Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Septemba 2015

Ongiini tatu vulu okuulika kutya otu hole Jehova?

Ongiini tatu vulu okuulika kutya otu hole Jehova?

“Otse otu hole, oshoka Kalunga okwa kala e tu hole tango.” —  1 JOHANNES 4:19.

OMAIMBILO: 56, 138

1, 2. Jehova okwe tu longo ngiini tu kale tu mu hole?

OPO omusamane a longe oyana momukalo gwa dhenga mbanda, oku na okutula po oshiholelwa. Uuna tu ulukile oyana ohole, ote ya longo nkene ye na okukala ye hole aantu. Tate yetu Jehova, oye awike e tu hole unene, e vulithe kehe gumwe. Onkee ano, otu shi nkene tu na okuulika ohole, “oshoka Kalunga okwa kala e tu hole tango.” —  1 Johannes 4:19.

2 Omomikalo dhini Jehova e tu ulukila kutya “okwa kala e tu hole tango”? Ombiimbeli otayi yamukula tayi ti: “Kalunga okwe tu hololele kutya oku tu hole, Kristus sho a si peha lyetu, manga twa li aalunde.” (Aaroma 5:8) Tate yetu omunahole, Jehova, okwa yamba po Omwana, opo e tu hupithe muulunde neso. Omagano ngaka gondilo ogo ge shi ningi tashi shiwa, opo tu vule okukala nekwatathano lyopothingo naJehova notu mu ulukile kutya otu mu hole. Sho Jehova a gandja eyambo ndyoka enene, okwe tu tulile po oshiholelwa. Okwe tu longo tu kale tu na ohole yokwaaihola mwene nokukala tu hole okugandja. —  1 Johannes 4:10.

3, 4. Ohatu ulike ngiini kutya otu hole Kalunga?

 3 Ohole oyo uukwatya waJehova wa dhenga mbanda. Nomolwaashono tatu vulu okuuva ko kutya omolwashike Jesus a popi kutya oshipango oshinene kiikwawo osho: “Hola Omuwa Kalunga koye komutima gwoye aguhe nokomwenyo gwoye aguhe nokomadhiladhilo goye agehe nonoonkondo dhoye adhihe.” (Markus 12:30) Jehova okwa hala tu kale tu mu hole ‘nomutima gwetu aguhe.’ Otashi ke mu ehameka, ngele otwa kala tu hole sha shilwe nenge omuntu gulwe, shi vulithe puye. Ohole yetu yoku mu hola, kayi na owala okukala momitima dhetu. Ihe okwa tegelela tu kale tu mu hole ‘nomadhiladhilo getu agehe nonoonkondo dhetu adhihe.’ Sha hala okutya otu na okuulika kutya otu mu hole mwaashoka hatu dhiladhila nomiilonga yetu. —  Lesha Mika 6:8.

4 Onkee ano, otu na okukala tu hole Jehova thiluthilu. Ngele otwa hala okuulika kutya otu mu hole shili, oye tu na okutula pondondo yotango monkalamwenyo yetu. Moshitopolwa sha zi ko, otwa kundathaneni omikalo ne, moka Jehova hu ulukile oyana kutya oku ya hole noonkondo. Ngashingeyi natu ka kundathaneni nkene tatu vulu okukokeka ohole yetu yoku mu hola, nankene tu na oku yi mu ulukila.

ULUKILA JEHOVA KUTYA OWA PANDULA

5. Ngele tatu dhiladhila kwaashihe shoka Jehova e tu ningila, ohatu inyengithwa tu ninge shike?

5 Uuna omuntu e ku pe omagano, otashi vulika ho ulike kutya owa pandula. Molwaashoka owa lenga shili omagano ngoka, oto ke ga kwata nawa. Jakob okwa nyola a ti: “Oshipewa kehe oshiwanawa nomagano kehe ga gwana ga pwa ohaga zi kuKalunga, Omushiti gwomaminikilo gokegulu. Puye kapu na nando elunduluko nenge epingathano lyuuyelele nomilema.” (Jakob 1:17) Otwa pandula shili sho Jehova he tu pe ashihe shoka twa pumbwa, tu kale nomwenyo notu kale twa nyanyukwa. Otu wete kutya oku tu hole shili. Natse otwa hala oku mu ulukila kutya otu mu hole wo. Mbela nangoye osho ngaa ho kala wu uvite ngawo?

6. Aaisraeli oya li ye na okuninga shike, ngele oya hala Jehova a tsikile noku ya yambeka?

6 Aaisraeli oya li ya pewa kuJehova omagano ogendji omawanawa. Uule woomvula omathele, Jehova okwa kala te ya wilike okupitila moompango dhe noku ya pa kehe shimwe ya pumbwa, opo ya kale momwenyo. (Deuteronomium 4:7, 8) Aaisraeli oya li taya vulu okuulika olupandu lwawo, mokukala haya vulika koompango ndhoka. Pashiholelwa, uuna taya yambele Jehova, oya li ye na okugandja “oshipe oshihogololwa shomepya” lyawo. (Eksodus 23:19, OB-1954) Aaisraeli oya li ye shi kutya Jehova ota ka tsikila noku ya yambeka, ngele oya vulika kuye nokugandja shoka oshiwanawaelela. —  Lesha Deuteronomium 8:7-11.

7. Ongiini tatu vulu okulongitha ‘oshipe shiilikolwa’ yetu, tu ulukile Jehova ohole yetu?

7 Natse otatu vulu okuulukila Jehova ohole yetu, mokukala hatu mu pe ‘moshipe shiilikolwa’ yetu. (Omayeletumbulo 3:9) Otatu vulu oku shi ninga mokukala hatu longitha shoka tu na, opo tu mu simaneke. Pashiholelwa, otatu vulu okugandja oshimaliwa, opo tu ambidhidhe iilonga yUukwaniilwa megongalo lyetu nomuuyuni awuhe. Atuheni otatu vulu okulongitha shoka tu na, opo tu ulike kutya otu hole Jehova, kashi na nduno mbudhi kutya otu na oshindji nenge oshishona. (2 Aakorinto 8:12) Ihe opu na wo omikalo dhilwe moka tatu vulu okuulukila Jehova kutya otu mu hole.

Ngele otwi inekela Jehova shili, otatu ke mu ulukila kutya otu mu hole

8, 9. Omomukalo ishewe guni tatu vulu okuulukila Jehova kutya otu mu hole? Mike naanegumbo lye oya li ya tokola okuninga shike?

 8 Jesus okwe tu longa tu pitithe komeho Uukwaniilwa nokaatu kale tu na oshimpwiyu shiikulya nenge shomizalo. Tate yetu okwe tu uvanekela oku tu pa ashihe shoka twa pumbwa. (Mateus 6:31-33) Otwi inekela Jehova notu shi kutya ota ka gwanitha po euvaneko ndyoka. Otu shi kutya ngele owu hole omuntu shili, oho kala we mu inekela. Ngele otwi inekela Jehova shili, otatu ke mu ulukila kutya otu mu hole. (Episalomi 143:8) Otashi vulika twi ipule ngeyi: ‘Mbela oompangela dhandje, omukalo moka handi longitha ethimbo lyandje noonkondo dhandje, ohagu ulike ngaa shili kutya ondi hole Jehova? Mbela ondi inekela ngaa Jehova oye a sile oshimpwiyu oompumbwe dhandje dhesiku kehe?’

9 Omumwatate Mike naanegumbo lye, oya kala yi inekela Jehova. Sho Mike a li omugundjuka, okwa li a hala oku ka uvithila koshilongo shilwe. Konima sho a hokana e ta mono aanona yaali, okwa kala natango a hala okugwanitha po elalakano lye. Mike naanegumbo lye oya lesha kombinga yaamwatate naamwameme mboka taya kwathele hoka ku na ompumbwe onene. Konima oya tokola ya kuthe po iinima mbyoka tayi ya imbi ya ka uvithile koshilongo shilwe. Oya landitha po egumbo lyawo e taya tembukile mehala eshona. Mike okwa shonopeke omwaalu gwaalandi mongeshefa ye yokwoopaleka nokwa mono omukalo gulwe gwokukala ta longo natango nongeshefa ye okupitila mointaneta, nonando oku li koshilongo shilwe. Kungeyi, Mike naanegumbo lye oya li ya vulu okutembukila koshilongo shilwe, hoka haya nyanyukilwa uukalele noonkondo. Mike ota ti: “Otwa gwanithilwa po oohapu dhaJesus ndhoka dhi li muMateus 6:33.”

TEDHATEDHA KWAASHOKA JEHOVA TE KU LONGO

10. Omolwashike oshiwanawa okutedhatedha kwaashoka tatu ilongo kombinga yaJehova, ngaashi David a li ha ningi?

10 Omukwaniilwa David okwa nyola a ti: “Eyalelo otali holola esimano lyaKalunga; Ewangandjo otali eta puuyelele iilonga ye!” Okwa gwedha ko: “Ompango yOmuwa kaku na we; otayi nyashula omuntu. Omalombwelo gOmuwa oge shi kwiinekelwa, taga gandja uunongo kumboka taa u pumbwa.” Konima sho David a tedhatedha koompango dhaJehova nokeshito lye, okwa li a hedha popepielela naJehova nokwa li a hala oku mu ulukila ohole ye. David okwa ti: “Omuwa, omugameni nomuhupithi gwandje, taamba oohapu nomadhiladhilo gandje!” —  Episalomi 19:1, 7, 14.

11. Ongiini tatu vulu okulongitha ontseyo ndjoka Jehova e tu pa, tu mu ulukile kutya otu mu hole? (Tala kethano lyopetameko.)

11 Kunena Jehova ohe tu longo oshindji kombinga ye, elalakano lye, eshito lye nOohapu dhe. Aantu muuyuni otaya ladhipike aantu ya longwe, ihe elongo lyopombanda olundji ohali ya ningitha ya kanithe ohole yawo yokuhola Kalunga. Mepingathano naashono, Jehova ina hala owala tu kale tu na ontseyo, ihe okwa hala wo e tu kwathele tu kale tu na uunongo. Okwa hala tu longithe shoka twi ilonga, opo shi tu etele uuwanawa notu shi longe yalwe. (Omayeletumbulo 4:5-7) Pashiholelwa,  Jehova okwa hala tu kwathele aantu ya “tseye oshili” notu ya kwathele ya ka hupithwe. (1 Timoteus 2:4) Ohatu ulike kutya otu hole Jehova nosho wo aantu, mokulonga aantu oyendji ngaashi tashi vulika kombinga yUukwaniilwa waKalunga naashoka tawu ke ya ningila. —  Lesha Episalomi 66:16, 17.

12. Omumwameme gumwe gwomugundjuka, okwa ti ngiini kombinga yomagano ngoka a pewa kuJehova?

12 Aagundjuka nayo otaya vulu okutedhatedha kiinima ayihe mbyoka Jehova e ya pa naambyoka e ya longa. Omumwameme Shannon ota dhimbulukwa nkene a li u uvite, sho a li poshigongi shoshitopolwa, manga a li e na oomvula 11. Okamwayinakodha oka li ke na oomvula 10. Poshigongi shoka shi na oshipalanyolo “Tila Kalunga,” aagundjuka ayehe, Shannon nokamwayinakadhona ya kwatelwa mo, oya li ya pulwa yi ikuutumbile. Petameko Shannon okwa li a tila. Ihe konima okwa ka kala a kumwa, sho a mono omugundjuka kehe ta pewa okambo Questions Young People Ask — Answers That Work. Mbela okwa li u uvitile ngiini Jehova, omolwomagano ngoka omawanawa? Okwa ti: “Esiku ndyoka onda mono kutya nani Jehova Omuntu gwolela noku hole ndje shili noonkondo. Onda nyanyukwa shili, sho Kalunga ketu omuwanawa, Jehova, he tu pe omagano omawanawa kaaku na we!”

KALA HO PULAKENE, UUNA JEHOVA TE KU PUKULULA

13, 14. Otu na okwiinyenga ngiini, uuna Jehova te tu pukulula, nomolwashike?

13 Ombiimbeli otayi tu dhimbulukitha tayi ti: “Omuwa ota dhenge ngoka e hole, ngaashi he, omwana ngoka a hokwa.” (Omayeletumbulo  3:12) Ngele otwa pulakene uuna Jehova te tu pukulula e tatu etha e tu dheule, otatu ki ilonga okulonga shoka shi li mondjila e tatu kala tu na ombili. Ihe “pethimbo ndyoka tatu geelwa, kombinga yetu kashi shi enyanyu, aawe, oluhodhi.” (Aahebeli 12:11) Ihe mbela otu na okwiinyenga ngiini, uuna Jehova te tu pukulula? Inatu kala nando hatu ipwililike, uuna Jehova te tu pe omayele nenge tu kale twa yemata, uuna inaatu panda shoka twa lombwelwa. Otatu ka pulakena kuye e tatu ningi omalunduluko ngoka ga pumbiwa, oshoka otu mu hole.

Ngele otwa ningi omalunduluko nehalo ewanawa, opo tu nyanyudhe Jehova, otatu ulike kutya otu mu hole shili

14 Pethimbo lyaMaleaki, Aajuda oyendji kaya li ya pulakene kuJehova. Omayambo gawo kaga li ga hokiwa kuJehova, ihe kaya li ye na ko nasha. Onkene, Jehova okwe ya nyenyetele. (Lesha Maleaki 1:12, 13.) Okwa kala wo he ya pe omayele, ihe oya tindi oku mu pulakena. Onkee ano, Jehova okwe ya lombwele a ti: “Ngele itamu pulakene shoka te ti, nena otandi ke mu thinga. Otandi ka thinga iitaambwa yeni ayihe hayi mu kwatha.” (Maleaki 2:1, 2) Ano osha yela kutya ngele otwa kala tatu tindi okupulakena komayele gaJehova nenge tu kale tu uvite kutya inaga simana, otatu ka kanitha uukuume wetu naye.

Dhiladhila kwaashoka Jehova a hala, ihe haashoka sha taambiwa ko apuhe muuyuni (Tala okatendo 15)

15. Otu na okuyanda iikala ya tya ngiini, uuna tatu pukululwa?

15 Uuyuni waSatana otawu ladhipike aantu ya kale ye na uuntsa noyi ihole yo yene. Aantu oyendji kaye hole okupukululwa nenge okulombwelwa shoka ye na okuninga. Yamwe ohaya pulakene owala komayele, molwaashoka kaye na nkene. Ihe tse hasho tu na okukala ngaaka. Ombiimbeli otayi tu lombwele kutya inatu “faathana nonkalo yuuyuni mbuka.” Pehala lyaashono, natu uve ko shoka Jehova a hala tu ninge e tatu ningi shoka tashi mu nyanyudha. (Aaroma 12:2) Jehova oha longitha ehangano lye, opo e tu pe omayele pethimbo twe ga pumbwa. Pashiholelwa, ohatu dhimbulukithwa nkene aalumentu naakiintu tu na okwiihumbatelathana. Ohatu dhimbulukithwa wo nkene tu na okuhogolola mboka tu na okupanga uukuume nayo naashoka twa hala oku ka ninga, uuna tatu thuwa po. Ngele otwa taamba ko nehalo ewanawa omapukululo gaJehova e tatu ningi omalunduluko, opo  tu mu nyanyudhe, otatu ka ulika kutya otwa pandula sho he tu wilike notu mu hole shili. —  Johannes 14:31; Aaroma 6:17.

INEKELA KUTYA JEHOVA OTE KU KWATHA NOTE KU GAMENE

16, 17. (a) Omolwashike tu na okukambadhala okumona shoka Jehova ta dhiladhila, manga inaatu ninga omatokolo? (b) Aaisraeli oya li ya ningi shike, pehala lyokwiinekela Jehova?

16 Aanona ohaya kala yi inekela kutya aavali yawo ota ye ke ya kwathela noku ya gamena. Aavali nayo ohaya pula kaavali yawo ekwatho. Oye shi kutya nonando otaya vulu okuninga omatokolo kuyo yene, aavali yawo otaya vulu oku ya pa omayele omawanawa. Tate yetu Jehova, naye ohe etha tu ninge omatokolo tse yene. Ihe molwaashoka otwe mu inekela notu mu hole, ohatu pula aluhe ekwatho kuye nohatu ningi oonkambadhala tu mone kutya ye ota dhiladhila ngiini, manga inaatu ninga etokolo. Ngele otwa kala twi inekela Jehova, ote ke tu pa ombepo ye ondjapuki yi tu kwathele tu longe shoka shi li mondjila. —  Aafilippi 2:13.

17 Pethimbo lyaSamuel, Aaisraeli oya li ya sindika molugodhi kAafilisti. Pehala lyokupula Jehova kutya oshike ye na okuninga, oya ti: “Tu yeni, tu ka tale oshikethahangano shOmuwa kuShilo, opo e ende natse, e tu hupithe kaatondi yetu.” Oshizemo? “Ekanitho olya li enene: aakwiita Aaisraeli omayuvi omilongo ndatu oya dhipagwa. Oshikethahangano shaKalunga osha kwatwa po.” (1 Samuel 4:2-4, 10, 11) Aaisraeli oya li taya dhiladhila kutya ngele oya yi noshikethahangano kolugodhi, Jehova ote ke ya kwathela noku ya gamena. Ihe inaya pula Jehova e ya kwathele nenge ya kambadhale okumona kutya ye ota dhiladhila ngiini. Oya ningi shoka ya li ye wete shi li mondjila, nokonima oya ka mona iilanduliko iiwinayi noonkondo. —  Lesha Omayeletumbulo 14:12.

18. Ombiimbeli otayi ku longo shike kombinga yokukala wi inekela Jehova?

18 Omupisalomi ngoka e hole Jehova noonkondo nokwe mu inekela, okwa nyola a ti: “Otandi inekele Kalunga, nonatango otandi ke mu hambelela, omuhupithi gwandje naKalunga kandje. Muupongekwa mbuka omwenyo gwandje ogwa pongola, nokuye tandi gameke omadhiladhilo gandje.” (Episalomi 42:5-7) Mbela nangoye osho wu uvitile Jehova ngawo? Mbela owu uvite kutya Jehova okuume koye kopothingo nowe mu inekela? Oto vulu okugwedha ko keinekelo lyoye muye, wu kale we mu inekela shi vulithe nale. Ombiimbeli otayi ti: “Inekela Omuwa nomutima gwoye aguhe noino igameka koondunge dhoye mwene. Mu tseya moondjila dhoye adhihe, nena oondjila dhoye ote dhi yelekanitha.” —  Omayeletumbulo 3:5, 6.

19. Mbela oto ka ulukila ngiini Jehova kutya owu mu hole?

19 Jehova oye a kala e tu hole tango. Shoka oshe tu kwathele tu mone nkene natse tu na okukala tu mu hole. Natu kaleni aluhe hatu dhiladhila kwaashihe shoka e tu ningila nankene e tu hole unene. Natu mu ulukile kutya otu mu hole nomutima gwetu, nomwenyo gwetu, nomadhiladhilo getu nonoonkondo dhetu adhihe. —  Markus 12:30.