Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Mei 2015

Omapulo ga za kaaleshi

Omapulo ga za kaaleshi

Gog yaMagog ngoka a popiwa membo lyaHesekiel olye?

Uule woomvula odhindji iileshomwa yetu oya kala hayi yelitha kutya Gog yaMagog, edhina lyaSatana konima sho u umbwa mo megulu. Omolwashike ya kala hayi yelitha ngawo? Omolwoohapu ndhoka dhi li mEhololo ndhoka tadhi ti kutya Satana oye ta ka kwatela komeho, sho oshigwana shaKalunga tashi ka ponokelwa muuyuni awuhe. (Eh. 12:1-17) Shika osho sha li she tu ningitha tu ye pehulithodhiladhilo kutya edhina limwe lyaSatana oGog.

Ihe eyelitho ndyoka oli na epuko lyontumba. Dhiladhila owala kiinima tayi landula: Jehova sho a popi kombinga yehanagulo lyaGog, okwa ti kutya ota ka ‘pitika omudhimba gwe gu paluthe oondhila niithitukuti.’ (Hes. 39:4) Jehova okwa gwedha ko wo a ti: “Uuna ayihe mbika tayi ningwa, otandi ka pa Gog omayendo muIsrael.” (Hes. 39:11) Ihe Satana ota ka liwa ngiini koondhila nokiithitukuti, ngele ye oshishitwa shopambepo? Ota vulu ngiini okufumvikwa kombanda yevi? Ombiimbeli oye shi popya sha yela kutya Satana ote ku umbilwa molumbogo lwomuule, a kale mo uule woomvula 1 000. Osha yela kutya, omudhimba gwe itagu ka liwa po nenge gu fumvikwe. —  Eh. 20:1, 2.

Ombiimbeli otayi ti kutya konima yoomvula 1 000, Satana ota ka piithwa mo molumbogo “nota ka tsikila okupukitha aantu ayehe mboka ya kala kombanda yevi alihe, kokutya Gog naMagog. Eeno, Satana ote ke ya gongela ayehe, ya hinge iita.” (Eh. 20:8) Ihe ngele Gog ngoka ta popiwa oSatana, nena otashi ti kutya Satana ote ki ipukitha ye mwene. Onkene “Gog” ngoka ta popiwa membo lyaHesekiel nolyEhololo ke shi Satana.

Gog yaMagog olye ano nani? Opo tu mone eyamukulo, otu na okukonga mOmbiimbeli tu tale kutya olye ta ka ponokela oshigwana shaKalunga. Ombiimbeli otayi popi omaponokelo gatatu. Eponokelo tali ningwa ‘kuGog yaMagog,’ ‘komukwaniilwa gwokonori’ nosho wo ‘kaakwaniilwa yokombanda yevi.’ (Hes. 38:2, 10-13; Dan. 11:40 (OB-1954), 44, 45; Eh. 17:14; 19:19) Mbela omaponokelo ngaka oga yooloka? Oga fa inaaga yooloka. Ombiimbeli otashi vulika tayi popi kombinga yeponokelo limwe tayi tumbula omadhina ga yoolokathana. Omolwashike tatu tile ngawo? Omolwaashoka Ombiimbeli otayi ti kutya iigwana ayihe yokombanda yevi otayi ka kutha ombinga mokuponokela oshigwana shaJehova lwahugunina, shoka tashi ka hingila kiita yaArmagedon. —  Eh. 16:14, 16.

Ngele otwa yelekanitha oovelise adhihe ndhoka tadhi popi kombinga yeponokelo lyahugunina  ndyoka tali ka ningilwa oshigwana shaKalunga, osha yela kutya Gog yaMagog ke shi Satana. Pehala lyaashono, Gog yaMagog otu ulike koshipandi shiigwana yi imanga kumwe. Mbela “omukwaniilwa gwokonori,” nenge gwokuumbangalantu, oye ta ka kwatela komeho iigwana mbika? Katu na naanaa uushili. Ihe eyelitho ndika olya fa tali tsu kumwe noohapu ndhoka Jehova ta lombwele Gog ta ti: ‘Oto ka pita mo mehala lyoye lyokokule kuumbangalantu, to wilike etanga enene lyaakwiita ya za miigwana oyindji, ayehe ya kayila uukambe.’ —  Hes. 38:6, 14, 15.

Omupolofeti Daniel ngoka a li ko pethimbo lyaHesekiel, naye ota popi kombinga yomukwaniilwa gwokonori ta ti: “Nena oonkundana dhokuuzilo nodhokuumbangalantu otadhi mu halutha nota ka kondja a sa ondjahi e ta dhipaga aantu oyendji. Oye nota ka dhika ootenda dhe oonene dhuuwa pokati kefuta nondundu ndjoka hoka kwa tungilwa otempeli. Ihe ota ka sa pwaa na ngoka te mu gongele.” (Dan. 11:44, 45) Shika osho wo embo lyaHesekiel tali ti kombinga yaashoka Gog taka ninga. —  Hes. 38:8-12, 16.

Oshike tashi ka ningwa po konima yeponokelo ndyoka lyahugunina? Daniel ota ti: “Pomasiku ngoka omuyengeli omukuluntu Mikael [Jesus Kristus], ngoka ha popile oshigwana shoye [okuza mo 1914], ota ka holoka [puArmagedon]. Nena otaku ka kala ethimbo edhigu [uudhigu uunene], omalwa omanene inaaga kala ko nale kombanda yevi, hela aantu ya shitilwe. Uuna ethimbo ndyoka tali ya, aantu ayehe yoshigwana shoye mboka omadhina gawo ga nyolelwa membo lyaKalunga, otaa ka hupithwa.” (Dan. 12:1) Ehokololo lya faathana kombinga yaashoka Jesus ta ka ninga otali adhika wo mEhololo 19:11-21.

Ihe ‘Gog naMagog’ ngoka a tumbulwa mEhololo 20:8 olye? Aantu mboka taya ka tukulila Jehova oshipotha e taya ponokele oshigwana she, oyo taya ithanwa edhina ndyoka. Shika otashi ka ningwa pehulilo lyomimvo 1 000, sho Satana ta ka pukitha aantu lwahugunina. Otaya ka kala ye na uutondwe ngaashi iigwana mbyoka tayi ithanwa Gog yaMagog, mbyoka tayi ka ponokela wo oshigwana shaKalunga pehulilo lyuudhigu uunene. Gog naMagog naye ota ka hanagulwa po, ngaashi naanaa iigwana mbiyaka tayi ka hanagulwa po piita yaArmagedon. (Eh. 19:20, 21; 20:9) Osha fa shi li mondjila okuthika pehulithodhiladhilo kutya “Gog naMagog” ngoka a popiwa mEhololo, aantu mboka taya ka tukulila Jehova oshipotha pehulilo lyomimvo 1 000.

“Omukwaniilwa gwokonori” oye ta ka kwatela komeho iigwana mbyoka tayi ka ponokela oshigwana shaKalunga. Otwa tegelela nondjuulukwe oku ka mona kutya omukwaniilwa ngoka olye, molwaashono otu na ko nasha lela naashono Ombiimbeli tayi ti. Ihe kutya nduno omukwaniilwa ngoka olye, otu na omukumo kutya (1) Gog yaMagog netangakwiita lye otaya ka sindwa e taya hanagulwa po. (2) Omukwaniilwa gwetu, Jesus Kristus, ota ka hupitha oshigwana shaKalunga, note ke shi fala muuyuni uupe wombili moka tamu ka kala egameno lyashili. —  Eh. 7:14-17.