Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Juni 2015

Kristus oye oonkondo dhaKalunga

Kristus oye oonkondo dhaKalunga

Kristus oye oonkondo dhaKalunga.’ —  1 AAKORINTO 1:24.

1. Omolwashike omuyapostoli Paulus a ti kutya ‘Kristus oye oonkondo dhaKalunga’?

JESUS KRISTUS sho a li kombanda yevi, okwa longo iikumithalonga mbyoka ya holola oonkondo dhaJehova. Iikumithalonga mbyoka ya popiwa mOmbiimbeli otayi vulu okukoleka eitaalo lyetu, uuna tatu yi lesha. (Mateus 9:35; Lukas 9:11) Molwaashono Jehova okwa pa Jesus oonkondo odhindji, omuyapostoli Paulus okwa ti: ‘Kristus oye oonkondo dhaKalunga.’ (1 Aakorinto 1:24) Ihe iikumithalonga mbyoka Jesus a longa, oye tu guma ngiini?

2. Iikumithalonga yaJesus otayi tu longo shike?

2 Omuyapostoli Petrus okwa ti Jesus okwa li ha longo ‘iikumithalonga.’ (Iilonga 2:22) Otayi tu longo shike? Otayi tu kwathele tu uve ko shoka Jesus ta ka ninga pethimbo lyElelo lye lyOomvula Eyuvi. Pethimbo ndyoka ota ka longa iilongankondo iinene yi vule mbyoka, opo e etele aantu kombanda yevi uuwanawa. Iikumithalonga ye otayi tu kwathele wo tu uve ko  nawa omaukwatya ge nosho wo gaHe. Moshitopolwa shika otatu ka kundathaneni iikumithalonga yaJesus itatu, notatu ki ilonga wo nkene tayi vulu oku tu guma nena nosho wo monakuyiwa.

OSHIKUMITHALONGA SHOKA TASHI TU LONGO OKUGANDJA

3. (a) Omolwashike Jesus a longo oshikumithalonga she shotango? (b) Jesus oku ulike ngiini kutya oku hole okugandja sho a li kohango muKana?

3 Jesus okwa longo oshikumithalonga she shotango sho a li kohango muKana. Okwa shitukitha omeya omaviinu. Katu shi kutya omaviinu oga pu po ngiini, ihe kaga li ga gwanena aayenda ayehe mboka ya hiywa. Osha li oshinakugwanithwa shooyene yohango okuyakula aayenda, nomolwaashono sha li tashi sitha ohoni, ngele ando kapwa li omaviinu ga gwana. Yina yaJesus, Maria, naye okwa li a hiywa, nokwa pula Jesus a ninge po sha. Mbela okwe mu pula molwaashoka e shi shi kutya Jesus ota vulu oku shi ninga pashikumithalonga? Otashi vulika Maria a li ha dhiladhila muule kombinga yomahunganeko ngoka taga popi kombinga yomwana. Okwa li e shi kutya omwana ote ki ithanwa “Omuna gwaKalunga gwokombandambanda.” (Lukas 1:30-32; 2:52) Jesus osho wo Maria oya li ya hala okukwathela aanandjokana mboka. Onkene Jesus okwa shitukitha omeya “omaviinu omatoye,” ge thike poolitela 380. (Lesha Johannes 2:3, 6-11.) Jesus ina thiminikwa a longe oshikumithalonga shika. Okwe shi ningi oshoka okwa li e na ko nasha naantu. Okwa li wo ta holele He ngoka e hole okugandja.

Jesus okwa ti kutya otu na okukala hatu ‘gandja’

4, 5. (a) Oshikumithalonga shaJesus shotango otashi tu longo shike? (b) Oshikumithalonga shaJesus muKana, otashi tu longo shike kombinga yonakuyiwa?

4 Jesus okwa ningi omaviinu omatoye pashikumithalonga, ngoka ga li ga gwana aantu oyendji. Mbela owu shi kutya oshikumithalonga shika otashi tu longo shike? Otashi tu longo kutya Jehova osho wo Omwana kaye shi aaluya, oye hole lela okugandja. Otashi tu pe einekelo kutya oye na ko nasha unene nomaiyuvo gaantu. Oshikumithalonga shoka otashi tu ulukile wo kutya Jehova ota ka longitha oonkondo dhe oku pa aantu iikulya ya gwana muuyuni uupe kongonga yevi alihe. —  Lesha Jesaja 25:6.

5 Kashi shi tu oshiwanawa okudhiladhila kutya masiku Jehova ote ke tu pa ashihe shoka twa pumbwa! Kehe omuntu ota ka kala e na egumbo ewanawa niikulya iiwanawa. Ohatu kala twa pandula uuna tatu dhiladhila kiinima iiwanawa mbyoka Jehova te ke tu pa meviparadisa.

Ngele ohatu gandja ethimbo lyetu, otatu holele Jesus ngoka e hole okugandja (Tala okatendo 6)

6. Jesus okwa li ha longitha ngiini oonkondo dhe, nongiini tatu vulu oku mu holela?

6 Jesus ina longitha oonkondo dhe netompelo lyokwiihola mwene. Dhiladhila owala  kwaashoka sha ningwa po sho Ondiyapoli ya li ya hala Jesus a shitukithe omamanya iikwiila. Okwa tindi okulongitha oonkondo dhe molwuuwanawa we mwene. (Mateus 4:2-4) Ihe Jesus okwa li e na ehalo okulongitha oonkondo dhe okukwathela aantu ooyakwawo. Ongiini tatu vulu okuholela ombepo ye yokwaaihola mwene? Jesus okwa ti kutya otu na okukala hatu ‘gandja.’ (Lukas 6:38) Otatu vulu oku shi ninga mokuhiya aantu komagumbo getu komwiha nenge kuulalelo. Otatu vulu wo okulongitha ethimbo lyetu konima yokugongala. Pashiholelwa, oto vulu okupulakena komumwatate sho ti idheula oshipopiwa she. Nenge tu dheule yalwe noku ya pa omayele ngoka taya vulu okulongitha muukalele. Ngele ohatu kwathele aantu ooyakwetu nehalo ewanawa, uuna tu na ompito yoku shi ninga, otatu holele Jesus.

“OYA LI NOYA KUTA”

7. Uupyakadhi wuni itaawu hulu po, manga tu li muuyuni waSatana?

7 Oluhepo ka lu shi oshinima oshipe. Jehova okwa li a lombwele Aaisraeli kutya “oohepele itadhi pu mo moshilongo.” (Deuteronomium 15:11) Konima yoomvula omathele, Jesus okwa ti: “Oohepele omu dhi na aluhe pune.” (Mateus 26:11) Mbela Jesus okwa li a hala okutya kombanda yevi otaku ka kala ku na oohepele sigo aluhe? Aawe. Okwa li a hala okutya, manga tu li muuyuni waSatana, oluhepo oko talu kala. Muuyuni uupe itamu ka kala we oluhepo. Pethimbo mpoka aantu ayehe otaya ka kala ye na iikulya ya gwana.

8, 9. (a) Omolwashike Jesus a palutha aantu omayuvi? (b) Oshikumithalonga shika oshi ku uvitithe ngiini?

8 Omupisalomi okwa popi kombinga yaJehova a ti: “Oto kamununa eke lyoye e to kutitha iinamwenyo ayihe kesilohenda lyoye.” (Episalomi 145:16) Sho Jesus a li kombanda yevi okwa li ha holele He nawanawa nokwa li ha gwanitha po oompumbwe dhaantu ooyakwawo. Kali he shi ningi nelalakano lyokwiiyulika. Okwa li e na ko nasha shili naantu. Natu kundathaneni Mateus 14:14-21. (Lesha.) Esiku limwe ongundu yaantu oya li ya landula Jesus kolupadhi okuza kiilando. (Mateus 14:13) Kongulohi, aalongwa ye oya li tayi ipula nongundu yaantu mboka ya li ya vulwa noya sa ondjala. Aalongwa oya pula Jesus a laleke aantu ye ki ilandele iikulya. Jesus okwa ningi po shike?

9 Jesus okwa palutha aalumentu 5 000 niikwiila itano ayike noohi mbali, nosho wo aakiintu naanona. Omolwashike Jesus a longo oshikumithalonga shika? Omolwaashoka okwa li e ya hole noku na ko nasha nayo. Osha yela kutya Jesus okwa li e ya pe iikulya oyindji, oshoka “aantu ayehe oya li noya kuta.” Iikulya mbyoka oye ya pe oonkondo dhokweenda ya shune komagumbo gawo. (Lukas 9:10-17) Ayehe sho ya kuta, aalongwa oya toola iihupe yiipambu, oontungwa 12 dhu udha.

10. Oshike tashi ka ningilwa oluhepo monakuyiwa?

10 Aantu oyendji muuyuni oye li moluhepo, molwaashoka aaleli oyendji oye na uulingilingi nosho wo olwiho. Nokuli naamwatate yamwe otaya si ondjala. Ihe masiku aantu mboka haya vulika kuJehova otaya ka  kala muuyuni moka kaamu na uulingilingi noluhepo. Jehova oye Kalunga omunankondoadhihe, noku na oonkondo nehalo okugwanitha po oompumbwe dhaayehe. Oku uvaneka kutya masiku ota ka hulitha po emono lyiihuna. —  Lesha Episalomi 72:16.

Iikumithalonga yaJesus otayi tu shilipaleke kutya okwa hala okulongitha oonkondo dhe e tu kwathele

11. Omolwashike wu na uushili kutya masiku Kristus ota ka longitha oonkondo dhe a kwathele aantu ayehe kombanda yevi, naashika otashi ku inyengitha wu kale wa hala okuninga shike?

11 Sho Jesus a li kombanda yevi okwa li a longo iikumithalonga moshitopolwa shimwe, uule owala woomvula ndatu netata. (Mateus 15:24) Ihe sho ta ka pangela mElelo lye lyOomvula Eyuvi ota ka kwathela aantu ayehe. (Episalomi 72:8) Iikumithalonga yaJesus otayi tu shilipaleke kutya okwa hala okulongitha oonkondo dhe e tu kwathele. Nando tse katu na oonkondo dhokulonga iikumithalonga, oshike mbela tatu vulu okuninga? Otatu vulu okulongitha ethimbo lyetu noonkondo dhetu okulombwela aantu kombinga yonakuyiwa ombwanawa ndjoka yu uvanekwa mOmbiimbeli. Shika osho oshinakugwanithwa shetu tu li Oonzapo dhaJehova. (Aaroma 1:14, 15) Ngele otwa kala hatu tedhatedha kwaashoka Kristus ta ka ninga monakuyiwa, otatu ka kala twa halelela okulombwela aantu kombinga yoshinima shoka. —  Episalomi 45:1; 49:3.

JEHOVA NAJESUS OYE NA OONKONDO DHOKUPANGELA ESHITO

12. Omolwashike tu na uushili kutya Jesus oku uvite ko thiluthilu eshito alihe kombanda yevi?

12 Jesus ‘oko a li nale a fa engomba a tegama nahe,’ sho He ta shiti evi niinima ayihe yi li ko. (Omayeletumbulo 8:22, 30, 31; Aakolossa 1:15-17) Osha yela kutya Jesus oku shi eshito alihe kombanda yevi. Oku uvite ko thiluthilu nkene ha li longo nankene li na okupangelwa.

Omolwashike Jesus a li ha longitha oonkondo dhe? (Tala okatendo 13, 14)

13, 14. Gandja oshiholelwa shankene Kristus a li a pangele eshito.

13 Sho Jesus a li kombanda yevi oku ulike kutya okwa pewa oonkondo kuHe dhokupangela eshito. Pashiholelwa, otashi vulika to dhimbulukwa nkene a li a mweneke oshikungulu shombepo. (Lesha Markus 4:37-39.) Omulongwantu gumwe gwOmbiimbeli ota ti kutya oshitya shOshigreka shoka sha tolokwa ‘oshikungulu shombepo’ membo lyaMarkus, otashi ulike koshikungulu shi na iikogo ya luudha noonkondo, ombepo tayi pepe ya dhiginina, omindundumo nomvula yepoolela. Oshikungulu sholudhi ndoka ohashi pepe po iinima ayihe. Omuyapostoli Mateus okwa popi oshikungulu shoka kutya osha li “oshikungulu oshidhigu.” —  Mateus 8:24.

14 Kala ando wa fa opo wu li sho omakuthikuthi tagi idhenge kombautu ombaluwali. Nonando oshikungulu osha li tashi homa sho otashi tengaukitha ombautu, Jesus okwa li a kotha, oshoka okwa li a vulwa. Aalongwa ye oye ke mu pendutha oshoka oya li ya tila. Oya ti kuye: “Otatu ningine mo!” (Mateus 8:25) Mbela Jesus okwi inyenge ngiini? Okwa penduka e ta lombwele ombepo nefuta ta ti: “Mwena!” (Markus 4:39) Ombepo oya kodha, “e taku ti thilu.” Shika kashi shi tuu oshiholelwa  sha dhenga mbanda, shankene Jesus a longitha oonkondo dhe a pangele eshito!

15. Jehova okwe shi ulike ngiini kutya oha pangele eshito?

15 Otu shi shi kutya Jehova, Kalunga Omunankondoadhihe, oha pangele eshito, oshoka oonkondo ndhoka Kristus a li e na odha zi kuYe. Pashiholelwa, manga Jehova inee etitha Eyelu, okwa ti: “Ngele pwa piti omasiku gaheyali, otandi ka lokitha omvula tayi ka tilahi omeya omasiku omilongo ne omutenya nuusiku.” (Genesis 7:4) Eksodus 14:21 otayi ti wo kutya: “Omuwa nokwa tondokitha po efuta lya shunithwa kombepo ondhigu yokuuzilo.” Jona 1:4 ota ti wo kutya: “Omuwa okwa tumu ombepo ondhigu mefuta, nomwa tukuluka oshikungulu oshinene sha hala okuteya po osikepa.” Otwa nyanyukwa okukala tu shi kutya muuyuni uupe, Jehova ota ka pangela eshito alihe thiluthilu.

16. Omolwashike tashi mbilipaleke okutseya kutya Jehova naJesus oye na oonkondo dhokupangela eshito?

16 Otashi mbilipaleke okutseya kutya Jehova naJesus oye na oonkondo dhokupangela eshito. Pethimbo lyElelo lyaKristus lyOomvula Eyuvi, aantu ayehe kombanda yevi otaya ka kala megameno. Kapu na nando ogumwe ta ka monithwa oshiponga nenge a dhipagwe kiiponga yopaunshitwe, ngaashi epepo edhigudhigu hali pepe mEmwenifuta,  ekuthikuthi enenenene ndyoka hali zi mefuta, oonkungimulilo nenge omakakamo gevi. Itatu ka kala twa tila oshiponga sha sha, oshoka “egumbo lyaKalunga” otali ka kala paantu. (Ehololo 21:3, 4) Otu na okukala nomukumo kutya Jehova ota ka pa Omwana oonkondo dhokupangela eshito alihe pethimbo lyElelo lye lyOomvula Eyuvi.

HOLELA KALUNGA NOSHO WO KRISTUS NGASHINGEYI

17. Ongiini tatu vulu okuholela Kalunga nosho wo Kristus ngashingeyi?

17 Jehova naJesus oyo owala taya vulu okukeelela iiponga yopaunshitwe kaayi ningwe. Tse aantu, itatu vulu oku shi ninga. Nonando ongaaka, opu na oshinima shoka tatu vulu okuninga. Otatu vulu okutula miilonga Omayeletumbulo 3:27. (Lesha.) Uuna ooitaali ooyakwetu taya mono iihuna, otatu vulu oku ya hekeleka noku ya kwathela naashoka ya pumbwa, kutya nduno opalutu nenge opamadhiladhilo. (Omayeletumbulo 17:17) Pashiholelwa, otatu vulu oku ya kwathela konima yoshiponga shopaunshitwe. Omuselekadhi gumwe ngoka egumbo lye lya hanagulilwe po koshikungulu oshidhigu okwa ti: “Onda pandula noonkondo okukala ndi li mehangano lyaJehova. Inandi pandula owala ekwatho lyopalutu, ihe onda pandula wo ekwatho lyopambepo.” Omumwameme gumwe inaa hokanwa okwa li a hupula sho egumbo lye lya mbonyagulwa. Sho aamwatate ye li mu opalekele, okwa ti: “Kandi shi nkene ndi shi hokolole. Kandi na iitya nomatumbulo, ndi popye nkene ndi uvite.” Okwa gwedha ko a ti: “Tangi Jehova!” Ohatu pandula noonkondo sho aamwatate naamwameme ye na ko nasha lela noompumbwe dha yalwe. Ihe olupandu olunene okupandula Jehova naJesus Kristus, sho ye na ko nasha natse shili.

18. Oshike she ku shambula ngele tashi ya petompelo lyaJesus lyokulonga iikumithalonga?

18 Jesus okwa li u ulike kutya ye “oonkondo dhaKalunga,” pethimbo lyuukalele we kombanda yevi. Ihe ke na esiku a longithile oonkondo dhe i iyulike nenge molwuuwanawa we mwene. Pehala lyaashoka, okwa li ha longitha oonkondo dhe a longe iikumithalonga, omolwohole ye yokuhola aantu. Moshitopolwa tashi landula otatu ki ilonga kombinga yoshinima shoka..