Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Januali 2015

Ondjokana yoye nayi kale ya kola noyi na enyanyu

Ondjokana yoye nayi kale ya kola noyi na enyanyu

“Omuwa ngele ita tungu egumbo, aatungi yalyo otaa ihepeke owala.”— EPS. 127:1a.

1-3. Aaihokani ohaya adhika komashongo geni? (Tala kethano lyopetameko.)

OMUSAMANE ngoka a kala nondjokana ombwanawa uule woomvula 38 ota ti: “Ngele owa kala ho ningi oonkambadhala dholela nohu ulike kutya owa hala ondjokana yeni yi tsikile, Jehova ote ke mu yambeka.” Eeno, aasamane naakulukadhi otaya vulu okukala ya nyanyukwa momathimbo omawanawa nokukwathelathana uuna pwa holoka uudhigu.— Omayel. 18:22.

2 Ihe aaihokani otaya vulu okwaadhika ‘kuudhigu wonkalamwenyo.’ (1 Kor. 7:28) Omolwashike mbela? Omolwashoka iimpwiyu yesiku kehe otayi vulu okunkundipaleka ekwatathano lyawo. Nokuli nomoondjokana ndhoka tadhi shi enditha nawa, aaihokani otashi vulika yu uvithathane nayi nenge pu holoke okwaauvathana. (Jak. 3:2, 5, 8) Ohashi kala wo oshidhigu kaaihokani mboka ye na aanona noye na iilonga hayi ya pula ya longe oowili odhindji. Ethindakano lyomadhiladhilo nomvulwe ohayi shi ningi oshidhigu kaaihokani ya kale ye na ethimbo lyokukoleka ondjokana yawo. Ohole yaaihokani otashi vulika yi nkundipalekwe kuupyakadhi wopashimaliwa, uukolele tawu nyangwanyangwa nenge kuupyakadhi wulwe. Iinima mbika otashi vulika yi ya ningithe wo ya kale inaaya simanekathana. Oshikwawo, ondjokana ndjoka tayi monika ya fa ya kola otayi  vulu okuteywa po ‘kiilonga yuuhalu wopantu,’ ngaashi oluhondelo, uukeeneidhiliko, uutondwe, oontamanana, efupa, ongeyo netopoko nenge okwaanuukumwe.— Gal. 5:19-21.

3 Shoka tashi nayipaleke onkalo ‘momasiku ngaka gahugunina,’ (NW) aantu mboka yi ihole yo yone noye na omikalo omiwinayi. Shika osha nika oshiponga kaaihokani. (2 Tim. 3:1-4) Oshinima shahugunina shoka oondjokana dha taalela, omutondi omukwanyanya. Omuyapostoli Paulus okwe tu londodha a ti: “Omutondi gweni Satana ohe mu kundukidha, ta ndunduma a fa onime, ta kongo ngoka, te mu ninagula po.”— 1 Pet. 5:8; Eh. 12:12.

4. Ongiini to vulu okukala nondjokana ya kola nombwanawa?

4 Omusamane gumwe moJapani ota ti: “Onda li ndi na uupyakadhi wopashimaliwa. Shaashi kanda li we ndi na ethimbo lyokukundathana nomukulukadhi gwandje, okwa ka kala kee na we ombili. Oshikwawo omukulukadhi gwandje okwa ka kwatwa komukithi omudhigu. Iinima mbika omathimbo gamwe oya li hayi tu ningitha tu nyenyete.” Omashongo gamwe mondjokana itaga vulu okuyandwa, ihe otaga vulu okusindwa. Aaihokani otaya vulu okukala nondjokana ya kola kekwatho lyaJehova. (Lesha Episalomi 127:1.) Natu kundathaneni iinima itano mbyoka tayi vulu okukoleka ondjokana opo yi kalelele. Konima yaashoka otatu ka kundathaneni nkene ohole hayi mangele kumwe iinima mbika.

JEHOVA NA KALE MONDJOKANA YENI

5, 6. Aaihokani oye na okuninga shike, ngele oya hala Jehova a kale pamwe nayo mondjokana yawo?

5 Opo ondjokana yi kale ya kola, aaihokani oye na okuvulika kOmutoti gwayo nokudhama muye. (Lesha Omuuvithi 4:12.) Ngele omusamane nomukulukadhi ohaya wilikwa kuJehova, Jehova ota ka kala mondjokana yawo. Ombiimbeli otayi popi ngeyi kombinga yoshigwana shaKalunga shonale ya ti: “Nge tamu peguka mo mondjila mu ye kolulyo nenge kolumoho, otamu ka uva ewi konima yeni tali ti: ‘Ondjila oyo ndjika. Yi landuleni.’” (Jes. 30:20, 21) Aaihokani nena ohaya ‘uvu’ ewi lyaJehova uuna taya lesha pamwe Oohapu dhaKalunga. (Eps. 1:1-3) Otaya vulu wo okukoleka ondjokana yawo ngele ohaya ningi Elongelokalunga lyUukwanegumbo momukalo tagu talaleke nomuhokithi. Okugalikana pamwe esiku kehe okwa simanenena, opo aaihokani ya vule okukondjitha oomwigo dhaSatana.

Ngele aaihokani ohaya ningi pamwe iinima yopambepo, otashi ke ya hedhitha popepi naKalunga notaya kala ye holathane, ya nyanyukwa noye na uukumwe (Tala okatendo 5, 6)

6 Gerhard a za koNdowishi ota ti: “Uuna tu uvite kutya inatu nyanyukwa omolwomaupyakadhi nenge okwaauvathana, omayele gomOohapu dhaKalunga oge tu kwathela tu kale tu na eidhidhimiko notu kale hatu dhiminathana po. Opo aaihokani ya pondole, oye na okukala ye na omaukwatya ngaka ga simanenena.” Ngele aaihokani oya hala Kalunga a kale mondjokana yawo, oye na okukala haya ningi pamwe iinima yopambepo. Naashoka otashi ke ya hedhitha popepi naye notaya kala ye holathane, ya nyanyukwa noye na uukumwe.

AASAMANE KALENI OMITSE DHOMAGUMBO DHI NA OHOLE

7. Aasamane oye na okuungaunga ngiini naakulukadhi yawo?

7 Opo aaihokani ya kale nondjokana ya kola noye na enyanyu, oshindji oshi ikolelela kunkene omusamane ta wilike. Ombiimbeli otayi ti: “Kristus oye omutse gwomulumentu kehe, omulumentu oye omutse gwomukadhi, naKalunga oye omutse gwaKristus.” (1 Kor. 11:3) Ovelise ndjika otayi lombwele aasamane kutya oye na okuungaunga naakulukadhi yawo ngaashi naanaa Kristus hu ungaunga naalumentu. Jesus ka li nando omukwanyanya, ihe okwa kala aluhe omunahole, omunambili, e na ondjele, omunahenda nomwiifupipiki.— Mat. 11:28-30.

8. Omusamane oku na okuninga shike opo omukulukadhi gwe a kale e mu hole nokwe mu simaneka?

8 Aasamane Aakriste inaya pumbwa okuuhala taya pula aakulukadhi yawo ye ya simaneke. Pehala lyaashono, ‘mokukalathana naakiintu yawo, oye na okutseya kutya oya fa iiyuma yeloya, onkee oye na oku ya simaneka.’ (1 Pet. 3:7) Aasamane oye na okusimaneka aakulukadhi yawo noku ya ningila iinima mbyoka tayi ulike kutya oye ya lenga, kutya nduno omegumbo nenge opokati kaantu. (Omayel. 31:28) Omusamane ngoka ha ningi ngaaka oha kala e holike nokwa simanekwa komukadhi, na Kalunga oha yambeke ondjokana yawo.

AAKULUKADHI VULIKENI NEIFUPIPIKO KAASAMANE YENI

9. Omukulukadhi ohu ulike ngiini kutya oha vulika neifupipiko komusamane gwe?

9 Ohole yokuhola Jehova Kalunga ohayi tu kwathele tu ishonopeke kohi yoshikaha she. (1 Pet. 5:6) Omukalo gumwe gwa simana moka aakulukadhi haya simaneke Jehova, ogwo okukala haya longele kumwe naasamane yawo noku ya ambidhidha. Ombiimbeli otayi ti: “Aakiintu, vulikeni kaalumentu yeni, oshoka osho oshinakugwanithwa sheni shaakriste.” (Kol. 3:18) Oshoshili kutya omukulukadhi ita ka kala a hokwa omatokolo agehe ngoka taga ningwa komusamane gwe. Ihe nonando ongaaka, omukulukadhi ngoka ha vulika ota ka vulika komatokolo gomusamane gwe uuna kaage li ompinge noompango dhaKalunga.— 1 Pet. 3:1.

10. Omolwashike sha simana omukulukadhi a vulike komusamane gwe?

10 Omukulukadhi okwa simanenena monkalamwenyo yomusamane gwe, oshoka oye “kuume” ke. (Mal. 2:14) Oha popi omadhiladhilo nomaiyuvo ge nesimaneko ngele tapu ningwa omatokolo gontumba pegumbo, ihe oha kala natango omuvuliki. Omusamane omunandunge oha pulakene nawa komadhiladhilo gomukadhi. (Omayel. 31:10-31) Ngele omukulukadhi oha vulika neifupipiko, megumbo ohamu kala ombili, enyanyu nuukumwe. Omusamane nomukulukadhi ohaya kala ya nyanyukwa shili, sho ye shi kutya otaya nyanyudha Kalunga.— Ef. 5:22.

KALENI HAMU DHIMINATHANA PO

11. Omolwashike okudhiminathana po kwa simanenena?

11 Shimwe shomiinima ya simanenena opo ondjokana yi kalelele, okudhiminathana po. Ngele omusamane nomukulukadhi ohaya ‘kwathathana nohaya dhiminathana po oondjo ethimbo kehe,’ ondjokana yawo ohayi kala ya kola. (Kol. 3:13) Ihe aaihokani otashi vulika kaaya kale nekwatathano ewanawa, ngele ohaya kwatelathana onkone nongele ohaya lafulula iinima iikulu uuna ya geelathana. Ngaashi owala etungo lya tenda omisa tali vulu okumbonyoka po nuupu, natse ngele otwa kala twa yemata momitima dhetu notwa kwatela ookuume ketu kopandjokana onkone, otashi kala oshidhigu oku ya dhimina po. Mekondjithathano naashoka, ondjokana ohayi kala ya kola, ngele omusamane nomukulukadhi ohaya dhiminathana po, ngaashi Jehova he ya dhimine po.— Mika 7:18, 19.

12. Ongiini ohole ‘hayi siikile omayono ogendji’?

12 Ohole yashili “ihayi dhimbulukwa uuwinayi ye u ningilwa.” Nokuli “ohole ohayi siikile omayono ogendji.” (1 Kor. 13:4, 5, lesha 1 Petrus 4:8.) Niitya yilwe, omuntu ngoka e na ohole iha yalula kutya iikando ingapi e na okudhimina po. Sho omuyapostoli Petrus a pula Jesus kutya iikando ingapi e na okudhimina po, Jesus okwa ti: “Olwomilongo heyali luheyali.” (Mat. 18:21, 22) Jesus okwa li tu ulike kutya Omukriste ke na okuyalula iikando mbyoka e na okudhimina po yalwe.— Omayel. 10:12. *

13. Oshike tashi ka kwathela aaihokani ya kale haya dhiminathana po?

13 Annette okwa ti: “Ngele aaihokani kaye hole okudhiminathana po, ohaya kala ye ninathane onkone noihaya kala yi inekelathana, naashika ohashi yono po ondjokana. Okudhiminathana po ohaku koleke ekwatathano mondjokana nohaku kwathele aaihokani ya pange uukuume wopothingo.” Opo wu kale ho dhimine po nuupu, kala ho pandula. Kala wu na egamo lyokupandula kuume koye kopandjokana nomwenyo aguhe. (Kol. 3:15) Kaleni mu na ombili yopamadhiladhilo, uukumwe nomayambeko ngoka Kalunga ha gandja kwaamboka haya dhimine po.— Rom. 14:19.

NINGILA MUKWENI SHOKA WA HALA E KU NINGILE

14, 15. Ekotampango lyaJesus olini, nohali kwathele ngiini aaihokani?

14 Osha yela kutya nangoye owu hole okuungaungiwa nangoye nesimaneko. Oho shi pandula ngele omadhiladhilo nomaiyuvo goye ga kala ge niwe ko nasha nago. Ihe mbela owu uva ngaa nale omuntu ta ti: “Otandi mu ningile naanaa ngaashi a ningile ndje”? Nonando omathimbo gamwe einyengo lya tya ngaaka otashi vulika li uviwe ko, Ombiimbeli otayi tu londodha tayi ti: ‘Ino tya: “Ngaashi a ningile ndje, osho tandi ke mu ningila.”’ (Omayel. 24:29) Nokuli Jesus okwa gandja ekotampango lyankene tu na okukandula po okwaauvathana. Ekotampango ndyoka lya tseyika nawa otali ti: “Shoka mwa hala aantu ye mu ningile, osho ya ningileni wo.” (Luk. 6:31) Jesus okwa hala okutya otu na okuungaunga naantu ngaashi twa hala yu ungaunge natse. Katu na oku ya shunithila uuwinayi. Mondjokana, shoka otashi ti otu na okukala nayakwetu ngaashi twa hala ya kale natse.

15 Aaihokani ohaya koleke ekwatathano lyawo, ngele oye na ko nasha nomaiyuvo gookuume kawo kopandjokana. Omusamane gumwe  gwomoSouth Africa okwa ti: “Otwa li twa kambadhala okuvulika kekotampango lyaJesus. Opwa li shili omathimbo gamwe hatu kala twa geelathana, ihe otwa kambadhala okuningilathana iinima mbyoka kehe gumwe a hala a ningilwe kumukwawo, ano hatu simanekathana.”

16. Oshike aaihokani kaaye na okuningilathana?

16 Ino kala ho popi uunkundi wakuume koye kopandjokana nenge ho simonona uukwatya we kehe ethimbo, nando oto ningi omashendjo. Dhimbulukwa kutya ondjokana kayi shi ethigathanopo lyokumona kutya olye e na oonkondo, olye ha vulu okunyenyeta mokule nenge olye ha vulu okugandja omangwanda. Atuheni ohatu ningi omapuko nohatu geyitha yakwetu omathimbo gamwe. Ihe omusamane nenge omukulukadhi ke na nando omatompelo gasha gokusheka, okutuka mukwawo, oku mu undula nenge oku mu dhenga.— Lesha Omayeletumbulo 17:27; 31:26.

17. Aasamane otaya vulu okutula ngiini ekotampango lyaJesus miilonga?

17 Momihoko dhimwe aalumentu mboka ye na onyanya nenge haya dhenge aakulukadhi yawo oya talika ko oyo aalumentuelela. Ihe Ombiimbeli otayi ti: ‘Omutalanteni oku vule ofule; naangoka ta pangele omwenyo gwe, oku vule ngoka ta sindi oshilando.’ (Omayel. 16:32) Ohashi pula eidhidhimiko, opo omuntu wu kale ho holele Jesus Kristus, omuntu omunenenene ngoka a li ko nosho wo okupangela ongeyo yoye. Omusamane ngoka hu ula omukadhi omalaka omawinayi nenge he mu dhenge, ke shi omulumentu gwolela noita kala e na ekwatathano ewanawa naJehova. Omupisalomi David ngoka a li omulumentu omunankondo nependa, okwa tile: ‘Geyeni, ihe inamu yona; dhiladhileni nawa oshinima shika, uuna mwa lala moondunda dheni.’— Eps. 4:4, yelekanitha NW.

“ZALENI OHOLE”

18. Omolwashike sha simana tu kale aluhe tatu imike ohole?

18 Lesha 1 Aakorinto 13:4-7. Ohole oyo ya simanenena mondjokana. Ombiimbeli otayi ti: “Zaleni esilohenda, ombili, eifupipiko, engungumano nontalanteni. Ihe kombanda yaambika ayihe zaleni ohole, oyo epaya lyegwaneno olyokumanga kumwe.” (Kol. 3:12, 14, OB-1954) Ohole yeiyambo ngaashi ndjoka ya li yu ulikwa kuKristus oyo hayi koleke ondjokana. Ohole ndjoka ohayi koleke ondjokana, nando mukwawo oku na uukwatya mboka hawu mu ningile nayi nenge mukwawo kee na uukolele, pu na uupyakadhi wopashimaliwa nomahilathano pokati ke naapambele yakuume ke kopandjokana.

19, 20. (a) Aaihokani otaya vulu ngiini okukoleka ondjokana yawo nokukala ya nyanyukwa? (b) Otatu ka kundathaneni shike moshileshwa tashi landula?

19 Opo ondjokana yi kalelele, ohashi pula aaihokani ya kale ye na ohole yaaluhe, yi itula mo mondjokana noyi inekelathana notaya ningi oonkambadhala dha mana mo ya kaleke po ondjokana yawo. Pehala lyokuthiga po ondjokana uuna pwa holoka uupyakadhi, aaihokani oye na okukala ya tokola toko okukaleka ekwatathano lyawo lya kola lela noitaali tengauka. Aaihokani Aakriste mboka ye hole Jehova noye holathane ohaya kandula po uupyakadhi kehe, oshoka “ohole itayi hulu po.”— 1 Kor. 13:8; Mat. 19:5, 6; Heb. 13:4.

20 ‘Momathimbo ngaka omadhigu’ kashi shi nando oshipu okukaleka ekwatathano lyeni mondjokana lya kola nokukala mwa nyanyukwa. (2 Tim. 3:1) Ihe otamu vulu oku shi pondola kekwatho lyaJehova. Aaihokani oye na wo okuyanda omikalo dha nyata ndhoka dha vuka muuyuni mbuka. Oshileshwa tashi landula otashi ka kundathana kombinga yaashoka aasamane naakulukadhi taya vulu okuninga, opo ya gamene ondjokana yawo.

^ okat. 12 Nonando aaihokani ohaya kambadhala okudhiminathana po nokutala kutya ongiini ye na okukandula po uupyakadhi wawo, Ombiimbeli otayi ti kutya kuume kopandjokana ngoka kee na ondjo oku na uuthemba okutokola ngele ota dhimine po mukwawo ngoka a hondele nenge ote mu henge po. (Mat. 19:9) Tala oshigwedhelwako “Shoka Ombiimbeli tayi ti kombinga yokuteya ondjokana nokutopoka,” membo ‘Ohole yaKalunga,’ epandja 219-221.