Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Apilili 2015

Nkene aakuluntugongalo ye na okudheula yalwe megongalo

Nkene aakuluntugongalo ye na okudheula yalwe megongalo

“Dhiginina oohapu ndhoka u uvu tandi dhi uvitha . . . Dhi gandja kaantu ye shi kwiinekelwa.” —  2 TIM. 2:2.

1. (a) Aapiya yaKalunga oya kala aluhe ye shi shike kombinga yokudheulwa, nongiini tu na oku shi tula miilonga kunena? (b) Oshike tatu ka kundathana moshitopolwa shika?

OSHIGWANA shaKalunga osha kala aluhe shi shi kutya okudheulwa ohaku pondola. Pashiholelwa, Abraham okwa li u unganeke ‘aapiya ye ayehe mboka ye shi okukondja,’ mboka ya pondola mokuhupitha Lot. (Gen. 14:14-16) Aaimbi pethimbo lyomukwaniilwa David ‘oya li ya longwa’ okwiimba omaimbilo taga tanga Jehova. (1 Ondjal. 25:7) Kunena, otu na okukondjitha Satana nuuyuni we. (Ef. 6:11-13) Ohatu kambadhala wo nuudhiginini okutanga Jehova sho tatu lombwele yalwe kombinga yedhina lye. (Heb. 13:15, 16) Opo tu shi pondole, otu na okukala twa dheulwa, ngaashi aapiya yaKalunga yonale. Jehova okwa pa aakuluntugongalo momagongalo oshinakugwanithwa shokudheula yalwe. (2 Tim. 2:2) Mbela aakuluntugongalo yamwe ohaya longitha omikalo dhini okudheula aamwatate, opo ya kale taya sile oshimpwiyu oshigwana shaJehova?

KWATHELA NGOKA TO DHEULA A KALE E HOLE JEHOVA

2. Manga omukuluntugongalo inaa dheulila omumwatate oshinima shontumba, oku na okuninga shike, nomolwashike?

2 Omukuluntugongalo ota vulu okuyelekanithwa nomuntu ta  kunu iimeno. Manga omuntu inaa kuna iimeno, evi ohe li tutile uuhoho, opo iimeno yi koke noyi kale yo ondoka. Omukuluntugongalo naye manga inaa dheulila omumwatate oshinima shontumba, ota vulu okukundathana naye omakotampango gontumba gOmbiimbeli ngoka tage ke mu kwathela, a kale i ilongekidha okutula miilonga shoka ta dheulilwa. —  1 Tim. 4:6.

3. (a) Oohapu dhaJesus ndhoka dhi li muMarkus 12:29, 30, otadhi vulu ngiini okulongithwa moonkundathana pamwe nomumwatate ngoka ta dheulwa? (b) Egalikano lyomukuluntugongalo ohali gumu ngiini omumwatate ngoka ta dheula?

3 Osha simana tu uve ko kutya oshili ohayi gumu ngiini omadhiladhilo nomaiyuvo gomumwatate ngoka ta dheulwa. Opo wu shi uve ko, owu na oku mu pula kutya sho i iyapulile Jehova, omatokolo ngoka ha ningi monkalamwenyo oga gumwa ngiini? Epulo ndyoka otali vulu okupendutha oonkundathana kombinga yankene tu na okulongela Jehova nomutima aguhe. (Lesha Markus 12:29, 30.) Otashi vulika wu na okugalikana pamwe nomumwatate nokupula Jehova e mu pe ombepo ondjapuki, ndjoka tayi ke mu kwathela sho ta dheulwa. Omumwatate ngoka ota ka kala a tsuwa omukumo, sho u uvite to mu popi megalikano.

4. (a) Gandja iiholelwa yomahokololo gOmbiimbeli, ngoka taga vulu okukwathela omumwatate a hume komeho nziya. (b) Elalakano lini aakuluntugongalo ye na okwiitulila po sho taya dheula yalwe?

4 Sho tamu tameke nedheulo, oshiwanawa mu kundathane omahokololo gopaMbiimbeli ngoka taga ka kwathela omumwatate ngoka ta dheulwa a mone kutya osha simana okukala ha kwathele. Otage ke mu kwathela wo a mone kutya okwa pumbwa okukala omwiinekelwa nomwiifupipiki. (1 Aak. 19:19-21; Neh. 7:2; 13:13; Iil. 18:24-26) Osha simana omumwatate a kale e na uukwatya mbuka. Otawu ka kwathela omumwatate a ninge ehumokomeho nziya, ngaashi owala uuhoho hawu kwathele iimeno yi koke. Jean-Claude, omukuluntugongalo a za koFulaanisa, ota ti kutya elalakano lye lyokudheula olyo okukwathela omumwatate a ninge omatokolo gi ikolelela komakotampango gOmbiimbeli. Ota ti: “Ohandi kongo oompito tu leshe enyolo lyontumba pamwe nomumwatate, opo ndi ‘tonatithe omeho’ ge, a mone “iikumitha” nenge iinima iiwanawa mbyoka yi li mOohapu dhaKalunga.” (Eps. 119:18) Omikalo dhilwe dhini tadhi vulu okulongithwa mokudheula omumwatate?

MU LOMBWELA OMALALAKANO NGOKA TA VULU OKWIITULILA PO NUUWANAWA WAGO

5. (a) Omolwashike sha simana okupula omumwatate omalalakano ngoka i itulila po, sho ta longele Jehova? (b) Omolwashike aakuluntugongalo ye na okudheula aamwatate manga ye li aagundjuka? (Tala enyolo lyopevi.)

5 Pula omumwatate ngoka to dheula kutya omalalakano geni i itulila po sho ta longele Jehova. Ngele ini itulila po omalalakano gasha,  mu kwathela i itulile po limwe ndyoka ta vulu okugwanitha po. Kala wu na ohamu sho to mu lombwele kombinga yomalalakano ngoka wa li wu na nankene wa li wu uvite sho we ga gwanitha po. Omukalo nguka omupu nohagu pondola. Victor, omukokolindjila nomukuluntugongalo moAfrika, okwa ti: “Sho nda li omugundjuka, omukuluntugongalo gumwe okwa li a pula ndje omapulo gontumba kombinga yomalalakano gandje. Omapulo ngoka oga kwathele ndje ndi dhiladhile muule kombinga yuukalele wandje.” Aakuluntugongalo mboka ya pyokoka ohaya ti kutya osha simana okudheula aamwatate manga ye li aagundjuka, tashi vulika sho opo ya gwanitha oomvula omulongo nasha. Oto vulu oku ya pa iinakugwanithwa megongalo, shi ikolelela koomvula dhawo. Ngele aamwatate oya dheulwa manga ye li aagundjuka, otashi ke ya kwathela ya gandje eitulomo komalalakano gawo sho taya koko naasho taya ka kala ye na iinakugwanithwa oyindji. —  Lesha Episalomi 71:5, 17. *

Yelithila omumwatate kutya omolwashike a pumbwa okulonga oshilonga shontumba shoka we mu pa a longe. Mu pandula sho ta kambadhala oku shi longa (Tala okatendo 5-8)

6. Omukalo guni gwa simana Jesus a longitha okudheula yalwe?

6 Opo ngoka ta dheulwa a kale e na ehalo okukwathela megongalo, ngoka te mu dheula ke na owala oku mu lombwela shoka e na okuninga. Oku na wo okuyelithila omumwatate ngoka kutya omolwashike sha simana e  shi ninge. Jesus, Omulongi Omunene, okwa lombwelele aayapostoli ye ye ku uvithe. Ihe tango okwe ya lombwele kutya omolwashike ye na oku shi ninga. Okwa ti: “Ongame nda pewa epangelo alihe megulu nokombanda yevi. Indeni ano, ka ningeni aantu ayehe aalongwa yandje.” (Mat. 28:18, 19) Ongiini aadheuli taya vulu okuholela omukalo gwaJesus gwokudheula?

7, 8. (a) Aakuluntugongalo otaya vulu ngiini okuholela Jesus ngele tashi ya pokudheula yalwe? (b) Omolwashike sha simana okupandula ngoka to dheula? (c) Oshike tashi ka kwathela aakuluntugongalo sho taya dheula yalwe? (Tala oshimpungu “ Nkene wu na okudheula yalwe.”)

7 Ngele owa pe omumwatate oshilonga shontumba, mu lombwela to longitha Ombiimbeli kutya omolwashike oshilonga shoka sha simana. Shoka otashi ke mu kwathela a kale ha longo metsokumwe nomakotampango gOmbiimbeli, pehala lyokuwilikwa owala koompango. Pashiholelwa, ngele owa pula omumwatate a kale ha tonatele posheelo shOshinyanga shUukwaniilwa nokwoopaleka po, opo aantu kaaya pundulwe kusha sho taye ya mo, oto vulu oku mu leshela Titus 2:10. Mu yelithila nkene oshinakugwanithwa she tashi ka ningitha etumwalaka lyUukwaniilwa li kale lya hokiwa. Oshikwawo, mu kwathela a kaleke aakokele mboka ye li megongalo momadhiladhilo nankene shoka ta longo tashi ke ya kwathela. Oonkundathana dha tya ngaaka otadhi ke mu kwathela a kale ha dhiladhila unene kunkene e na okukwathela aantu pehala lyokudhiladhila koompango. Ngele okwa mono nkene shoka ta longo tashi kwathele aamwatate naamwameme, ota ka kala a nyanyukwa sho e wete kutya ote ya kwathele.

8 Ino dhimbwa okupandula omumwatate ngoka to dheula, sho ta tula miilonga omayele ngoka we mu pe. Omolwashike shika sha simana? Ngaashi ashike oshimeno hashi pumbwa omeya opo shi koke nawa, omumwatate naye ota ka ninga ehumokomeho miilonga yaJehova ngele oho mu pandula. —  Yelekanitha Mateus 3:17.

UUPYAKADHI MBOKA TAWU VULU OKUHOLOKA PO

9. (a) Omolwashike oshidhigu kaakuluntugongalo mboka ya kala miilongo iiyamba okudheula yalwe megongalo? (b) Omolwashike aamwatate yamwe aagundjuka inaaya pititha komeho okulongela Kalunga monkalamwenyo yawo?

9 Aakuluntugongalo mboka ye li miilongo iiyamba otashi vulika ya mone oshidhigu okuladhipika aamwatate mboka ye na oomvula omilongo mbali nasha nenge omilongo ndatu nasha ya kale ye na iinakugwanithwa megongalo. Aakuluntugongalo yokiilongo 20 lwaampono, mboka ye na owino owindji, oya ti oya mona kutya omolwashike aamwatate yamwe aagundjuka ihaaya kala ye na iinakugwanithwa megongalo. Oyendji yomuyo oya ti kutya sho aamwatate yamwe ya li aagundjuka, aavali yawo kaya li ye ya ladhipike ya kale ye na omalalakano gokulongela Jehova. Omanga aamwatate mboka ya li ya hala okukala ye na iinakugwanithwa megongalo, oya li ya ladhipikwa kaavali yawo ya lalakanene elongo lyopombanda nenge iilonga mbyoka hayi futu nawa. Onkee ano, inaya kala nando ya pititha komeho okulongela Jehova monkalamwenyo yawo. —  Mat. 10:24.

10, 11. (a) Omukuluntugongalo ota vulu ngiini okukwathela omumwatate a taambe ko iinakugwanithwa megongalo? (b) Omanyolo geni omukuluntugongalo ta vulu okulongitha a kwathele omumwatate, nomolwashike? (Tala enyolo lyopevi.)

10 Ngele omumwatate ina hala okukala e na iinakugwanithwa megongalo, owu na okukambadhala lela wu mu kwathele. Owu na wo oku mu idhidhimikila, nopehulilo oto ka vula oku mu kwathela. Omuntu ngele owa hala okamuti ka koke ku ukilila oto vulu oku ka ukitha moku ka zula kashona nakashona. Nangoye oto vulu okukwathela omumwatate kashona  nakashona a mone kutya osha simana okutaamba ko iinakugwanithwa megongalo. Mbela owu na oku shi ninga ngiini?

11 Konga ethimbo lyokupanga uukuume nomumwatate ngoka. Mu lombwela kutya egongalo olye mu pumbwa. Mokweendela ko kwethimbo oto vulu okutompathana naye to longitha omanyolo, opo wu mu kwathele a dhiladhile kutya okwiiyapulila Jehova otaku ti lela shike. (Omuuv. 5:4; Jes. 6:8; Mat. 6:24, 33; Luk. 9:57-62; 1 Kor. 15:58; 2 Kor. 5:15; 13:5) Oto vulu okuguma omutima gwe ngele owe mu pula omapulo taga landula: ‘Sho wi iyapulile Jehova otashi ti owe mu uvanekele shike? Mbela Jehova okwa li u uvite ngiini sho wa ninginithwa?’ (Omayel. 27:11) ‘Ye Satana okwa li u uvite ngiini?’ (1 Pet. 5:8) Omanyolo ngaangoka oge na oonkondo notaga vulu okuguma omutima gwomumwatate. —  Lesha Aahebeli 4:12. *

MBOKA TAMU DHEULWA, KALENI MU SHI KWIINEKELWA

12, 13. (a) Elisa okwa li e na iikala ya tya ngiini sho ta dheulwa? (b) Jehova okwa yambeke ngiini Elisa molwuudhiginini we?

12 Aamwatate ne aagundjuka, egongalo olye mu pumbwa! Omu na okukala mu na iikala ya tya ngiini, opo mu pondole sho tamu longele Jehova? Opo tu mone eyamukulo, natu kundathaneni iinima yontumba mbyoka ya ningilwe monkalamwenyo yaElisa sho a li ta dheulwa.   

13 Oomvula 3 000 lwaampono dha ka pita, omupolofeti Elia okwa pulile Elisa a kale he mu kwathele. Elisa okwa zimine e ta kala ha kwathele Elia nuudhiginini niilonga oyindji, naambyoka ya dhinika nokuli. (2 Aak. 3:11) Elisa okwa kala ta dheulwa uule woomvula hamano lwaampo. Sho Elia a li e li pokuhulitha po iilonga ye muIsraeli, okwa lombwele Elisa kutya ota vulu okweetha po oshilonga she. Ihe iikando ayihe itatu, Elisa okwa ti: “Itandi ku thigi po.” Okwa li a tokola toko okukala naElia ngele otashi vulika. Jehova okwa li a yambeke Elisa, molwaashoka okwa li e shi kwiinekelwa nomudhiginini. Jehova okwe mu pe uuthembahenda wokumona Elia sho ta fegulwa po koshikungulu. —  2 Aak. 2:1-12.

14. (a) Mboka taya dheulwa otaya vulu ngiini okuholela Elisa? (b) Omolwashike ngoka ta dheulwa e na okukala omudhiginini?

14 Ongiini to vulu okuholela Elisa sho to dheulwa? Kala ho taamba ko iinakugwanithwa nomaako agehe, kutya nduno owu wete inaayi simana. Kala wa tala ko ngoka te ku dheula kutya oku li kuume koye. Mu lombwela kutya owe mu pandula sho ta kambadhala oku ku dheula. Mu lombwela wo kutya owa halelela a tsikile oku shi ninga. Sha simanenena, kala ho gwanitha po iinakugwanithwa yoye nuudhiginini. Omolwashike mbela? Omolwaashoka otashi ku ulukila aakuluntugongalo kutya Jehova okwa hala oku ku longitha megongalo. —  Eps. 101:6; lesha 2 Timoteus 2:2.

KALA HO SIMANEKE AAKULUNTUGONGALO MBOKA YA PYOKOKA

15, 16. (a) Elisa okwa li u ulike ngiini kutya okwa simaneka Elia ngoka a li te mu dheula? (Tala kethano lyopetameko.) (b) Omolwashike aapolofeti yalwe ya li yi inekela Elisa?

15 Ehokololo lyaElisa otali tu longo wo kutya osha simana aamwatate ya kale ya simaneka aakuluntugongalo mboka ya pyokoka. Ehokololo otali popi kutya sho Elia naElisa ya talele po aapolofeti muJeriko, aalumentu mbaka yaali oya yi komulonga gwaJordan. “Elia okwa kutha elwaakani lye, e li gonyo e te li dhenge omeya. Omeya oga topoka pokati.” Oya tokola Jordan puukukutu e taya yi handiyaka yomulonga “taa kundathana, manga taye ende.”  Elisa okwa li a yamu mo sha momudheuli gwe, oshoka okwa li e mu pulakena nawa sho ta popi. Elisa ka li i ishi e shi iinima. Sho Elia a fegulwa po koshikungulu, Elisa okwa shuna kuJordan. Sho a thiki pomulonga ngoka okwa kutha elwaakani lyaElia, e te li dhengitha omeya ta ti: “Omuwa, Kalunga kaElia, ou li peni?” Omulonga ogwa topoka natango pokati. —  2 Aak. 2:8-14.

16 Owa ndhindhilika ngaa kutya oshikumithalonga shotango shaElisa osha li sha fa oshikumithalonga shaElia shahugunina? Shika otashi tu longo shike? Otashi tu longo kutya Elisa ka li u uvite kutya oku na okukala ha ningi iinima momukalo gwa yooloka ko kugwaElia, oshoka ngashingeyi oye a langekwa po a ninge omupolofeti omukuluntu. Pehala lyaashono, Elisa oku ulike kutya okwa li a simaneka Elia sho a ningi naanaa ngaashi Elia a ningile. Shika osha kwathele aapolofeti ooyakwawo ya kale ye mu inekela. (2 Aak. 2:15) Moshilonga shoka shuupolofeti okwa ningi mo uule woomvula 60. Jehova okwa kala te mu pe oonkondo dhokulonga iilongankondo oyindji yi vulithe nokuli nopwaambyoka ya longwa kuElia. Aamwatate mboka taya dheulwa oye na okwiilonga mo shike mwaashoka?

17. (a) Ongiini aamwatate mboka taya dheulwa taya vulu okukala ye na iikala ya fa yaElisa? (b) Mokweendela ko kwethimbo, Jehova ota ka longitha ngiini aamwatate mboka taya dheulwa?

17 Uuna wa pewa iinakugwanithwa megongalo ino dhiladhila kutya owu na oku yi gwanitha po pamukalo gwa yooloka ko thiluthilu kwaangoka gwa li hagu longithwa nale. Dhimbulukwa kutya omalunduluko ohaga ningwa owala ngele osha pumbiwa, nenge ngele ehangano lyaJehova otali ti naga ningwe. Inashi pumbiwa wu ninge omalunduluko, molwaashoka owala wa hala oku ga ninga. Sho Elisa a kala ha holele Elia, oshu ulike kutya okwe mu simaneka. Shoka osha ningitha wo aapolofeti ooyakwawo ya kale ye mu inekela. Nangoye ngele owa kala ho longitha omikalo ndhoka omudheuli gwoye ha longitha, oto ulike kutya owa simaneka aakuluntugongalo mboka ya pyokoka, naamwatate megongalo otaya ka kala ye ku inekela. (Lesha 1 Aakorinto 4:17.) Sho to ende to dheuka nawa, oto ka vula okuninga omalunduluko ngoka taga ka kwathela egongalo li kale tali endele pamwe nehangano lyaJehova ndyoka hali kala aluhe tali pula komeho. Mokweendela ko kwethimbo, Jehova ote ke ku kwathela wu longe iilonga iinene yi vule yomudheuli gwoye, ngaashi naanaa a li a kwathele Elisa e shi ninge. —  Joh. 14:12.

18. Omolwashike sha simanenena okudheula aamwatate momagongalo?

18 Otu na einekelo kutya omaetopo ngoka ge li moshitopolwa shika, naashoka sha tetekele otaga kwathele aakuluntugongalo ya konge ethimbo lyokudheula yalwe. Otatu galikana, opo aamwatate oyendji ya kale ya hala okudheulwa, noya longithe uunongo mboka taya pewa ya kwathele aapiya yaJehova. Shika otashi ka koleka omagongalo ogendji kongonga yevi alihe, notashi ke tu kwathela wo atuheni tu kale aadhiginini momasiku omadhigu ngoka twa taalela.

^ okat. 5 Uuna omumwatate omugundjuka a pyokoka pambepo, omwiifupipiki noku na wo omaukwatya galwe ngoka taga vulu oku mu petha iinakugwanithwa megongalo, aakuluntugongalo otashi vulika ye mu popile a langekwe po e li omuyakuligongalo nonando ke na oomvula 20. —  1 Tim. 3:8-10, 12; tala Oshungolangelo ye 1 Juli 1989, epandja 29.

^ okat. 11 Oto vulu wo okukundathana nomumwatate uuyelele mboka tawu adhika mOshungolangelo, 15 Apilili 2012, epandja 14-16, okatendo 8-13 nosho wo membo ‘Ikalekeni mohole yaKalunga,’ ontopolwa 16, okatendo 1-3.