Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Januali 2015

Omolwashike hatu dhimbulukwa Uulalelo wOmuwa?

Omolwashike hatu dhimbulukwa Uulalelo wOmuwa?

“Shi ningeni nokudhimbulukwa ndje.”— 1 KOR. 11:24.

1, 2. Oshike sha ningwa kuJesus mongulohi 14 Nisan 33 E.N.? (Tala kethano lyopetameko.)

OSHA li ongulohi 14 Nisan 33 E.N., etango olya adhika owala opo lya ningine muJerusalem, nomwedhi ogwa li gwa toka. Jesus naalongwa ye oya mana okudhana Opaasa, taya dhimbulukwa sho Aaisraeli ya tembudhwa muupika waEgipiti oomvula 1 500 dha ka pita. Jesus okwa li ta ka sa esiku ndyoka. Onkene manga a li pamwe naayapostoli ye aadhiginini 11, okwa dhike po uulalelo wi ikalekelwa wokudhimbulukwa eso lye. *— Mat. 26:1, 2.

2 Jesus okwa hambelele e ta gandja oshikwiila inaashi tulwa efulika kaayapostoli ye, ta ti: “Taambeni, lyeni.” Okwa kutha wo oshitenga shomaviinu, okwa pandula e ta ti: “Nweni mo amuhe.” (Mat. 26:26, 27) Jesus ina pa we aalongwa ye aadhiginini iikulya yilwe, ihe okwe ya lombwele oshindji kombinga yongulohi ndjika ya simana.

3.Otatu ka kundathana omapulo geni moshileshwa shika?

3 Kungeyi Jesus okwa dhike po Edhimbuluko lyeso lye  ndyoka hali ithanwa wo “Uulalelo wOmuwa.” (1 Kor. 11:20) Yamwe otashi vulika ya pule omapulo ngaka kombinga yuulalelo mbuka: Omolwashike tu na okudhimbulukwa eso lyaJesus? Oshikwiila nomaviinu oyi lile po shike? Otu na okwiilongekidhila ngiini Edhimbuluko? Oolye ye na okulya nokunwa? Nosho wo kutya Aakriste oye na okwiinyenga ngiini kwaashoka Omanyolo taga popi kombinga yetegameno lyawo?

OMOLWASHIKE HATU DHIMBULUKWA ESO LYAJESUS?

4. Eso lyaJesus olye tu egululile ondjila yashike?

4 Molwaashoka tse oluvalo lwaAdam, otwa thigulula uulunde neso. (Rom. 5:12) Omuntu inaa gwanenena ita vulu okupa Kalunga iikulila yomwenyo gwe nenge gwamukwawo. (Eps. 49:6-9) Ihe Jesus okwa futu ofuto ya gwana okupitila meso lye. Ofuto nenge iikulila mbyoka, olutu lwe lwa gwanenena nombinzi ye ndjoka ya tilwahi. Jesus okwe tu egululile ondjila tu hupithwe muulunde nomeso notu ka mone omagano gomwenyo gwaaluhe, sho a gandja kuKalunga iikulila yi na ongushu.—  Rom. 6:23; 1 Kor. 15:21, 22.

5. (a) Otu shi ngiini kutya Kalunga naKristus oye hole aantu? (b) Omolwashike tu na okukala pEdhimbuluko lyeso lyaJesus?

5 Ekulilo otali ulike kutya Kalunga oku hole aantu. (Joh. 3:16) Otali ulike wo kutya Jesus naye oku tu hole. Jesus manga inee ya kombanda yevi okwa li “engomba” puHe, ‘nokwa li nokuli a nyanyukilwa aana yaantu.’ (Omayel. 8:30, 31) Otwa pandula Kalunga nosho wo Omwana. Olupandu nduka nalu tu inyengithe tu kale po pEdhimbuluko lyeso lyaJesus nokuvulika koshipango shika: “Shi ningeni nokudhimbulukwa ndje.”— 1 Kor. 11:23-25.

OSHIKWIILA NOMAVIINU OTAGA TI SHIKE?

6. Otu na okutala ko ngiini oshikwiila nomaviinu pEdhimbuluko?

6 Sho Jesus a dhike po Edhimbuluko, okwa popi kombinga yoshikwiila a ti: “Shika osho olutu lwandje. Kombinga yomaviinu okwa ti: “Ndjika oyo ombinzi yandje, ombinzi yehangano, ndjoka tayi tilwahi omolwoyendji.” (Mark. 14:22-24) Jesus ina lundululila pashikumithalonga oshikwiila molutu lwe nenge omaviinu mombinzi ye. Osha yela kutya oshikwiila nomaviinu oya li ethano nenge endhindhiliko owala.

7. Oshikwiila shoka hashi longithwa pEdhimbuluko otashi thaneke shike?

7 Jesus poshiningwanima shoka sha simanenena shomo 33 E.N., okwa li a longitha oshikwiila inaashi tulwa efulika shoka sha hupu po pOpaasa. (Eks. 12:8) Pamanyolo, efulika omathimbo gamwe ohali thaneke eyonuko nenge uulunde. (Mat. 16:6, 11, 12; Luk. 12:1) Nomolwaashono oshikwiila shaa na efulika shoka Jesus a longitha, sha li tashi thaneke thiluthilu olutu lwe lwaa na oondjo. (Heb. 7:26) Oshikwiila sholudhi ndoka osho hashi longithwa pEdhimbuluko.

8. Omaviinu ngoka haga longithwa pEdhimbuluko otaga thaneke shike?

8 Omaviinu ngoka Jesus a longithile mo 14 Nisan 33 E.N., oge lile po ombinzi ye. Omaviinu ngoka haga longithwa nena pEdhimbuluko nago oge lile po ombinzi yaJesus. Ombinzi ye ‘yokudhima po oondjo’ oya tilwahi puGolgata, popepi naJerusalem. (Mat. 26:28; 27:33) Otwa pandula ekulilo ndyoka. Onkene osho opala, opo kehe gumwe i ilongekidhile Uulalelo wOmuwa, oshoka oshikwiila nomaviinu ngoka haga kala pEdhimbuluko, oge lile po ekulilo ndyoka Jesus a gandja omolwaantu ayehe aavuliki.

NKENE TU NA OKWIILONGEKIDHA

9. (a) Omolwashike sha simana tu leshe elesho lyOmbiimbeli lyEdhimbuluko? (b) Owu uvitile ngiini ekulilo?

9 Otatu vulu okukala tatu tedhatedha kwaashoka Jesus a ningile manga inaa sa, ngele otwa landula elesho lyOmbiimbel i lyEdhimbuluko mokambo Konakona Omanyolo esiku kehe. Shika otashi ke tu kwathela tu longekidhile omitima dhetu Uulalelo wOmuwa. Omumwameme gumwe okwa nyola a ti: “Ohatu kala twa tegelela Edhimbuluko nondjuulukwe. Omumvo kehe Edhimbuluko ohali kala li ikalekelwa shi vulithe shito. Otandi dhimbulukwa nda tala omudhimba gwatate e tandi pandula ekulilo nomutima gwandje aguhe. . . . Onda kala nale shili ndi shi oovelise ndhoka tadhi popi ekulilo nondi shi oku dhi fatulula, ihe onda tameke owala nde li pandula unene sho nda silwa.” Onkee ano, aluhe ngele tatu ilongekidhile Edhimbuluko, natu dhiladhile kunkene ekulilo lyaJesus lye tu mangulula muulunde nomeso.

Longitha ashihe shoka wa pewa wu ilongekidhile Edhimbuluko (Tala okatendo 9)

10. Oshike tatu vulu okuninga shi nasha nuukalele wetu sho tatu ilongekidhile Edhimbuluko?

10 Okwiilongekidhila Edhimbuluko otashi vulika ku kwatele mo okutamununa mo uukalele woye, ngaashi okukutha uukwathelikokolindjila moomwedhi dhEdhimbuluko. Sho tatu hiya aakonakonimbiimbeli nayalwe kUulalelo wOmuwa, otatu ka kala twa nyanyukwa okupopya kombinga yaKalunga noyOmwana nokombinga yomayambeko ngoka ga nuninwa ayehe mboka haya nyanyudha Jehova nohaye mu hambelele.— Eps. 148:12, 13.

11. Ongiini yamwe yomegongalo lyaKorinto ya li noya nu pamukalo omwiinayi pEdhimbuluko?

11 Sho to ilongekidhile Uulalelo wOmuwa, dhiladhila kwaashoka omuyapostoli Paulus a nyolele Aakriste yomegongalo lyaKorinto. (Lesha 1 Aakorinto 11:27-34.) Paulus okwa ti kehe ngoka ta li nokunwa oshikwiila nomaviinu pamukalo omwiinayi, “oye oku na oondjo molwolutu nombinzi yOmuwa,” Jesus Kristus. Eihumbato lya nyata olya li lya ningi Aakorinto oyendji “ya kale taa alukwa, yamwe aankundi nayamwe oya sa” pambepo. Otapeya yamwe ya li haya li nokunwa sha pitilila, manga inaaye ya kEdhimbuluko nenge pEdhimbuluko lyo lyene e taya kala inaaya tonata pamadhiladhilo nopambepo. Onkene omugwayekwa kehe “ni ikonakone ye mwene” tango manga inaa lya oshikwiila nokunwa omaviinu. Ngele hasho,  “oti iyetele epangulo mokulya nokunwa kwa tya ngaaka.” Okulya oshikwiila nokunwa omaviinu pamukalo omwiinayi ohaku ningitha omuntu a kale inaa hokiwa kuKalunga.

12. (a) Paulus okwa yelekanitha Edhimbuluko nashike nokwa londodha ngiini aakuthimbinga? (b) Omugwayekwa ngele okwa yono sha kwata miiti oku na okuninga ngiini?

12 Paulus okwa yelekanitha Edhimbuluko nokulya pamwe nayalwe. Okwa londodha aakuthimbinga a ti: “Itashi vulika, mu nwe moshitenga shOmuwa e tamu ka nwa ishewe moshitenga shoompwidhuli. Nenge mu lye koshililo shOmuwa e tamu ka lya ishewe koshililo shoompwidhuli.” (1 Kor. 10:16-21) Omuntu ngoka ha li oshikwiila noha nu omaviinu pUulalelo wOmuwa ngele okwa yono sha kwata miiti, oku na okupula a kwathelwe pambepo. (Lesha Jakob 5:14-16.) Ngele okwa imike ‘iiyimati mbyoka tayi holola kutya okwi itedhulula,’ nena ite ku ulika kutya okwa dhina eyambo lyaJesus ngele okwa li oshikwiila nokunwa omaviinu pEdhimbuluko.— Luk. 3:8.

13. Omolwashike tashi ke tu etela uuwanawa ngele otwa galikana shi na ko nasha netegameno lyetu ndyoka Kalunga e tu pa?

13 Sho tatu ilongekidhile Edhimbuluko, natu dhiladhile pamwe negalikano ketegameno ndyoka Kalunga e tu pa. Naashika otashi ke tu etela uuwanawa. Kapu na omupiya gwaJehova e mu igandjela nenge omulanduli gwaJesus omudhiginini ta ka kala a hala okulya nokunwa pEdhimbuluko, ngele ke na uumbangi wa yela kutya ye omugwayekwa shili. Shika otashi ka ulika kutya okwa dhina ekuliloyambo lyaJesus. Omuntu ota tseya ngiini kutya ota vulu okulya oshikwiila nokunwa omaviinu?

OOLYE YE NA OKULYA NOKUNWA?

14. Mboka ye li mehangano epe, ohaya lile shike oshikwiila nohaya nwine shike omaviinu?

14 Mboka ye na okulya nokunwa pEdhimbuluko oomboka owala ye shi thiluthilu kutya oye na ombinga mehangano epe. Kombinga yomaviinu, Jesus okwa ti: ‘Oshitenga shika osho ehangano epe tali kolekwa nombinzi yandje.’ (1 Kor. 11:25) Kalunga okwa popi okupitila momupolofeti Jeremia kutya Ye ota ka dhika po ehangano epe ndyoka lya yooloka ko kehangano lyOmpango ndyoka a dhikile nAaisraeli. (Lesha Jeremia 31:31-34.) Kalunga ehangano epe okwe li ningi nAaisraeli yopambepo nenge naantu yaKalunga. (Gal. 6:15, 16) Ehangano ndika olya kolekwa kekuliloyambo lyaKristus nolya tulwa miilonga nombinzi ye ndjoka ya tilwahi. (Luk. 22:20) Ano Jesus oye omupokati, naagwayekwa aadhiginini oye na ombinga mehangano ndika epe notaya ka thigulula omwenyo megulu.— Heb. 8:6; 9:15.

15. Oolye ye na ombinga mehangano lyUukwaniilwa, notaya ka pewa uuthembahenda washike ngele oya kala aadhiginini?

15 Mboka ye na okulya nokunwa pEdhimbuluko oye shi kutya oye na ombinga mehangano lyUukwaniilwa. (Lesha Lukas 12:32.) Mboka ya ningi aagwayekwa noya piti momahepeko nuudhiginini ngaashi Jesus, otaya ka pangela pamwe naye megulu. (Fil. 3:10) Molwaashoka aagwayekwa aadhiginini oye na ombinga mehangano lyUukwaniilwa, otaya ka pangela naKristus ngaakwaniilwa aluhe sigo aluhe. (Eh. 22:5) Mbaka oyo ye na uuthemba wokulya nokunwa pUulalelo wOmuwa.

16. Yelitha pafupi eityo lyAaroma 8:15-17.

16 Oomboka owala ombepo ye ya hempululila kutya yo aana yaKalunga ye na okulya oshikwiila nokunwa omaviinu. (Lesha Aaroma 8:15-17.) Ndhindhilika kutya mpaka Paulus okwa longitha oshitya shOshiaramea Abba shoka tashi ti “Tate!” Okanona otashi vulika ka longithe oshitya shoka uuna taka ithana he, ku ulike kutya oke mu hole noke mu simaneka. Mboka ‘ombepo ye ya ninga aana yaKalunga’ ohayi ithanwa aana yaKalunga yopambepo.  Mbaka inaya ninga aana yaKalunga, molwaashoka owala kaaye na we ehalo lyokukala kombanda yevi, ihe ombepo yaKalunga oyo yene tayi kwatathana noombepo dhawo yi ya lombwele kutya yo aana yaKalunga aagwayekwa. Oye shi kutya otaya ka pangela pamwe naJesus mUukwaniilwa womegulu ngele oya dhiginine sigo omeso. Nena kombanda yevi okwa hupa owala aagwayekwa nenge aalanduli yaKristus aashona mboka ‘ya tililwa ombepo ondjapuki’ kuJehova. (1 Joh. 2:20; Eh. 14:1) Ombepo oyo tayi ya igidhitha taya ti: “Tate! Tate!” Kaye na tuu ekwatathano ewanawa naKalunga!

ETEGAMENO LYOPAMBIIMBELI NALI KU INYENGITHE

17. Aagwayekwa oye na etegameno lini, noye li tala ko ngiini?

17 Ngele ngoye omugwayekwa, osha yela kutya momagalikano goye gopaumwene oho popi olundji kombinga yetegameno lyomegulu. Uuna Ombiimbeli tayi popi kombinga yomukadhona omuyelele, ngoka a ‘kongelwa omulumentu’ gwe, Jesus Kristus, oho kala wu wete kutya ongoye to popiwa nowa halelela oku ka ninga “omufuko” gwaKristus. (2 Kor. 11:2; Joh. 3:27-29; Eh. 21:2, 9-14) Sho Kalunga ta popi mOohapu dhe kutya oku hole oyana yopambepo, oho ti: “Ongaye te popiwa.” Nongele Oohapu dhaKalunga tadhi popi noyana yaKalunga aagwayekwa, ombepo ondjapuki ohayi ku inyengitha wu vulike nowu popye momutima gwoye wu tye: “Omalombwelo ngaka ongame ga nuninwa.” Kungeyi ombepo yaKalunga otayi kwatathana nombepo yoye yi ku lombwele kutya ngoye owu na etegameno lyokuya megulu.

18. ‘Oonzi dhilwe’ odhi na etegameno lyashike, nowu uvitile ngiini etegameno ndyoka?

18 Ihe ngele ngoye oshilyo ‘shengathithi lyaantu’ nenge ‘shoonzi dhilwe’ Kalunga okwe ku pa etegameno lyokukala kombanda yevi. (Eh. 7:9; Joh. 10:16) Owa hala okukala mOparadisa kombanda yevi sigo aluhe noho nyanyukilwa okutedhatedha kwaashoka Ombiimbeli tayi ti shi na ko nasha nonkalamwenyo ndjoka. Owa halelela oku ka kala pamwe noyaandjeni nosho wo aantu yalwe aayuuki mombili. Owa tegelela wo nondjuulukwe uuna, ondjala, oluhepo, omikithi, eso nokumona iihuna itaayi ka kala po we. (Eps. 37:10, 11, 29; 67:6; 72:7, 16; Jes. 33:24) Owa halelela oku ka hambelela mboka taya ka yumudhwa ya kale kombanda yevi sigo aluhe. (Joh. 5:28, 29) Ino pandula tuu Jehova sho e ku pa etegameno lyoku ka kala kombanda yevi! Nonando iho li oshikwiila nokunwa omaviinu, oho kala pEdhimbuluko wu ulike kutya owa pandula ekuliloyambo lyaJesus Kristus.

OPO TO KA KALA?

19, 20. (a) Owu na okuninga shike, opo etegameno ndyoka Kalunga e ku pa li ka gwanithwe po? (b) Omolwashike wa hala oku ka kala pUulalelo wOmuwa?

19 Kutya nduno etegameno lyoye olyoku ka kala megulu nenge okombanda yevi, otali vulu owala okugwanithwa po ngele owi itaala muJehova Kalunga, muJesus Kristus nomekulilo. Okukala po kwoye pEdhimbuluko otaku ke ku kwathela wu dhiladhile muule ketegameno lyoye nokunkene eso lyaJesus lya simana. Onkene ilongekidha wu ka kale mongundu yaantu omamiliyona mboka taya ka kala pUulalelo wOmuwa pIinyanga yUukwaniilwa nenge pomahala galwe muuyuni awuhe, peningino lyetango mEtitano, 3 Apilili 2015.

20 Ngele owa kala pEdhimbuluko, otashi ke ku kwathela wu kale wa pandula noonkondo ekuliloyambo lyaJesus. Okukala to pulakene nawa otaku ke ku kwathela wu ulukile yalwe ohole moku ya kuthila ko kwaashoka wi ilonga kombinga yohole yaJehova nomalalakano ge omawanawa ngoka e nine aantu ayehe. (Mat. 22:34-40) Onkee ano, ino kala nando inoo ya kUulalelo wOmuwa!

^ okat. 1 Omasiku gAahebeli oga li haga tameke peningino lyetango sigo okeningino lyetango lyesiku ekwawo.