokupulakena okwa li he mu pe iileshomwa. Omathimbo gamwe aanegumbo ayehe oya li haya gongala ya pulakene koshipopiwa. Okuza mo 1934, o-Watch Tower Society oya tameke okunduluka oongalamathona dhokuuvitha. Pehulilo opwa li iipopiwa 92 ya yoolokathana ya kwatwa muungalo.

9. Mbela ongalamathona oya li ngaa hayi pondola?

9 Sho Hillary Goslin u uvu shimwe shomiipopiwa mbyoka, okwa pula a kwathelwe ongalamathona uule woshiwike, opo a pulakene ketumwalaka lyOmbiimbeli pamwe naashiinda she. Oshizemo? Aantu oyendji oya taamba ko oshili e taya ninginithwa. Hugunina, oyanakadhona yaali yomumwatate Goslin oya ka tumwa kOsikola yaGilead e taya ningi aatumwa. Ongalamathona nayo oya kwathele aauvithi ya tameke okuuvitha, ngaashi naanaa uukalata wokugandja uunzapo. Omukwaniilwa okwa tsikile natango okudheula oshigwana she okupitila mOsikola yOkudheula Aauvithi shi kale shi shi okulonga nawa aantu.

OYA LONGITHA OMIKALO ODHINDJI YU UVITHILE AANTU

10, 11. Iifokundaneki noradio oya longithwa ngiini okuuvithila aantu onkundana ombwanawa, nomolwashike omikalo ndhoka dha pondola?

10 Kohi yewiliko lyOmukwaniilwa gwetu, oshigwana shaKalunga osha longitha omikalo odhindji shu uvithile aantu oyendji ngaashi tashi vulika. Omikalo ndhoka odha li dha kwathele noonkondo, unene tu pethimbo sho aalongi ya li aashona yowala. (Lesha Mateus 9:37.) Pashiholelwa, nale otwa li twa longitha iifokundaneki tu uvithile aantu onkundana ombwanawa. Oshiwike kehe, omumwatate Russel okwa li ha tumine oshipopiwa she kehangano lyiikundaneki. Opo ihe ehangano ndyoka olya li hali tumine oshipopiwa she kiifokundaneki moKanada, Europa nomoAmerika. Sho twa ka thika mo 1913, iipopiwa yomumwatate Russell oya li ya nyanyangidhwa nale miifokundaneki 2 000, noya leshwa kaantu 15 000 000.

Iifokundaneki noradio oye tu kwathele tu uvithile aantu oyendji miitopolwa moka mwa li aauvithi aashona

11 Oradio nayo oya li wo ya longithwa okuuvitha onkundana ombwanawa. Oshipopiwa shotango shomumwatate Rutherford  koradio osha li ko mo 16 Apilili 1922, nosha pulakenenwe kaantu 50 000. Nziya konima yaashoka, otwa toto po osasiona yetu yoradio, yedhina WBBR. Opolohalama yotango oya tumwa mombepo mo 24 Febuluali 1924. Oshungolangelo ye 1 Desemba 1924, oya ti: “Otwi itaala kutya okulongitha oradio okwo omukalo omupe, gwombiliha nohagu pondola mokutaandelitha oshili.” Ngaashi iifokundaneki, oradio nayo oye tu kwathele tu uvithile aantu oyendji miitopolwa moka mwa li aauvithi aashona.

Aauvithi oyendji ohaya nyanyukilwa uunzapo womontaneho nokulombwela aantu kombinga yepandja lyetu lyokOitaneta (Tala okatendo 12, 13)

12. (a) Owu hole okuuvithila unene pomahala geni uuna to gandja uunzapo womontaneho? (b) Oshike tashi vulu oku tu kwathela tu sinde uumbanda wokugandja uunzapo womontaneho?

12 Uunzapo womontaneho owo omukalo ngoka hagu pondola mokuuvithila aantu pethimbo lyetu. Otaku ningwa natango oonkambadhala, opo aantu yu uvithilwe pomathikameno goombesa, poosasiona dhomashina, mpoka hapu thikama iiyenditho, momahala gaayehe nopomalandithilo. Mbela oho tila okugandja uunzapo womontaneho? Ngele osho, galikana Jehova e ku kwathele. Dhiladhila wo kwaashoka sha popiwa komumwatate Manera, omutonateli omweendi, sho a ti: “Otwa li hatu kala twa tala ko omukalo kehe omupe gwokuuvitha kutya otagu tu pe ompito yokulongela Jehova, yokuulika uudhiginini wetu noyokutala ngele otwa kola ngaa meitaalo. Otwa li hatu kala twa hala okuulika kutya otu na ehalo oku mu longela momukalo kehe a hala.” Uuna twa sindi uumbanda wetu  e tatu uvitha momikalo omipe, ohashi koleke einekelo lyetu muJehova nohashi tu ningitha tu kale aauvithi aawanawa. — Lesha 2 Aakorinto 12:9, 10.

13. Omolwashike okuuvithila aantu tatu longitha epandja lyetu lyokOintaneta ku li omukalo tagu pondola, niizemo yini wa mona?

13 Aauvithi oyendji ohaya nyanyukilwa okulombwela aantu kombinga yepandja lyetu lyokOitaneta, jw.org, hoka taya vulu okulesha nokutapa iileshomwa yetu yopaMbiimbeli momalaka ge vulithe po 700. Esiku kehe, aantu ye vulithe pomiliyona 1.6, ohaya talele po epandja lyetu. Monakuziwa, onkundana ombwanawa ndjoka ya kala tayi uvithwa okupitila moradio, oya thikile kaantu yomiitopolwa yokokule. Nokunena, epandja lyetu nalyo osho tali longithwa.

OKUDHEULA AAUVITHI YONKUNDANA OMBWANAWA

14. Aauvithi oya li ya pumbwa edheulo lini, noya dheulwa mosikola yini opo ya kale aanekeka?

14 Iilongitho nomikalo ndhoka twa kundathana, odha kala hadhi pondola. Ihe moomvula ndhoka dhopetameko, aauvithi oya li ya pumbwa okudheulwa nkene ye na okuuvitha. Pashiholelwa, omathimbo gamwe omunegumbo ka li ha tsu kumwe naashoka sha popiwa kongalamathona. Omanga poompito dhimwe ya li haya kala ya hokwa etumwalaka noya hala okwiilonga oshindji. Aauvithi oya li ye na okulongwa okuyamukula aantu nuukeka nonkene ye na okulonga aantu. Omumwatate Knorr okwa wilikwa kombepo ondjapuki a mone kutya osha simana aauvithi yi ilonge okuuvithila aantu. Onkee, mo 1943, omagongalo oga tameke nOsikola yOkudheula Aauvithi. Oya kwathele aauvithi ayehe ya kale aanekeka.

15. (a) Aauvithi yamwe oye shi endithile ngiini sho ya li ye na iipopiwa mOsikola yOkudheula Aauvithi? (b) Euvaneko lyaJehova ndjoka lya popiwa mEpisalomi 32:8, olye ku gwanithilwa ngiini?

15 Aamwatate oyendji kaya li yi igilila okupopya komeho gaantu. Omumwatate Ramu ota dhimbulukwa oshipopiwa she shotango mo 1944. Osha li shi na ko nasha naDoeg ngoka a popiwa mOmbiimbeli. Okwa ti: “Oongolo dhandje odha li owala tadhi idhenge kumwe kuumbanda, noonyala dhandje odha li tadhi dhekweta, omanga omayego gandje ga li tagi idhenge kumwe.” Okwa gwedha ko a ti: “Oshikando shandje shotango osho she endele ngaaka, ihe kanda li nda sholola.” Nuunona nawo owa li hawu kala wu na iipopiwa mosikola, nonando kasha li oshipu. Omumwatate Manera ota dhimbulukwa oshipopiwa shotango shomugundjuka gumwe. Ota ti: “Okwa li a tila noonkondo, naasho a popi ko kashona, okwa tameke ta hekumuna. Ihe okwa tsikile ngaa ta hekumuna, sigo e shi  mana.” Otashi vulika ihoo yamukula pokugongala, oshoka nangoye owu na ohoni nenge wu wete itoo shi vulu. Ngele osho, galikana Jehova e ku kwathele wu sinde uumbanda woye. Ote ku kwathele ngaashi a kwathelele aanasikola yotango mOsikola yOkudheula Aauvithi. — Lesha Episalomi 32:8.

Aatumwa ye vulithe 8 500 oya dheulwa mosikola yaGilead, noya tumwa kiilongo 170, okuza mo 1943

16. Elalakano lyOsikola yaGilead olya li lyokudheula oolye (a) monakuziwa (b) nokuza mo 2011?

16 Ehangano lyaJehova ohali dheula wo aauvithi pOsikola yaGilead. Elalakano limwe lyosikola ndjika olyo okukwathela aanasikola ya kale ye hole okuuvitha onkundana ombwanawa. Osikola yaGilead oya tamekele mo 1943. Aanasikola 8 500 oya dheulwa mosikola moka, noya tumwa kiilongo 170. Okuza mo 2011, aakokolindjila yi ikalekelwa, aatonateli aayendi, Aabetel nenge aatumwa yamwe mboka inaaya dheulwa natango kosikola ndjika, oyo haya hiywa ko.

17. Mbela osikola yaGilead oya kwathela ngaa aauvithi?

17 Mbela osikola yaGilead oya kwathela ngaa aauvithi? Eeno. Tala owala kwaashoka sha ningilwe moJapani. MuAuguste 1949, moJapani kamwa li mu na aauvithi ya konda nopomulongo. Pehulilo lyomumvo ngoka, aatumwa 13 oya tumwa ye ku uvithe pamwe naauvithi yomoshilongo moka. MoJapani ngashingeyi omu na aauvithi 216 000 lwaampo; konyala etata lyaauvithi mboka aakokolindjila.

18. Opu na ishewe oosikola dhilwe dhini?

18 Opu na wo oosikola dhilwe, ngaashi: Osikola yUukalele wUukwaniilwa, Osikola yOkudheula Aakokolindjila, Osikola yaauvithi yUukwaniilwa, Osikola yAatonatelishikandjo naakulukadhi yawo nosho wo Osikola yOkudheula Iilyo yOokomitiye dhIitayimbelewa naakulukadhi yawo. Oosikola ndhika odha dheula aamwatate naamwameme ya koleke eitaalo lyawo. Osha yela kutya Jesus onkee ngaa ta dheula aantu oyendji.

19. Omumwatate Russell okwa popi shike shi nasha niilonga yokuuvitha, naashoka otashi gwanithwa ngiini ngashingeyi?

19 Uukwaniilwa waKalunga owa kala tawu pangele uule woomvula dhi vulithe 100. Muule woomvula ndhoka, Omukwaniilwa gwetu, Jesus Kristus, okwa kala ta wilike iilonga yokuuvitha. Mo 1916, Omumwatate Russell okwa li i itaala kutya onkundana ombwanawa otayi ka tamunuka mo sigo omuuyuni awuhe. Okwa ti: “Iilonga otayi tamunuka mo neendelelo notayi ka tsikila okutamunuka mo, oshoka ‘elaka etoye lyOshilongo’ oli na okuuvithilwa kongonga yevi alihe.” (Faith on the March, omunyoli: A. H. Macmillan, epandja 69) Oshilonga shoka otashi longwa sigo onena. Otwa pandula Jehova, Kalunga kombili, sho he tu pe ashihe shoka twa pumbwa, opo tu longe ehalo lye.

^ okat. 2 Otashi vulika oyendji yomongundu ndjono ya ningi Aakriste. Omolwashike tatu tile ngawo? Omolwaashoka omuyapostoli Paulus okwe ya ithana ‘aalanduli yaJesus ye vule omathele gatano.’ Okwa ti wo kutya: “Oyendji yomuyo oye na omwenyo natango, nonando yamwe oya sa.” Onkee, otashi vulika omuyapostoli Paulus nAakriste ooyakwawo ya li ye shi oyendji yomwaamboka yu uva kondandalunde sho Jesus ta gandja elombwelo lyokuuvitha.