Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Febuluali 2015

Omagano ngoka ya li inaaya tegelela

Omagano ngoka ya li inaaya tegelela

Mondoolopa yedhina Nagoya yi li moJapani, omwa li mwa ningwa okugongala kwi ikalekelwa mo 28 Apilili 2013. Omumwatate Anthony Morris, oshilyo shOlutuwiliki okwa ningi etseyitho lituntula pokugongala hoka. Okwa tseyithile aakalipo kutya opwa nyanyangidhwa embo epe mOshijapani li na oshipalanyolo: The Bible — The Gospel According to Matthew. Aantu ye vulithe po 210 000 oya li pokugongala hoka, omanga yalwe ya li taya pulakene kotiivii ye li komahala galwe. Aapulakeni sho yu uvu kutya opu na embo epe oya li ya nyanyukwa unene, noya hakele omake ethimbo ele.

Embo lyEvaangeli lyaMateus olya pilintululwa okuza mo-New World Translation. Oli na omapandja 128, nolyi ikalekelwa. Omumwatate Morris okwa yelitha kutya embo ndyoka olya nuninwa Aajapani. Embo ndino olya yooloka ko ngiini komambo omakwawo? Omolwashike lya li lya pumbiwa? Aantu oya li yi inyenge ngiini sho ye li pewa?

OLYA YOOLOKA KO KOMAMBO GALWE

Aantu oyendji oya li ya kumwa nkene embo ndika lya nyolwa. Elaka lyOshijapani ohali nyolwa momikalo mbali. Oto vulu oku li nyola to zi kolulyo wu uka kolumoho, nenge to zi pombanda wu uka pevi. Iileshomwa oyindji mOshijapani, mwa kwatelwa yehangano lyetu, oya nyolwa okuza kolulyo wu uka kolumoho. Ihe embo ndika olya nyolwa okuza pombanda wu uka pevi, lya fa iifokundaneki niileshomwa yilwe moJapani. Aantu oyendji moJapani ohaya lesha nuupu oondanda ndhoka dha nyolwa okuza pombanda wu uka pevi. Shimwe ishewe, iipalanyolo mbyoka hayi kala shito pombanda yepandja oya lundululilwa puupalanyolo wuutendo, opo shi kwathele aaleshi ya mone nziya enenedhiladhilo.

Sho aamwatate naamwameme ya pewa embo lyaMateus inaya kwatakwata, oya tameke oku li lesha nziya. Omumwameme ngoka e na omimvo 80 nasha okwa ti: “Embo lyOmbiimbeli lyaMateus onde li lesha nale iikando oyindji, ihe omukalo gwembo epe gwokunyola okuza pombanda wu uka pevi nosho wo uupalanyolo mboka uushona owa kwathele ndje ndi uve ko nawa Euvitho lyOkondundu.” Omumwameme gumwe omugundjuka okwa ti: ‘Embo lyaMateus onde li lesha alihe inaandi fudha. Ngame mwene ondi igilila okulesha tandi zi kolulyo ndu uka kolumoho, ihe aantu oyendji oye hole okulesha taya zi pombanda yu uka pevi.’

EMBO LYA NUNINWA AAJAPANI

Omolwashike embo lyaMateus tali opalele Aajapani? Oyendji yomuyo kaye shi Ombiimbeli, ihe oye hole oku yi lesha. Mboka inaaya mona nale Ombiimbeli oye na ompito yoku yi lesha, nonando inayi ihwa po.

Omolwashike ehangano lya tokola okunyanyangidhulula embo lyaMateus? Uuna Aajapani oyendji yu uvu oshitya “Ombiimbeli” momadhiladhilo gawo ohamu ya ethano lyaJesus Kristus. Onkee ano, embo lyaMateus olya li lya hogololwa, molwaashoka otali hokolola ezimo lyaJesus nokuvalwa kwe. Mulyo omu na wo Euvitho lyOkondundu ndyoka lya tseyika nawa apuhe, nomahunganeko kombinga yomasiku gahugunina. Aajapani oyendji oye hole okukundathana nokulesha iinima mbyoka.

 Aauvithi oyendji moJapani oya tameke okugandja embo ndika epe sho taya longo egumbo negumbo naasho taya ningi omaishunoko. Omumwameme gumwe okwa ti: ‘Ngashingeyi ondi na ompito yokutseyithila aantu oyendji Oohapu dhaKalunga shi vulithe nale. Onda li nda pe omuntu gumwe embo lyaMateus komatango gesiku ndyoka sho twa zi owala pokugongala hoka kwi ikalekelwa.’

NKENE AANTU YI INYENGE

Aauvithi oya li ye shi ende ngiini sho taya gandja embo ndika kaantu? Aantu oyendji moJapani oye shi oohapu ngaashi ‘osheelo shoka sha patekidha,’ “iimona yeni inamu yi umbila iingulu” nosho wo “inamu sila esiku lyanofu oshimpwiyu.” (Mat. 6:34; 7:6, 13) Ohashi ya kumitha okumona kutya Jesus Kristus oye a li a popi oohapu ndhoka. Ngele ye dhi mono membo lyaMateus, oyendji ohaya ti: “Onda kala nda hala nale okulesha Ombiimbeli kutya nduno oshikando shimwe owala.”

Uuna aauvithi taya shuna kaantu mboka ya pa embo lyaMateus, oyendji ohaya ti kutya oye li lesha. Yamwe oya lesha omapandja gamwe, omanga yalwe ye li mana ko. Omulumentu gwomimvo 60 nasha okwa lombwele omuuvithi gumwe a ti: “Embo ndika onde li lesha iikando niikando, nolya hekeleka ndje. Otandi ku indile nesimaneko enene wu longe ndje Ombiimbeli.”

Embo lyaMateus ohali gandjwa wo nomepandaanda. Esiku limwe omumwameme gumwe manga e li muukalele okwa gandja oe-mail ye komukadhona gumwe ngoka a pewa embo ndyoka. Konima owala yowili yimwe, omukadhona okwa tumine omumwameme etumwalaka kutya okwa lesha omapandja gamwe gembo ndyoka, nokwa hala okutseya oshindji. Konima owala yoshiwike shimwe, omukadhona okwa tameke Ekonakonombiimbeli, nokwa tameke okuya kokugongala.

Omambo ga konda po 1 600 000 oga tumwa nale komagongalo moJapani. Omwedhi kehe, Oonzapo ohadhi gandja omambo ngoka ogendjigendji muukalele. Moontentekelihapu dhembo lyaMateus omu na oohapu dha nyolwa kaanyanyangidhi tadhi ti: “Otwi inekela kutya okulesha embo ndika otashi ka kokeka ohokwe yoye yokulesha Ombiimbeli.”