Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Maalitsa 2015

Natu longeni pamwe naamwahe yaKristus nuudhiginini

Natu longeni pamwe naamwahe yaKristus nuudhiginini

“Ayihe mbyoka mwe yi ningile gumwe gwaamwatate mbaka aashuushuka, ongame mwe yi ningile.” —  MAT. 25:40.

1, 2. (a) Jesus okwa lombwele ookuume ke kopothingo omayele geni? (Tala kethano lyopetameko) (b) Otu na okukala twa tseya shike kombinga yeyele lyoonzi niikombo?

POMPITO yimwe Jesus okwa li ta lombwele ookuume ke kopothingo, Petrus, Andreas, Jakob naJohannes oshinima sha simanenena. Okwe ya lombwele eyele lyomupiya omudhiginini nomunandunge, lyaakadhona omulongo nolyiimaliwa nenge lyiitalenti. Okwa lombwele wo ookuume ke eyele lilwe ishewe. Meyele ndyoka okwa popi kombinga yethimbo sho “Omuna gwOmuntu” te ke ya okupangula “aantu ayehe yokombanda yevi.” Okwa ti “Omuna gwOmuntu” ota ka topola aantu moongundu mbali. Aantu yomongundu yotango oonzi, omanga yomongundu onkwawo iikombo. Okwa popi wo kombinga yongundu ontitatu, ongundu ‘yaamwahe’ yOmukwaniilwa. —  Lesha Mateus 25:31-46.

 2 Aapiya yaJehova yokunena nayo oye na wo ohokwe meyele ndika ngaashi aayapostoli ya li ye na ohokwe mulyo, molwaashoka shoka tashi popiwa meyele ndika osha kwatela mo oomwenyo dhaantu. Jesus okwa ti kutya aantu yamwe otaya ka mona omwenyo gwaaluhe, ihe yalwe otaya ka hanagulwa po. Onkene osha simanenena tu kale tu shi kutya eyele ndyoka otali ti shike, noshike tu na okuninga, opo tu ka mone omwenyo gwaaluhe. Moshitopolwa shika, otatu ka yamukula omapulo taga landula: Jehova okwe tu kwathele ngiini tu uve ko eyele lyoonzi niikombo? Otu shi shi ngiini kutya eyele otali popi kombinga yokuuvitha? Oolye ye na okuuvitha? Nomolwashike sha simana okukala tatu longo pamwe ‘nomukwaniilwa’ nosho wo ‘naamwahe’ kunena?

JEHOVA OKWE TU KWATHELE NGIINI TU UVE KO EYELE NDIKA?

3, 4. (a) Opo tu uve ko eyele ndika, otu na okuuva ko shike tango? (b) Mo 1881 Oshungolangelo oya fatululile ngiini eyele ndika?

3 Opo tu tseye kutya eyele lyoonzi niikombo otali ti shike, otwa pumbwa okukala tu shi kutya (1) olye “Omuna gwOmuntu,” nenge “omukwaniilwa,” oolye oonzi noolye iikombo nosho wo kutya oolye ‘aamwahe’ yOmukwaniilwa? Otu na wo okukala tu shi kutya (2) uunake “Omuna gwOmuntu” ta ka yoolola oonzi miikombo, nenge ta ka pangula aantu? Nosho wo kutya (3) omolwashike aantu yamwe tayi ithanwa oonzi nayalwe iikombo?

4 Momumvo 1881, Oshungolangelo oya tile kutya “Omuna gwOmuntu” nenge “Omukwaniilwa,” oJesus. Oya yelitha kutya ‘aamwahe’ yOmukwaniilwa kaye shi owala mboka taya ka pangela pamwe naJesus megulu, ihe aantu ayehe ya gwanenena mboka taya ka kala kombanda yevi. Oshungolangelo oya tile wo kutya aantu otaya ka yoololwa momukokomoko gwElelo lyOomvula Eyuvi lyaKristus. Mboka taye ku ulika mukehe shimwe taya ningi kutya oye hole Kalunga, otaye ki ithanwa oonzi.

5. Oshigwana shaKalunga osha li shu uvu ko ngiini eyele ndika mo 1923?

5 Jehova okwe ke tu kwathela tu uve ko nawa eyele ndika. Oshungolangelo yo 15 Kotoba 1923 oya tile kutya “Omuna gwOmuntu,” oJesus. Ihe oya li ya longitha Ombiimbeli sho tayi yelitha kutya ‘aamwahe’ mboka taya popiwa meyele otaya thaneke mboka taya ka pangela pamwe naJesus. Aantu mboka otaya ka kala megulu pethimbo lyElelo lyOomvula Eyuvi lyaKristus. Oya tile wo kutya oonzi, aantu mboka taya ka kala kombanda yevi taya pangelwa kuJesus naamwahe. Oshungolangelo oya ti kutya molwaashoka eyele otali ti oonzi otadhi ka kwathela aamwahe yOmukwaniilwa, eyoololo nenge epangulo oli na okuningwa manga aamwahe yaJesus ye li natango kombanda yevi, manga Elelo lyOomvula Eyuvi inaali tameka okupangela. Oshifo shoka osha tile wo kutya oonzi, aantu mboka yi itaala muJesus noyi itaala kutya Uukwaniilwa otawu ke eta onkalamwenyo ombwanawa kombanda yevi.

6. Mo 1995, otwa li tu uvu ko ngiini eyele ndika?

6 Petameko otwa li tu shi epangulo otali ningwa sho tatu uvithile aantu momasiku ngaka gahugunina. Ngele oya taamba ko etumwalaka lyetu, nena yo oonzi, ihe ngele  oye li tindi, nena yo iikombo. Ihe efatululo ndyoka olya lunduluka momumvo 1995. Oshungolangelo oya yelekanithile Mateus 24:29-31 (lesha) naMateus 25:31, 32 (lesha), noya yelitha kutya Jesus ota ka pangula aantu pethimbo lyuudhigu uunene sho Omuna gwOmuntu “te ya meadhimo lyuukwaniilwa we.” *

Otwa pandula Jehova sho e tu kwathela tu uve ko omayele gaJesus

7. Eyele lyoonzi niikombo otali ti ngiini?

7 Ngashingeyi eyele lyoonzi niikombo otu li uvite ko nawa. Otu shi shi kutya “Omuna gwOmuntu” nenge “omukwaniilwa,” oJesus. ‘Aamwahe’ yOmukwaniilwa, aantu mboka ya gwayekwa nombepo ondjapuki, mboka taya ka pangela pamwe naJesus megulu. (Rom. 8:16, 17) “Oonzi” nosho wo “iikombo,” aantu yomiigwana ayihe. Aantu mboka otaya ka pangulwa lwopehulilo lyuudhigu uunene mboka wu li pokutameka. Otu shi wo kutya Jesus ota ka pangula aantu shi ikolelela kunkene yu ungaunga naagwayekwa mboka ye li natango kombanda yevi. Otwa pandula Jehova sho e tu kwathela tu uve ko eyele ndika nomakwawo ngoka ge li muMateus ontopolwa 24 no 25.

EYELE NDIKA OTALI TU LONGO KUTYA OKUUVITHA OKWA SIMANENENA

8, 9. Omolwashike Jesus a ti aantu mboka ya fa oonzi “aayuuki”?

8 Meyele ndika lyoonzi niikombo, Jesus ina longitha oshitya “uvitha” nenge “iilonga yokuuvitha.” Otu shi shi nduno ngiini kutya eyele otali tu longo kutya iilonga yokuuvitha oya simana?

9 Opo tu mone eyamukulo kepulo ndyoka, tango otu na okudhimbulukwa kutya Jesus ka li ta popi kombinga yoonzi niikombo yo yeneyene. Okwa longitha eyele ndika a longe aantu oshiilongomwa. Oshikwawo, ka li ta ti kutya aantu ayehe mboka taye ki ithanwa oonzi otaya ka pa aagwayekwa iikulya noonguwo nenge ye ya hunge ngele taye ehama, nenge ye ya talele po mondjedhililo. Pehala lyaashono, Jesus okwa ti mboka ya fa oonzi, “aayuuki,” oshoka oyi itaala kutya aagwayekwa aamwahe yaJesus nomolwaashoka ohaya longo pamwe nayo nuudhiginini momasiku ngaka omadhigu gahugunina. —  Mat. 10:40-42; 25:40, 46; 2 Tim. 3:1-5.

10. Oonzi odhi na okukwathela ngiini aamwahe yaKristus?

10 Sho Jesus a tameke okupopya eyele lyoonzi niikombo okwa adhika ta popi kombinga yaashoka tashi ka ningwa momasiku gahugunina. (Mat. 24:3) Pashiholelwa, okwa ti: “Elaka ndika etoye lyOshilongo otali ka uvithilwa aantu ayehe.” (Mat. 24:14) Okuza mpoka okwa landulitha ko eyele lyiimaliwa, nokonima yaashoka okwa popi eyele lyoonzi niikombo. Jesus okwa hokolola eyele lyiimaliwa a longe aagwayekwa kutya oye na okuuvitha ya mana mo. Kombanda yevi nena oku na owala aagwayekwa  aashona. Ihe iilonga mbyoka yi na okulongwa oyindji natango. Aagwayekwa oye na okuuvithila “iigwana ayihe” kombanda yevi manga ehulilo inaali thika. Ngaashi twi ilongo meyele lyoonzi niikombo, “oonzi” otadhi kwathele aamwahe yaJesus. Omukalo gumwe moka hadhi vulu okukwathela aamwahe yaJesus ogwo, okulonga miilonga yokuuvitha. Ihe mbela osha gwana owala okugandja oshimaliwa nenge okutsa aagwayekwa omukumo sho taya uvitha?   

OOLYE YE NA OKUUVITHA?

11. Epulo lini hali holoka po, nomolwashike?

11 Kongonga yevi nena oku na aalongwa yaJesus oomiliyona hetatu. Oyendji yomuyo kaye shi aagwayekwa. Mbaka hayo Jesus a pa iimaliwa nenge iitalenti yomeyele. Iimaliwa okwe yi pe aagwayekwa. (Mat. 25:14-18) Otashi vulika nduno omuntu a tye, ‘ngele nani iimaliwa oya pewa aagwayekwa, mbela mboka kaaye shi aagwayekwa oye na tuu okuuvitha?’ Eeno, oye na okuuvitha. Natu ka taleni kutya omolwashike.   

12. Oohapu dhaJesus ndhoka dhi li muMateus 28:19, 20 otadhi tu longo shike?

12 Jesus okwa lombwelele aalongwa ye ayehe ye ku uvithe. Konima sho Jesus a yumudhwa, okwa lombwele aalanduli ye ‘ya ka ninge aantu ayehe aalongwa’ noku ya longa “ayihe” mbyoka e ya lombwele. Aalongwa mbaka nayo oya li ye na okuvulika kelombwelo ndyoka lyaJesus. (Lesha Mateus 28:19, 20.) Osha yela kutya atuheni otu na okuuvitha, kutya nduno otu na etegameno lyoku ka kala megulu nenge okombanda yevi. —  Iil. 10:42.

Atuheni otu na okuuvitha, kutya nduno otu na etegameno lyoku ka kala megulu nenge okombanda yevi

13. Oshike tatu ilongo memoniko ndyoka Johannes a mono?

13 MEhololo otatu ilongo mo kutya aagwayekwa nosho wo aantu yalwe otaya ka kala haya uvitha. Jesus okwa pe omuyapostoli Johannes emoniko ‘lyomuyalekwa’ ngoka ta hiya aantu ya nwe omeya gomwenyo. Omuyalekwa ota thaneke aagwayekwa 144 000 mboka taya ka pangela pamwe naJesus megulu. (Eh. 14:1, 3; 22:17) Omeya otaga thaneke ekuliloyambo lyaJesus. Ekulilo otali ka kwathela aantu ya vule okumanguluka mo muulunde nomeso. (Mat. 20:28; Joh. 3:16; 1 Joh. 4:9, 10) Aagwayekwa ohaya longo aantu ya mana mo kombinga yekulilo nokombinga yankene taya vulu okumona uuwanawa mulyo. (1 Kor. 1:23) Ihe emoniko olya popi wo ongundu yilwe yaantu mboka kaaye shi aagwayekwa. Aantu mboka oye na etegameno lyokukala kombanda yevi. Nayo otaya lombwelwa yi ithane aantu taya ti: “Ila!” Sho taya uvithile aantu onkundana ombwanawa, otaya vulika kelombwelo ndyoka. Onkee ano, otatu ilongo memoniko ndika kutya ayehe mboka ya taamba ko onkundana ombwanawa oye na okuuvithila aantu ooyakwawo.   

14. Ohatu vulika ngiini ‘kompango yaKristus?’

 14 Ayehe mboka haya vulika ‘kompango yaKristus’ oye na okuuvitha. (Gal. 6:2) Jehova okwa hala ayehe mboka haye mu longele ya vulike kompango yimwe. Pethimbo lyonale, okwa li a tegelela Aaisraeli naakwiilongo mboka ya li puyo, ya kale haya vulika kiipango ye. (Eks. 12:49; Lev. 24:22) Ihe nena inatu pumbwa okuvulika kiipango ayihe mbyoka ya pelwe Aaisraeli. Pehala lyaashono, otu na okuvulika ‘kompango yaKristus,’ kashi na nduno mbudhi kutya otu li aagwayekwa nenge hasho. Oshinima shimwe shomiinima ya simanenena mbyoka Jesus e tu longa osho okukala tu na ohole. (Joh. 13:35; Jak. 2:8) Otu na okukala tu hole Jehova, Jesus nosho wo aantu. Omukalo dhingi moka tatu vulu okuulika ohole ogwo okuuvithila aantu kombinga yonkundana ombwanawa yUukwaniilwa. —  Joh. 15:10; Iil. 1:8.

15. Omolwashike tatu vulu okutya Jesus okwa hala aalongwa ye ayehe yu uvithe?

15 Shoka Jesus a lombwele aalongwa ye yamwe po otashi vulu okukwatela mo aalongwa ayehe. Pashiholelwa, mboka taya ka pangela pamwe naJesus oye li 144 000. Ihe Jesus okwa ningi owala ehangano naalongwa ye 11 nokwe ya uvanekele kutya otaya ka pangela pamwe naye mUukwaniilwa we. (Luk. 22:29, 30; Eh. 5:10; 7:4-8) Sha faathana, aalongwa mboka yu uvu elombwelo lyaJesus konima sho a yumuka, kutya oye na okuuvitha, aashona yowala. (Iil. 10:40-42; 1 Kor. 15:6) Ihe aalongwa yaJesus ayehe yomethelemumvo lyotango  oya li yu uvitha. (Iil. 8:4; 1 Pet. 1:8) Natse nena, otu shi shi kutya otu na okuuvitha, nando inatu uva Jesus te tu lombwele tu ku uvithe. Nokuli oku na aantu oomiliyona hetatu taya longo iilongo mbyoka. Otu shi shi kutya sho tatu uvitha, otatu ulike kutya otwi itaala shili muJesus. —  Jak. 2:18.

NGASHINGEYI OLYO ETHIMBO LYOKUKALA AADHIGININI

16-18. Ongiini tatu vulu okukwathela aamwahe yaKristus, nomolwashike tu na oku shi ninga?

16 Satana ota kondjitha a mana mo aamwahe yaKristus mboka ye li natango kombanda yevi, oshoka oku shi shi kutya oku na ko ashike “okathimbo okafupi kowala.” (Eh. 12:9, 12, 17) Ihe nonando ongaaka, aagwayekwa onkee ngaa taya tsikile nokukwatela komeho iilonga yokuuvitha. Aantu oyendji otaya uvu onkundana ombwanawa shi vulithe nale. Osha yela kutya Jesus oku li pamwe naagwayekwa note ya wilike. —  Mat. 28:20.

Oshi li uuthembahenda okukwathela aamwahe yaKristus

17 Otu uvite kutya oshi li uuthembahenda okukwathela aamwahe yaKristus sho tatu uvitha. Ohatu ya yambidhidha wo pashimaliwa nomokutunga iinyanga yUukwaniilwa, Iinyanga yIigongi niitayimbelewa. Ngele otwa kala hatu vulika kaakuluntugongalo nokaamwatate yalwe mboka ya langekwa po ‘komupiya omudhiginini nomunandunge,’ (NW) otatu ulike kutya otwa hala okukwathela aamwahe yaKristus. —  Mat. 24:45-47; Heb. 13:17.

18 Masiku aagwayekwa mboka ye li kombanda yevi otaya ka tulwa iihako miipala yawo. Naayengeli mboka ya kwata ‘oombepo dhokoombinga ne’ otaye ke dhi etha, nuudhigu uunene otawu ka tameka. (Eh. 7:1-3) Manga Armagedon inaa tameka, Jesus ota ka fala aagwayekwa megulu. (Mat. 13:41-43) Onkee ano, ngele otwa hala Jesus e ke tu tale ko kutya tse oonzi, ngashingeyi olyo ethimbo lyokulongela kumwe naamwahe yaKristus nuudhiginini.

Ohatu kwathele aamwahe yaKristus momikalo dhi ili nodhi ili (Tala okatendo 17)

^ okat. 6 Opo wu mone uuyelele wa gwedhwa po kombinga yeyele ndika, tala oshitopolwa “Ongahelipi To Ka Fikama Komesho yOlukalwatokolo?” nosho wo “Eedi nOikombo Oi Na Onakwiiwa Ilipi?” mOshungonangelo yo 15 Kotoba 1995.