Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Novomba 2014

 IINIMA MBYOKA YA NINGWA MONDJOKONONA YOONZAPO DHAJEHOVA

Oshili yOmbiimbeli tayi thiki muJapani

Oshili yOmbiimbeli tayi thiki muJapani

Uufo wehiyo koshipopiwa owa li wa longithwa moTokio, nomoOsaka owa li wu umbilwa aantu koondhila ndhoka dha tuka kombanda yoshilando

OMUTONATELI omweendi gumwe moAmerika ngoka a valelwa moJapani, okwa li a shuna koJapani mo 6 Septemba 1926 a ka ninge omutumwa. Okwa adha a tegelelwa komuntu gumwe ngoka a li i inyolitha a kale ha tuminwa Oshungolangelo. Omuntu nguka okwa li ha konakona Ombiimbeli nongundu yaantu moKobe. Aakonakoni yOmbiimbeli oya ka ninga oshigongi shawo shotango moshilando moka mo 2 Januali 1927. Poshigongi opwa li aantu 36, nayahetatu oya ninginithwa. Olya li etameko ewanawa shili. Ihe mbela okangundu hoka oka li ngaa taka ka uvithila aantu ayehe omamiliyona 60 moJapani mboka ya hala okuuva oshili yOmbiimbeli?

MuMei 1927, Aakonakoni yOmbiimbeli oya ningi oshikonga shokuhiya aantu kiipopiwa yOmbiimbeli. Aamwatate oya tula omapulakata mooha dhoondjila nagalwe omanene moshilando ashihe e taya tumu uufo wehiyo 3 000 kaanenentu moOsaka ye ye koshipopiwa shotango moshilando shoka. Oya andjaganeke uufo wehiyo 150 000, noya tula etseyitho miifokundaneki moOsaka nokuutekete womashina gokolutenda 400 000. Mesiku lyoshipopiwa, oondhila mbali odha tuka kombanda yoshilando, e tadhi umbile aantu uufo wehiyo 100 000. Aantu 2 300 oye ya koshinyanga hashi ithanwa Osaka Asahi, ya pulakene koshipopiwa shi na oshipalanyolo “Uukwaniilwa waKalunga owu li popepi.” Omanga aantu 1 000 ya shunithwa ko, oshoka kamwa li mu na ehala. Konima yoshipopiwa aantu ye vulithe 600 oya kala po, taya pula omapulo. Muule woomwedhi dha ka landula ko, iipopiwa yopaMbiimbeli oya kala tayi gandjwa moshilando Kyoto nomiilando yilwe muuninginino waJapani.

MuKotoba 1927, Aakonakoni yOmbiimbeli oya longekidha opo iipopiwa yi ka gandjwe moTokio. Oshikando shika aanenentu oya hiywa natango, ngaashi omuprima, iilyo yomutumba gopashigwana, aasita yoongeleki nondjayi dhiita. Opwa ningwa omapulakata, omatseyitho miifokundaneki, nuufo wehiyo 710 000 owa longekidhwa. Piipopiwa itatu mbyoka ya gandjwa moshilandopangelo shika shaJapani, opwa li aantu 4 800.

AAKOKOLINDJILA AALAADHI

Omumwatate Katsuo nomukadhi Hagino Miura

Aakokolindjila oya li ya dhana onkandangala onene mokutaandelitha etumwalaka lyUukwaniilwa momagumbo. Omumwameme Matsue Ishii, gumwe gwomaakokolindjila yotango moJapani, pamwe nomulume Jizo, oyu uvitha okuza koshilando Sapporo shi li kuumbangalantuelela waJapani e taya yi kuSendai, kuTokio, kuYokohama, kuNagoya, kuOsaka, kuKyoto, kuOkayama nokuTokushima. Okonyala ya mane ko oshilongo ashihe. Omumwameme Ishii pamwe naSakiko Tanaka, omumwameme omukokele, oya zala nawa e taya yi ya ka talele po aanenentu mepangelo. Omunambelewa gumwe gwomuyo okwa pula a pewe omambo The Harp of God nosho wo Deliverance 300 ga ka tulwe moongulumambo moondholongo.

 Katsuo nomukadhi Hagino Miura oye ya nziya moshili konima sho ya pewa omambo komumwameme Ishii. Oya ninginithwa mo 1931 e taya ningi aakokolindjila. Omumwatate Haruichi nomukadhi Tane Yamada nosho wo aakwanezimo yawo oyendji oye ya moshili komeho yomumvo 1930. Haruichi naTane oya ningi aakokolindjila. Okamwanakadhona kawo, Yukiko, oka ka longa koBetel yaTokio.

OMATEMBA OMANENE NUUTEMBA UUSHONA

Etemba enene olya li hali gwana aakokolindjila yahamano

Pethimbo ndiyaka, oohauto odha li dhi na ondilo, dho noondjila kadha li oombwaanawa. Omumwatate Kazumi Minoura naakokolindjila yalwe aagundjuka oya li haya longitha omatemba. Oye ga luku Jehu, omukwaniilwa gwaIsraeli, ngoka a li ha hingi etemba. (2 Aak. 10:15, 16) Omatemba gatatu omanene oga li ge na uunene woometa 2.2, omutamo gwometa 1.9 nuule wokuya pombanda wometa 1.9. Mulimwe omwa li hamu gwana aakokolindjila yahamano. Opwa li wo pu na uutemba uushona wu li 11 hawu hilwa noombasikela. Muutemba mboka ohamu gwana aantu yaali. Owa pangelwa kaamwatate yokoshitayimbelewa shaJapani. Omumwatate Kiichi Iwasaki ngoka a li a kwathele moku wu pangela ota ti: “Okatemba kehe oka li ke na otenda nopatilii yokutemitha omalamba.” Aakokolindjila oya li taya taandelitha oshili muJapani alihe, taya undula notaya nana omatemba moondundu nomomasilu okuza ngaa koshilando Hokkaido, kuumbangalantuelela woshilongo, sigo okoKyushu muumbugantu waJapani.

Okatemba okashona oka li haka gwana aakokolindjila yaali

Omumwatate omukokolindjila Ikumatsu Ota, okwa ti: “Uuna twa thiki mondoolopa yontumba, otwa li hatu thikameke etemba lyetu pomulonga nenge melundu. Otwa li hatu talele po tango aanenentu, ngaashi omuleli gwoshilando, nokuza mpoka ohatu ka gandja iileshomwa momagumbo. Shampa twa mana ko ondoolopa ayihe, tse otatu yi kondoolopa ya landula ko.”

Sho Aakonakoni yOmbiimbeli ye li 36 ya ningile oshigongi shawo shotango moKobe, ndyoka olya li “ehumokomeho eshona lyowala.” (Sak. 4:10) Ihe mo 1932, konima owala yoomvula ntano, moJapani omwa li mu na aakokolindjila naauvithi 103 mboka ya gandjele omambo ge vule 14 000. Kunena miilando iinene yaJapani iilonga oyu unganekwa nawa notayi longwa konyala kaauvithi 220 000. —  Okuza moJapani.

Omathano ga thanekwa komumwatate Kiichi Iwasaki, ngoka a pangelele omatemba koBetel yaJapani