Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Mei 2015

Kotokeni ne mu tonate, Satana okwa hala oku mu ninagula po!

Kotokeni ne mu tonate, Satana okwa hala oku mu ninagula po!

“Kotokeni ne mu tonate! Oshoka omutondi gweni Satana ohe mu kundukidha, ta ndunduma a fa onime, ta kongo ngoka, te mu ninagula po.” —  1 PET. 5:8.

1. Oshe ende ngiini, opo omuyengeli gumwe a ninge Satana?

PETAMEKO Satana okwa li e na ekwatathano lyopothingo naJehova. Ihe okwa li a hala aantu ya kale haye mu galikana. Satana okwe etha uuhalu mboka wa puka wu koke muye, sigo we mu fala muulunde. Ina endelela oku wu kondjitha. (Jak. 1:14, 15) Edhina ndyoka a lukwa tango katu li shi, ihe otu shi owala Satana ndyoka hi ithanwa kunena. Omuyengeli ngoka “ina dhiginina oshili,” nokwa li a tsile Jehova ondumbo. Okuza mpono okwa ningi omufundja “nahe yiifundja ayihe.” —  Joh. 8:44, yelekanitha NW.

2, 3. Omadhina “Satana,” “Ondiyapoli,” “eyoka” nosho wo “oshikoko,” otagu ulike shike kombinga yomutondi gwaJehova omunenenene?

2 Okuza sho Satana a tsile Jehova ondumbo okwa ningi omutondi gwe omunenenene. Satana oku li wo omutondi gwaantu ayehe koonono. Edhina lye ndyoka Satana otali ti kutya “Omupataneki,” shoka tashi ulike kutya ye omuyengeli omwiinayi ngoka e tonde epangelo lyaKalunga note li kondjitha omutenya nuusiku. Okwa  hala okuhulitha po epangelo lyaJehova. Ngashingeyi osha yela mo nawa kutya oondjila dhaSatana adhihe odha goyoka ngaashi naanaa Ombiimbeli tayi shi popi.

3 MEhololo 12:9, Satana oti ithanwa omuhindadhi nenge Ondiyapoli, shoka tashi ti kutya “Omulundili.” Satana okwa dhini Kalunga, sho e mu ula kutya oha fundju. Uutumbulilo “eyoka ndyoka ekulu” (OB-1954) otawu tu dhimbulukitha nkene Satana a li a longitha eyoka a pukithe Eva. Uutumbulilo “oshikoko oshinene” owe eleka wo okwiithanwa Satana. Ye omuhahu, omukwanyanya noku li omukolokoshi. Okwa hala okuya moshipala elalakano lyaJehova li na ko nasha naantu, nokuhanagula po oshigwana she.

4. Otatu ka kundathaneni shike moshitopolwa shika?

4 Ombiimbeli otayi tu londodha tayi ti: “Kotokeni ne mu tonate! Oshoka omutondi gweni Satana ohe mu kundukidha, ta ndunduma a fa onime, ta kongo ngoka, te mu ninagula po.” (1 Pet. 5:8) Omolwashike Ombiimbeli tayi tu londodha ngawo? Omolwaashoka Satana okwa hala tu kothe pambepo. Moshitopolwa shika otatu ka kundathana omaukwatya gatatu gaSatana. Okukala tu ga shi otashi tu kwathele tu mone kutya omolwashike sha simana tu igamene komutondi omunenenene gwaJehova nogwoshigwana she.

SATANA OMUNANKONDO

5, 6. (a) Tumbula iiholelwa mbyoka tayi ulike kutya aayengeli “oofule naanankondo.” (b) Ombiimbeli oya hala okutya ngiini sho tayi ti Satana oye “he eta eso”?

5 Aayengeli “oofule naanankondo” moku ya yelekanitha naantu yonyama nombinzi. (Eps. 103:20) Oye na oondunge nosho wo oonkondo dhi vule dhaantu. Ihe aayengeli aadhiginini ohaya longitha oonkondo dhawo omolwuuwanawa woshigwana shaJehova. Pashiholelwa, omuyengeli gumwe gwaJehova okwa li a letheke po aakwiita Aayassur ye li 185 000. Omuntu gumwe ita vulu okudhipaga aakwiita ayehe mboka. Otashi vulika nokuli shi kale oshidhigu noketangakwiita li ya dhipage. (2 Aak. 19:35) Oshikando shimwe, omuyengeli gumwe okwa li a longitha uunongo noonkondo dhe, opo a mangulule aayapostoli yaJesus mondholongo. Omuyengeli okwe egulula omiyelo, e ta piitha mo aayapostoli nokwe edhile omiyelo dhondholongo. Nonando aalangeli oya li ya langela, inayu uva po sha. —  Iil. 5:18-23.

6 Aayengeli ohaya longitha oonkondo dhawo ya longe shoka shu uka. Ihe Satana oha longitha oonkondo dhe a longe uukolokoshi. Oku na oonkondo oonene nokwa nwetha mo uuyuni awuhe. Ombiimbeli otayi ti kutya oye “omupangeli guuyuni mbuka” nosho wo “kalunga komuuyuni mbuka.” (Joh. 12:31; 2 Kor. 4:4) Satana oye wo “he eta eso.” (Heb. 2:14) Shino inashi hala okutya Satana oye mwenemwene ha dhipaga aantu ayehe. Omolwashike mbela? Shotango, konima sho Adam naEva yi itaale iifundja yaSatana noinaya vulika kuKalunga, aantu ayehe oya thigulula uulunde mboka hawu eta eso. Oshitiyali, otu li muuyuni mbuka waSatana wu udha uutondwe nelongithonkondo. Iinima mbyoka oyo hayi eta eso. (Rom. 5:12) Onkee ano, Satana “omudhipagi,” ngaashi naanaa Jesus e mu ithana. (Joh. 8:44) Osha yela kutya Satana omutondi gwetu omunene nomunankondo.

Otwa pumbwa ekwatho lyaJehova, opo tu vule okukondjitha Satana

7. Oompwidhuli odha kala nokuulika ngiini kutya odhi na oonkondo dhi vule dhaantu?

7 Ngele otatu kondjitha Satana, nena otatu  kondjitha wo aayambidhidhi ye ayehe mboka ye huge epangelo lyaKalunga. Mokati kaayambidhidhi ye omwa kwatelwa wo ongundu yaayengeli oyendji aanashipotha, mboka haya ithanwa oompwidhuli. (Eh. 12:3, 4) Oompwidhuli odhi na oonkondo dhi vule dhetu, nolundji odha kala nokumonitha aantu iihuna. (Mat. 8:28-32; Mark. 5:1-5) Inatu dhimbwa kutya Satana noompwidhuli dhe oye na oonkondo ye tu vule. (Mat. 9:34) Onkee ano, otwa pumbwa ekwatho lyaJehova, opo tu vule oku ya kondjitha.

SATANA OMUKWANYANYA

8. (a) Elalakano lyaSatana olini? (Tala kethano lyopetameko.) (b) Ngele to tala muuyuni kunena, otawu ulike ngiini onyanya ya fa yaSatana?

8 Omuyapostoli Petrus okwa yelekanitha Satana ‘nonime tayi ndunduma.’ Embo lyomauyelele limwe otali fatulula kutya oshitya shOshigreka shoka sha tolokwa “ndunduma,” otashi gandja edhiladhilo “lyoshilikama tashi gono, she etwa mo kondjala.” Shika otashi tu ulukile nawa kutya Satana omukwanyanya nomukolokoshi shili. Uuyuni awuhe owu li mepangelo lye, ihe natango shika inashi mu gwanena. Satana okwa fa onime ye etwa mo kondjala tayi kongo aluhe oshihakanwa. (1 Joh. 5:19) Oshoodhekwa she oshinene, aagwayekwa mboka ye li natango kombanda yevi taya ambidhidhwa ‘koonzi dhilwe.’ (Joh. 10:16; Eh. 12:17) Elalakano lyaSatana olyo okuhulitha po oshigwana shaKalunga. Aakriste yashili mboka ya li ko omimvo 2000 nasha dha ka pita, nayo oya li taya li taya pi kuSatana. Shika oshi li euliko kutya ye omukwanyanya shili.

9, 10. (a) Satana okwa li a ponokele ngiini oshigwana shaIsraeli? (Gandja iiholelwa.) (b) Omolwashike Satana a li e na etompelo li ikalekelwa lyokuponokela Aaisraeli? (c) Mbela Ondiyapoli ohayi kala yu uvite ngiini ngele omupiya gumwe gwaJehova a yono eyono lya kwata miiti?

 9 Satana oku ulike onyanya ye momukalo gulwe ishewe. Ngele onime oye etwa mo kondjala, ihayi kala yi uvitile oshihakanwa shayo ohenda. Ihayi kala yu uvite olukeno uuna tayi dhipaga sha, nenge yi kale yu uvite nayi konima ngele ye shi dhipaga. Sha faathana, Satana iha kala u uvitile mboka ha ponokele olukeno. Pashiholelwa, Satana okwa li ha kala u uvite ngiini uuna Aaisraeli ya gwile moluhondelo nenge ya kwatwa ko kolwiho? Kala ando wa fa wu wete Satana ta tanta a nyanyukwa sho Simri a gwile moluhondelo, naasho Gehasi a kwatwa ko kolwiho. —  Num. 25:6-8, 14, 15; 2 Aak. 5:20-27.

Satana oha kala ta yolele ketayego, ngele gumwe gwomaapiya yaJehova a yono (Tala okatendo 10)

10 Satana okwa li e na etompelo li ikalekelwa lyokuponokela Aaisraeli. Dhimbulukwa kutya Mesiasa okwa li te ke ya okupitila moshigwana shoka noye ta ka nyanyagula Satana, nokuulika kutya Jehova oku na uuthemba wokupangela. (Gen. 3:15) Satana ka li a hala oshigwana shaIsraeli shi kale sha hokiwa kuKalunga, nomolwaashono a li a ningi ngaashi ta vulu e shi hongolole, opo shi yone. Dhiladhila owala sho David a yi moluhondelo. Mbela Satana okwa li e mu etela ko ohenda? Nenge sho Moses a kanitha uuthembahenda wokuya mEvi lyEuvaneko, mbela Satana okwa li e mu uvitile olukeno? Satana oha kala ta yolele ketayego, ngele omupiya gumwe gwaJehova a yono eyono lya kwata miiti. Nokuli Ondiyapoli ohayi longitha omayono ngoka yi sithe Jehova ohoni. —  Omayel. 27:11.

11. Omolwashike Satana tashi vulika a li a makele Sara?

11 Satana okwa li e tonde unene tuu ezimo moka mwa li tamu ka za Mesiasa. Pashiholelwa, tala owala shoka sha li sha ningwa po sho Jehova a lombwele Abraham kutya ota ka ninga “oshigwana oshinene.” (Gen. 12:1-3) Sho Abraham naSara ya li muEgipiti, Farao okwa li e eta Sara muuwa we, nelalakano a ninge omukadhi. Ihe Jehova okwa li a gamene Sara pethimbo ndyoka, sho a keelele Farao kee mu gume. (Lesha Genesis 12:14-20.) Omukwaniilwa gwomoshilongo shaGerar okwa ale wo a ninge oshinima sha faathana, manga Isak inaa valwa. (Gen. 20:1-7) Mbela Satana oye a li e li aakwaniilwa mboka konima? Ombiimbeli inayi shi popya, ihe otashi vulika oye. Dhimbulukwa kutya Sara okwa li a thigi po Ur, oshilando shoka sha li shi na uuyamba owundji, e ta ka kala momatsali. Onkee ano, otashi vulika Satana a li a hala oku mu makela nomaliko ngoka ge li muuwa waFarao nosho wo waAbimelek. Satana okwa li a hala Sara a hokanwe po kuFarao nenge kuAbimelek, opo kaa kale omudhiginini kuAbraham nokuJehova. Andola Sara okwi igandjele komamakelo ngoka, ando Ondiyapoli oya kala tayi yolele ketayego sho a hunutha ompito, opo moluvalo lwe mu ze Mesiasa ngoka u uvanekwa. Satana ka li te ke etela Sara ohenda yasha, andola Sara okwa yonene ondjokana ye, a nyateke edhina lye nokuyona po ekwatathano lye naJehova. Otu wete lela kutya Satana omukwanyanya nomukolokoshi!

Satana iha yawala kutya oshike shi li mondjila noshike sha puka

12, 13. (a) Satana okwe shi ulike ngiini kutya ye omukwanyanya konima yokuvalwa kwaJesus? (b) Sho to tala, Satana oku uvitile ngiini aagundjuka mboka ye hole Jehova notaye Mu longele kunena?

12 Konima yomimvo omathele ogendji sho  Abraham a si, okanona Jesus oka valwa. Satana ka li a panda sho okanona hoka ka valwa. Okwa li e shi kutya oko taka ka ninga Mesiasa ngoka u uvanekwa. Jesus oye oshitopolwa shotango sholuvalo lwaAbraham. Ngashingeyi otwa tegelela e ye a “hanagule po iilonga yomuhindadhi.” (1 Joh. 3:8) Mbela sho to tala, Satana okwa li ngaa e wete kutya okudhipaga okanona oshinima oshiwinayi? Aawe. Iha yawala kutya oshike shi li mondjila noshike sha puka. Onkee ano, okwa li a kambadhala nziya ngaashi ta vulu, opo a dhipage Jesus sho a li okanona. Ngiini mbela?

13 Sho omukwaniilwa Herodes a lombwelwa kaayanekelinyothi kutya “omukwaniilwa gwAajuda” okwa valwa, okwa li a thita po kondjahi. Okwa li a hala okudhipaga okanona hoka mepathimo lyeho. (Mat. 2:1-3, 13) Okwa li a gandja elombwelo muBetlehem ashihe nopuushiinda washo, opo uunona wuumati awuhe, okuza poomvula mbali oku uka pevi wu dhipagwe. (Lesha Mateus 2:13-18.) Jesus okwa li a hupu moshikonga shedhipago ndyoka lya kii na henda. Shino otashi tu lombwele shike kombinga yomutondi gwetu Satana? Osha yela kutya Ondiyapoli inayi lenga nando omwenyo. Kutya nduno omwenyo ogwokahanona, ke na nago. Oohapu ndhoka tadhi ti kutya ‘ota ndunduma a fa onime’ odhoshili. Onkee ano, kala wu shi kutya ye omukwanyanya a shiga ko.

SATANA OMUPUKITHI

14, 15. Ongiini ‘mboka inaa itaala, omadhiladhilo gawo ga pukithwa’ kuSatana?

14 Satana oha pukitha aantu, opo e ya gamune ko kuJehova, Kalunga ketu omunahole. (1 Joh. 4:8) Ohe ya pukitha, opo kaaya kale ‘yu uvite kutya yo oohepele koomwenyo.’ Sha hala okutya kaaya kale ye wete ya pumbwa okukala ye na ekwatathano naKalunga. (Mat. 5:3) Ombiimbeli otayi ya popi kutya ‘inaa itaala, oshoka omadhiladhilo gawo oga pukithwa’ kOndiyapoli, opo kaaya mone oshili kombinga yaJehova. —  2 Kor. 4:4.

15 Satana oha pondola okupukitha aantu, te shi ningi unene tuu okupitila momalongelokalunga giifundja. Oku shi shi nawa kutya Jehova okwa hala ‘oye awike a longelwe.’ (Eks. 20:5, NW) Satana oha kala a nyanyukwa uuna e wete aantu taya longele iinima yilwe, pehala lyokulongela Jehova. Miinima mbyoka omwa kwatelwa okugalikana aakulu yonale nenge aathithi, eshito nenge iinamwenyo naantu. Shi yemateka, oyendji mboka haya dhiladhila kutya Kalunga okwa hokwa omalongelokalunga gawo, oya nwethwa mo komalongo giifundja nokoonkuluhedhi dhomalongelokalunga. Aaisraeli nayo oya li monkalo ya faathana, pethimbo lyaJesaja. Jehova okwe ya pula ta ti: “Omolwashike iimaliwa yeni tamu yi gandjele iinima ihaayi kutitha? Omolwashike tamu tula oondjambi dheni miinima ihaayi mu kutha ondjala? Uvii ndje, opo mu lye iikulya yuuyamba, noomwenyo dheni otadhi ka kutithwa kuutoye.” —  Jes. 55:2.

Satana ota vulu wo okupukitha naapiya yaJehova aadhiginini

16, 17. (a) Omolwashike Jesus a yamukula Petrus ta ti: “Za po pungame, Satana”? (b) Satana otashi vulika e tu pukithe ngiini, opo kaatu kale twa tonateni?

16 Satana ota vulu wo okupukitha naapiya yaJehova aadhiginini. Pashiholelwa, dhiladhila owala kwaashoka sha ningwa po sho Jesus a lombwele aayapostoli ye kutya ota ka dhipagwa. Omuyapostoli Petrus ngoka a li e hole Jesus  okwe mu lombwele a ti: “Omuwa, [iyaalela, NW] shi valelwe, u ningwe ngaaka!” Ihe Jesus okwe mu yamukula a ti: “Za po pungame, Satana!” (Mat. 16:22, 23) Omolwashike Jesus u ula Petrus “Satana”? Omolwaashoka Satana oye a li a hala Jesus a kale i “iyaalela.” Ethimbo ndika olya li ethimbo lya simana mondjokonona yaantu. Kalya li ethimbo lyaJesus lyokukala i “iyaalela.” Jesus okwa li e shi shi nawa kutya masiku ota ka gandja omwenyo gwe gu ninge ekuliloyambo nokuulika kutya Satana omufundja.

17 Uuyuni waSatana owu li popepi nokuhula po. Ano natse otu li methimbo lya simana mondjokonona. Satana okwa hala tu kale twi “iyaalela” nenge tu ihole tse yene, mokukala tatu gandja eitulomo olindji tu pondole muuyuni mbuka. Okwa hala tu dhimbwe kutya otu li momasiku gahugunina e tatu kotha pambepo. Inatu etheni shoka shi tu ningilwe, ihe natu kaleni twa “tonateni.” (Mat. 24:42) Inatu landuleni omakoto gaSatana kutya ehulilo oli li kokule nenge itali ya we.

18, 19. (a) Satana oha kambadhala oku tu pukitha ngiini, tu kale tu uvite kutya inatu gwana okukala tu holike kuJehova? (b) Jehova ohe tu kwathele ngiini tu kaleni twa tonata?

18 Satana oha kambadhala oku tu pukitha momukalo gulwe ishewe. Okwa hala tu itaale kutya inatu gwana okukala tu holike kuJehova nosho wo kutya ite ke tu dhimina po nando omayono getu. Ihe mbika iifundja iitokele. Ngele tatu dhiladhila, mbela olye lela inaa gwana okukala e holike kuJehova? OSatana. Mbela olye inaa gwana nando okudhiminwa po kuKalunga omolwomayono ge? Natango oSatana. Ihe Ombiimbeli otayi tu lombwele tayi ti: ‘Kalunga oku shi kwiinekelwa. Ita dhimbwa iilonga nohole yetu mokusimanekitha edhina lye.’ (Heb. 6:10) Jehova oha pandula ashihe shoka hatu ningi, opo tu mu nyanyudhe, niilonga yetu kayi na siku yi kale osima yowala kuye. (Lesha 1 Aakorinto 15:58.) Ano inatu etheni tu pukithweni kiifundja yaSatana.

19 Otu shi wete kutya Satana omunankondo, omukwanyanya nomupukithi. Oshike tashi ke tu kwathela tu vule okusinda omutondi nguka? Jehova ote ke tu kwatheleni. Oohapu dhe otadhi tu longo omikalo ndhoka Satana ha longitha. Onkee ano, “omakoto ge otu ga shi.” (2 Kor. 2:11) Ngele otu shi omikalo dhi ili nodhi ili ndhoka Satana ha longitha, opo e tu ponokele, otashi ke tu kwathela tu kaleni twa tonata. Ihe inashi gwana okukala owala nontseyo ndjoka. Ombiimbeli otayi tu lombwele tayi ti: ‘Kondjitheni Satana, ye note mu yi ontuku.’ (Jak. 4:7) Moshitopolwa tashi landula ko otatu ka kundathaneni nkene tatu vulu okuhenuka oomwigo ndatu dhaSatana nankene tatu vulu oku mu sinda.