Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo yokukonakonwa  |  Maalitsa 2015

Ondjokana ‘yopakriste’ oshinima ngaa shi li pandunge natango?

Ondjokana ‘yopakriste’ oshinima ngaa shi li pandunge natango?

Aagundjuka yamwe ohaya ti: “Megongalo kandi wete mo ngoka tatu yi naye mondjokana, ngame onda tila okukulupila ko.”

Yo yalwe ohaya ti: “Aalumentu yamwe yomuuyuni oye li nawa, aanahole noye na oondunge. Ihaya pataneke elongelokalunga lyandje nohaya nyanyudha ndje ye vulithe aamwatate yamwe.”

Aapiya yamwe yaJehova mboka inaaya ya mondjokana oya popya sha faathana. Omolwashike haya tile ngawo? Oye shi shi kutya Jehova okwa hala oondjokana dhaapiya ye dhi kale “dhopakriste,” ano ya hokana owala nAakriste yashili. —  1 Kor. 7:39.

OMOLWASHIKE YAMWE HAYA TILE NGAWO?

Aakriste mboka hayi ipula ngawo oye wete kutya aamwameme mboka inaaya hokanwa oyo oyendji ye vule aamwatate. Miilongo oyindji osho shi li ngawo. Pashiholelwa, oopelesenda 57 dhOonzapo ndhoka dhi li moKorea odhaamwameme mboka inaaya hokanwa, omanga oopelesenda 43 odhaamwatate mboka inaaya hokana. MoColombia, oopelesenda 66 dhOonzapo, aamwameme mboka inaaya hokanwa, omanga oopelesenda 34 odhaamwatate mboka inaaya hokana.

Miilongo yimwe aavali mboka kaaye shi Oonzapo ohaya pula iigonda ya pitilila nenge haya pula ya pewe omagano gondilo uuna oyanakadhona taya hokanwa. Aamwatate mboka ya hala okuhokana ohashi vulika ya kale itaaya vulu okugandja omagano ngoka. Shika ohashi ningitha aamwameme ya kale tayi ipula ngele onaya ka mona ngaa omumwatate ngoka te ya hokana. *

OSHA SIMANENENA OKUKALA WI INEKELA MUJEHOVA

Ngele nangoye osho ho kala to ipula ngawo, kala wu shi kutya Jehova oku uvite ko onkalo yoye noku shi naanaa nkene wu uvite. —  2 Ondjal. 6:29, 30.

Jehova ote tu kumagidha mOohapu dhe, Ombiimbeli, opo oondjokana dhetu dhi kale dhopaKriste.  Omolwashike mbela? Omolwaashoka oku shi shoka oshiwanawa kutse, nokwa hala oku tu gamena. Jehova ina hala tu ninge omatokolo kaage li pandunge ngoka tage ke tu yemateka. Pethimbo lyaNehemia, Aajuda oyendji oya li haya hokana aakiintu mboka ihaaya longele Kalunga. Onkee ano, Nehemia okwe ya lombwele oshiholelwa shaSalomo, opo e ya londodhe. “Kalunga okwa li e mu hole e te mu ningi omukwaniilwa gwaIsrael alihe.” Ihe ‘aakulukadhi aakwiilongo oya yonitha Salomo.’ (Neh. 13:23-26) Jehova oku shi kutya omayele ge omawanawa kutse, nomolwaashoka ta lombwele Aakriste, opo oondjokana dhawo dhi kale owala dhopaKriste. (Eps. 19:7-10; Jes. 48:17, 18) Otwa pandula sho e tu pa omayele gopahole noge shi okwiinekelwa. Uuna tatu vulika komayele ngoka tatu pewa kuJehova Omupangeli gwetu, nena otwa zimina kutya oye e na uuthemba woku tu lombwela shoka tu na okuninga. —  Omayel. 1:5.

Osha yela kutya inatu hala “okulongela kumwe naamboka yaa shi ooyitaali,” ano okuya mondjokana naamboka kaaye hole Jehova. Omuntu ngoka ota vulu oku ku ethitha po okulongela Jehova. (2 Kor. 6:14) Omayele gopakalunga ohaga longo aluhe, nAakriste oyendji kunena oya tokola okuvulika kuJehova. Ihe yamwe oya tokola okwaavulika kuye.

ONDJOKANA YOPAKRISTE OSHINIMA SHI LI PANDUNGE NATANGO

Omumwameme Maggy, a kala moAustralia, okwa li e endelwa kugumwe ngoka kee shi omumwatate. * Ota ti: “Onda li handi faula olundji okugongala, opo ndi kale naye. Uupambepo wandje owa li wa shuna pevi nayi.” Omumwameme gulwe omugundjuka moIndia, gwedhina Ratana, okwa li e na omumati gwomongundu yawo ngoka a tameke okukonakona Ombiimbeli. Ihe okwa tameke owala okukonakona Ombiimbeli, opo a vule oku mu endela. Hugunina omumwameme okwe etha po okulongela Jehova nokwa yi melongelokalunga lyomumati ngoka, opo a vule oku mu hokana.

Ndenguè a za koCameroon okwa li e na oomvula 19 sho a hokanwa komulumentu ngoka ihaa longele Jehova. Omulumentu ngoka manga inee mu hokana okwa li e mu uvanekele kutya ota vulu okutsikila okukala Onzapo. Ihe konima yiiwike iyali sho ya hokana, okwe mu lombwele kutya ke na okukala ha yi kokugongala. Omumwameme ota ti: “Onda li ndi uvite uuwike. Onda li nda nika aluhe oluhodhi.”

Oshoshili kutya Aakriste yamwe oya hokana naamboka ihaaya longele Jehova, ihe aantu mboka aanambili noye hole uuyuuki. Ihe nando kuume koye kopandjokana ihaa longele Jehova ona kale omunambili, mbela otashi ka guma ngiini ekwatathano lyoye naJehova? Oto kala wu uvite ngiini ngele ino pulakena komayele ngoka Jehova e ku pa? Naashoka sha simana unene osho kutya mbela Jehova ota kala u uvitile ngiini shoka wa ningi? —  Omayel. 1:33.

Aamwatate naamwameme mboka haya vulika kelombwelo lyokuya owala moondjokana “dhopakriste” oyi itaala kutya oya ninga etokolo lyomondjila. Aamwatate naamwameme mboka ya hala okuya mondjokana oya tokola toko oku shi ninga owala naamboka haya longele Jehova, opo ye mu nyanyudhe. Michiko ngoka a za koJapani, okwa li a tokola toko okuvulika kuKalunga, nonando aakwanezimo ye oya li taye mu thiminike a hokanwe po komumati ngoka ihaa longele Jehova. Osha li wo oshidhigu kuye okumona ookahewa ke yamwe taya hokanwa kaamwatate, omanga ye inaa hokanwa. Ota ti: “Onda kala handi ilombwele kutya molwaashoka Jehova ‘oKalunga omunyanyukwi,’ kutya nduno otwa hokanwa nenge hasho otatu vulu okukala twa nyanyukwa. Ondi itaala wo kutya ota vulu oku tu pa shoka twa hala. Onkene nando otwa halelela okuhokanwa, ihe inatu mona natango kuume kopandjokana onawa tu kale twa tegelela.” (1 Tim. 1:11) Michiko osho a ka hokanwa komumwatate e li nawa lela. Ngashingeyi oku uvite nawa sho a pulakene komayele gaJehova.

Opu na wo aamwatate mboka ya tegelele ya mone aamwameme mboka taye ya opalele. Pashiholelwa, Bill ngoka a za koAustralia ota zimine kutya opu na omathimbo gamwe a li a hokwa aakiintu mboka kaaye shi Oonzapo. Ihe ina panga uukuume nayo oshoka ka li a hala “okulongela kumwe” naamboka yaa shi ooyitaali. Opwa li wo aamwameme mboka a li a hokwa, ihe yo hasho ya li ye mu uvitile ngaaka. Bill okwa kala oomvula 30 a tegelela sigo a mono omumwameme ngoka e na omalalakano ga fa ge. Ota ti: “Itandi ipe nando oombedhi. Ondu uvite kutya Jehova okwa yambeka ndje. Ohatu yi pamwe muukalele  nomukulukadhi gwandje, ohatu konakona pamwe nohatu longele Jehova pamwe. Ohandi nyanyukilwa okutalela po ookuume komukulukadhi gwandje, oshoka ayehe ohaya longele Jehova. Ohatu kandula po omaupyakadhi mondjokana tatu longitha omithikampango dhOmbiimbeli.”

SHOKA WU NA OKUNINGA MANGA WA TEGELELA

Oshike to vulu okuninga manga wa tegelela wu mone kuume kopandjokana ngoka ha longele Jehova? Dhiladhila kutya omolwashike inoo ya natango mondjokana. Ngele etompelo lyoye omolwaashono wa hala okuvulika kuJehova, nena kala wu shi shi kutya oto nyanyudha Jehova. (1 Sam. 15:22; Omayel. 27:11) Galikana aluhe kuJehova noku mu lombwela omaiyuvo goye agehe. (Eps. 62:8) Ekwatathano lyoye naJehova otali ka kolekwa esiku kehe, sho to ningi oonkambadhala wu kondjithe omamakelo nomahalo omawinayi. Kala wu na omukumo kutya Jehova oku shi shoka wa hala naashoka wa pumbwa, oshoka owa simana kuye. Jehova ina uvanekela omuntu omukulukadhi nenge omusamane. Ihe ngele owa hala shili okuya mondjokana, oku shi nkene te ku gwanithile po ompumbwe ndjoka. —  Eps. 145:16; Mat. 6:32.

Omathimbo gamwe otashi vulika wu kale wu uvite ngaashi David a li u uvite sho a ti: “Omuwa, yamukula ndje mbala; onda vulwa okutegelela. Ino holeka ndje oshipala shoye.” (Eps. 143:5-7, 10) Ino sa uunye. Tegelela Jehova e ku ulukile shoka a hala wu ninge. Pulakena kuJehova mokulesha Ombiimbeli nokutedhatedha muule kwaashoka wa lesha. Shika otashi ke ku kwathela wu mone kutya Jehova okwa hala wu ninge shike. Oto ka mona wo nkene a li ha kwathele aapiya ye yonale. Ngele owa kala ho pulakene kuye oto ka kala wu na oonkondo dhokuvulika kuye.

Aakriste mboka inaaya ya natango mondjokana oye na oshilonga megongalo, molwaashoka ohaya kwathele aagundjuka naanegumbo yalwe

Oshike ishewe to vulu okuninga? Oto vulu okukoleka ekwatathano lyoye naJehova nokwiiningila edhina ewanawa. Oto vulu wo okwiilonga okukala ho gandja, wu hole iilonga, wu shi okukaliwa nangoye nowu hole Jehova. Omaukwatya ngoka ogo ga pumbiwa, opo ondjokana kehe yi kale yi na ombili. (Gen. 24:16-21; Rut 1:16, 17; 2:6, 7, 11; Omayel. 31:10-27) Konga tango Uukwaniilwa waKalunga mokukala wi ipyakidhila muukalele nomegongalo. Shika otashi ke ku gamena waaha ninge omatokolo kaage li pandunge. Bill ota popi kombinga yomimvo ndhono a li inaa hokana ta ti: “Odha li dha piti po neendelelo! Ethimbo ndyono onda li nde li longitha mokulongela Jehova tandi kokola ondjila.”

Oshipango shaJehova kutya oondjokana nadhi kale owala “dhopakriste” inashi kulupa sho inashi kusha. Uuna tatu tokola okuhokana Omukriste omukwetu, otatu simaneke Jehova notatu kala tu uvite ombili. Ombiimbeli otayi ti: “Omunelago oye ngoka ha simaneke Omuwa, oongoka e hole okuvulika kiipango ye. Megumbo lye otamu udha uuyamba nomaliko. Nakehe shoka te shi longo, oshu uka notashi kalelele.” (Eps. 112:1, 3) Onkee ano, kala wa tokola toko okuvulika koshipango shaKalunga kutya oondjokana nadhi kale “dhopakriste.”

^ okat. 7 Oshitopolwa shika otashi kundathana nkene aamwameme haya kala yu uvite. Ihe omayele ngaka otaga longo wo nokaamwatate.

^ okat. 13 Omadhina gamwe oga lundululwa.