Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Kotoba 2015

Mbela owu wete ngaa oshikaha shaKalunga monkalamwenyo yoye?

Mbela owu wete ngaa oshikaha shaKalunga monkalamwenyo yoye?

“Oshikaha shOmuwa otashi iholololele aantu ye.” — JESAJA 66:14, OB-1954.

OMAIMBILO: 65, 26

1, 2. Aantu yamwe ohaya dhiladhila ngiini kombinga yaKalunga?

AANTU oyendji inayi itaala kutya Kalunga oku na ko nasha neihumbato lyawo. Ohaya dhiladhila kutya ke na ko nasha nayo. Pashiholelwa, oshikungulu oshidhigu osha dhenge oshilongo shaFilipine muNovomba 2013. Omuleli gwoshilando shimwe oshinene moshilongo shoka okwa ti: “Kalunga okwa li a za po mbela.”

2 Yalwe ohaya dhiladhila kutya Kalunga ke wete shoka taya ningi. (Jesaja 26:10, 11; 3 Johannes 11) Nopethimbo lyomuyapostoli Paulus, aantu yamwe osho ya li haya dhiladhila ngaaka. Okwe ya popi a ti: ‘Oya dhini okunongela Kalunga.’ Oya li aakaanuuyuuki, aawinayi, aakolokoshi naanalwiho. —  Aaroma 1:28, 29.   

3. (a) Otu na okwiipula omapulo geni? (b) Uuna ‘oshikaha’ shaKalunga tashi popiwa mOmbiimbeli, oshike tashi popiwa?

3 Mbela tse ohatu dhiladhila ngiini? Otu shi kutya Tate Jehova oha mono ashihe shoka hatu ningi. Ihe mbela otwi itaala ngaa shili kutya oku na ko nasha natse? Mbela otu wete ngaa oshikaha she monkalamwenyo yetu? Ngele ‘oshikaha’ shaKalunga tashi popiwa mOmbiimbeli, otaku popiwa oonkondo dhe. Ohe dhi  longitha a kwathe aapiya ye nokusinda aatondi ye. (Lesha Deuteronomium 26:8.) Jesus okwa popi kutya opu na mboka “taa ka mona Kalunga.” (Mateus 5:8) Mbela ngoye ogumwe gwomaantu mboka? Mbela otatu “ka mona Kalunga” ngiini? Natu taleni kiiholelwa mOmbiimbeli, yaamboka ya mono oshikaha shaKalunga moonkalamwenyo dhawo, naamboka inaaye shi mona. Otatu ka longwa wo nkene eitaalo tali tu kwathele tu mone oshikaha shaKalunga.

OYA TINDI OKUMONA OSHIKAHA SHAKALUNGA

4. Omolwashike aatondi yoshigwana shaIsraeli ya tindi okumona oshikaha shaKalunga?

4 Aantu oyendji monakuziwa oya li ye na ompito yokumona nokuuva nkene Kalunga a li a kwathele Aaisraeli. Tate Jehova okwa li a longitha iikumithalonga a mangulule oshigwana she muEgipiti nokusinde aakwaniilwa oyendji mEvi lyEuvaneko. (Josua 9:3, 9, 10) Nonando aakwaniilwa oyu uvu noya mono shoka a ningi opo a hupithe oshigwana she, “oya gongala kumwe, ya hangane okukondjitha Josua nAaisraeli.” (Josua 9:1, 2) Jehova okwe etha aatondi yaIsraeli “ya kukutike” omitima dhawo, opo ye ya kondjithe. (Josua 11:20, yelekanitha OB-1954.) Ihe sho taya kondjitha Aaisraeli, oya li ye na ompito yokumona oshikaha shaKalunga. Pompito yimwe, molwoonkondo dhaJehova oonene, “etango olya kala lya mwena, nomwedhi inagu inyenga, sigo oshigwana sha sindi aatondi yasho.” (Josua 10:13) Aatondi oya sindika, oshoka oya tindi okwiitaala kutya Jehova oye ta kondjele oshigwana she.

Otu na okukonga oshikaha shaKalunga monkalamwenyo yetu

5. Omukwaniilwa omukolokoshi Ahab okwa tindi okwiitaala shike?

5 Konima yoomvula dhontumba, opwa li omukwaniilwa omukolokoshi Ahab, ngoka naye a tindi lwiikando okumona oshikaha shaKalunga. Elia okwe mu lombwele a ti: “Omume nenge omvula itayi ka loka momimvo ndhika tadhi ya, okuninga tandi shi ti.” (1 Aakwaniilwa 17:1) Omvula oya li owala itaayi ka loka koonkondo dhaKalunga, ihe Ahab okwa tindi oku shi itaala. Pompito ishewe yilwe, Ahab okwa mono sho Elia ta galikana kuJehova e te mu yamukula, sho a tumu omulilo gwa zi megulu. Hugunina, Elia okwa lombwele Ahab kutya Jehova ota ka lokitha omvula yi hulithe po oshikukuta. (1 Aakwaniilwa 18:22-45) Ahab okwa mono iikumithalonga ayihe mbika, ihe okwa tindi okwiitaala kutya okwa mono oonkondo dhaJehova. Iiholelwa mbika otayi tu longo shike? Otayi tu longo kutya otu na okukonga oshikaha shaKalunga monkalamwenyo yetu.

OYA MONO OSHIKAHA SHAKALUNGA

6, 7. Aagibeon nosho wo Rahab, oya li ya dhimbulula shike?

6 Aagibeon oya li ya yooloka ko kiigwana iikwawo, oshoka oya mono oshikaha shaKalunga. Inaya kondjitha Aaisraeli. Pehala lyaashono, oya li ya hala okupanga ombili nayo. Omolwashike mbela? Omolwaasho oya kundana kombinga yaJehova naayihe mbyoka a ningi. (Josua 9:3, 9, 10) Oya ningi oshinima oshiwanawa, sho ya dhimbulula kutya Jehova oye a li ta kondjele Aaisraeli.

7 Rahab naye okwa li a mono oshikaha shaKalunga. Nonando ka li Omuisraeli, oku uvu nkene Jehova a mangulula oshigwana she muEgipiti.  Sho oondaadhi mbali dhe ya megumbo lye, okwe dhi lombwele a ti: “Ondi shi shi kutya Omuwa okwa gandja evi ndika miikaha yeni.” Rahab okwa li i itaala kutya Jehova ota vulu oku mu hupitha pamwe negumbo lye. Oku ulike eitaalo lye, nonando okwa li e shi shi kutya shika otashi vulika shi mu tulithe moshiponga. —  Josua 2:9-13; 4:23, 24.

8. Aaisraeli yamwe oyi inyenge ngiini, sho ya mono oshikaha shaKalunga?

8 Aaisraeli yamwe inaya ninga ngaashi Omukwaniilwa omukolokoshi Ahab. Sho ya mono omulilo tagu zi megulu oya dhimbulula kutya ogwa tumwa kuKalunga, opo a yamukule egalikano lyaElia. Oyi igidha ya ti: “Omuwa oye Kalunga!” (1 Aakwaniilwa 18:39) Osha li she ya yelela kutya oya mono oonkondo dhaKalunga.

9. Ongiini tatu vulu okumona Jehova noshikaha she kunena?

9 Otwa zi nokutala kiiholelwa iiwanawa niiwinayi, mbyoka tayi tu kwathele tu uve ko shoka ‘okumona Kalunga’ nenge okumona oshikaha shaKalunga tashi ti. Sho tatu ende tatu tseya Jehova nomaukwatya ge, otatu ka mona oshikaha she ‘nomeho getu gokomwenyo.’ (Aaefeso 1:18) Shika otashi tu inyengitha tu holele aapiya ye aadhiginini mboka ya li ko nale naamboka ye li ko ngashingeyi, mboka ya mona nkene Jehova a kala ta kwathele oshigwana she. Ihe mbela opu na ngaa shoka tashi holola kutya Kalunga ota kwathele oshigwana she kunena?

OSHIKAHA SHAKALUNGA NONENA OSHI IWETIKILE

10. Otu shi shi ngiini kutya Tate Jehova ota kwatha aantu nonena? (Tala kethano lyopetameko.)

10 Opu na uumbangi wa gwana kutya sigo onena Jehova ota kwathele aapiya ye. Ohatu uvu omahokololo gaamboka ya galikana kuKalunga  e ya kwathe e te ya yamukula. (Episalomi 53:2) Pashiholelwa, omumwatate Allan okwa tsakanekele omukiintu gumwe, sho a li tu uvitha mokantuntu okashona moFilipine. Omukiintu sho e mu mono okwa tameke okulila. Allan ota ti: “Ongula yesiku ndyoka, omukiintu ngoka okwa li a galikana kuJehova, opo Oonzapo dhi ye puye.” Sho omukiintu ngoka a li omugundjuka, okwa li ha konakona Ombiimbeli nOonzapo. Ihe ekonakono lye olya hulu, sho a hokanwa e ta tembukile kokantuntu hoka. Okwa li a gumwa komutima shili, sho Kalunga a yamukula egalikano lye meendelelo. Meni owala lyomvula yimwe, okwi iyapulile Jehova.

Mbela oto kongo omikalo moka to vulu okumona oshikaha shaJehova monkalamwenyo yoye? (Tala okatendo 11-13)

11, 12. (a) Jehova ota kwathele ngiini aapiya ye? (b) Yelitha nkene Jehova a kwathele omumwameme gumwe.

11 Aapiya yaJehova oyendji oya mona oshikaha she, nkene she ya kwathela ya ethe po iilonga ya nyata ngaashi okuhila omakaya, okulongitha iingangamithi nenge okutala omathano giipala. Yamwe oya ti kutya oya kambadhala oku shi ninga kuyo yene, ihe inaya pondola. Ihe sho ya pula Jehova e ya kwathele, okwe ya pe “oonkondo” ndhoka ya pumbwa e taya etha po iilonga mbyoka. —  2 Aakorinto 4:7; Episalomi 37:23, 24.

Jehova oha kwathele aapiya ye, yi idhidhimikile oonkalo oondhigu ndhoka ye li mudho

12 Jehova oha kwathele wo aapiya ye, yi idhidhimikile oonkalo oondhigu ndhoka ye li mudho. Shika osho sha ningilwa omumwameme Amy. Okwa li a pewa oshinakugwanithwa shokutunga Oshinyanga shUukwaniilwa negumbo lyaatumwa, mokantuntu okashona ke li mEfuta lya Mwena. Amy okwa li ha zi mokandunda okashona mohotela nokwa li ha kala a yuulukwa kegumbo. Olundji olusheno olwa li halu kala lwa dhima, nomeya oga li haga kala ga pata. Omanga omapandaanda ga li haga kala ga yelulwa. Gwo nomuthigululwakalo gwaakalimo ogwa li gwa yooloka ko kugwe. Esiku limwe, okwa yamukula nayi omumwameme ngoka ta longo naye muukalele. Okwa li u uvite nayi noonkondo sho e shi ningi. Sho a yi mokandunda ke moka mwa li mwa luudha, okwa galikana kuJehova e mu kwathele. Olusheno sho lwa galuka, okwa tameke okulesha Oshungolangelo tayi popi kombinga yegandjo lyoonzapo posikola yaGilead. Oya li tayi kundathana naanaa omaupyakadhi ngoka a taalela. Amy okwa ti: “Onda li ndi wete kutya Jehova oye ta popi nangame uusiku mboka. Onda li nda tsuwa omukumo ndi tsikile noshinakugwanithwa shandje.” —  Episalomi 44:25, 26; Jesaja 41:10, 13.

13. Oshike tashi ulike kutya Jehova okwa kwathela oshigwana she shi popile uuthemba washo wokuuvitha?

13 Jehova okwa kwathela wo oshigwana she shi popile nokukoleka onkundana ombwanawa paveta. (Aafilippi 1:7) Pashiholelwa, sho omapangelo gamwe ga kambadhala okukankeka iilonga yokuuvitha, otwa li twi ipopile mompangu. Muuyuni awuhe, otwa sindana iipotha 268 mompangu onene. Iipotha 24 yomuyo otwe yi sindana okuza mo 2000 mOmpangu yUuthemba wOmuntu yaEuropa. Osha yela kutya kapu na ngoka ta vulu oku ya moshipala oshikaha shaKalunga. —  Jesaja 54:17; lesha Jesaja 59:1.

14. Oshike ishewe tashi tu ulukile kutya Kalunga oku li pamwe noshigwana she?

14 Shoka tashi tu ulukile ishewe kutya Kalunga ote tu kwathele noshikaha she, osho iilonga  yokuuvitha onkundana ombwanawa muuyuni awuhe. (Mateus 24:14; Iilonga 1:8) Uukumwe mboka wu li mokati kaapiya yaJehova ya za miigwana ayihe, nawo owu li po kekwatho lyaJehova. Uukumwe mbuka owi ikalekelwa shili. Aantu mboka nokuli ihaaya longele Jehova oye shi zimina taya ti: “Eeno, Kalunga oku li mpaka mokati keni.” (1 Aakorinto 14:25) Otu na uumbangi owundji mboka tawu ulike kutya Kalunga oku li pamwe noshigwana she. (Lesha Jesaja 66:14.) Mbela ongiini kombinga yoye? Owu wete ngaa oshikaha shaJehova monkalamwenyo yoye?

MBELA OWU WETE NGAA OSHIKAHA SHAJEHOVA MONKALAMWENYO YOYE?

15. Omolwashike omathimbo gamwe tashi vulika ihaatu mono oshikaha shaJehova monkalamwenyo yetu?

15 Omathimbo gamwe otashi vulika kaatu mone oshikaha shaKalunga monkalamwenyo yetu. Omolwashike mbela? Oshoka uuna tu na omaupyakadhi ogendji, otashi vulika tu dhimbwe kutya Jehova okwe tu kwathela nale moonkalo odhindji. Shika osho sha ningilwa omupolofeti Elia. Okwa li omulaadhi, ihe sho omukwaniilwakiintu Isebel a tokola e mu dhipage, okwa kwatwa kuumbanda. Pethimbo mpoka okwa dhimbwa kutya Jehova okwe mu kwathelele nale. Ombiimbeli otayi popi kutya Elia okwa li a hala okusa. (1 Aakwaniilwa 19:1-4) Openi a li ta vulu okumona ekwatho nuulaadhi? Okwa li a pumbwa okutala kuJehova. —  1 Aakwaniilwa 19:14-18.

16. Ongiini tatu vulu okumona oshikaha shaKalunga, uuna tu na omaupyakadhi?

16 Job naye okwa li ti ipula unene nomaupyakadhi ge. Ka li a tala ko onkalo ye ngaashi Jehova. (Job 42:3-6) Omathimbo gamwe, otashi vulika natse tu mone oshidhigu okumona Kalunga omolwomaupyakadhi getu. Oshike tashi vulu oku tu kwathela tu mone shoka Kalunga he tu ningile? Otu na okutedhatedha kwaashoka Ombiimbeli tayi ti  kombinga yomaupyakadhi getu. Opo nee Jehova ota ka ninga Omuntu gwolela kutse, notatu ka vula natse okupopya tatu ti: “Nale onda li nde ku uvu omufofoto, ihe ngashingeyi ondi ku wete nomeho gandje mwene.”

Mbela Jehova ote ku longitha wu kwathele yalwe ye mu mone? (Tala okatendo 17, 18)

17, 18. (a) Ongiini to vulu okumona oshikaha shaKalunga monkalamwenyo yoye? (b) Gandja ehokololo ndyoka tali ulike kutya Tate Kalunga ote tu kwathele nonena.

17 Ongiini to vulu okumona oshikaha shaJehova monkalamwenyo yoye? Natu taleni kiiholelwa itano. Shotango, otashi vulika wu kale wu uvite kutya Jehova oye e ku kwathele wu mone oshili. Oshitiyali, otashi vulika to dhimbulukwa wa ya kokugongala, e to pulakene koshipopiwa shoka she ku guma e to ti: “Osho naanaa nda li nda pumbwa shi.” Oshititatu, otashi vulika wa mona nkene Jehova a yamukula limwe lyomomagalikano goye. Oshitine, otashi vulika wa li wa hala okulonga oshindji miilonga yaJehova nowa mono nkene e ku kwathele wu adhe elalakano lyoye. Oshititano, otashi vulika we etha po iilonga yoye, oshoka oya li tayi kutha po ethimbo lyoye olindji lyokulongela Jehova. Konima owa mono sho wa gwanithilwa po euvaneko lyaKalunga ndyoka ta li ti: “Itandi ku thigi po.” (Aahebeli 13:5) Ngele otu na ekwatathano lya kola naJehova, otatu ka mona nuupu oshikaha she monkalamwenyo yetu.

18 Omumwameme Sarah ngoka ha zi moKenya, okwa ti: “Onda galikana kombinga yomukonakonimbiimbeli gwandje ngoka nda li ndu uvite kutya ina lenga ekonakonombiimbeli lye. Onda pula Jehova, ngele otandi vulu oku li hulitha po. Ihe konima ngaa sho nda ti ‘Amen,’ ongodhi yandje yo otayi lili. Omukonakonimbiimbeli gwandje oye a li ta dhenge a pule ngele otatu vulu okuya pamwe kokugongala. Onda li nda kumwa noonkondo!” Ngele otwa kongo omikalo moka Kalunga he tu kwatha, ota tu ka mona oshikaha she. Omumwameme Rhonna ngoka ha kala moAsia, ota ti kutya ohashi pula ethimbo okumona nkene Jehova te tu kwathele monkalamwenyo yetu. Okwa gwedha ko a ti: “Uuna we shi ningi, oto ka kala wa kumwa okumona kutya nani oku na ko nasha natse.”

19. Oshike ishewe tu na okuninga, opo tu mone Kalunga?

19 Jesus okwa popi kutya mboka “taa ka mona Kalunga,” oye na okukala “ya yela moomwenyo dhawo.” (Mateus 5:8) Shoka osha hala okutya ngiini? Osha hala okutya otu na okukaleka omadhiladhilo getu ga yogoka nokweetha po oshilonga kehe sha puka. (Lesha 2 Aakorinto 4:2.) Moshitopolwa shika, otwa mona kutya ngele otwa hala okumona Kalunga, otu na okutsikila okukoleka ekwatathano lyetu naye. Moshitopolwa tashi landula, otatu ka kundathana nkene eitaalo tali vulu oku tu kwathela tu mone lela oshikaha shaJehova monkalamwenyo yetu.