Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Maalitsa 2015

Mbela oto ka ‘kala ngaa wa tonata’?

Mbela oto ka ‘kala ngaa wa tonata’?

“Kaleni ano mwa tonata, oshoka inamu tseya esiku notundi.” —  MAT. 25:13.

1, 2. (a) Jesus okwa li a popi shike kombinga yomasiku gahugunina? (b) Omapulo geni tatu ka kundathana?

KALA ando wa fa wu wete Jesus a kuutumba kOndundu yOomono muJerusalem ta tala kotempeli. Okwa li e li pamwe naayapostoli ye, Petrus, Andreas, Jakob naJohannes. Aalongwa oya li taya pulakene nawa sho Jesus te ya hokololele ehunganeko lituntula kombinga yonakuyiwa. Ehunganeko ndyoka olya li tali popi shoka sha li tashi ka ningwa po momasiku gahugunina sho Jesus ta ka pangela mUukwaniilwa waKalunga. Jesus okwe ya lombwele kutya pethimbo ndyoka lituntula, “omumati omwiinekelwa nomunandunge” nenge omupiya omudhiginini nomunandunge oye ta ka kala e mu lile po kombanda yevi noye ta ka kala ta pe aalanduli ye iikulya yopambepo pethimbo lyo opala. —  Mat. 24:45-47.

2 Mehunganeko omo tuu moka, Jesus okwa li wo a hokolola  eyele lyaakadhona omulongo. (Lesha Mateus 25:1-13.) Moshitopolwa shika otatu ka kundathana omapulo ngaka taga landula: (1) Eyele ndika otali tu lombwele naanaa shike? (2) Aagwayekwa oya kala haya tula ngiini miilonga omayele gomeyele ndika, noshizemo oshini? (3) Uuwanawa washike tatu mono nena meyele lyaJesus?

OSHIKE TATU ILONGO MO MEYELE NDIKA?

3. Iileshomwa yetu nale oya li ya yelitha eyele lyaakadhona omulongo ngiini, noshizemo otashi vulika sha li shike?

3 Moshitopolwa sha tetekele, otwi ilongo kutya momimvo opo dha zi ko, omupiya omudhiginini okwa lundulula omukalo moka omahokololo gamwe gomOmbiimbeli haga yelithwa. Ngashingeyi omupiya ngoka ota popi unene kombinga yaashoka tage tu longo naashoka taga ti. Iha popi we naanaa kutya otaga thaneke shike nenge kutya otaga hunganeke shike. Pashiholelwa, natu taleni keyele lyaJesus lyaakadhona omulongo. Iileshomwa yetu oya li ya ti kutya oolamba, omahooli niiyuma otayi thaneke sha nenge omuntu gulwe. Mbela shoka eyele ndika tali tu longo osha kana, sho twa li hatu kala tatu konenene unene okanima kehe ka popiwa mulyo? Eyamukulo lyepulo ndika olya simana.

Aakadhona mboka taya popiwa meyele, oye na okukala ye na oolamba dhawo dha tema sho ombushiki te ya

4. Otu shi shi ngiini kutya (a) ombushiki ndjoka tayi popiwa meyele otayi thaneke lye? (b) aakadhona otaya thaneke lye?

4 Natu taleni kutya eyele lyaJesus otali tu longo naanaa shike. Tango, natu taleni kaantu mboka taya popiwa meyele lyaakadhona omulongo. Ombushiki olye? Otu shi shi kutya oJesus, molwashoka Jesus okwa tile nale kutya oye ombushiki. (Luk. 5:34, 35) Aakadhona otaya thaneke lye? Otaya thaneke “oshigunda oshishona” shaagwayekwa. Otu shi shi ngiini? Aakadhona mboka taya popiwa meyele, oye na okukala ye na oolamba dhawo dha tema sho ombushiki te ya. Ngashingeyi natu tale shoka Jesus a ti kombinga yaalanduli ye aagwayekwa: “Kaleni mwi ilongekidha, mu na omapaya ga patwa noolamba dha tema, ongaashi aantu ya tegelela omuwa gwawo ta zi koshituthi shohango.” (Luk. 12:32, 35, 36) Oshikwawo, omuyapostoli Paulus nomuyapostoli Johannes oya yelekanitha aalanduli yaKristus aagwayekwa naakadhona ya yogoka. (2 Kor. 11:2; Eh. 14:4) Onkee ano, otatu vulu okumona kutya omayele nelondodho ndyoka li li muMateus 25:1-13, olya li tali lombwelwa aalanduli yaJesus aagwayekwa.

5. Jesus oku ulike ngiini kutya eyele lye otali popi kombinga yethimbo lini?

5 Ngashingeyi natu taleni kutya eyele lyaJesus otali popi kombinga yethimbo lini? Shoka Jesus a popi pehulilo lyeyele otashi tu kwathele tu mone kutya okwa li ta popi kombinga yethimbo lini. Okwa ti: “Ombushiki okwe ya.” (Mat. 25:10) Sho Jesus a popi kombinga ‘yokuya’ kwe, okwa adhika owala opo a popi shi na ko nasha nethimbo lyuudhigu uunene mboka tawu ka kala ko sho te ya okupangula nokuhanagula po aakolokoshi. Onkee ano, otatu vulu okuthika pehulithodhiladhilo  kutya eyele lye otali popi kombinga yomasiku gahugunina, ihe ote ke “ya” pethimbo lyuudhigu uunene. Oshungolangelo yo 15 Juli 2013 otayi popi kutya ehunganeko lyaJesus ndyoka li li muMateus ontopolwa 24 nosho wo 25, otali popi lwiikando ihetatu kombinga ‘yokuya’ kwe.   

6. Eyele lyaJesus oli na etumwalaka lya simana lini?

6 Etumwalaka lini lya simana li li meyele ndika? Dhimbulukwa kutya Jesus okwa li ta popi kombinga yashike manga inaa hokolola ehokololo ndyoka. Montopolwa yaMateus 24, Jesus okwa popi kombinga ‘yomupiya omudhiginini nomunandunge.’ (NW) Omupiya ngoka okwa li ta ka kala a thikama po mokangundu okashona kaagwayekwa mboka ya li taya ka kwatela aalanduli yaKristus komeho momasiku gahugunina. Jesus okwa li a londodha aalumentu mboka ya kale aadhiginini. Montopolwa ya landula ko, Jesus okwa longitha eyele lyaakadhona omulongo, opo a gandje omayele kaagwayekwa ayehe momasiku ngaka gahugunina. Okwa li e ya ladhipike ya ‘kale ya tonata,’ opo kaaya kanithe ondjambi yawo yokuya megulu. (Mat. 25:13) Ngashingeyi natu konakoneni eyele ndyoka, opo tu mone nkene aagwayekwa ya li ya tula miilonga omayele ngoka.

AAGWAYEKWA TAYA TULA MIILONGA OMAYELE GOMEYELE NDIKA

7, 8. (a) Omolwashike aakadhona aanandunge ya li yi ilongekidha? (b) Omolwashike taku tiwa aagwayekwa oyi ilongekidha?

7 Jesus ota tsu omuthindo meyele lye kutya aakadhona aanandunge oya adhika yi ilongekidha sho ombushiki e ya. Ihe aakadhona omagoya yo inaya adhika yi ilongekidha. Omolwashike aakadhona aanandunge ya li yi ilongekidha? Omolwaashoka oya li ya tonata. Aakadhona ayehe omulongo oya li ye na okukala ya tonata uusiku mboka noye na oolamba dha tema. Aakadhona yatano mboka aanandunge oya li yi ilongekidha, molwaashoka oya li ye etelela omahooli ga gwana, omanga aakadhona omagoya yatano kaaya li ye na sha. Aagwayekwa aadhiginini oya kala tayi ilongekidhile ngiini okuya kwaJesus?

8 Aagwayekwa oyi ilongekidha okulonga iilonga yawo sigo ehulilo. Oye shi kutya okulongela Kalunga kwawo otaku pula ye ethe po iinima yopamaliko yomuuyuni waSatana. Oye na lela ehalo oku shi ninga. Oya tokola toko okulongela Jehova nuudhiginini. Itaye mu longele molwaashoka ehulilo li li popepi, ihe omolwaashoka ye mu hole nosho wo Omwana. Aagwayekwa aadhiginini noihaya pitika nando ya nwethwe mo kohole yomaliko, keihumbato ewinayi nosho wo kombepo yokwiihola mwene. Nonando ombushiki oya fa ya kala ko, aagwayekwa oyi ilongekidha notaya adhima, ya tegelela neidhidhimiko ombushiki yi galuke, ngaashi naanaa aakadhona aanandunge ya li yi ilongekidha ye na oolamba dhu udha omahooli. —  Fil. 2:15.

Jesus okwa londodha aagwayekwa ya kale aadhiginini

9. (a) Jesus okwa gandja elondodho lini kombinga yokulendenda? (b) Aagwayekwa oya li yi inyenge ngiini sho kwi igidhwa kwa tiwa: “Ombushiki oye ngu!”? (Tala wo enyolo lyopevi.)

9 Aakadhona aanandunge oya li wo yi  ilongekidhila okuya kwombushiki, molwaashoka oya li ya tonata. Ihe aakadhona ayehe omulongo mboka taya popiwa meyele lyaJesus oya li ya “lendenda noya kotha,” manga ya tegelela ombushiki ndjoka ya li ya fa ya kala ko. Onkee ano, kunena Aakriste aagwayekwa otaya vulu ‘okukotha,’ nenge okweetha po iilonga yawo sho ya tegelela Kristus a galuke. Jesus oku shi kutya nokuli nomuntu ngoka a halelela okukala a tonata ota vulu okukotha e ta kala itaa longo we iilonga ye. Aakadhona omulongo mboka taya popiwa meyele lyaJesus oya penduka sho kwi igidhwa kwa tiwa: “Ombushiki oye ngu!” Ihe aakadhona owala aanandunge ya kala ya tonata. (Mat. 25:5, 6; 26:41) Sha faathana, momasiku gahugunina Aakriste aagwayekwa oya pendukile sho kwi igidhwa taku tiwa “ombushiki oye ngu!” Oyi itaala lela kutya Jesus oku li pokuya, noyi ilongekidhila okuya kwe. * Shika otashi ulike kutya Aakriste aagwayekwa otaya kambadhala nuudhiginini okukala ya tonata. Jesus okwa popi pehulilo lyeyele lye kombinga yoshinima shoka tashi ka ningwa pethimbo lyontumba. Ngashingeyi natu ka taleni kutya okwa popi shike.

AAKADHONA AANANDUNGE OYA PEWA ONDJAMBI OMANGA AAGOYA YA GEELWA

10. Oonkundathana pokati kaakadhona aanandunge naakadhona omagoya otadhi pendutha epulo lini?

10 Pehulilo lyeyele opwa popiwa kutya aakadhona omagoya oya pula aakadhona aanandunge ye ya pe mo momahooli gawo. Ihe aakadhona aanandunge oya tindi oku ya kwathela. (Lesha Mateus 25:8, 9.) Ihe mbela aagwayekwa opu na ngaa sikulimwe ya tindile okukwathela mboka ya pumbwa ekwatho? Onawa tu kaleke momadhiladhilo kutya ethimbo lini tali popiwa meyele lyaJesus. Dhimbulukwa kutya Jesus, ngoka ti ithanwa wo ombushiki, ote ya okupangula sho uudhigu uunene wu li pokuhula po. Osha yela kutya eyele ndika otali popi shoka tashi ka ningwa po lwopehulilo lyuudhigu uunene. Omolwashike tatu tile ngawo? Omolwaashoka puudhigu uunene aagwayekwa otaya ka tulwa iihako.

11. (a) Oshike tashi ka ningwa po sho uudhigu uunene wu li pokutameka? (b) Aakadhona aanandunge oya li ya hala okutya shike sho ya lombwele aakadhona omagoya ye ki ilandele omahooli?

11 Onkee ano, manga uudhigu uunene inaawu tameka, Jesus ota ka ndhindhilika aagwayekwa ayehe lwahugunina noshihako. (Eh. 7:1-4) Okuza mpono, eithano lyawo lyokuya megulu olya kolekwa. Ihe natu dhiladhile kombinga yomimvo tadhi tetekele uudhigu uunene. Oshike mbela tashi ka ningilwa aagwayekwa mboka ya talala e taya kala inaaya tonata we? Itaya ka ndhindhilikwa noshihako. Pethimbo mpoka otaya ka adhika ya pingenwa po nale kAakriste yalwe mboka aadhiginini. Ngele uudhigu uunene wa tameke, aakadhona aagoya otashi vulika ya kumwe sho taya mono Babiloni oshinene tashi hanagulwa po. Otashi vulika taya ka dhimbulula owala pethimbo ndyono kutya inayi ilongekidhila okuya kwaJesus. Mbela pethimbo mpono ngele oya pula ekwatho, otaya vulu ngaa oku li pewa? Eyamukulo otatu li adha meyele. Meyele moka aakadhona aanandunge oya tindi okugandja omahooli gawo kaakadhona omagoya. Pehala  lyaashono oye ya lombwele ye ki ilandele gawo. Molwaashoka osha li “pokati kuusiku,” kaya li ye na mpoka taye ke ga landa. Ethimbo olya li lya pwa po.

12. (a) Pethimbo lyuudhigu uunene, oshike tashi ka ningilwa mboka ya li nale aagwayekwa, e taya etha po uudhiginini wawo manga inaaya ndhindhilikwa noshihako? (b) Oshike tashi ka ningilwa mboka ya fa aakadhona omagoya?

12 Pethimbo lyuudhigu uunene, aagwayekwa itaya ka kwathela aantu mboka kaaye shi aadhiginini. Itapu ka kala we ompito yoku ya kwathela. Oshike tashi ka ningilwa mboka kaaye shi aadhiginini? Ndhindhilika kutya sho aakadhona omagoya ya yi ya ka lande omahooli, “Ombushiki okwe ya. Oye nokwa yi mo pamwe naakadhona yatano mboka ya adhika yi ilongekidhila oshituthi shohango, osheelo noshe edhilwa po.” Lwopehulilo lyuudhigu uunene, Jesus ote ke ya okugongela aagwayekwa ayehe aadhiginini e ya fale megulu. (Mat. 24:31; 25:10; Joh. 14:1-3; 1 Tes. 4:17) Jesus ote ki idhimbika mboka kaaye shi aadhiginini. Ngaashi aakadhona mboka omagoya, otashi vulika nayo ya ka tye: “Omuwa, Omuwa, tu egulula!” Ihe Jesus ota ka tya ngiini? Shiyemateka, ote ke ya yamukula ngaashi ta ka yamukula mboka ya fa iikombo ta ti: “Ongame tandi mu lombwele: Kandi mu shi.” —  Mat. 7:21-23; 25:11, 12.

Omukriste kehe omugwayekwa oku na okukala i ilongekidha nokwa tonata

13. (a) Omolwashike inaatu pumbwa tu thike pehulithodhiladhilo kutya aagwayekwa oyendji otaya ka kala kaaye shi aadhiginini? (b) Omolwashike tatu vulu okutya eyele lyaJesus otali holola kutya okwi inekela Aakriste aagwayekwa? (Tala kethano lyopetameko.)

13 Mbela Jesus okwa li a hala okutya aagwayekwa oyendji otaya ka pumbwa okupingenwa po, molwaashoka otaya ka kala kaaye shi aadhiginini? Hasho nando. MuMateus ontopolwa 24, otamu popiwa kutya Jesus okwa londodha omupiya omudhiginini nomunandunge kaa ninge omupiya omwiinayi. Shoka itashi ti kutya omupiya omudhiginini ota ka ninga omwiinayi. Ano neyele lyaakadhona omulongo otali tu londodha owala. Ngaashi naanaa aakadhona mbeyaka yatano omagoya nayatano aanandunge ya li ye na okukala ya tonata, Omukriste kehe omugwayekwa oku na okukala i ilongekidha nokwa tonata. Ngele hasho, ita kala omudhiginini, nota ningi egoya. Paulus naye okwa londodhele aamwahe aagwayekwa momukalo gwa faathana. (Lesha Aahebeli 6:4-9; yelekanitha Deuteronomium 30:19.) Okwa li e ya londodha e ya ukilila, ihe okwa li wo e na einekelo kutya aamwahe mboka otaya ka pewa ondjambi. Elondodho ndyoka li li meyele lyaJesus lyaakadhona omulongo otali holola kutya Jesus naye okwi inekela aagwayekwa. Okwa li e shi kutya kehe gumwe gwomwaamboka a hogolola ya ninge aagwayekwa ota vulu okukala omudhiginini e ta ka mona ondjambi ombwanawa.

UUWANAWA WUNI ‘OONZI DHILWE’ DHAKRISTUS TADHI KA MONA?

14. Omolwashike ‘oonzi dhilwe’ tadhi vulu okumona mo wo uuwanawa meyele lyaJesus lyaakadhona omulongo?

14 Eyele lyaJesus olya li lya nuninwa Aakriste aagwayekwa. Ihe mbela ‘oonzi dhilwe’  otadhi vulu wo okumona mo uuwanawa mulyo? (Joh. 10:16) Eeno. Meyele lyaJesus omu na etumwalaka ndika tali ti: “Kaleni ano mwa tonata.” Oshikando shimwe Jesus okwa tile: ‘Shoka tandi mu lombwele, otandi shi lombwele wo aantu ayehe kutya: Tonateni!’ (Mark. 13:37) Jesus okwa tegelela aalongwa ye ayehe ya kale yi ilongekidha noya tonata. Aakriste ayehe otaya vulu okulandula oshiholelwa oshiwanawa shaagwayekwa mboka ya pititha komeho uukalele monkalamwenyo yawo. Dhimbulukwa kutya aakadhona omagoya oya li ya pula aakadhona aanandunge ye ya pe mo momahooli gawo. Inaya pewa shoka ya pula. Shoka tashi tu dhimbulukitha kutya kehe gumwe oku na oshinakugwanithwa shokukala omudhiginini kuKalunga, shokukala i ilongekidha nokukala a tonata. Kapu na gumwe ta vulu oku shi tu ningila. Kehe gumwe gwomutse oku na oku ki ihokolola koshipala shOmupanguli omuyuuki, Jesus Kristus, ngoka e li pokuya. Onkee ano, otu na okukala twi ilongekidha.

Kapu na omuntu ta vulu okukala a tonata nenge omudhiginini pehala lyetu

15. Omolwashike Aakriste ayehe taya ka kala ya nyanyukilwa ohango yaKristus nomuyalekwa gwe?

15 Aakriste ayehe oya nyanyukilwa ohango ndjoka tayi popiwa meyele lyaJesus. Monakuyiwa, konima yiita yArmagedon, Aakriste aagwayekwa otaya ka ninga omuyalekwa gwaKristus. (Eh. 19:7-9) Pethimbo ndyoka kehe gumwe kombanda yevi ota ka mona uuwanawa mohango ndjoka yomegulu. Omolwashike? Omolwaashoka okuza poshituthi shoka otapu ka kala epangelo lya gwanenena tali pangele aantu ayehe. Kutya nduno otu na etegameno lyoku ka kala nomwenyo megulu nenge okombanda yevi, natu kaleni twa tokola toko okukala twi ilongekidha notwa tonata. Ngele otwe shi ningi, otatu ka nyanyukilwa onakuyiwa ombwanawa ndjoka Jehova e tu uvanekela.

^ okat. 9 Eyele otali ulike kutya pokati keigidho kutya “Ombushiki oye ngu!” (ovelise 6) nokuya kwombushiki (ovelise 10) opwa pitile ethimbo lyontumba. Aagwayekwa aadhiginini oya kala ya tonata momasiku ngaka gahugunina. Oye wete endhindhiliko kutya Jesus ota pangele nale mUukwaniilwa waKalunga. Ihe oye na okukala ya tonata sigo e ya.