Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Juni 2015

Natu kaleni metsokumwe noohapu dhomegalikano lyOmuwa —  Oshitopolwa oshi-2

Natu kaleni metsokumwe noohapu dhomegalikano lyOmuwa —  Oshitopolwa oshi-2

“Ho yeni oku shi shi nale shoka mwa pumbwa.” —  MATEUS 6:8.

1-3. Omolwashike omumwameme gumwe a li u uvite kutya Jehova okwa li e shi shoka a pumbwa?

OMUMWAMEME LANA, omukokolindjila gwondjigilile, iha dhimbwa shoka sha li sha ningwa po sho a li ta talele po koNdowishi mo 2012. Sho e li meshina lyokolutenda u uka kokapale koondhila, okwa pula Jehova e mu kwathele a mone ompito yokuuvithila omuntu. Sho a thiki kokapale koondhila, okwa tseyithilwa kutya ondhila ye oya lata, notayi ke ya owala esiku lya landula ko. Lana okwa pula ekwatho kuJehova, molwaashoka iimaliwa ye oya li pokupwa po, nokwa li a pumbwa ehala mpoka ta ka lala uusiku mboka.

2 Sho Lana a mana okugalikana, oku uvu omuntu ta ti: “Owa uhala po ngaa Lana? Oto ningi shike muno?” Ngoka e mu popitha okwa li omumati gumwe a sikola naye. Omumati ngoka okwa li e li nayina nosho wo yinakulu, mboka ya li taye mu laleke, oshoka okwa li tayi koSouth Africa. Sho Lana e ya lombwele uupyakadhi mboka wa holoka po, yina yomumati nayinakulu oya hiya Lana a ka lale maandjawo. Oya kala taye mu pula  kombinga yeitaalo lye nosho wo yiilonga ye yuukokolindjila.

3 Sho kwa shi, Lana okwa kala natango ta yamukula omapulo gawo ge na sha nOmbiimbeli, sho taya li oshuumbululwa. Lana okwe ya pula ye mu pe ondjukithi yawo, opo ya talelwe po komuntu gulwe ngoka ta vulu okutsikila okuyamukula omapulo gawo. Lana osho a ka thika kegumbo nota tsikile natango nuukokolindjila. Oku uvite kutya Jehova oku uva omagalikano ge gaali, nokwa li e shi shoka a pumbwa e tu mu kwathele. —  Episalomi 65:2.

Inatu pumbwa okukala tatu ipula noompumbwe dhetu dhokonahiya

4. Iinima yini twa pumbwa, tatu ka kundathaneni moshitopolwa shika?

4 Ngele twa adhika kuupyakadhi ombaadhilila, ohashi kala oshipu okupula Jehova ekwatho, naye oha kala a nyanyukwa okupulakena komagalikano getu. (Episalomi 34:15; Omayeletumbulo 15:8) Ihe oshiholelwa shaJesus sha nkene tu na okugalikana, otashi tu longo kutya opu na iinima yilwe ya simanenena mbyoka twa pumbwa okupula megalikano. Moshitopolwa shika, otatu ka kundathaneni kombinga yiinima ine yi li megalikano lyOmuwa, mbyoka tayi tu kwathele tu kale aadhiginini kuJehova. —  Lesha Mateus 6:11-13.

“TU PA WO NENA OSHITHIMA SHETU SHESIKU KEHE”

5, 6. Omolwashike Jesus e tu longo tu pule “oshithima shetu,” nonando otu na iikulya oyindji?

5 Jesus ine tu longa tu pule “oshithima shandje,” ihe otu pule “oshithima shetu.” Victor, omutonatelishikandjo moAfrika, okwe shi yelitha ta ti: “Ohandi pandula Jehova unene sho ngame nomukulukadhi gwandje ihaatu kala tu na oshimpwiyu sha pitilila kutya iikulya yetu yesiku kehe otayi ka za peni, nenge kutya olye ta ka futa egumbo ndyoka hatu hiila. Aamwatate oyo haye tu sile oshimpwiyu pahole esiku kehe. Ihe ohandi galikanene mboka taye tu kwathele, ya vule okwiidhidhimikila oonkalo dhopamahupilo ndhoka oondhigu.”

6 Otashi vulika tu na iikulya oyindji, ihe aamwatate oyendji oya hepa. Omanga yalwe, oya gumwa kiiponga yopaunshitwe. Inatu ya galikanena owala, ihe natu ninge po sha, tu ya kwathele. Pashiholelwa, otatu vulu okutopola nayo shoka tu na. Otatu vulu wo okukala hatu ambidhidha iilonga yuuyuni awuhe mbyoka hayi longwa kaapiya yaJehova. Otwa tseya kutya omaambidhidho getu ohaga kwathele aamwatate mboka ye na ompumbwe. —  1 Johannes 3:17.

7. Jesus okwe tu longo ngiini kaatu sile “esiku lyanofu oshimpwiyu”?

7 Konima sho Jesus a longo aalongwa ye okugalikana, okwe ya longo wo kaaya pwile miinima yopamaliko. Okwa ti kutya ngele Jehova oha sile oshimpwiyu oongala dhokelundu, “ano ne mboka yeitaalo enkundi ite shi mu ningile ando? Inamu kala mu na oshimpwiyu mu tye: . . . ’Otatu zala shike?’” Okwa tsikile ko wo ta ti: “Inamu sila esiku lyanofu oshimpwiyu.” (Mateus 6:30-34) Inatu pumbwa okukala tatu ipula noompumbwe dhetu dhokonahiya. Pehala lyaashono, otu na okukala twa gwana naashoka hatu mono esiku kehe. Pashiholelwa, otatu vulu okugalikana tu mone ehala lyokukala, tu mone iilonga yomboloto tu sile aanegumbo yetu oshimpwiyu notu pewe owino tu ninge omatokolo ge li mondjila ge na sha nuukolele wetu. Ihe opu  na sha shilwe sha simanenena unene, shoka twa pumbwa okupula megalikano.

8. Oohapu dhaJesus kombinga yoshithima shetu shesiku kehe, otadhi tu dhimbulukitha shike? (Tala kethano lyopetameko.)

8 Oohapu dhaJesus kombinga yoshithima shetu shesiku kehe, otadhi tu dhimbulukitha wo sho a popi ta ti: “Omuntu ita kala e na omwenyo koshikwiila ashike, ihe okukehe ohapu tayi zi mokana kaKalunga.” (Mateus 4:4) Onkee ano, otu na okugalikana, opo Jehova a tsikile oku tu longa noku tu pa ashihe shoka twa pumbwa tu kale popepi naye.

“DHIMA PO OONDJO DHETU”

9. Omolwashike oondjo dhetu dha fa oongunga ndhoka twa lila omuntu?

9 Jesus okwa ti: “Dhima po oondjo dhetu.” (Mateus 6:12; Lukas 11:4) Okwe shi popi oshoka omayono getu oga fa oondjo nenge oongunga ndhoka twa lila omuntu. Mo 1951, Oshungolangelo oya fatululile tayi ti kutya uuna twa yono, ohatu kala twa fa tu nine Jehova oongunga. Otu na ongunga yokuulukila Jehova ohole nokuvulika kuye. Onkene ngele tatu yono, itatu pe Jehova shoka e na okupewa. Oshungolangelo oya tile kutya omolwomayono getu, oku na nokuli uuthemba wokuhulitha po uukuume wetu naye. Oya ti wo kutya: “Ngele otatu yono otashi ulike kutya katu hole Kalunga.” —  1 Johannes 5:3.

Otu na aluhe okupandula Jehova omolwomagano gondilo gekulilo

10. Omolwashike Jehova ta vulu okudhima po oondjo dhetu, naashoka oshi na oku tu uvitha ngiini?

10 Otwa pumbwa okudhiminwa po kuJehova esiku kehe. Nomolwaashono twa pandula  lela sho Jehova a gandja Jesus e tu kulile, opo tu dhiminwe po oondjo dhetu. Jesus okwe tu sile oomvula 2 000 dha ka pita, ihe sigo onena, otatu mono mo uuwanawa mekuliloyambo lye. Otu na aluhe okupandula Jehova omolwomagano ngoka gondilo. Kapu na gumwe gwomutse ta vulu okugandja ekuliloyambo ndyoka lya li lya pumbiwa, opo tu mangululwe mo muulunde neso. (Lesha Episalomi 49:7-9; 1 Petrus 1:18, 19.) Oohapu ndhoka dhi li megalikano lyOmuwa ndhoka tadhi ti kutya ‘dhima po oondjo dhetu,’ otadhi tu dhimbulukitha kutya ngaashi tse twa pumbwa ekulilo, aamwatate naamwameme nayo oye li pumbwa. Jehova okwa hala tu dhiladhile kombinga yekwatathano lyawo naye. Shika osha kwatela mo okuya dhimina po nziya, ngele ya yono kutse. Olundji omayono ngaka ohaga kala ga nathangwa, ihe ngele tatu dhimine po yalwe, otatu ulike kutya otu ya hole. Otatu ulike wo kutya otwa pandula sho Jehova he tu dhimine po. —  Aakolossa 3:13.

11. Omolwashike sha simana okudhimina po aantu ooyakwetu?

11 Omathimbo gamwe otashi vulika shi kale oshidhigu okudhimina po aantu ooyakwetu, molwaashoka inatu gwanenena. (Levitikus 19:18) Ngele otwa lombwele yalwe megongalo kombinga yaashoka omwiitaali omukwetu e tu yonena, otashi vulika shi teye po uukumwe wegongalo. Ngele otwe etha oshinima sha tya ngaaka shi tsikile, otashi ulike kutya katu na ko nasha nomagano gekuliloyambo ngoka Kalunga e tu pa. Itatu ka mona mo uuwanawa mugo. (Mateus 18:35) Ngele ihatu dhimine po yakwetu, Jehova naye ite tu dhimine po. (Lesha Mateus 6:14, 15) Oshikwawo, ngele otwa hala Jehova e tu dhimine po, katu na okukala hatu yono omayono ga kwata miiti. —  1 Johannes 3:4, 6.

Ngele owa hala Kalunga e ku dhimine po, owu na okudhimina po yalwe (Tala okatendo 11)

“INO TU FALA MEHONGOLOLO”

12, 13. (a) Oshike sha ningilwa Jesus konima sho a ninginithwa? (b) Omolwashike kaatu na okupa aantu yalwe ombedhi, uuna twi iyethele mehongololo nenge memakelo? (c) Jesus oku ulike shike sho a kala omudhiginini sigo omeso?

12 Oohapu ndhoka dhi li megalikano lyOmuwa ndhoka tadhi ti kutya “ino tu fala mehongololo,” otadhi tu dhimbulukitha shoka sha ningilwa Jesus konima owala sho a ninginithwa. Ombepo yaKalunga oye mu fala mombuga, “a ka makelwe komuhindadhi.” (Mateus 4:1; 6:13) Omolwashike Jehova a pitike shoka shi ningwe? Omolwaashoka Jehova okwa tumu Jesus kombanda yevi a kandule po ompata ndjoka ya holoka po konima sho Adam naEva ya tindi epangelo lyaJehova. Eihumbato lyawo olya pendutha omapulo ngoka ga pumbwa okuyamukulwa. Omapulo ngoka ongaashi, mbela opwa li epuko lyasha momukalo ngoka Jehova a shiti aantu? Mbela omuntu a gwanenena ota vulu ngaa okukala omudhiginini kuJehova, uuna ta makelwa “komuhindadhi”? Mbela otashi ka kala oshihwepo ngele aantu tayi i pangele yo yene? (Genesis 3:4, 5) Monakuyiwa, ngele omapulo ngoka ga mono omayamukulo ngaashi Jehova a hala, aantu ayehe megulu nokombanda yevi otaya ka tseya kutya omukalo gwaJehova gwokupangela ogwo dhingi.

Otatu vulu okukala aadhiginini kuJehova, nonando otu li moonkalo oondhigu shi thike peni

13 Jehova omuyapuki, noke na siku a hongolole  nenge a makele omuntu nuuwinayi. Pehala lyaashono, Satana oye “Omumakeli.” (Mateus 4:3) Oha kambadhala oku tu makela momikalo odhindji. Ihe kehe gumwe ota vulu okutokola a kondjithe omamakelo gaSatana nenge kee ga kondjithe. (Lesha Jakob 1:13-15) Sho Jesus a li ta makelwa kuSatana, okwa tindi omamakelo nopwaa na okwoongaonga, mokutotha mOohapu dhaKalunga. Jesus okwa li omudhiginini kuKalunga, ihe Satana ina sholola. Okwe mu thigi po “manga,” opo e ke mu makele nale. (Lukas 4:13) Shoka Satana a kambadhala okuninga inashi pondola, oshoka Jesus okwa kala aluhe ha pangelwa kuKalunga noha vulika kuye. Oku ulike kutya omuntu a gwanenena ota vulu okukala omudhiginini kuJehova, nonando oku kale moonkalo oondhigu shi thike peni. Ihe Satana oha kambadhala okuhongolola nenge okumakela aalongwa yaJesus, nangoye wa kwatelwa mo, opo kaaya vulike kuJehova.

Jehova oku na einekelo kutya otatu vulu okukala aadhiginini kuye nokwa hala oku tu kwathela

14. Oshike tu na okuninga ngele otwa hala okukondjitha omamakelo?

14 Omapulo ge na sha nokupangela kwaJehova ngoka ga pulwa kuSatana, oga pumbwa natango okuyamukulwa. Sigo onena, Jehova okwa pitika Satana e tu makele. Ihe Jehova haye he tu “fala mehongololo” nenge memakelo. Oku na einekelo kutya otatu vulu okukala aadhiginini kuye nokwa hala oku tu kwathela. Ihe Jehova ihe tu kondjitha to longe shoka shu uka. Okwa simaneka uuthemba wetu wokuninga omatokolo. Nomolwaashono he tu etha tu tokole ngele otwa hala okukala aadhiginini nenge inatu hala. Opo kaatu  gwile momamakelo, otu na okuninga iinima iyali: okukala tu na ekwatathano lya kola naJehova nokugalikana aluhe e tu kwathele. Jehova oha yamukula ngiini omagalikano getu, tu kondjithe omamakelo?

Kala popepi naJehova e to kala omulaadhi muukalele (Tala okatendo 15)

15, 16. (a) Omamakelo gamwe geni tu na okukondjitha? (b) Olye tu na okupa ombedhi, ngele twa gwile meyono?

15 Jehova ohe tu pe ombepo ye ondjapuki ndjoka yi na oonkondo, yi tu kwathele tu kondjithe omamakelo. Okwe tu pa wo Ombiimbeli negongalo, opo tu londodhwe kiiponga mbyoka tu na okuyanda. Pashiholelwa, ohe tu londodha kaatu longithe ethimbo lyetu olindji, iimaliwa yetu noonkondo dhetu miinima mbyoka inaatu pumbwa. Omumwatate Espen nomukadhi Janne ohaya zi moshilongo oshiyamba moEuropa. Uule woomvula odhindji, oya kala taya kokola ondjila moshitopolwa moka mu na ompumbwe yaauvithi. Sho ya mono okanona, oye etha po uukokolindjila. Ngashingeyi oye na aanona yaali. Espen ota hokolola ta ti: “Ohatu galikana aluhe kuJehova, opo kaatu gwile momamakelo, unene tuu molwaasho itaatu vulu we okukala ethimbo olindji muukalele ngaashi nale. Ohatu pula Jehova e tu kwathele tu kaleke po uupambepo wetu nokukala aalaadhi muukalele.”

16 Emakelo lilwe ndyoka tu na okukondjitha olyo okutala omathano giipala. Omolwashike mbela itaatu vulu oku pa Satana uusama ngele otwa gwile meyono ndyoka? Omolwaashoka Satana nuuyuni we, itaya vulu oku tu thiminika tu ninge sha sha puka. Aantu yamwe ohaya tala omathano giipala, oshoka ihaya kondjitha omadhiladhilo ga nyata. Ihe oyendji yomaamwatate naamwameme oya pondola mokukondjitha emakelo ndika, natse otatu vulu oku li kondjitha wo. —  1 Aakorinto 10:12, 13.

“TU HUPITHA MUUWINAYI”

17. (a) Ongiini tatu vulu okuulika kutya otwa hala Jehova e ‘tu hupithe muuwinayi’? (b) Jehova ota ka ninga po shike masiku, opo tu kale twa pepelelwa?

17 Ongiini tatu vulu okuulika kutya otwa hala Jehova e ‘tu hupithe muuwinayi’? Omokukala kaatu “shi yomuuyuni” nomokukala kaatu “hole uuyuni nenge iinima ayihe yomuuyuni.” (Johannes 17:14; 1 Johannes 2:15-17) Itatu ka kala tuu twa pepelelwa, sho Jehova ta ka hanagula po Satana nuuyuni mbuka uukolokoshi! Manga twa tegelela shoka shi ningwe, natu dhimbulukwe kutya Satana oku “udha ondjahi, sho e shi shi kutya oku na ko ashike okathimbo okafupi kowala.” Ota ka ninga ngaashi ta vulu, opo e tu ethithe po okulongela Jehova. Onkee ano, otu na okugalikana aluhe, opo Jehova e tu gamene kuSatana. —  Ehololo 12:12, 17.

18. Ngele otwa hala tu ka kale muuyuni kaamu na Satana, oshike tu na okuninga?

18 Mbela owa hala okukala muuyuni kaamu na Satana? Ngele eyamukulo lyoye oeeno, tsikila okugalikana Uukwaniilwa waKalunga wu ye, edhina lye li yapulwe nehalo lye li gwanithwe kombanda yevi. Kala aluhe wi inekela Jehova oye e ku sile oshimpwiyu noku ku pe ashihe shoka wa pumbwa nokukala omudhiginini kuye. Natu ningeni ngaashi tatu vulu, tu kale nonkalamwenyo yi li metsokumwe negalikano lyOmuwa.