Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Mei 2015

Omolwashike okukondwa ku li egeeloputudho lyopahole?

Omolwashike okukondwa ku li egeeloputudho lyopahole?

OMUMWATATE Julian ota dhimbulukwa nkene a li u uvite sho u uvu etseyitho kutya, okamwanamati ka ke shi we Onzapo yaJehova. Okwa popi ta ti: “Omakutsi gandje oga li ga thita sho ndu uvu osheeli shandje sha kondwa. Otwa li tu na ekwatathano lyopothingo lela, notwa li hatu ningi iinima oyindji pamwe.” Julian okwa gwedha ko kutya omwanamati okwa li hi ihumbata nawa, ihe konima yethimbo okwa ka lunduluka e ta tameke okuninga iinima iiwinayi. Omukadhi okwa li ha lili olundji, Julian ka li e shi nokuli nkene e na oku mu hekeleka. Julian okwa ti: “Otwa kala hatu ipula ngele otwa ndopa mokutekula omumati gwetu.”

Omatompelo geni taga adhika mOmbiimbeli haga konditha omuntu? Nonando oha ku eta uuwehame owindji, omolwashike tatu vulu okutya okukondwa oku li egeeloputudho lyopahole?

OSHIKE HASHI KONDITHA OMUNTU?

Uuna Onzapo yaJehova ya ninginithwa ya yono eyono lya kwata miiti e tayi kala inaayi iyela ombedhi, ohayi kondwa.

Jehova ina tegelela tu kale twa gwanenena, ihe okwa hala aapiya ye ya kale haya vulika koompango dhe nokukala aayapuki. Pashiholelwa, Jehova oha londodha aapiya ye ya yande omayono ga kwata miiti ngaashi uuholume, okusimaneka iimenka, uufuthi, okuyuga, okudhipaga nuumpulile. —  1 Kor. 6:9, 10; Eh. 21:8.

Shoka Jehova a hala tu ninge oshi shi okuuviwa ko notashi tu gamene. Pashiholelwa, atuheni otwa hala okukala pamwe naantu aanambili, yokolela, ye na omikalo naanashili. Omaukwatya ngaka ohatu ga mono maamwatate naamwameme. Omolwashike ye na omaukwatya ngoka? Omolwaasho yi iyapulila Jehova noyu uvaneka okwiiyutha kwaashoka te ya lombwele okupitila mOmbiimbeli.

Oshike hashi ningwa po ngele Omukriste ngoka a ninginithwa a yono eyono lya kwata miiti, omolwuunkundi wontumba? Shika osha li sha ningilwa yamwe yomaapiya yaJehova yonale, ihe ka li e ye ekelehi thiluthilu. Pashiholelwa, omukwaniilwa David okwa li a yi moluhondelo nokwa dhipaga. Nonando  David okwa li a yono ngawo, omuhunganeki Natan okwe mu lombwele kutya Jehova okwe mu dhimina po. —  2 Sam. 12:13.

Omolwashike Jehova a dhimine po David? Omolwaasho Jehova okwa li e wete kutya David okwi iyela ombedhi shili. (Eps. 32:1-5) Kunena, ngele gumwe a yono oha dhiminwa po ngele okwi iyela ombedhi shili, nokwe etha po okuninga shoka oshiwinayi. (Iil. 3:19; 26:20) Ngele aakuluntugongalo mboka ye li mokomitiye yopampangu kaye wete kutya omuyoni okwi iyela ombedhi shili, oha kondwa.

Ngele omuntu gwaandjeni nenge kuume koye kopothingo okwa kondwa, otashi vulika shi kale oshidhigu oku shi taamba ko nokukala wu uvite kutya oshinima inashi talwa nawa. Ihe Oohapu dhaJehova otadhi ulike sha yela kutya okukondwa oku li egeeloputudho lyopahole.

UUWANAWA MBOKA HAWU ZI MOKUKONDWA

Jesus okwa popi kutya “uunongo waKalunga owa hololwa kiilonga ye.” (Mat. 11:19) Natu taleni komatompelo gatatu kutya omolwashike shi li pandunge okukonda omuyoni ngoka ini iyela ombedhi.

Okukondwa ohaku gamene edhina lyaJehova kaa li shekwe. Eihumbato lyetu otali vulu okusimanekitha nenge okushekitha Jehova, oshoka tse Oonzapo dhe, twa humbata edhina lye. (Jes. 43:10) Ngaashi owala eihumbato lyokanona ta li vulu okusimanekitha nenge okushekitha aavali, eihumbato lyaapiya yaJehova ota li vulu oku mu simanekitha nenge oku mu shekitha. Aantu yomiigwana yilwe pethimbo lyaHesekiel, oya li ye shi kutya Aaisraeli oye lile po edhina lyaJehova. (Hes. 36:19-23) Sha faathana kunena, aantu oye shi kutya Oonzapo dhaJehova odhi li le po edhina lyaKalunga, Jehova. Ngele otwa vulika koompango dhe, otatu ke mu simanekitha.

Omuyapostoli Petrus okwa kumagidha Aakriste ta ti: “Vulikeni kuKalunga ne inamu etha, okukalamwenyo kweni ku pangelwe kuuhalu mboka mwa li nawo, manga mwa li mwaa na oondunge. Ihe kaleni aayapuki mwaayihe mbyoka tamu yi ningi, ngaashi Kalunga ngoka e mu ithana, omuyapuki. Oshoka enyolo otali ti: ‘Omu na okukala aayapuki, oshoka ongame omuyapuki.’” (1 Pet. 1:14-16) Pashiholelwa, ngele otu niwe kohole yiipala, otatu shekitha edhina lyaKalunga. Ihe ngele otwa kala tu na eihumbato lya yogoka, ota tu simanekitha Jehova.

Ngele gumwe gwomOonzapo dhaJehova oha longo uuwinayi, aantu mboka ye mu shi otaya ka tseya shoka ha ningi. Uuna yu uvu kutya omuntu ngoka ke shi we Onzapo yaJehova, ohaya mono kutya aapiya yaJehova ohaya vulika kwaashoka sha popiwa mOmbiimbeli nohaya kaleke egongalo lya yogoka. Pashiholelwa, omusamane gumwe okwa yi kokugongala moSwitzerland, e ta ti kutya okwa hala okukala oshilyo shegongalo. Molwaasho omumwayinakadhona okwa kondelwe sho a yi moluhondelo, ngashingeyi omusamane ngoka okwa hala okukala mehangano ndyoka “ihaali pitike eihumbato ewinayi.”

Okukondwa ohaku kaleke egongalo lya yogoka. Omuyapostoli Paulus okwa li a londodha egongalo lyomuKorinto kombinga yoshiponga shokukaleka megongalo omuyoni ngoka ini iyela ombedhi. Okwa li a yelekanitha enwethomo ewinayi lyomuyoni ngoka nokafulika okashona hoka taka tumbike ondombo ayihe. Paulus okwa ti: “Okafulika okashona ohaka tumbike ondombo ayihe.” Onkee ano, okwe ya kumagidha ta ti: “Umbii mo omuyoni mokati keni.” —  1 Kor. 5:6, 11-13.

“Omuyoni” ngoka okwa li e li moluhondelo, kee na nando ohoni yasha. Yamwe megongalo otashi vulika ya tamekele okukala taya popile eihumbato lye ewinayi. (1 Kor. 5:1, 2) Shika osha li sha nika oshiponga, oshoka Aakriste ooyakwawo oya li taya vulu okunwethwa mo kiikala ya nyata mbyoka ya li apuhe  muKorinto. Sha faathana kunena, ngele egongalo olya siikilile eyono lya kwata miiti, yamwe otashi vulika ya tameke okukala ya tala ko omithikampango dhaJehova dhaa na oshilonga. (Omuuv. 8:11) Aayoni mboka inaayi iyela ombedhi otaya vulu okuyona po eitaalo lya yalwe megongalo, ngaashi owala ‘omamanya ga nika oshiponga ge li kohi yomeya’ (NW) taga vulu okuyona nokuhanagula po ombautu onene. —  Jud. 4, 12.

Okukondwa ohaku kwathele omuyoni a mone eyono lye. Jesus okwa li a hokolola eyele li na ko nasha nomumati a kanene. Omumati ngoka okwa thigi po egumbo lyahe nokwa hanagula po eliko lye alihe, mokukala e na onkalamwenyo ya nyata. Konima yethimbo, omumati ngoka okwa dhimbulula kutya okukala kokule negumbo lyahe itashi kwatha sha. Okwi iyele ombedhi e ta tokola a shune kegumbo. He okwa li a nyanyukwa noonkondo sho a mono kutya omwana okwa lundulula iikala ye, nokwe mu taamba ko a galukile kegumbo. (Luk. 15:11-24) Eyele ndika ota li tu kwathele tu uve ko nkene Jehova ha kala u uvite, ngele omuyoni i iyele ombedhi. Jehova ota ti: “Itandi nyanyukilwa omulunde ta si. Onda hala, i itedhulule ye a kale e na omwenyo.” —  Hes. 33:11.

Sho tu li megongalo lyopaKriste, otu li aamwayinathana yopambepo. Ngele omuntu okwa kondwa, iha kala we oshitopolwa shuumwayinathana mboka. Konima ngele ngoka a kondwa a mono iizemo iiwinayi yeihumbato lye, otashi vulika a mone epuko lye. Otashi vulika wo a ka dhimbulukwe nkene a li ha kala a nyanyukwa sho a li e na ekwatathano ewanawa naJehova nosho wo negongalo. Shika otashi vulu shi mu inyengithe a galukile kaamwayina yopambepo.

Opo tu kwathele omuntu ngoka a kondwa a galukile kegongalo, otu na oku mu ulukila ohole mokukala ihaatu endathana naye. Pashiholelwa, dhiladhila kaantu yaali ye li momugongo taya thithina oongongo. Ka ye na okunina oongongo nandonando, oshoka otadhi vulu oku ya ponda pomuligu. Ihe gumwe gwomuyo okwa nina ongongo inee shi tegelela e tayi mu pondo. Opo mukwawo a hupithe omwenyo gwe, oku na oku mu dhenga a dhiginina kekothi, opo yi ze po pothingo. Nonando ngoka a dhengwa okwe ehama, omwenyo gwe otashi vulika gwa hupithwa. Omupisalomi David naye okwa li a dhiladhila oshinima sha faathana sho a popi kutya: “Osho opala, omuyuuki ngele ta ganda ndje e ta dhenge ndje.” (Eps. 141:5) David okwa dhimbulula kutya nonando ihashi kala oshipu okutaamba ko egeeloputudho ndyoka ta pewa, otali vulu oku mu kwathela.

Ngaashi owala omuntu a pumbwa okudhengwa, opo ongongo yi ze po pothingo, okukondwa oha ku kwathele omuntu a galukile kuJehova. Omwanamati gwaJulian ngoka a tumbulwa petameko lyoshitopolwa shika, okwa ka lundulula onkalamwenyo ye nokwa galukile kegongalo konima yomimvo omulongo. Oku li omukuluntugongalo ngashingeyi. Okwa zimine ta ti: “Okukala nda kondwa okwa kwathele ndje ndi mone lela iizemo yokukala nonkalamwenyo ya nyata. Onda li nda pumbwa egeeloputudho ndika.” —  Heb. 12:7-11.

ONGIINI TATU VULU OKUULUKILA MBOKA YA KONDWA OHOLE

Uuna omuntu a kondwa, ohashi ehameke shili. Ihe shika inashi hala okutya omuntu ngoka ita vulu we nando a galukile kuJehova. Osha simana kutse atuhe tu ethe egeeloputudho li tulwe miilonga. Ihe mbela ongiini tatu vulu oku shi ninga?

Ohapu ningwa oonkambadhala, opo mboka yi iyela ombedhi ya kwathelwe ya kale ishewe ye na ekwatathano ewanawa naJehova

Aakuluntugongalo ohaya holele aluhe Jehova mokuulika ohole, unene tuu uuna ye na okulombwela omuntu kutya ke shi we Onzapo yaJehova. Ohaya yelithile nawa omuntu kutya oshike e na okuninga, opo a galukile megongalo nokukala e na ekwatathano ewanawa  naJehova, taye shi ningi nolukeno. Ngele ngoka a kondwa oku ulike kutya okwa hala okugalukila megongalo, aakuluntugongalo otaya vulu oku ke mu talela po omathimbo nomathimbo. Oha ye shi ningi, opo ye mu dhimbulukithe shoka e na okuninga, opo a galukile kuJehova. *

Aanegumbo yaangoka a kondwa ohaya ulukile egongalo ohole nosho wo ngoka a kondwa, uuna taya longo metsokumwe netokolo ndyoka lya ningwa kaakuluntugongalo. Omumwatate Julian okwa ti: “Sho a kondwa itashi ti kutya ka li we omumwandje, ihe iikala ye oya li ya tula po eyinda pokati ketu naye.”

Ayehe mboka ye li megongalo otaya vulu okuulukila ngoka a kondwa ohole mokuyambidhidha egeeloputudho ndyoka Jehova e mu pa, okupitila maakuluntugongalo. Shika osha hala okutya kaye na nando okukala pamwe naye nenge ya popye naye. (1 Kor. 5:11; 2 Joh. 10, 11) Ethimbo ndika oha li kala edhigu kaanegumbo yaangoka a kondwa. Egongalo ota li vulu okuulukila aanegumbo yaangoka a kondwa ohole moku ya ambidhidha. Inatu ya ningitha ya kale yu uvite ya fa kaaye shi we oshitopolwa shegongalo. —  Rom. 12:13, 15.

Pehulilo lyoshimoniwa she, Julian okwa ti: “Okukondwa oku li elongekidho ndyoka twa pumbwa, opo tu kwathelwe tu kale nonkalamwenyo tayi wilikwa komithikampango dhaJehova. Mokweendela ko kwethimbo, otatu ka mona iizemo iiwanawa, nonando ihashi kala oshipu. Ando onda taambele ko eihumbato ewinayi lyomumwandje, ando ina galuka we.”

^ okat. 24 Tala Oshungonangelo ye 1 Apilili 1991, epandja 27-29.