Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Mei 2015

Oto vulu okukondjitha Satana e to mu sindi

Oto vulu okukondjitha Satana e to mu sindi

‘Kaleni mu na eitaalo lya kola, opo mu vule okukondjitha Satana.’ —  1 PET. 5:9.

1. (a) Omolwashike twa pumbwa okukondjitha Satana twa mana mo, unene tuu pethimbo lyetu? (b) Omolwashike tu na uushili kutya otatu vulu okukondjitha nokusinda Satana?

SATANA ota kondjitha aagwayekwa mboka ye li natango kombanda yevi, ‘noonzi dhilwe.’ (Joh. 10:16) Okwa hala okuninga shike muule wokathimbo okafupi hoka e na ko? Okwa hala okuteya po thiluthilu eitaalo lyaapiya yaJehova oyendji ngaashi tashi vulika. (Lesha Ehololo 12:9, 12.) Ihe otatu vulu oku mu kondjitha noku mu sinda. Ombiimbeli otayi ti: “Kondjitheni Satana, ye note mu yi ontuku.” —  Jak. 4:7.

2, 3. (a) Omolwashike Satana a hala aantu yi itaale kutya ke ko? (b) Owu shi shi ngiini kutya Satana oko e li?

2 Aantu oyendji inayi itaala kutya Satana oko e li shili. Kuyo Satana noompwidhuli dhe, oongano dhowala ndhoka tadhi adhika momambo, moomuvi dhiiluli nomuuvidio. Aantu mboka ohaya kala yu uvite kutya ngele ngoye omunandunge, nena ito ki itaala kutya oku na Satana noompwidhuli dhe. Mbela Satana oha kala ngaa e na ko nasha sho aantu yi itaala kutya ye noompwidhuli  dhe kaye ko? Aawe, ke na ko nasha, oshoka ohashi kala nokuli oshipu kuye oku ya pukitha. (2 Kor. 4:4) Omolwashike Satana ta humitha komeho omadhiladhilo ngono? Ote shi ningi, opo a pukithe aantu nuupu.

3 Tse aapiya yaJehova otu shi kutya Satana omuntu gwolela. Otwe shi tseya ngiini? Ombiimbeli otayi tu lombwele kutya Satana okwa li a popi naEva okupitila meyoka. (Gen. 3:1-5) Satana okwa li a popi naJehova te mu lombwele kutya Job ihe mu tila shili. (Job 1:9-12) Satana oye tuu ngono okwa makele Jesus. (Mat. 4:1-10) Onkee ano, tse otu shi kutya oko e li, noshipu kutse okumona oomwigo dhe. Sho Jesus a ningi Omukwaniilwa megulu mo 1914, Satana okwa tameke ‘oku mu kondjitha.’ Oku li wo ta kondjitha aagwayekwa yaJesus mboka ye li kombanda yevi. (Eh. 12:17) Olugodhi nduka otalu tsikile natango. Ondiyapoli oya hala okuteya po thiluthilu eitaalo lyaagwayekwa no lyoonzi dhilwe. Otatu vulu okusindana molugodhi nduka lwopambepo. Ihe opo tu kondjithe Satana, otu na okukala neitaalo lya kola. Oshitopolwa shika otashi kundathana omikalo ndatu nkene tatu vulu oku mu kondjitha.

YANDA UUNTSA

4. Omolwashike Satana e na uuntsa wa shiga ko?

4 Satana oye oshishitwa shimwe shoka shi na uuntsa wamatutu. Omuyengeli nguka omwiinayi okwa li nokuli a pula Kalunga ngele okwa gwana ngaa okupangela aantu. Okwa li wo a ningi oonkambadhala, opo iishitwa yilwe yi kale tayi mu galikana, pehala lyokugalikana Jehova. Ngele owa tumwa omuntu ngoka e na uuntsa kamana, ino thiga ko Satana. Opo tu mu kondjithe otu na okuyanda uuntsa, nokukala aaifupipiki. (Lesha 1 Petrus 5:5.) Mbela uuntsa oshike? Mbela osha puka aluhe okukala tu uvitile sha uuntsa?

5, 6. (a) Mbela uuntsa awuhe owa puka? Shi yelitha. (b) Uuntsa wuni wa puka, noolye ya popiwa mOmbiimbeli ya li ye wu na?

5 Embwiitya limwe otali fatulula uuntsa tali ti kutya okukala inaatu idhina, nenge okukala twi isimaneka. Otali ti wo kutya “okukala wa tuntukwa, molwaashoka ngoye nenge aapambele yoye ya pondola sha nenge ye na sha oshiwanawa.” Mbela osha puka okukala wu uvite ngawo? Aawe. Omuyapostoli Paulus okwa lombwele aamwatate muTessalonika a ti: “Onkee ano tse momagongalo gaKalunga ohatu itanga molweni. Tse otatu mu itangele, sho hamu idhidhimike nomwa dhiginina eitaalo momatidhagano nomomahepeko ngoka hage mu adha.” (2 Tes. 1:4) Okukala tu uvitile uuntsa shoka yalwe ya longa, nokukala tu iyuvitile uuntsa tse yene, otashi vulu oku tu etela uuwanawa. Katu na okukala twa sa ohoni aantu yaandjetu, uukwashigwana wetu nenge ehala mpoka twa putukila. —  Iil. 21:39.

6 Ihe opu na oludhi lwuuntsa wumwe mboka tawu vulu okuyona po ekwatathano lyetu naJehova. Uuntsa mboka owo hawu tu ningitha tu kale twa geya uuna tatu pukululwa. Otawu vulu nokuli oku tu ningitha tu ekelehi omayele, pehala lyoku ga shambekela neifupipiko. (Eps. 141:5) Uuntsa mboka ohawu tu ningitha tu kale owala tatu idhiladhila tse yene. Ohawu tu ningitha wo tu kale “aainenepeki nokukala twi itaala kutya otu li hwepo tu vule aantu yalwe, ihe olundji ndyoka eifundjaleko lyowala.” Jehova oku tonde lela uuntsa woludhi ndoka. (Hes. 33:28; Amos 6:8) Ihe Satana oha kala a hokwa lela okumona aantu tayi inomo, molwaashoka oye taya holele. Sho Nimrod, Farao, naAbsalom ya li tayi itadha omolwuuntsa, Satana okwa li a nyanyukwa lela. (Gen. 10:8, 9; Eks. 5:1, 2; 2 Sam. 15:4-6) Uuntsa owo wa li wa ningitha Kain a teye po ekwatathano lye naKalunga. Kain okwa kala  owala a kukutika omutse gwe omolwuuntsa, nonando Jehova oye mwene a li te mu pukulula. Kain okwa li a tangalala, noina pulakena kelondodho ndyoka Kalunga e mu pe. Konima owala yokathimbo sho a pukululwa, okwa li a yono kuKalunga. —  Gen. 4:6-8.

7, 8. (a) Uukwamuhoko oshike, nowa pambathana ngiini nuuntsa? (b) Ongiini uuntsa tawu vulu okuyona po ombili yegongalo?

7 Aantu pethimbo lyetu ohayu ulike uuntsa momikalo odhindji omiwinayi. Uuntsa nosho wo uukwamuhoko, ekuvu nela. Embwiitya limwe otali fatulula uukwamuhoko tali ti kutya okukala wa dhina nowu tonde aantu yomihoko dhilwe. Uukwamuhoko ohawu ningitha wo ‘aantu ya kale yi itaala kutya aantu yomihoko dhontumba oye na omaukwatya nuunkulungu ye vulithe aantu yomihoko dhilwe. Oyi itaala wo kutya omihoko dhimwe odha thingwa, na Kalunga oku hole owala aantu yoshipa shontumba.’ Uukwamuhoko ohawu hwahwameke omalugodhi, nohawu etitha iita nomadhipago gaantu oyendji.

Uuntsa otawu vulu okuyona po ombili megongalo

8 Iinima yoludhi ndono inatu hala yi holoke megongalo lyopaKriste. Ihe omathimbo gamwe okwaauvathana hoka haku kala pokati kaamwatate naamwameme otashi vulika ku etithwe kuuntsa. Omathimbo gamwe onkalo ohashi vulika nokuli yi nayipale. Oshinima sha tya ngawo osha li sha holoka megongalo lyopaKriste pethimbo lyaayapostoli. Shono osha ningitha omulongwa Jakob a pule ta ti: “Omalugodhi noontamanana mokati keni ohayi zi peni?” (Jak. 4:1) Onkee ano, katu na okukala tu tonde yalwe nenge tu wete tu ya vule. Omolwashike mbela? Oshoka otashi vulika tu popye nenge tu ninge iinima mbyoka tayi ya ehameke. (Omayel. 12:18) Osha yela kutya uuntsa otawu vulu okuyona po ombili megongalo.

9. Ombiimbeli otayi tu kwathele ngiini tu kondjithe uukwamuhoko nosho wo uuntsa? (Tala kethano lyopetameko.)

9 Ngele oho kala wu wete wu vule yalwe, dhimbulukwa kutya Jehova oku tonde “omutima kehe gu hole uuntsa.” (Omayel. 16:5) Opo tu ikonakone nawa meni lyetu, otwa pumbwa okwiipula tatu ti: ‘Mbela ohandi kala ndi wete ndi vule aantu yomihoko dhilwe, yomiigwana yilwe noyomomaputuko galwe?’ Ngele osho wu li ngawo, nena owa dhimbwa thiluthilu kutya “mokushita kwe Kalunga okwa kutha omihoko adhihe dhaantu momulumentu gumwe.” (Iil. 17:26) Osha yela kutya tse atuheni aantu namumwayina, molwaashoka otwa za muAdam. Osha nika uusama okwiitaala kutya Kalunga okwa shita omihoko dhimwe dhi vule omikwawo. Ngele ohatu dhiladhila ngawo, otatu pitike Satana a yone po ohole nuukumwe wetu wopaKriste. (Joh. 13:35) Opo tu kondjithe Satana noku mu sinda, katu na okukala nando tu na uuntsa. —  Omayel. 16:18.

YANDA OHOLE YOKUHOLA OMALIKO NUUYUNI

10, 11. (a) Oshike hashi shi ningitha oshipu tu kale tu hole uuyuni? (b) Demas okwa li a kanitha shike sho a kala a lenga iinima yuuyuni?

10 Satana oye “omupangeli guuyuni mbuka.” (Joh. 12:31; 1 Joh. 5:19) Iinima oyindji mbyoka tayi humithwa komeho muuyuni mbuka otayi kondjithathana nomakotampango gOmbiimbeli. Shika itashi ti kutya kehe shimwe shi li muuyuni oshiwinayi. Ihe nonando ongawo, Satana oha longitha uuyuni mbuka, opo e tu nwethe mo tu yone. Oha kambadhala  wo oku tu ningitha tu kale tu hole uuyuni notu kale kaatu na ko nasha nokulongela Jehova. —  Lesha 1 Johannes 2:15, 16.

11 Aakriste yamwe yonale oya li ye hole uuyuni. Pashiholelwa, Paulus okwa nyola a ti: “Demas mokuhokwa uuyuni mbuka okwa thigi ndje po.” (2 Tim. 4:10) Ombiimbeli inayi popya kondandalunde kutya Demas okwa li e hole shike muuyuni, shoka she mu ningitha a thige po Paulus. Ihe otashi vulika Demas a li e hole omaliko, pehala lyokukala a lenga iilonga yaJehova. Ngele osho, nena okwa li a kanitha uuthembahenda wa dhenga mbanda wokulongela Jehova. Mbela oshe mu etela ngaa uuwanawa washa? Aawe. Demas okwa li ta vulu okukala ta longele Jehova pamwe naPaulus, molwaashoka uuyuni kawa li tawu ke mu pa sha shomupondo. —  Omayel. 10:22.

Inatu kala nando twa lenga oshimaliwa nenge omaliko, pehala lyokukala twa lenga ekwatathano lyetu naJehova

12. Ongiini Satana ta vulu oku tu heka “nefundjaleko lyuuyamba”?

12 Oshinima shoka, natse Aakriste, otashi vulu oku tu ningilwa. Inashi puka okukala twa hala tu isile tse yene oshimpwiyu nenge tu sile aanegumbo yetu oshimpwiyu. (1 Tim. 5:8) Sho Jehova a pe Adam naEva oshikunino oshiwanawa, otashi ulike kutya okwa hala aantu ya nyanyukilwe onkalamwenyo. (Gen. 2:9) Ihe Satana ota vulu oku tu heka “nefundjaleko lyuuyamba.” (Mat. 13:22) Oyendji ohaya dhiladhila kutya oshimaliwa nenge omaliko otaga vulu oku ya etela enyanyu lyashili. Ngele ohatu dhiladhila ngawo, otashi ke tu kanithitha ekwatathano lyetu naJehova ndyoka li na ongushu onene. Jesus okwa londodha a ti: “Kaku na ngoka ta vulu okulongela aawa yaali; oshoka ota tondo gumwe, ye e ta kala e hole mukwawo, nenge ta simaneke nguka, ye ta dhini ngwiyaka. Kamu vulu okulongela Kalunga pamwe nemona.” (Mat. 6:24) Ngele otwa kala aapika yiinima yopamaliko, nena otashi ti otwe etha po okulongela Jehova. Shoka osho naanaa Satana a hala tu ninge. Inatu kala nando twa lenga oshimaliwa nenge omaliko, pehala lyokukala twa lenga ekwatathano lyetu naJehova. Opo tu kondjithe Satana noku mu sinda, otu na okukala tu na etaloko ewanawa ngele tashi ya pomaliko. —  Lesha 1 Timoteus 6:6-10.

YANDA OHOLE YIIPALA

13. Etaloko lya goyoka lini li li muuyuni ngele tashi ya pondjokana nomilalo?

13 Ohole yiipala oyo omwigo gumwe ngoka Satana ha longitha. Oyendji ohaya dhiladhila kutya ondjokana nenge okukala owala nomusamane gumwe, nenge nomukulukadhi gumwe itashi endele pamwe nethimbo. Otashi yugu anuwa omuntu emanguluko lye. Pashiholelwa, omukiintu gumwe ngoka ha dhana oomuvi okwa ti kutya itashi vulika wu kale owala nomuntu gumwe. Okwa gwedha ko a ti: “Kandi shi wo ngele opu na omuntu e na owala omuntu gumwe nenge a hala okukala nomuntu gumwe.” Omunyandi gumwe okwa ti: “Kandi shi wo lela ngele oshi li mondjila okukala nomuntu gumwe onkalamwenyo yoye ayihe.” Satana oha kala u uvite ombili uuna aantu mboka ya simana taya sheke ondjokana ndjoka yi li omagano ga za kuKalunga. Ondiyapoli kayi na ko nasha nondjokana, yo inayi hala ondjokana yi kalele. Opo tu kondjithe Ondiyapoli, otu na okukala twa tala ko ondjokana ngaashi Kalunga he yi tala ko.

14, 15. Oshike tashi ke ku kwathela wu yande ohole yiipala, uuna to makelwa?

 14 Otu na okukondja twa mana mo tu yande ohole yiipala, kutya nduno otu li mondjokana nenge inatu ya mo natango. Mbela oshipu oku shi ninga? Hasho nando. Pashiholelwa, ngele ngoye omugundjuka, otashi vulika wu uve omunasikola omukweni ti itanga kutya ota vulu oku ya momilalo nakehe ngoka a hala. Otashi vulika wo a kale u uvite uunambano sho ha tumine yalwe omatumwalaka giihole, nenge omathano giipala nongodhi yopeke. Miilongo yimwe nokuli oto vulu okumangwa po ngele oho tumu omathano giipala taga ulike aanona. Ombiimbeli otayi ti: “Omuntu ngoka ta hondele, ota yono kolutu lwe mwene.” (1 Kor. 6:18) Aantu oyendji otaya mono iihuna, yo yamwe oya sa nokuli komikithi ndhoka hadhi taandele pamilalo. Aagundjuka oyendji mboka ya ya momilalo manga inaaya ya mondjokana, oyi ipa uusama. Ombedhi aluhe onuukelo. Iikundaneki muuyuni oya hala tu itaale kutya kapu na omuponga gwasha, uuna tatu taaguluka oompango dhaKalunga. Ngele otwi itaale omitotolombo ndhono, nena otatu ka “fundjalekwa kuulunde.” —  Heb. 3:13.

15 Oshike tashi ke ku kwathela, opo wu yande ohole yiipala? Omusita gwolutu omwene, onkee ano, kala wu shi uunkundi mboka wu na. (Rom. 7:22, 23) Galikana Kalunga e ku pe oonkondo. (Fil. 4:6, 7, 13) Ino iyethela  moonkalo ndhoka tadhi ku nana sigo wa yulwa komwigo gwaSatana, gwohole yiipala. (Omayel. 22:3) Uuna to makelwa, inda ontuku meendelelo. —  Gen. 39:12.

16. Jesus okwa ti ngiini sho a li ta makelwa kuSatana, nomoshiholelwa she otatu ilongo mo shike?

16 Jesus okwe tu tulila po oshiholelwa sha dhenga mbanda. Ini iyethela momamakelo gaSatana. Jesus ina gandja nokuli eitulomo kiipolopolo mbyoka Satana a li ta popi. Pehala lyaashono, Jesus okwa lombwele Satana ta ti: “Okwa nyolwa.” (Lesha Mateus 4:4-10.) Jesus okwa li e shi nawa Omanyolo. Onkee ano, osha li oshipu kuye okutotha mo Omanyolo sho Satana a li ta kambadhala oku mu makela. Opo tu kondjithe Satana noku mu sinda, otu na okukala twa kotoka kaatu gwile momwigo gwe gwohole yiipala. —  1 Kor. 6:9, 10.

IDHIDHIMIKA SIGO WA SINDANA

17, 18. (a) Satana oha longitha ishewe oomwigo dhilwe dhini, nomolwashike tu na okukala twe dhi tegelela? (b) Satana ota ka ningilwa shike, notashi ku kumike ngiini wi idhidhimike?

17 Uuntsa, ohole yokuhola omaliko nosho wo ohole yiipala oyi li owala oomwigo dhimwe po ndhoka Satana ha longitha. Ihe hadho adhike ndhoka, oha longitha wo oomwigo odhindji dhi ili nodhi ili. Pashiholelwa, Aakriste yamwe otaya hepekwa momagumbo, nenge taya shekwa kaanasikola ooyakwawo. Yo yalwe oye li miilongo moka omapangelo taga kambadhala gi indike iilonga yetu yokuuvitha. Natse otwa tegelela wo tu ka pite momaupyakadhi gontumba nogongandi. Jesus okwe tu londodha a ti: “Otamu ka tondwa kwaayehe omolwandje. Ihe ngoka ti idhidhimike sigo ehulilo, oye ta hupithwa.” —  Mat. 10:22.

Satana ota ka nyanyagulwa po thiluthilu (Tala okatendo 18)

18 Oshike tashi ke tu kwathela tu kondjithe Satana, notu mu sinde? Jesus okwa ti: “Mokwiidhidhimika otamu ihupithile oomwenyo dheni.” (Luk. 21:19) Kapu na oshinima shoka she etwa po komuntu tashi vulu oku tu ehameka sigo aluhe. Aantu itaya vulu oku tu yuga uukuume wetu naKalunga, kakele shila ngele otse yene tatu etha shi ningwe. (Rom. 8:38, 39) Nonando yamwe yomaapiya yaJehova aadhiginini oya se, shoka itashi ti kutya Satana okwa sindana. Jehova ote ke ya yumudha. (Joh. 5:28, 29) Ihe Satana ke na etegameno lyasha. Ota ka umbilwa molumbogo lwomuule omimvo 1 000, konima ngele uuyuni we mbuka tu li wa hanagulwa po. (Eh. 20:1-3) Pehulilo lyomimvo 1 000 lyElelo lyaKristus, Satana “ota ka piithwa mo mondholongo,” opo a kambadhale okupukitha aantu ya gwanenena lwahugunina. Konima yaashono, ota ka nyanyagulwa po thiluthilu. (Eh. 20:7-10) Ondiyapoli kayi na etegameno lyasha, ihe ngoye owu na etimaumbwile lyomwenyo gwaaluhe. Onkee ano, tsikila nokukondjitha Satana wa tula ombunda moshihwa. Oto vulu oku mu kondjitha noku mu sinda.