Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Desemba 2014

Natu taaleleni ehulilo lyuuyuni mbuka tu na uukumwe

Natu taaleleni ehulilo lyuuyuni mbuka tu na uukumwe

“Tse atuhe iilyo yolutu lwaKristus.” —  EF. 4:25.

1, 2. Kalunga okwa hala aagundjuka naakuluntu ye mu longele ngiini?

MBELA ngoye omugundjuka? Ngele osho, kala wu shi shi kutya owa simana mehangano lyaJehova. Aantu oyendji mboka taya ninginithwa miilongo oyindji, aagundjuka. Otashi tsu shili omukumo okumona aagundjuka oyendji taya kutha onkatu ya longele Jehova!

2 Otapeya wu hole okweendathana naagundjuka ooyakweni. Ohashi tu nyanyudha okukala naantu yepipi lyetu. Kashi na nduno mbudhi kutya omuntu omugundjuka nenge omukuluntu, kutya okwa putukila peni, Kalunga okwa hala atuhe tu mu longele twa hangana. Omuyapostoli Paulus okwa nyola kutya Kalunga okwa hala “aantu ayehe ya hupithwe noya tseye oshili.” (1 Tim. 2:3, 4) Ehololo 7:9 otayi popi kombinga yaalongelikalunga mboka ya zi “maantu yomomihoko adhihe, momaludhi agehe, miigwana ayihe nomomalaka agehe.”

3, 4. (a) Aagundjuka oyendji nena oye na ombepo ya tya ngiini? (b) Iikala yini tayi tsu kumwe noohapu ndhoka dhi li mAaefeso 4:25?

3 Opu na eyooloko enene pokati kaagundjuka mboka haya longele Jehova naamboka yomuuyuni. Aagundjuka oyendji mboka ihaaya  longele Jehova oyi ihole yo yene nohaya ningi owala shoka ya hala. Aakongi yamwe yuuyelele oya ti nokuli kutya aagundjuka yonena oyi ihole unene sha pitilila. Omizalo dhawo nosho wo okupopya kwawo ohaku ulike kutya inaya simaneka aantu, unene tuu aakuluntu.

4 Ombepo ya tya ngeyi oyi li apehe. Nomolwaashono aagundjuka aatilikalunga ya mona kutya ohashi pula omuntu a ninge oonkambadhala dha mana mo, opo a yande ombepo ndjika, ye a vulike kuJehova. Pethimbo lyaayapostoli, Paulus okwa lombwelele ooitaali ooyakwawo ya yande “ombepo ndjoka tayi pangele ngashingeyi aantu mboka ihaa vulika kuKalunga.” (Lesha Aaefeso 2:1-3.) Aagundjuka mboka haya kambadhala okuyanda ombepo ndjika nohaya longo pamwe naamwayina ya hangana, oye shi okupandulwa. Shoka otashi tsu kumwe noohapu dhaPaulus ndhoka tadhi ti kutya “tse atuhe iilyo yolutu lwaKristus.” (Ef. 4:25) Osha simanenena nokuli okukala twa hangana nena, unene tuu sho tu uka pehulilo lyuuyuni mbuka. Natu ka taleni kiiholelwa yimwe ya za mOmbiimbeli yi tu kwathele tu mone kutya omolwashike sha simana tu kale muukumwe nenge twa hangana.

OYA LI YA HANGANA

5, 6. Otatu ilongo shike koshiholelwa shaLot naanegumbo lye?

5 Monale, Jehova okwa li a gamene oshigwana she uuna sha li tashi kwathelathana muudhigu sha hangana. Aapiya yaKalunga atuheni nena, kutya nduno tse aagundjuka nenge aakuluntu, otatu vulu okwiilonga sha kiiholelwa mbika ya za mOmbiimbeli. Oshiholelwa shimwe oshaLot.

6 Lot naanegumbo lye oya li monkugo yi na onkambe, oshoka oshilando shaSodom moka haya zi, osha li tashi ka hanagulwa po. Aayengeli yaKalunga oya lombwele Lot a matukile koondundu, ya ti: “Fadhukii po, mu ka hupithe oomwenyo dheni.” (Gen. 19:12-22) Lot noyanakadhona yaali oya vulika e taya zi mo moshilando. Shinikitha oluhodhi, aapambele yalwe yaLot inaya vulika. Sho Lot a lombwele iitenya ye mbyoka ya li yi na okuhokana oyanakadhona, oya dhiladhila kutya omusamane “ota ningi omashendjo.” Okwaapulakena kwawo, okwa pula oomwenyo dhawo. (Gen. 19:14) OLot owala noyanakadhona yaali ya hupu, oshoka oya vulika noya li ya hangana.

7. Jehova okwa kwathelele ngiini Aaisraeli mboka ya li ya hangana sho taya zi muEgipiti?

7 Natu taleni ishewe koshiholelwa oshikwawo. Aaisraeli sho ya tembudhwa mo muEgipiti, inaya za mo ye li muungundu, okangundu kehe taki iyendele. Naasho Moses a “yeluthile okwooko kwe kefuta,” Jehova e ta topola efuta, Moses haye awike e li taaguluka, ye ine li taaguluka owala nAaisraeli yontumba. Pehala lyaashono, ontanda ayihe yAaisraeli oya taaguluka, na Jehova okwe ya gamene. (Eks. 14:21, 22, 29, 30) Nonando mokati kAaisraeli omwa li mu na “aantu yalwe aayeni” mboka ya zi muEgipiti pamwe nayo, ayehe oya li ya hangana. (Eks. 12:38) Ngele ando opwa li aagundjuka yamwe ya hala okuya nondjila yawo yene ndjoka taya dhiladhila kutya oyo ombwanawa, ando inashi ya endela nawa. Ngele ando opwa li omuntu a yile nondjila ye mwene, ando ina gamenwa kuJehova. —  1 Kor. 10:1.

8. Pethimbo lyaJehosafat, oshigwana shaKalunga osha li shu ulike ngiini kutya osha hangana?

8 Pethimbo lyomukwaniilwa Jehosafat, oshigwana shaKalunga osha li sha taalelwa ‘ketangakwiita enene.’ (2 Ondjal. 20:1, 2) Mbela oshigwana shaKalunga osha li shi inekela musho shene, opo shi kondjithe omutondi nguka? Aawe, oshi inekele muJehova e tashi pula ewiliko kuye. (Lesha 2 Ondjalulo 20:3, 4.) Shika Aaisraeli oye shi ningi ya hangana, pehala lyomuntu kehe ti ikongele ekwatho kuye mwene. Ombiimbeli otayi ti: “Aajuda ayehe, aalumentu naakiintu yawo noyana, oya li ya thikama potempeli.” (2 Ondjal. 20:13) Oshigwana  ashihe, okuza kokanona sigo okomukuluntu, osha li shi inekele Jehova nokuvulika komalombwelo ngoka sha pewa. Molwaashoka osha li sha hangana, Jehova okwe shi gamene kaatondi yasho. (2 Ondjal. 20:20-27) Shika oshiholelwa oshiwanawa shankene oshigwana shaKalunga shi na okutaalela omashongo sha hangana.

9. Eihumbato niikala yAakriste yopetameko otayi tu longo shike kombinga yuukumwe?

9 Aakriste yopetameko oya li haya longele Kalunga ya hangana noye na ombili. Pashiholelwa, konima sho Aajuda oyendji nayalwe yomiigwana ya ningi Aakriste, oya “kala taa longwa kaayapostoli e taa topola shoka ye shi na naayapostoli noya lile pamwe e taa galikana Kalunga pamwe.” (Iil. 2:42) Uukumwe mbuka owa li wu iwetikile unene tuu pethimbo lyomatidhagano. Pethimbo ndika opo unene ya li ya pumbwathana. (Iil. 4:23, 24) Uuna tatu hepekwa, natse otwa pumbwa okukala twa hangana notatu ambidhidhathana.

NATU KALENI TWA HANGANA, SHO ESIKU LYAJEHOVA TALI HEDHA POPEPI

10. Opethimbo lini tatu ka kala twa pumbwa okukala twa hangana?

10 Ngashingeyi otwa tegelela ethimbo ewinayi nedhigu inaali monika nando onale mondjokonona yaantu. Omuhunganeki Joel ota ti esiku ndyoka “esiku eluudhe noli na oonzigi.” (Joel 2:1, 2; Sef. 1:14) Pethimbo mpoka oshigwana shaKalunga osha pumbwa okukala sha hangana shi vulithe nale. Jesus okwa tile: “Okehe tuu oshilongo tashi itsile ondumbo, otashi yonuka po.” —  Mat. 12:25.

11. Aapiya yaKalunga otaya vulu okwiilonga shike mEpisalomi 122:3, 4 kombinga yuukumwe? (Tala kethano lyopetameko.)

11 Pethimbo lyuudhigu uunene mboka twa tegelela, otu na okukala twa hangana shili. Otatu vulu okwiilonga oshindji kombinga yankene omagumbo muJerusalem ga li ga tungwa. Omagumbo ngaka oga li ga tungwa ge lyaathane popepi, naashika oshi inyengitha omupisalomi a nyole kutya Jerusalem “oshilando sha tungwa sha kolelela [“sha kwatekelwa kumwe,” OB-1954].” Momukalo nguka aakalimo oya li taya vulu okukwathelathana nokugamenathana. Omagumbo otashi vulika ga li wo taga dhimbulukitha omupisalomi uukumwe wopambepo woshigwana shaIsraeli, sho “omazimo ngaka gOmuwa” ga li haga gongala ga longele Kalunga. (Lesha Episalomi 122:3, 4.) Natse nena nosho wo momasiku omadhigudhigu ngoka ge li komeho, otwa pumbwa okukala ‘twa kwatelwa kumwe’ muukumwe.

12. Oshike tashi ke tu kwathela tu pite muudhigu mboka tawu ka adha oshigwana shaKalunga?

12 Omolwashike monakuyiwa tashi ka kala sha simana tu kale twa hangana? Hesekiel ontopolwa 38 otayi hunganeke kombinga ‘yaGog gwomevi lyaMagog’ sho ta ka ponokela oshigwana shaKalunga. Pethimbo mpoka katu na okweetha nando osha shi tu topole. Otashi ka kala wo epuko enene, ngele otwa dhiladhila kutya uuyuni waSatana otawu ke tu gamena. Pehala lyaashoka, otu na okutula uukuni kumwe naamwatate. Ihe itashi ti kutya otatu ka hupa owala, molwaashoka tu li mongundu yooitaali. Otu na okukala twi inekela muJehova tse yene nokuvulika kuye. Opo nduno Jehova naJesus otaye ke tu pititha mo methimbo ndyoka edhigu noku tu fala muuyuni uupe. (Joel 2:32; Mat. 28:20) Ihe nando ongaaka, otwa pumbwa okukala twa hangana noshigwana shaKalunga. Mbela sho to dhiladhila Jehova ota ka hupitha ngaa mboka taya tokola okuya noondjila dhawo yene? —  Mika 2:12.

13. Aagundjuka otaya vulu okwiilonga shike miiholelwa mbyoka twa zi nokukundathana?

13 Aagundjuka, mbela omwa mona kutya omolwashike shi li pandunge okukala mwa hangana nooitaali ooyakweni? Yandeni iikala yokukala hamu endathana owala naamboka yepipi lyeni nenge iikala yokwiikalela. Masiku atuhe, kutya nduno aagundjuka nenge aakuluntu, otatu ka kala twa pumbwathana.  Eeno, ngashingeyi olyo ethimbo lyokulongela kumwe muukumwe, opo tu ka hupithwe monakuyiwa.

‘IILYO YOLUTU LUMWE’

14, 15. (a) Nena Jehova ota dheula aagundjuka naakuluntu nelalakano lyashike? (b) Jehova ohe tu pe omayele geni, opo e tu kwathele tu kale twa hangana?

14 Jehova ote tu kwathele tu mu ‘longele twa tegamathana.’ (Sef. 3:8, 9, OB-1954) Ote tu dheulile onakuyiwa, sho ta ka ‘hanganitha eshito alihe kumwe nomutse, Kristus.’ (Lesha Aaefeso 1:9, 10.) Eeno, Jehova okwa hala okuhanganitha iishitwa ayihe megulu nokombanda yevi megumbo lye, nota ka pondola oku shi ninga. Nane aagundjuka otamu vulu okukala megumbo lye sigo aluhe. Mbela owa hala okukala muukumwe nehangano lyaJehova?

15 Jehova ote tu longo nena okukala tu na uukumwe, opo tu vule oku ka kala tu na uukumwe nomuuyuni uupe. Ohe tu dhimbulukitha aluhe moohapu dhe tu kale hatu “silathana oshimpwiyu,” ‘tu na ohole yaamwayinathana,’ hatu ‘talalekathana’ nohatu ‘kwathathana.’ (1 Kor. 12:25; Rom. 12:10; 1 Tes. 4:18; 5:11) Molwaashoka Jehova oku shi kutya okwaagwanenena kwAakriste otaku vulu okuteya po uukumwe, ote tu ladhipike tu kale hatu ‘dhiminathana po oondjo.’ —  Ef. 4:32.

16, 17. (a) Elalakano limwe lyokugongala olyashike? (b) Aagundjuka otaya vulu okwiilonga shike kuJesus pethimbo a li omugundjuka?

16 Okugongala okwo oshinima shilwe shoka Jehova e tu pa oku tu kwathela tu kale twa hangana. Ohatu lesha olundji omayele ngoka taga adhika mAahebeli 10:24, 25, ngoka tage tu dhimbulukitha kutya ohatu gongala nelalakano ‘lyokusilathana oshimpwiyu, lyokukwathathana mokuholathana nomokulongelathana uuwanawa.’ Notatu ka pumbwa unene okugongala, opo tu “kumagidhathaneni, unene sho tu wete esiku lyOmuwa tali hedha popepi.”

17 Jesus okwa tulila po aagundjuka oshiholelwa oshiwanawa, molwaashoka okwa li e hole okugongala. Sho a li e na oomvula 12, okwa yile naakuluntu ye koshigongi oshinene shopambepo. Pethimbo lyoshigongi shoka, Jesus okwa kana po, ihe hamolwaashoka ando a yi naagundjuka ooyakwawo. Pehala lyaashono, he nayina oye mu adha ta kundathana naalongimpango potempeli. —  Luk. 2:45-47.

18. Ongiini okugalikana taku tu kwathele tu kale twa hangana?

18 Otatu vulu wo okukoleka uukumwe wetu,  ngele ohatu galikana Jehova a kwathele aamwameme moonkalo dhokondandalunde. Okugalikanena aamwameme ohaku tu dhimbulukitha kutya otu na ko nasha nayo. Osha simana tu kale tu hole aamwameme, oku ya tsa omukumo pokugongala noku ya kwatela mo momagalikano getu. Aagundjuka, mbela ohamu kambadhala ngaa oku shi ninga? Shika otashi ke mu kwathela mu pange uukuume wopothingo naamboka yomegongalo lyeni. Osha simana okukala twa hangana naamwatate, hanuuyuni waSatana, opo tu ka hupithwe sho ehulilo tali ke ya.   

Atuheni otatu vulu okugalikanena ooitaali ooyakwetu (Tala okatendo 18)

SHOKA TASHI HOLOLA KUTYA ‘TSE IILYO YOLUTU LUMWE’

19-21. (a) Ongiini hatu ulike kutya ‘tse iilyo yolutu lumwe’? Gandja iiholelwa. (b) Omukalo moka aamwatate haya kwathelathana uuna pwa holoka oshiponga ogwe ku longo shike?

19 Aapiya yaJehova oya tula nale miilonga oohapu ndhoka tadhi adhika mAaroma 12:5, ndhoka tadhi ti: ‘Tse iilyo yolutu lumwe.’ Shika ohashi imonikila uuna pwa holoka oshiponga. MuDesemba 2011 efundja enene ndyoka lye etithwa komvula yoshikungulu olya dhenge okantuntu kaMindanao moFilipine. Omagumbo ge vule 40 000, mwa kwatelwa nomagumbo gaamwatate, oga yelulwa po kefundja mongulohi yimwe ayike. Ihe oshitayimbelewa osha tseyitha kutya, “nomanga okomitiye yokugandja ekwatho inaayi tameka okukwathela, aamwameme yokiitopolwa yilwe oya li nale ya tameke okutuma iikwatha.”

20 Sha faathana, ooitaali oyendji oya li ya kanitha omaliko gawo, sho ekakamo lyevi enene ndyoka lye etitha otsunami lya dhenge uuzilo waJapani. Yamwe inaya thigwa nasha. Meme Yoshiko, ngoka egumbo lye lya faalelwa kotsunami, okwa li ha kala ookilometa 40 lwaampono okuza pOshinyanga shUukwaniilwa. Ota ti: “Otwa li twa kumwa noonkondo sho omutonatelishikandjo nomumwatate gulwe ye ya ye tu konge esiku lya landula. Otwa pewa wo oondjatha, oongaku, oondjato noonguwo dhokulala.” Oshilyo shokomitiye yokugandja ekwatho otashi ti: “Aamwatate ya za koombinga adhihe dhaJapani oya li taya longele kumwe, taya kambadhala okukwathelathana. Opwa li wo aamwatate ya za koAmerika ye ya okukwathela. Sho ya pulwa kutya omolwashike ye ende ondjila onde, oya yamukula ya ti: ‘Aamwatate moJapani oya pumbwa ekwatho, tse naamwatate moJapani yamwe.’” Mbela ku uvite uuntsa sho wu li mehangano moka mu na aantu mboka ye holathane shili? Dhiladhila owala kenyanyu ndyoka Jehova u uvite, sho twa hangana!

21 Ngele otwi ilongo okukala twa hangana naamwameme nena, otatu ka kala twi ilongekidha okukondjitha uupyakadhi monakuyiwa twa hangana. Nonando otwa ka kala twaa na ekwatathano nAakriste ooyakwetu yokomahala galwe muuyuni, otatu ka kala twa hangana naamboka yomoshitopolwa shetu. MeeFumiko ngoka a gumwa kepepo edhigudhigu ndyoka lya dhengele Japani, ota ti: “Ehulilo oli li popepi. Otu na okukala tatu kwathele ooitaali ooyakwetu, manga twa tegelela ethimbo ndyoka itaaku ka kala we iiponga yopaunshitwe.”

22. Okukala twa hangana ngashingeyi otaku ke tu kwathela ngiini monakuyiwa?

22 Mboka haya kambadhala okukala ya hangana ngashingeyi nooitaali ooyakwawo, kutya nduno aagundjuka nenge aakuluntu, otaya ilongekidhile oku ka hupithwa pehulilo lyuuyuni mbuka wa piyagana nowu na olutandu. Kalunga ota ka hupitha oshigwana she, ngaashi naanaa e shi ningile pomathimbo ngeyaka. (Jes. 52:9, 10) Ngele owa longo nuudhiginini wu kale wa hangana noshigwana shaKalunga, kala wu shi kutya oto ka hupithwa pamwe nasho. Moshitopolwa tashi landula, otatu ka kundathana kutya omolwashike sha simana tu kale twa pandula shoka tu na nale.