Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Novomba 2015

Jehova oye Kalunga kohole

Jehova oye Kalunga kohole

“Kalunga oye ohole.” — 1 JOHANNES 4:8, 16.

OMAIMBILO: 18, 91

1. Uukwatya waKalunga wa simanenena owuni, naashika oshi ku uvitithe ngiini kombinga ye?

OMBIIMBELI otayi tu lombwele kutya “Kalunga oye ohole.” (1 Johannes 4:8) Shika mbela osha hala okutya ngiini? Ohole oyo uukwatya waJehova wa dhenga mbanda momaukwatya ge agehe. Ke na ashike ohole, ihe oye ohole. Ohole oyo hayi mu wilike mwaashihe shoka ta longo. Inatu pandula tuu sho ohole yi inyengitha Jehova a shite iinima ayihe, mwa kwatelwa shaashoka shi na omwenyo!

2. Ohole ye ndjoka Kalunga e tu nine, ohayi tu ningitha tu kale tu na einekelo lyashike? (Tala kethano pombanda.)

2 Jehova oku nine ashihe shono a shita olukeno nohole. Ohole ye ndjoka e tu nine, ohayi tu ningitha tu kale tu na einekelo kutya elalakano lye li na ko nasha naantu otali ka gwanithwa momukalo omwaanawa. Oshizemo, mboka haya vulika kuye otaya ka kala nenyanyu lyashili. Pashiholelwa, omolwohole ye, Jehova “oku utha nale esiku, uuna ndoka ta ka pangula uuyuni pauyuuki, note ke u pangulitha omulumentu ngoka e mu hogolola,”  Jesus Kristus. (Iilonga 17:31) Otwi itaala kutya epangulo ndjoka otali ka ningwa. Konima yaashoka, aantu mboka haya vulika, otaya ka kala nonkalamwenyo ombwanawa sigo aluhe.

SHOKA TATU ILONGO MONDJOKONONA

3. Ando Jehova ka li e tu hole, ando onkalamwenyo otayi ka kala ya tya ngiini?

3 Mbela ando ohole kaya li uukwatya waKalunga wa simanenena, ando onkalamwenyo yaantu monakuyiwa otayi ka kala ya tya ngiini? Ando aantu otaya tsikile okupangelathana nokunwethwa mo kuSatana, omuhindadhi ngoka kee na ohole. (2 Aakorinto 4:4; 1 Johannes 5:19; lesha Ehololo 12:9, 12.) Ando Jehova ka li e tu hole, ando onkalamwenyo otayi ka kala ombwinayi!

4. Omolwashike Jehova e etha uunamapangelo we wu tukuluthilwe oshipotha?

4 Sho Satana a tukuluthile uunamapangelo waKalunga oshipotha, okwa nwetha mo wo Adam naEva ya tukule oshipotha. Satana oku wete Kalunga kee na uuthemba wokupangela. Okwa ti kutya okupangela kwe oku vule kwaKalunga. (Genesis 3:1-5) Jehova okwa pe Satana ethimbo efupi, opo u ulike ngele oshoshili. Ihe oshi iwetikile nawa kutya Satana nosho wo aantu itaya vulu okupangela.

Jehova ina shita aantu ye na uuthemba wokwiipangela yoyene kaaye na ewiliko lye

5. Iiningwanima mondjokonona yaantu otayi holola shike puuyelele?

5 Kunena, uuyuni otawu ende tawu nayipala. Moomvula 100 dha ka pita, aantu ye vulithe pomamiliyona 100 oya dhipagelwa miita. Ombiimbeli oya popya kombinga ‘yomathimbo gokehulilo’ ya ti: “Aakolokoshi naafudhime otaa tsikile okuza muuwanawa yu uka muuwinayi.” (2 Timoteus 3:1, okapalanyolo; 3:13) Ombiimbeli oya ti wo kutya: “Omuwa, ondi shi shi kutya omuntu iha vulu okupangela shoka u uthilwa; kaku na omuntu hu utha okukalamwenyo kwe.” (Jeremia 10:23) Iiningwanima mondjokonona otayi holola puuyelele kutya Oohapu ndhono odhoshili. Jehova ina shita aantu ye na uuthemba wokwiipangela yoyene kaaye na ewiliko lye.

6. Omolwashike Kalunga e etha uukolokoshi tawu tsikile?

6 Sho e etha uukolokoshi wu tsikile uule wethimbo efupi, kungawo Jehova oku ulika kutya epangelo lye olyo owala tali vulu okupondola. Komeho, Kalunga ota ka hanagula po aakolokoshi ayehe. Okuza mpono, ngoka ta ka kala e wete okupangela kwaKalunga inaaku opala, ota ka katukilwa onkatu nziya. Kalunga ota ka longitha iiningwanima mondjokonona yaantu, a gandje uumbangi kutya uunashipotha wa tya ngawo owu na okuhanagulwa po mbalambala. Uukolokoshi kawu na we siku wu ka pitikwe nandonando.

KALUNGA OKWE TU ULUKILE NGIINI OHOLE YE?

7, 8. Jehova okwe tu ulukile ngiini ohole ye?

7 Jehova okwe tu ulukile ohole ye momikalo odhindji. Dhiladhila owala kuunene nokuuwanawa wewangandjo. Olya tholomwa po komilalawili omabiliyona, nakehe omulalawili ogu na oonyothi noopulanete omabiliyona. Momulalawili moka tu li ngoka hagu ithanwa Ekaladhidhi, omu na onyothi ndjoka  hatu ithana etango. Kombanda yevi itaku vulu okukalwa ngele kapu na etango. Eshito alihe ndika olyu ulika kutya Jehova oye Omushiti gwetu, nolya holola uukwatya we ngaashi oonkondo, uunongo nohole ye. Kalunga “nando oye iha monika, okwa holola puuyelele oonkondo dhe dhaaluhe nuukalunga we.” — Aaroma 1:20.

Iinima ayihe mbyoka Jehova a shita, oya nuninwa okukwathela aantu niinamwenyo

8 Jehova okwa shiti evi li kalwe. Aantu niinamwenyo ohaya mono mo uuwanawa mukehe shoka shi li kombanda yevi. Kalunga okwa ningile aantu oshikunino oshiwanawa ya kale mo sigo aluhe ye li megwaneneno. (Lesha Ehololo 4:11.) Kakele kaashono, oha “palutha iinamwenyo ayihe, oshoka esilohenda lye otali kala aluhe.” — Episalomi 136:25.

9. Nonando Jehova oKalunga kohole, oku tonde shike?

9 Jehova, oKalunga kohole, ihe oku tonde shoka oshiwinayi. Pashiholelwa, Episalomi 5:4-6, olye mu popi kutya: “Ngoye ku shi Kalunga ngoka ha nyanyukilwa uuwinayi; . . . ou tonde ayehe mboka haa longo uukolokoshi.” Oku tonde wo “aadhipagi naagwaaleki.”

UUKOLOKOSHI OWU LI POKUHULITHWA PO

10, 11. (a) Oshike tashi ka ningilwa aakolokoshi? (b) Jehova ota ka yambeka ngiini aantu mboka haya vulika?

10 Pethimbo lyo opala, Jehova ota ka kutha po uukolokoshi meshito alihe, oshoka oye Kalunga kohole noku tonde shoka oshiwinayi. Oohapu dhaKalunga odha uvaneka kutya: “Mboka haa inekele Omuwa, otaa ka thigulula evi, ihe aakolokoshi otaa ka tidhwa po. Aadhudhu otaa ka kana po mbala; nando u ya konge, ito ya mono.” Aatondi yaJehova “otaa ka kana po ya fa olwithi.” — Episalomi 37:9, 10, 20.

11 Oohapu dhaKalunga odha uvaneka kutya: “Aayuuki otaa ka thigulula evi e taa kala mo sigo aluhe.” (Episalomi 37:29) Aayifupipiki “otaa ka thigulula evi notaa ka mona uulinawa nombili.” (Episalomi 37:11) Omolwashike mbela? Omolwaashoka Kalunga ketu omunahole okwa halela aluhe aapiya ye aadhiginini shoka oshiwanawa. Ombiimbeli otayi ti: “Oye ota ka theta omahodhi agehe momeho gawo. Oko noitaku ka kala we eso, oluhodhi, eliko [elilo] nenge uuwehame. Oshoka iikulu oya hula po.” (Ehololo 21:4) Aantu mboka haya vulika noya taamba ko ohole ye, otaya ka nyanyukilwa onkalamwenyo ombwanawa monakuyiwa.

12. “Omuyuuki” omuntu a tya ngiini?

12 Ombiimbeli otayi ti: “Undja omuyuuki, ngu u ndhindhilike omunamikalo; omunambili oku na oluvalo olwindji, ihe aalunde otaa dhimwa po sheke, noyana otaa yonwa po thilu.” (Episalomi 37:37, 38) “Omuyuuki” ota tseya Jehova nOmwana, nokuvulika kehalo lyaKalunga. (Lesha Johannes 17:3.) Oha kala lela i itaala kutya “uuyuni niinima ayihe yi li mo mbyoka aantu ye yi hokwa, otayi hulu po. Ihe ngoka ta longo shoka Kalunga a hala, ota kala e na omwenyo aluhe.” (1 Johannes 2:17) Molwaashoka ehulilo oli li popepi, osha simanenena tu kale twi ‘inekela Omuwa, nokuvulika kiipango ye.’ — Episalomi 37:34.

 SHOKA KALUNGA A NINGI U ULIKE OHOLE YE

13. Kalunga okwa ningi oshinima oshinene shini a holole ohole ye?

13 Nonando inatu gwanenena, otatu vulu okukala hatu vulika kuKalunga. Otatu vulu wo okukala nekwatathano lyopothingo naJehova, omolwekuliloyambo lyaJesus, oshinima oshinene shoka Kalunga a ningi a holole ohole ye. Jehova okwa gandja ekuliloyambo, opo mboka haya vulika ya vule okumona ompito yokumangululwa mo muulunde nomeso. (Lesha Aaroma 5:12; 6:23.) Jesus okwa kala omudhiginini kuKalunga uule wethimbo ele megulu. Onkee Jehova okwa li e na einekelo kutya Omwana ota kala omudhiginini kombanda yevi. Tate yetu omunahole, Jehova, okwa li e ehamekwa noonkondo sho a li a tala Omwana ta hepekwa. Ihe nonando ongawo, Jesus okwa ambidhidha nuudhiginini okupangela kwaKalunga, noku ulike kutya omuntu a gwanenena ota vulu okukala omudhiginini.

Omolwohole ye, Kalunga okwa tumu Omwana (Tala okatendo 13)

14, 15. Eso lyaJesus olya pe aantu ompito yashike?

14 Nonando okwa li ta makelwa, Jesus okwa kala omudhiginini nokwa zimina kutya Jehova oye e na uuthemba wokupangela. Onkee, natu pandule Jesus sho a futu ofuto ya gwana okupitila meso lye, molwaashoka okwa pe aantu ompito ya vule okukala nomwenyo sigo aluhe muuyuni uupe waKalunga. Omuyapostoli Paulus okwa popi ohole ndjoka Jehova naJesus yu ulika okupitila mekuliloyambo. Okwa ti: “Ano manga twa li twaa na nando etegelelo lyasha, Kristus okwa sile aakolokoshi pethimbo lyu uthwa kuKalunga. Osho oshinima oshidhigu, omuntu gwontumba ngele ta si omolwomuyuuki. Eeno, pamwe otashi vulika, omuntu gwontumba ta si omolwomuntu gumwe omwaanawa. Ihe Kalunga okwe tu hololele kutya oku tu hole, Kristus sho a si peha lyetu, manga twa li aalunde.” (Aaroma 5:6-8) Omuyapostoli Johannes okwa nyola a ti: “Kalunga okwe tu hololele ohole ye, sho a tumu Omuvalwa gwe awike muuyuni, opo tu kale tu na omwenyo omolwe. Ohole hayo ndjoka kutya ando twa li tu hole Kalunga, aawe, ihe Kalunga oye kwa li e tu hole tango nokwa tumu Omwana, a  ninge eyambo lyokudhima po oondjo dhetu.” — 1 Johannes 4:9, 10.

15 Jesus okwa ti: “Oshoka osho ngeyi Kalunga a kala e hole uuyuni, oye a gandja Omwana awike, opo shaa ngoka te mu itaale, kaa kane, ihe a kale e na omwenyo gwaaluhe.” (Johannes 3:16) Nonando kasha li oshipu kuJehova, okwa gandja Omwana a ninge ekuliloyambo. Shika oshu ulike kutya Jehova oku hole aantu. Nohole ndjoka otayi kalelele. Omuyapostoli Paulus okwa nyola a ti: “Oshoka ondi shi shili kutya kaku na nando oshinima shimwe tashi vulu oku tu topola ko kohole yaKalunga: haeso nenge omwenyo, haayengeli nenge aapangeli naanankondo yomegulu, haambyoka yongashingeyi nenge mbyoka tayi ke ya, hauyuni wokombanda nenge wokohi. Meshito kamu na sha tashi vulu oku tu topola ko kohole yaKalunga yi li muJesus Kristus, Omuwa gwetu.” — Aaroma 8:38, 39.

UUKWANIILWA WAKALUNGA OTAWU PANGELE NGASHINGEYI

16. Uukwaniilwa wopaMesiasa oshike, nOmukwaniilwa gwawo ngoka Jehova a langeka po olye?

16 Epangelo lyaKalunga nenge Uukwaniilwa wopaMesiasa nawo owu ulika kutya Jehova oku hole aantu. Ngiini mbela? Jehova okwa langeka po nale Jesus Kristus, Omupangeli ngoka e hole aantu nokwa gwana okupangela. (Omayeletumbulo 8:31) Oshikwawo, aantu 144 000 oya hogololwa ya ka pangele pamwe naKristus megulu. Ngele oya yumudhwa, otaya ka ya nontseyo yaashoka ya kala ye shi, sho ya li aantu yopanyama. (Ehololo 14:1) Manga Jesus a li kombanda yevi, Uukwaniilwa owo wa li ehuku melongo lye, nokwa li a longo aalongwa ye ya galikane ngeyi: “Tate yetu, ngu u li megulu: Edhina lyoye nali yapulwe, Oshilongo shoye nashi ye, Ehalo lyoye nali gwanithwe kombanda yevi wo ngaashi megulu.” (Mateus 6:9, 10) Otwa tegelela nomutima aguhe omagalikano goludhi ndoka ga gwanithwe, sho Uukwaniilwa waKalunga tawu ka etela aantu omalaleko nuuyamba ogendji.

17. Hokolola eyooloko ndyoka li li pokati kokupangela kwaJesus nokupangela kwaantu.

17 Ope na eyooloko enene pokati kokupangela kwaJesus kwopahole nokupangela kwaantu. Okupangela kwaantu okwe etitha iita moka mwa dhipagelwa aantu omamiliyona. Ihe Omupangeli gwetu, Jesus, oku tu hole shili noha holele uukwatya waKalunga, unene tuu ohole ye. (Ehololo 7:10, 16, 17) Jesus okwa ti: “Ileni kungame amuhe mwa vulwa nomwa humbatekwa uudhigu, ongame notandi mu pe evululuko. Itsikeni ondjoko yandje, ne mu tseye ndje, oshoka ongame omunambili nomomutima ondi ishonopeka; notamu imonene evululuko. Oshoka ondjoko yandje ombwanawa nomutenge gwandje omupu.” (Mateus 11:28-30) Euvaneko kali shi tuu ewanawa ndono!

18. (a) Oshike sha kala tashi ningwa okuza mo 1914? (b) Oshike tashi ka kundathanwa moshitopolwa tashi landula?

18 Ombiimbeli oye shi popya kutya Uukwaniilwa waKalunga owa tameke okupangela mo 1914 megulu. Okuza momumvo ngono, omwaalu gwahugunina gwaantu mboka taya ka pangela pamwe naJesus megulu ogwa kala tagu gongelwa, nosho wo “engathithi lyaantu” mboka taya ka hupa pehulilo lyuuyuni mbuka. Otaya ka kala muuyuni uupe. (Ehololo 7:9, 13, 14) Uunene wengathithi lyaantu owu thike peni? Kalunga okwa tegelela ya ninge shike? Shoka otashi ka kundathanwa moshitopolwa tashi landula.