Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Auguste 2015

Natu kaleni twe li tegelela

Natu kaleni twe li tegelela

“Ngele sha fa tashi dhikala, shi tegelela ashike; otashi ka ningwa.” —  HABAKUK 2:3.

OMAIMBILO: 128, 45

1, 2. Einekelo lini aapiya yaJehova ye na, ngele tashi ya kokugwanithwa po kwomahunganeko ge?

OPU NA iiholelwa yaapiya yaJehova mboka ya kala ya tegelela neidhidhimiko omahunganeko ga gwanithwe po. Jeremia okwa li a tegelela Aababilonia ya hanagule po oshilongo shaJuda. Shoka osha ningwa mo 607 K.E.N. (Jeremia 25:8-11) Jesaja okwa li a hunganeke kutya Jehova ota ka galulila Aajuda koshilongo shawo, e ta gwedha ko ta ti: “Aanelago ayehe ye mu tegelela.” (Jesaja 30:18, OB-1954.) Mika okwa li wo a tegelela omauvaneko gaJehova ga gwanithwe po, sho a ti: “Ngame otandi tegelele Omuwa.” (Mika 7:7) Uule woomvula omathele, aapiya yaKalunga oya li ye na einekelo lya kola kutya Mesiasa nenge Kristus, ote ke ya. —  Lukas 3:15; 1 Petrus 1:10-12. *

2 Natse nena otwa tegelela omahunganeko kombinga yUukwaniilwa waJehova ga gwanithwe po. Jesus ngoka ta pangele mUukwaniilwa mboka, masiku ota ka hupitha aapiya  yaKalunga muuyuni mbuka wa kolokosha. Ota ka hanagula po aakolokoshi, e ta hulitha po okumona iihuna akuhe. (1 Johannes 5:19) Natu kale twa tegelela esiku lyaJehova li ye ethimbo kehe, nokuninga ngaashi tatu vulu, tu kale twi ilongekidha.

3. Ngele otwa kala twa tegelela ehulilo ethimbo ele, otashi vulika twi ipule epulo lini?

3 Otwa tegelela nondjuulukwe, uuna ehalo lyaKalunga tali ka gwanithwa kombanda yevi. (Mateus 6:10) Ihe ngele otwa kala twa tegelela uule woomvula odhindji, otashi vulika tu tameke okwiipula kutya: ‘Omolwashike tu na okukala twa tegelela kutya masiku, ehulilo otali ya?’

OMOLWASHIKE TU NA OKUKALA TWA TEGELELA EHULILO LI YE MASIKU?

4. Omolwashike sha simana tu kaleni twa ‘tonata’?

4 Jesus okwa lombwelele aalanduli ye, ya kale ya ‘tonata.’ Nomolwaashoka sha simana tu kale twa tegelela kutya masiku, ehulilo otali ya. (Mateus 24:42; Lukas 21:34-36) Oshikwawo, ehangano lyaJehova ohali kala tali tu dhimbulukitha tu kale twa “tegelela esiku lyaKalunga,” notu kale tatu dhiladhila komauvaneko gaJehova ge na ko nasha nuuyuni uupe. —  Lesha 2 Petrus 3:11-13.

5. Otu na omatompelo geni gokukala twa tegelela esiku lyaJehova?

5 Ngele aalanduli yaJesus methelemumvo lyotango oya li ye na okukala ya tegelela esiku lyaJehova, nena osha simana wo natse tu kale twe li tegelela. Omolwashike? Omolwaashoka endhindhiliko ndyoka Jesus a pe aalongwa ye, otali ulike kutya okwa ningi Omukwaniilwa gUukwaniilwa waKalunga mo 1914. Otali ulike wo kutya otu li momasiku gahugunina nenge ‘lwopehulilo lyuuyuni.’ Pashiholelwa, ngaashi Jesus a hunganekele, oonkalo muuyuni otadhi nayipala, nelaka etoye lyUukwaniilwa, otali uvithilwa aantu ayehe. (Mateus 24:3, 7-14) Jesus ina popya kutya omasiku gahugunina otaga kala ko ethimbo li thike peni. Onkene, otu na oku kala twa tegelela ehulilo li ye ethimbo kehe.

6. Otu shi shi ngiini kutya oonkalo muuyuni otadhi ka nayipala, shi vulithe ngashingeyi, sho ehulilo tali hedha popepi?

6 Mbela ‘ehulilo lyuuyuni’ otali ke ya owala monakuyiwa, ngele uuyuni wa nayipala nayinayi? Ombiimbeli otayi ti kutya aantu otaya ka dhimuka mokulonga uuwinayi “momasiku gahugunina.” (2 Timoteus 3:1, NW, 3:13; Mateus 24:21; Ehololo 12:12) Nonando onkalo ombwiinayi nale, otu shi shi kutya otayi ende natango tayi nayipala.

7. Otatu ilongo mo shike muMateus 24:37-39, kombinga yoonkalo dhuuyuni momasiku gahugunina?

7 Yamwe otashi vulika ya dhiladhile kutya manga ‘omahepeko ngoka omanene’ nenge uudhigu uunene inaawu tameka, moshilongo kehe otamu ka kala iita, omanga aantu oyendji taya ka kala ya kwatwa komikithi nokondjala. (Ehololo 7:14) Ihe ngele osho sha ningwa ngawo, nena aantu ayehe otaya ke shi mona kutya omahunganeko gOmbiimbeli otaga gwanithwa po. Naamboka kaaye na ko nasha naashoka Ombiimbeli tayi ti, otaye ke shi dhimbulula. Dhimbulukwa kutya Jesus okwa ti momasiku gahugunina, aantu oyendji ‘itaye ke shi tseya.’ Otaya ka kala yi ipyakidhila niinima yawo yonkalamwenyo, notaya ka kumwa okumona kutya esiku lyaJehova olya thikana. (Lesha Mateus 24:37-39.) Osha yela kutya katu na okutegelela oonkalo dhuuyuni dhi dhimuke,  manga ‘uudhigu uunene’ inaawu ya, opo ando aantu yi itaale kutya ehulilo oli li popepi. —  Lukas 17:20, NW; 2 Petrus 3:3, 4.

Otwi itaala kutya otu li pethimbo ‘lyehulilo lyuuyuni’

8. Molwaashoka otu shi kutya endhindhiliko lyaJesus otali gwanithwa, otwi itaala shike?

8 Endhindhiliko ndyoka Jesus a pe aalanduli ye, otali ya kwathele ya kale ya yelelwa kutya oye li pethimbo lini. Oya kala ya tonata. (Mateus 24:27, 42) Endhindhiliko ndyoka olya tameke okugwanithwa okuza mo 1914. Otwi itaala kutya otu li momasiku gahugunina, ano pethimbo ‘lyehulilo lyuuyuni.’ Jehova okwa tokola nale kutya uuyuni waSatana ote ke wu hanagula po uunake.

9. Omolwashike tu na okukala twa tegelela ehulilo?

9 Omolwashike tu na okukala twa tegelela ehulilo li ye? Omolwaashoka ohatu vulika kuJesus Kristus. Oshikwawo, otu wete nkene endhindhiliko ndyoka Jesus a pe aalanduli ye kombinga yomasiku gahugunina tali gwanithwa. Otwi itaala kutya ehulilo oli li popepi, hamolwaashoka hatu itaale kehe shimwe tatu lombwelwa, ihe omolwaashoka twa tompwa kutya omahunganeko gOmbiimbeli otaga gwanithwa. Otu na okukala twa tonata, manga twa tegelela ehulilo li ye.

OTU NA OKUTEGELELA ETHIMBO LI THIKE PENI?

10, 11. (a) Omolwashike Jesus a lombwele aalanduli ye ya ‘tonate’? (b) Jesus okwa lombwele aalanduli ye ya ninge shike, ngele oya mono ehulilo lya kala ko? (Tala kethano lyopetameko.)

10 Oyendji yomutse otwa kala tatu longele Jehova nuudhiginini uule woomvula odhindji, omanga twa tegelela nondjuulukwe esiku lyaJehova. Nonando otwa kala twa tegelela ethimbo ele, natu kale tu shi kutya esiku ndyoka oli li popepi. Otu na okwaadhika twi ilongekidha, sho Jesus te ke ya okuhanagula po uuyuni waSatana. Dhimbulukwa shoka Jesus a lombwelele aalanduli ye ya ninge, sho a ti: “Kotokeni ano, ne mu tonate, oshoka inamu tseya kutya ethimbo otali thiki uunake. Otaku ningi ngashika omulumentu te ke enda kiilongo e ta thigi po egumbo lye: Oye okwa thigile aamati ye, ya tonatele iinima ye ayihe. Kehe omumati okwe mu pe oshilonga she mu yeleka e ta lombwele omukeeleli gwoposheelo, a kale a tonata. Onkee ano tonateni, oshoka ina mu tseya, uuna mwene gwegumbo te ya, ngele ongulohi nenge opokati kuusiku opokwiiga kwekondombolo nenge okoongulasha. Opo nge te ya ombaadhilila, kee mu adhe mwa kotha. Shoka tandi mu lombwele, otandi shi lombwele wo aantu ayehe kutya: Tonateni!” —  Markus 13:33-37.

Eponokelo lyomalongelokalunga giifundja otashi vulika li ningwe ombaadhilila nomepathimo lyeho

11 Sho aalanduli yaJesus ya ndhindhilike kutya okwa tameke okupangela mo 1914, oya mono kutya ehulilo kali na esiku inaali ya. Onkene, oya nyatipala mokuuvitha, opo ya kale ye li ilongekidhila. Jesus okwa ti otashi vulika eke ye, kutya nduno “opokwiiga kwekondombolo nenge okoongulasha.” Ngele osho shi li ngawo, aalanduli ye oya li ye na okuninga po shike? Jesus okwa ti: “Tonateni!” Ano, nonando otu wete twa kala twa tegelela ethimbo ele, shika itashi ti kutya ehulilo oli li kokule nenge pamwe kutya itali ya pethimbo lyetu.

12. Habakuk okwa pula Jehova shike, naJehova okwe mu yamukula ngiini?

 12 Omuhunganeki Habakuk okwa li hu uvitha, omanga a tegelela neidhidhimiko ehanagulo lyaJerusalem. Aahunganeki yalwe, mboka ye mu tetekele, oya li wo yu uvitha etumwalaka ndyoka, uule woomvula odhindji. Habakuk okwa li e shi wete kutya muuyuni omu udha uukolokoshi nokwaanuuyuuki, shi vulithe nale. Okwa pula Jehova e mu kwathe, ta ti: “Omuwa, sigo uunake ndi na oku ku kugila ekwatho?” Nonando Jehova ina lombwela Habakuk kutya ehulilo otali ya uunake, okwe mu uvanekele ta ti: “Otashi ka ningwa.” Jehova okwe mu lombwele wo a ti: “Shi tegelela ashike.” —  Lesha Habakuk 1:1-4; 2:3.

13. Habakuk okwa li ta vulu okudhiladhila shike, nomolwashike shoka sha li tashi ka kala sha nika oshiponga?

13 Natu tye ando Habakuk okwa lolokele okutegelela ehulilo li ye, e ta ti: ‘Onda kala nda tegelela Jerusalem shi hanagulwe po uule woomvula odhindji. Ehulilo oli li kokule natango. Yalwe otaya vulu okuuvitha kombinga yehulilo ndyoka, ngame inandi pumbwa oku shi ninga.’ Ando oshike sha ningwa po, ngele ando osho a dhiladhilile ngawo? Ando ina kala we e holike kuJehova. Nongele okwa adhikile ini ilongekidha sho ehulilo lye ke ya, ando okwa kanitha omwenyo gwe.

14. Omolwashike tatu ka pandula Jehova, sho a kala te tu londodha tu kale twa tegelela ehulilo?

14 Kala ando wa fa wu iwete wu li muuyuni uupe. Iiningwanima ayihe mbyoka ya hunganekwa kombinga yomasiku gahugunina, oya ningwa naanaa ngaashi Jehova e shi hunganeka. Ngashingeyi owi inekela Jehova shi vulithe nale, nowi itaala kutya ota ka gwanitha po ashihe shoka e shi uvaneka. (Lesha Josua 23:14.) Owa pandula noonkondo sho Jehova e eta ehulilo pethimbo lyo opala, naasho a kala ta londodha oshigwana she shi kale she li tegelela. —  Iilonga 1:7; 1 Petrus 4:7.

NATU TSIKILENI OKUUVITHA, MANGA TWA TEGELELA

Mbela oho uvitha ngaa onkundana ombwanawa nuulaadhi? (Tala okatendo 15)

15, 16. Omolwashike tu na okuuvitha twa mana mo, momasiku ngaka gahugunina?

15 Ehangano lyaJehova otali tsikile noku tu dhimbulukitha tu kale twa pititha komeho okulongela Jehova monkalamwenyo yetu. Shika otashi ke tu kwathela tu kale twi ipyakidhila nokulongela Kalunga, notu mone kutya etumwalaka lyetu olye endelela.  Otwi itaala kutya endhindhiliko ndyoka Jesus a pe aalanduli ye otali gwanithwa ngashingeyi, nehulilo oli li popepi. Onkee ano, otwa pititha Jehova komeho monkalamwenyo yetu, nohatu uvitha onkundana ombwanawa yUukwaniilwa. —  Mateus 6:33; Markus 13:10.

16 Ngele otwa kala tatu uvithile yalwe onkundana ombwanawa, otatu ya kwathele ya ka hupithwe, sho uuyuni waSatana tawu ka hanagulwa po. Momumvo 1945, mefuta omwa li mwa ningwa oshiponga oshinene, sho osikepa yedhina Wilhelm Gustloff ya ningine mefuta. Aantu omayuvi oya sile mo. Omumwameme gumwe pamwe nomusamane gwe oya hupu moshiponga shoka. Ota dhimbulukwa kutya sho osikepa tayi ningine, opwa li omukulukadhi gumwe ta li li ta ti: “Oondjato dhandje! Yakwetu, oondjato dhandje! Omaliko gandje! Yakwetu, omaliko gandje omo ge li mosikepa mo. Iinima yandje ayihe nde yi kanitha!” Ihe aayendi pamwe naye oya li taya longo nuudhiginini, opo ya hupithe oomwenyo, oshoka oya li ye shi shoka sha simanenena. Nonena, oomwenyo odhi li moshiponga. Otwa hala okukala twi itula miilonga yokuuvitha mbyoka ye endelela, ngaashi aayendi mbeyaka ya li tayi idhipagele po, opo ya hupithe oomwenyo. Otu na okuninga ngaashi tatu vulu tu kwathele aantu ya ka hupe, sho uuyuni mbuka tawu ka hanagulwa po.

Ninga omatokolo gomondjila, e to kala wi itula mo miilonga yokuuvitha mbyoka ye endelela (Tala okatendo 17)

17. Omolwashike tu na okukala twi itaala kutya ehulilo otali ya ethimbo kehe?

 17 Otu shi wete kutya omahunganeko gOmbiimbeli otaga gwanithwa po, nehulilo lyuuyuni mbuka wa kolokosha oli li popepi. Otwa tegelela “ooniga omulongo” ‘noshilikama’ yi ponokele omalongelokalunga giifundja, ano Babiloni oshinene. (Ehololo 17:16) Inatu ifundjaleka kutya otapu ka pita ethimbo ele, opo shoka shi ka ningwe. Dhimbulukwa kutya Kalunga ota ka “pendutha moomwenyo dhawo ehalo lye,” opo ya ponokele omalongelokalunga giifundja. Shika otashi vulika shi ka ningwe ombaadhilila nomepathimo lyeho. (Ehololo 17:17) Ehulilo lyuuyuni waSatana oli li popepi lela. Onkee ano, otu na okuvulika kelondodho lyaJesus, ndyoka tali ti: “Ikotokeleni ne yene! Inamu etha, omadhiladhilo geni ga luudhikwe kiituthi nokuunkolwi nokiimpwiyu yopauyuni, opo esiku ndyoka lyaaye mu adhe ombaadhilila. Oshoka ota li ya ongomwigo.” (Lukas 21:34, 35; Ehololo 16:15) Natu kaleni twa tonata, twi ipyakidhila niilonga yaJehova, tu na omukumo kutya ota ka ‘popila kehe ngoka te mu inekele’ nenge e mu tegelela. —  Jesaja 64:4.

18. Epulo lini tali ka yamukulwa moshileshwa tashi landula?

18 Manga twa tegelela ehulilo lyuuyuni mbuka wa kolokosha, otu na okupulakena komayele gomulongwa Judas, ngoka a ti: ‘Ookuume kandje, itungileni kekankameno lyeitaalo lyeni eyapuki. Galikaneni moonkondo dhombepo ondjapuki, ne mwi ikaleke mohole yaKalunga mokutegelela kweni, Omuwa gwetu Jesus Kristus pasilohenda lye e mu pe omwenyo gwaaluhe.’ (Judas 20, 21) Ihe ongiini tatu vulu okuulika kutya otwa tegelela uuyuni uupe waKalunga, mboka wu li pokuya notwa halelela wu ye? Shika otatu ke shi kundathaneni moshileshwa tashi landula.

^ okat. 1 Opo wu mone omusholondondo gwomahunganeko gamwe gOmbiimbeli kombinga yaMesiasa, nankene ga gwanithwa po, tala embo Omalongo gashili gOmbiimbeli ogeni naanaa? epandja 200.