Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Apilili 2015

Mbela ekwatathano lyoye naJehova olya kola ngaa?

Mbela ekwatathano lyoye naJehova olya kola ngaa?

“Hedheni kuKalunga, ye nota hedha kune.” —  JAK. 4:8.

1. Omolwashike tu na okukaleka ekwatathano lyetu naJehova lya kola?

NGELE ngoye Onzapo yaJehova ya ninginithwa, nena owu na ekwatathano lyopothingo naJehova. Ekwatathano ndyoka oshinima shi na ondilo onene. Ihe ekwatathano ndyoka otali vulu okuteywa po kuuyuni waSatana notali vulu wo okunkundipalekwa kokwaagwanenena kwetu. Ano atuheni otu na okukaleka ekwatathano lyetu naJehova lya kola ngaashi tashi vulika.

2. (a) Okukala nekwatathano nomuntu osha hala okutya ngiini? (Tala enyolo lyopevi.) (b) Ongiini tatu vulu okukoleka ekwatathano lyetu naJehova?

2 Mbela Jehova omuntu ngaa gwolela kungoye? Mbela owu uvite ngaa kutya oku li Kuume koye? Owa hala ngaa ekwatathano lyoye naye li kale lya kola shi vulithe nale? Oohapu dhaJakob 4:8 otadhi tu lombwele shoka tu na okuninga tadhi ti: “Hedheni kuKalunga, ye nota hedha kune.” Opo pokati keni naJehova pu kale pu na ekwatathano ewanawa, amuhe naJehova omu na okuninga po sha. * Ngele owa katuka oonkatu wu hedhe  popepi naJehova, naye ota ka katuka oonkatu a hedhe popepi nangoye. Sho to shi ningi, Jehova ota ka kala Omuntu gwolela kungoye. Ekwatathano lyoye naye otali ka kala lya kola e to kala wu uvite ngaashi Jesus a li u uvite sho a ti: ‘Ngoka a tumu ndje, oye omunashili.’ Okwa tsikile ko ta ti: ‘Ngame ondi mu shi.’ (Joh. 7:28, 29) Oshike to vulu okuninga, opo wu hedhe popepi naJehova?   

Oho popi ngiini naKalunga? (Tala okatendo 3)

3. Ongiini tatu vulu okukala hatu popi naJehova?

3 Ngele owa hala okuhedha popepi naJehova, osha simana wu kale ho popi naye esiku kehe. Ihe mbela otashi wapa ngaa? Dhiladhila owala kunkene ho popi nakuume koye ngoka ha kala kokule nangoye. Otashi vulika mu kale hamu inyolele olundji oombilive nohamu popi mongodhi. Ngoye oho popi naJehova esiku kehe uuna to galikana kuye. (Lesha Episalomi 142:2.) Ihe ongiini to vulu oku mu pa ompito a popye nangoye? Oto vulu oku shi ninga pandjigilile sho to lesha oohapu dhe, Ombiimbeli, nokutedhatedha kudho. (Lesha Jesaja 30:20, 21.) Natu kundathaneni kutya okukala ho popi naJehova otaku vulu ngiini okukoleka ekwatathano lyoye naye, noku mu ninga Kuume koye kashili.

PITIKA JEHOVA A POPYE NANGOYE SHO TO KONAKONA OMBIIMBELI

4, 5. Jehova oha popi ngiini nangoye sho to konakona Ombiimbeli? Gandja oshiholelwa.

4 Otu shi shi kutya Ombiimbeli oyo etumwalaka lya za kuKalunga nolya nuninwa aantu ayehe. Ihe mbela Ombiimbeli otayi vulu ngaa oku ku kwathela wu hedhe popepi naJehova? Eeno, otayi vulu. Sho to yi lesha naasho to yi konakona, gandja eitulomo kunkene wu uvitile shoka to lesha. Dhiladhila wo kunkene to vulu okutula miilonga shoka wa lesha. Ngele owe shi ningi, oto pitike Jehova a popye nangoye. Ota ka ninga Kuume koye kopothingo ngoka te ku kwathele noto ka hedha popepi naye. —  Heb. 4:12; Jak. 1:23-25.

5 Pashiholelwa, oho kala wu uvite ngiini sho to lesha oohapu dhaJesus ndhoka tadhi ti: “Inamu ilikolela omaliko kombanda yevi”? Ngele owa kala wa lenga Jehova monkalamwenyo yoye, oto kala wu uvite kutya okwe ku hokwa. Ihe otashi vulika wu leshe oohapu ndhoka dhaJesus e to mono kutya owa pumbwa okweetha po iinima mbyoka tayi ku imbi okugandja eitulomo kokulongela  Kalunga. Kungeyi, Jehova ote ku kwathele wu uve ko kutya oshike wu na okuninga, opo wu hedhe lela popepi naye. —  Mat. 6:19, 20.

6, 7. (a) Oshike hashi ningilwa ohole yetu yokuhola Jehova nohole ye yoku tu hola, uuna tatu konakona Ombiimbeli? (b) Elalakano lyetu unene olyashike uuna tatu konakona Ombiimbeli?

6 Oshoshili kutya uuna tatu konakona Ombiimbeli, ohatu ilongo mo omalunduluko ngoka tu na okuninga, opo tu longele nawa Jehova. Ohatu ilongo wo kombinga yiinima mbyoka e tu ningila molwohole ye nomaukwatya ge omawanawa, ngoka hage tu inyengitha tu kale tu mu hole unene. Sho ohole yetu yokuhola Jehova tayi koko, ohole ye yoku tu hola nayo otayi koko, nekwatathano lyetu naye ohali kolo wo. —  Lesha 1 Aakorinto 8:3.

7 Ngele otwa hala okuhedha popepi naJehova, osha simana tu kale tu na etompelo lyu uka lyokukonakona Ombiimbeli. Jesus okwa ti: ‘Mboka ye ku tseya, Kalunga awike kashili, noya tseya wo Jesus Kristus, ngoka we mu tumu, oyo mboka ye na omwenyo gwaaluhe.’ (Joh. 17:3) Otatu vulu okwiilonga iinima oyindji iipe niihokithi uuna tatu konakona Ombiimbeli. Ihe elalakano lyetu nali kale unene okutseya kutya Jehova Omuntu gwolela. —  Lesha Eksodus 33:13; Eps. 25:4.   

8. (a) Yamwe otashi vulika ya kale yu uvitile ngiini omukalo moka Jehova u ungaunga naUsia? (b) Ngele Jehova owu mu shi nawa, oto ka kala wu uvitile ngiini shoka a ninga?

8 Ngele Jehova oKuume ketu kopothingo, itatu ka kala tatu ipula unene kutya omolwashike Ombiimbeli ihaayi yelitha aluhe shoka a ninga. Pashiholelwa, sho Usia a li omukwaniilwa gwaJuda, oshigwana osha li hashi longele iikalunga. Ihe ye ina kutha nando ombinga. “Okwa longo shoka sha hokiwa kOmuwa.” (2 Aak. 15:1-5) Ihe konima Jehova okwe mu geele nuuvu woshilundu. Omolwashike mbela? Ehokololo inali shi popya. Mbela owu uvitile ngiini shoka Jehova a ningi? Mbela owu uvite kutya Jehova ke shi omuyuuki sho a geele Usia pwaahe na etompelo lyoku shi ninga? Ino kala wu uvite ngawo. Ngele Jehova owu mu shi nawa, nena owu shi kutya egeeloputudho lye aluhe oli li mondjila. Aluhe oha “putudha nuuyuuki.” (Jer. 30:11) Nonando ino tseya kutya omolwashike Jehova a geele Usia, kala nuushili kutya egeelo ndyoka oli li pauyuuki.

9. Uuyelele wuni tawu tu kwathele tu uve ko kutya omolwashike Jehova a geele omukwaniilwa Usia nuuvu woshilundu?

9 Ombiimbeli otayi tu pe uuyelele wulwe kombinga yonkalamwenyo yomukwaniilwa Usia. (2 Aak. 15:7, 32) Ehokololo ndyoka li li mOndjalulo ontiyali 26:3-5, 16-21 otali ti kutya “okwa longo shoka sha hokiwa kOmuwa.” Ihe olya popi wo kutya konima yethimbo “okwa tumbu pombanda, naashika oshe mu fala mepunduko.” Omukwaniilwa Usia okwa kambadhala okuninga oshinima shoka aayambi oyo owala ya li ya pitikwa ye shi ninge. Aayambi 81 oya li ye mu lombwele kutya shoka ta ningi osha puka noya kambadhala nokuli oku mu keelela. Mbela okwa li i inyenge ngiini? Okwe ya geele, oshoka okwa li e na uuntsa. Uuyelele mbuka wa gwedhwa po otawu tu kwathele tu uve ko kutya omolwashike Jehova a geele omukwaniilwa Usia nuuvu woshilundu.

Mpoka ngaa pu thike ontseyo yoye yokutseya Jehova, opo ngaa pu thike einekelo lyoye kutya oha ningi aluhe shoka shi li mondjila

10. Omolwashike inaatu pumbwa aluhe okuuva etompelo lyoshinima kehe shoka Jehova a ninga, nomolwashike tu na einekelo kutya oha ningi aluhe shoka shi li mondjila?

10 Otatu ilongo mo shike sha simana mehokololo lyomukwaniilwa Usia? Otu na uuyelele  owindji mboka tawu tu kwathele tu uve ko kutya omolwashike Jehova e mu geele. Ihe mbela oshike tatu ka ninga po, ngele Ombiimbeli inayi gandja uuyelele awuhe? Mbela oto ka kala to ipula ngele shoka Jehova a ninga oshi li ngaa mondjila? Nenge oto ka kala wu uvite kutya Ombiimbeli oyi na uuyelele wa gwana mboka tawu ku kwathele wu kale wi inekela kutya Jehova oku li aluhe mondjila? (Deut. 32:4) Mpoka ngaa pu thike ontseyo yoye yokutseya kutya Jehova Omuntu gwolela, opo ngaa pu thike ohole yoye yoku mu hola nokukala we mu inekela. Ito ka kala nokuli wa pumbwa okumona omatompelo kutya omolwashike ha ningile iinima yontumba. Sho to konakona Ombiimbeli, Jehova ota ka ninga omuntu gwolela kungoye noto ka hedha popepi lela naye. —  Eps. 77:12, 13.

UUNA TO GALIKANA OTO POPI NAJEHOVA

11-13. Owu shi shi ngiini kutya Jehova oha pulakene komagalikano getu? (Tala kethano lyopetameko.)

11 Egalikano ohali tu hedhitha popepi naJehova. Ohatu mu hambelele megalikano noku mu pandula, nohatu mu pula wo ekwatho. (Eps. 32:8) Ihe ngele owa hala okupanga uukuume wopothingo naJehova, owu na okukala nuushili kutya ohu uvu omagalikano.

12 Aantu yamwe ohaya ti kutya Kalunga iha pulakene komagalikano. Ohaya ti kutya egalikano oshinima shoka hashi uvitha owala omuntu nawa. Oyi itaala kutya egalikano ohali ku kwathele ashike wu dhiladhile nawa kombinga yuupyakadhi mboka wu na, nokumona kutya oto wu kandula po ngiini. Odhoshili kutya egalikano otali vulu li ku  kwathele momikalo ndhoka. Ihe uuna to popi naJehova megalikano, ohe ku pulakene shili. Ongiini to vulu okukala wu na uushili kutya Jehova ohu uvu omagalikano shili?

Kala nuushili kutya Jehova oha pulakene komagalikano goye

13 Dhiladhila kwaashika: Manga Jesus inee ya kombanda yevi, okwa li a mono kutya Jehova oha yamukula omagalikano gaapiya Ye. Sho e ya kombanda yevi, okwa kala ha galikana kuHe gwomegulu, kombinga yaashoka ta dhiladhila naashoka u uvite. Oshikando shimwe, okwa galikanene uusiku awuhe. (Luk. 6:12; 22:40-46) Omolwashike Jesus a li ha galikana kuJehova, ngele ando Kalunga iha pulakene shili komagalikano gaantu? Jesus okwa longo nokuli aalanduli ye nkene ye na okugalikana kuJehova. Ngele ando Jehova iha pulakene shili komagalikano gaantu, omolwashike Jesus a longo aalanduli ye okugalikana? Osha yela kutya Jesus okwa li e shi shi kutya Jehova ohu uvu shili omagalikano. Okwa lombwele He megalikano ta ti: “Tate otandi ku hambelele, ongoye sho ho uvu ndje. Ondi shi shi kutya ngoye oho uvu ndje aluhe.” Onkee ano, natse otatu vulu okukala nuushili kutya Jehova oha pulakene omagalikano getu. —  Joh. 11:41, 42; Eps. 65:2.

14, 15. (a) Uuwanawa wuni hatu mono ngele ohatu pula iinima yokondandalunde momagalikano getu? (b) Kathy omagalikano ge oge mu kwathele ngiini a hedhe popepi naJehova?

14 Ihatu shi mono aluhe uuna omagalikano getu taga yamukulwa. Ihe ngele owa pula iinima yokondandalunde megalikano lyoye, oto ka mona nawa sho Jehova te ku yamukula. Shika otashi ke ku kwathela wu mone kutya Jehova Omuntu gwolela. Ngele owa mbumbulile Jehova ashihe shoka to ipula nasho, ota ka hedha popepi nangoye.

15 Pashiholelwa, omumwameme Kathy okwa kala ha yi muukalele olundji, ihe ka li he wu nyanyukilwa. * Ota ti: “Kanda li  ndi hole mo momapya. Onda li ndi tonde mo lelalela.” Sho a penzelwa, omukuluntugongalo gumwe okwe mu ladhipike a ninge omukokolindjila gwondjigilile. Ota ti: “Omukuluntugongalo ngoka okwa pe ndje nokuli ofooloma. Onda tokola ndi kokole ondjila, ihe onda tameke wo okugalikana esiku kehe, opo Jehova a kwathele ndje ndi kale ndi hole mo.” Mbela Jehova okwa yamukula ngaa omagalikano ge? Konima yokukokola ondjila uule woomvula ndatu, ota ti: “Molwaashoka onda kala handi yi muukalele ethimbo ele, ondi ilongo oshindji kaamwameme yalwe mboka nda longa nayo, nonde ende tandi hwepopala mokuuvitha. Ngashingeyi ohandi kala owala nda hala okuya muukalele, ihe ondi hole mo unene. Shimwe ishewe, ekwatathano lyandje naJehova olya kola shi vulithe nale.” Omagalikano gaKathy oge mu kwathela shili a hedhe popepi naJehova.

Tsikila okuhedha popepi naJehova (Tala okatendo 16, 17)

NINGA PO SHA

16, 17. (a) Oshike tu na okuninga, opo tu koleke ekwatathano lyetu naJehova? (b) Oshike tatu ka kundathana moshitopolwa tashi landula?

16 Otatu vulu okukala hatu hedha aluhe popepi naJehova, aluhe sigo aluhe. Natu tsikileni okukala hatu pulakene kuye mokukonakona Ombiimbeli pandjigilile nokupopya naye megalikano. Ngele otwe shi ningi, ekwatathano lyetu naJehova otali ka kola lela nokekwatho lye otatu ka vula okwiidhidhimikila omayeleko.

Otatu vulu okukala hatu hedha aluhe popepi naJehova, aluhe sigo aluhe

17 Ihe omathimbo gamwe, ohatu kala tatu kondjo nomaupyakadhi ngoka tu na, nonando ohatu kala aluhe tatu galikana kuJehova. Oonkalo ndhika ohadhi tu ningitha tu kanithe einekelo lyetu muye. Otashi vulika tu kale tu uvite kutya Jehova iha uvu omagalikano getu, nokukala tatu ipula ngele otu li ngaa shili ookuume ke. Ngele mungoka ohamu iyakele omadhiladhilo ngono, oshike to vulu okuninga po? Oshitopolwa tashi landula otashi ke ku kwathela.

^ okat. 2 Ekwatathano olyo omukalo moka aantu yaali haya kala yu uvitilathane nankene hayi ihumbatelathana. Ayehe yaali oye na okuninga po sha, opo ya kaleke ekwatathano lyawo lya kola.

^ okat. 15 Edhina ndyoka halyo lye lyolela.