Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Januali 2015

Mbela aanandjokana otaya vulu ngaa okukala ye holathane sigo aluhe?

Mbela aanandjokana otaya vulu ngaa okukala ye holathane sigo aluhe?

“Oohandje [dhohole] oohandje dhomulilo, oohandje dhOmuwa.”— ONDJIMB. 8:6, OB-1954.

1, 2. Oolye taya vulu okukwathelwa uuna taya konakona Ondjimbolela yaSalomo, nomolwashike? (Tala kethano lyopetameko.)

AAFUKO oya li ya talathana yo taya iyolitha. Kehe gumwe okwa li e wete kutya oye holathane shili. Omumwatate ngoka a gandja oshipopiwa shohango yawo okwa li a mono sho taya ulukilathana ohole, e ti ipula kutya, ‘Mbela osho ngaa taya kala ye holathane sigo aluhe ngeyi? Nenge pamwe ohole yawo otayi ke enda tayi talala?’ Ngele omusamane nomukulukadhi oye holathane shili, ekwatathano lyawo ohali kalelele nokuli nando opu holoke uupyakadhi wa yaga kegonga. Shiyemateka, aanandjokana ohaya lulilwa e taya etha oondjokana dhawo dhi teke. Nomolwaashono omuntu tashi vulika wu ipule to ti: ‘Mbela aanandjokana otaya vulu ngaa okukala ye holathane sigo aluhe?’

2 Ohole yashili oya li ya pumba nopethimbo lyomukwaniilwa Salomo. Okwa popi nkene aantu ya li pethimbo lye a ti: “Maantu eyuvi onda mono mo omulumentu gumwe omunashili, ihe inandi mona mo omukiintu omunashili nando ogumwe momwaalu tuu ngoka. Tala, onda mono ashike kutya Kalunga okwa shiti aantu aayuuki,  ihe yo yene ohayi ikongele iihelele oyindji.” (Omuuv. 7:26-29) Salomo okwa li a mono oshidhigu okwaadha mo moshilongo omulumentu nenge omukiintu e na omikalo omiwanawa, omolwaakiintu aakwiilongo mboka ya li haya longele Baal. * Ihe okatewo hoka a adhika a nyola nale oomvula 20 lwaampono dha tetekele, haki ithanwa Ondjimbolela yaSalomo, otaku ulike kutya pokati komulumentu nomukiintu otapu vulu okukala ohole tayi kalelele. Otaka popi wo sha yela kutya ohole yashili oshike notayi vulu okuulikwa ngiini. Aalongeli yaJehova mboka ya hokana naamboka inaaya hokana otaya vulu okwiilonga oshindji kombinga yohole yashili, ngele taya konakona nuukeka Ondjimbolela yaSalomo

OHOLE YASHILI OKO YI LI!

3. Omolwashike omulumentu nomukiintu taya vulu okuholathana nohole yashili?

3 Lesha Ondjimbolela 8:6. Ohole otayi popiwa kutya oyo “oohandje dhOmuwa.” Omolwashike mbela? Omolwashoka ohole oyo uukwatya dhingi waJehova. Ye Jehova okwe tu shita oshifetha she notatu vulu okuholela ohole ye. (Gen. 1:26, 27) Sho Kalunga e eta omukiintu gwotango, Eva, kuAdam, Adam okwa li a nyanyukwa shili e ta popi nokuli nkene a li u uvitile omukiintu gwe. Eva “okwa kuthwa momulumentu,” nomolwaashono a li a hokwa omulumentu gwe Adam. (Gen. 2:21-23) Shaashi Jehova okwa shita aantu momukalo moka taya vulu okuulika ohole, omulumentu nomukiintu otaya vulu okuulukilathana aluhe ohole yashili ndjoka ihaayi hulu.

4, 5. Ondjimbolela yaSalomo otayi hokolola kombinga yashike?

4 Ondjimbolela yaSalomo otayi hokolola nawa ohole ndjoka omulumentu nomukiintu haya kala ye ninathane. Ondjimbo ndjika otayi imbi kombinga yohole pokati kokakadhona ka za komukunda Shulem nomumati gwako omuholike ngoka omusita gwoonzi. Okakadhona oke etwa kuSalomo ngoka a li a yunga ontanda popepi niitsambe yomiviinu mbyoka ka li taka langele. Okwa li e ka hokwa, molwaashoka oka li ka shitikika. Salomo okwe ka lombwele kutya ko okawanawa dhingi e te ka pe omagano ogendji. Ihe osha li sha yela kutya, ko oka li owala ke hole omumati gwako noka li ka halelela owala okukala nomuholike gwako. (Ondjimb. 1:4-14) Omumati okwe ke ka konga montanda, naasho ya li pamwe oya lombwelathana uuhapu uutoye.— Ondjimb. 1:15-17.

5 Sho Salomo a shuna kuJerusalem okwa faalele okakadhona haka, ihe omumati gwako okwe ka landulile ko. (Ondjimb. 4:1-5, 8, 9) Oonkambadhala adhihe dhaSalomo opo okakadhona haka ka kale ke mu hole odha li dha ponyo. (Ondjimb. 6:4-7; 7:1-10) Hugunina, omukwaniilwa okwe ke etha ka shune kaandjawo. Ondjimbo ndjika oya hulitha nokakadhona taki ithana omuholike gwako e ‘endelele, a fa omenye,’ opo e ye kuko.— Ondjimb. 8:14, OB-1954.

6. Omolwashike oshidhigu okumona kutya oohapu ndhoka dhi li mOndjimbolela yaSalomo odha popiwa koolye?

6 Ondjimbolela yaSalomo oyo ondjimbo ombwanawa lela. Nomolwaashono tayi ithanwa “ondjimbolela.” (Ondjimb. 1:1) Embo limwe lyedhina The New Interpreter’s Dictionary of the Bible olya ti kutya “iinima ngaashi ehokololo, aapopi nenge omadhina, hayo naanaa ya simana” mondjimbo ndjika. Salomo ina popya kutya olye ta popi, oshoka okwa li a hala omuleshi a gandje eitulomo koohapu dhokatewondjimbo haka okawanawa. Ihe nonando Salomo ina popya kutya olye ta popi, omuntu oto vulu okumona kutya oohapu odha popiwa koolye, ngele owa tala kwaashoka tashi popiwa. *

 “OHOLE YOYE ONTOYE YI VULE OMAVIINU”

7, 8. Omusita nokakadhona ke oya li yu ulukilathana ngiini kutya oye holathane? Gandja iiholelwa.

7 Okakadhona nomusita gwako oya li ya lombwelathana uuhapu uuwanawa, sho taya ulike kutya oye holathane. Otashi vulika tu kale kaatu uvite kutya oohapu dhawo dhimwe ‘dhohole’ odhu uka naanaa peni, molwaashoka odha nyolelwe oomvula dha konda 3 000 dha ka pita. Nonando eputuko lyawo olya yooloka ko kulyetu nena, otu wete kutya oya li ye holathane. Pashiholelwa, omusita gwoonzi okwa ti kutya omeho gokakadhona ke ‘oga fa goonguti,’ shoka tashi ti kutya oka li hake mu tala nohole. (Ondjimb. 1:15) Ko okakadhona oke mu lombwele kutya omeho ge inaga fa goonguti, ihe oga fa oonguti dho dhenedhene. (Lesha Ondjimbolela 5:12.) Omeho ge omaluudhe, go omatokele, oga li taga monika kuko ga fa oonguti tadhi yogo momahini.

8 Oohapu ndhoka dha popiwa mokatewondjimbo haka itadhi popi owala uuwanawa wokoshipala. Tala kwaashoka omumati a ti kombinga yokupopya kwokakadhona ke. (Lesha Ondjimbolela 4:7, 11.) Okwa ti omilungu dhako ‘ohadhi ndonda omagadhi goonyushi. Omagadhi goonyushi nomahini oge li kohi yelaka lyako.’ Omolwashike a tile ngawo? Omolwaashoka kuye oohapu dhako odha li oombwanawa ngaashi omahini, noontoye ngaashi omagadhi goonyushi. Sho omumati a lombwele okakadhona kutya “ayihe oye ku opala; ino pumbwa sha,” ka li owala ta popi uuwanawa wako wokoshipala, ihe okwa li ta popi wo kombinga yuukwatya wako uuwanawa.

9. (a) Ohole ndjoka hayi kala pokati komusamane nomukulukadhi oya kwatela mo shike? (b) Omolwashike aaihokani ye na okuulukilathana ohole?

9 Komusamane nomukulukadhi mboka haya longele Jehova nena, ondjokana kayi shi owala okondalaka nenge euvathanotsokumwe. Aaihokani mbaka oye holathane shili nohaya ulukilathana ohole. Ihe ohole ndjika oyoludhi luni? Mbela ohole yokwaaihola mwene ndjoka Ombiimbeli tayi tu longo tu kale tu hole nayo aantu ayehe? (1 Joh. 4:8) Mbela oondjoka hatu kala tu hole nayo aakwanezimo yetu? Nenge oondjoka hayi kala pokati kookuume yashili? (Joh. 11:3) Nenge pamwe oondjoka hayi kala pokati komulumentu nomukiintu? (Omayel. 5:15-20) Ohole ndjoka omusamane nomukulukadhi haya kala ye ninathane oya kwatela mo ayihe mbyoka. Iinima iiwanawa mbyoka hamu lombwelathana nohamu ningilathana otayi ulukile mukweni kutya owu mu hole, notayi mu kwathele amuhe mu kale mwa nyanyukwa mondjokana yeni. Osha pumbiwa lela mu kale hamu shi ningi, kutya nduno ohamu kala mwi ipyakidhila shi thike peni. Miilongo yimwe moka aantu haya kongelwa ookuume kopandjokana kaakwanezimo, aaihokani otashi vulika ya tseyathane owala esiku lyohango. Sho taya ende taya tseyathana naasho ohole yawo tayi koko, oya pumbwa okulombwelathana kutya oye holathane. Shika ohashi koleke ekwatathano lyawo nosho wo ondjokana yawo.

10. Okuulukilathana ohole otaku kwathele ishewe ngiini okukoleka ondjokana?

10 Ngele aanandjokana ohaya lombwelathana kutya oye holathane nohaye shi ulike, shika ohashi koleke wo ondjokana momukalo gulwe. Omukwaniilwa Salomo okwa li a lombwele okakadhona kutya ote ke ka pa “omagola goshingoli ge na oombandi dhoshisiliveli.” Okwa li e ka tanga ta ti, ko ‘okawanawalela ka fa omwedhi gwa toka, okashekesheke ka fa etango.’ (Ondjimb. 1:9-11; 6:10) Ihe okakadhona oka adhika nale ka mona po omuholike gwako ngoka ke hole shili. Oshike sha li she ka kwathele ka dhiginine ohole yako yokuhola omumati gwako, noshike she ka hekeleke pethimbo ya li ye lyaathane kokule? (Lesha Ondjimbolela 1:2, 3.) Okakadhona oka ti kutya oka dhimbulukwa oohapu ‘dhohole’ ndhoka omumati gwako  e ka lombwelele. Kuko, ohole ye oya li “ontoye yi vule omaviinu” ngoka taga nyanyudha omuntu, nedhina lye olya li ewanawa ‘lya fa omugwayo gwa pimpilwa’ komutse. (Eps. 23:5; 104:15) Osha simana omusamane nomukulukadhi yu ulukilathane ohole aluhe, oshoka shika otashi ka kokeka ohole yawo yokuholathana. Nuuna taya dhimbulukwa omathimbo ngono yu ulukilathana ohole, ohole yawo otayi kala ya kola!

INAMU PENDUTHA OHOLE “MANGA INAAYI SHI YUULUKWA”

11. Aakriste mboka inaaya ya natango mondjokana otaya ilongo shike moohapu dhokakadhona ndhoka ka lombwele aakadhona muJerusalem?

11 Aakriste mboka taya kongo kuume kopandjokana otaya ilongo oshindji mOndjimbolela yaSalomo. Okakadhona kaka li nando ke hole Salomo. Oka lombwele nokuli aakadhona muJerusalem ka ti: “Inamu pendutha ohole nenge mu yi kudhile, manga inaayi shi yuulukwa.” (Ondjimb. 2:7; 3:5) Omolwashike ka tile ngawo? Omolwaashoka osha puka omuntu wu kale wu hole kehe omulumentu nenge kehe omukiintu wa mono. Nena otashi ka kala pandunge ngele Omukriste ngoka a hala okuhokana nenge okuhokanwa a tegelele sigo a mono omukiintu nenge omulumentu ngoka e hole shili.

12. Omolwashike okakadhona Okashulami ka li ke hole omusita gwako gwoonzi?

12 Omolwashike okakadhona Okashulami ka li ke hole omusita gwako gwoonzi? Odhoshili kutya omumati gwako okwa li omwaanawa a fa “omenye” nomaako ge oga li omanankondo ga fa “omitenge dhoshingoli.” Omagulu ge omawanawa noga kola ga fa “oongudhi dhomarmera.” Omumati ka li owala omwaanawa noku na oonkondo. Ihe kuko, ‘omuholike gwako mokati kaamati okwa fa omuyapula mokati komiti dhomokuti.’ Omumati nguka oku na okukala a li e hole Jehova noku na uukwatya uuwanawa, nomolwaashono okakadhona haka okatilikalunga ka li ke mu hole.— Ondjimb. 2:3, 9; 5:14, 15.

13. Omolwashike omusita gwoonzi a li e hole okakadhona ke?

13 Okakadhona Okashulami ko oka li ka tya ngiini? Oka li ke na ondjelo ombwanawa, nomolwaashoka ka li ka hokiwa komukwaniilwa Salomo ngoka pethimbo mpoka a li e na “aanyekadhi omilongo hamano naakiintu yopooha omilongo hetatu naadhike yaa shi kuyalulwa.” Ihe nando ongaaka, oka li ki itala ko kutya ko “ongala yokelundu lyaSharon.” Oka li shili okayifupipiki. Itashi kumitha nokuli sho omusita gwako gwoonzi a ti kutya ko oka “fa ongala ya sheneka mokati komano.” Oka li ka dhama muJehova.— Ondjimb. 2:1, 2; 6:8.

14. Ngele owa hala okuya mondjokana, oshike to vulu okwiilonga komusita gwoonzi nosho wo kokakadhona Okashulami?

 14 Ombiimbeli otayi kumagidha Aakriste kutya oondjokana dhawo “odhi na okukala dhopakriste.” (1 Kor. 7:39) Omukriste ngoka a hala okuya mondjokana oku na okuyanda kaa ye miihole nomuntu gwomuuyuni. Pehala lyaashono, na konge owala ngoka ha longele Jehova nuudhiginini. Shika otashi ka kwathela ngiini ondjokana? Omusamane nomukulukadhi otaya ka adhika kuupyakadhi esiku nesiku. Ihe ngele ayehe oye na ekwatathano lyopothingo naJehova, otaya vulu okukala nombili noya nyanyukwa mondjokana yawo. Onkee ano, ngele ngoye owa hala okuya mondjokana, holela omusita gwoonzi nosho wo okakadhona Okashulami. Konga omuntu ngoka e na uukwatya uuwanawa noku hole shili Jehova.

Aakriste ohaya yanda okuya miihole naantu yomuuyuni (Tala okatendo 14)

MUYALEKWA GWANDJE, “OWA FA OSHIKUNINO SHOKUVULULUKILWA SHA PATEKA”

15. Oshiholelwa shini Aakriste aalumentu naakiintu taya vulu okwiilonga kokadhona Okashulami?

15 Lesha Ondjimbolela 4:12. Omolwashike omusita gwoonzi a ti kutya omuholike gwe “oshikunino shokuvululukilwa sha pateka”? Ngele oshikunino oshi na olugumbo otashi ti kutya hakehe gumwe ta vulu okuya mo. Ngoka ta yi mo oku na owala okupitila pomweelo hagu patwa. Okakadhona Okashulami osho wo ka li ka fa oshikunino shoka, oshoka oka li owala ke hole omumati ngoka a li te ke ka hokana, ano omusita gwoonzi. Oka li ka fa “ekuma,” ‘hamweelo’ ngoka gwe ekama owala, nomolwaashono inaaki iyethela momukwaniilwa. (Ondjimb. 8:8-10) Sha faathana, Aakriste aalumentu naakiintu mboka taya dhiladhila ya hokane, ohaya kala owala ye hole mboka taya ka ya nayo mondjokana, hamuntu gulwe.

16. Mboka taya endelathana otaya vulu okwiilonga shike mOndjimbolela yaSalomo?

16 Sho omusita gwoonzi a pula okakadhona Okashulami ya ye ye ke endaende pamwe, aamwayina yako aalumentu oye ka indike ko. Pehala lyaashono, aamwayina oye ka tumu ka ka langele iitsambe yomiviinu. Omolwashike? Mbela kaya li ye ka inekela? Mbela oya li taya dhiladhila kutya oka hala oku ka ninga sha shapuka? Aawe, oya li owala ya hala okugamena omumwayinakadhona, opo kaa falwe memakelo. (Ondjimb. 1:6; 2:10-15) Oshiholelwa shika otashi longo Aakriste mboka inaaya hokana nenge inaaya hokanwa kutya, uuna taya endelathana, naya kotoke ya kaleke ekwatathano lyawo lya yogoka. Inamu kala one amuke pehala mpoka kaapu na aantu. Nonando otamu vulu okuulukilathana ohole momukalo gwa yogoka, omu na okukotoka kaamu yone.

17, 18. Oonkundathana dhetu kombinga yOndjimbolela yaSalomo odhe ku kwathele ngiini?

17 Olundji Aakriste mboka opo ya hokana ohaya kala ye holathane noonkondo. Jehova sho a toto ondjokana okwe yi toto nelalakano yi kale sigo aluhe. Onkee ano, osha simanenena aanandjokana ya kokeke ohole yawo noyi kale ya hwama ngaashi omulilo.— Mark. 10:6-9.

18 Sho to kongo kuume kopandjokana, konga omuntu ngoka wu hole shili. Ngele owe mu mono, longeleni kumwe, opo mu koleke ohole yeni yi kalelele, ngaashi sha popiwa mOndjimbolela yaSalomo. Kutya nduno oto kongo kuume kopandjokana nenge owu li nale mondjokana, oto vulu okukala nohole yashili notayi kalelele, oshoka oyo “oohandje dhOmuwa.”— Ondjimb. 8:6.

^ okat. 2 Tala Oshungolangelo yOshiingilisa yo 15 Januali 2007, epandja 31.

^ okat. 6 Tala oshitopolwa “Outline of Contents” mOmbiimbeli yOshiingilisa yo-New World Translation, epandja 926-927.