Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Novomba 2014

Natu kaleni aayapuki mwaayihe mbyoka tatu ningi

Natu kaleni aayapuki mwaayihe mbyoka tatu ningi

“Kaleni aayapuki mwaayihe mbyoka tamu yi ningi.” —  1 PET. 1:15.

1, 2. (a) Oshigwana shaKalunga osha tegelelwa shi ihumbate ngiini mwaayihe mbyoka tashi ningi? (b) Omapulo geni tatu ka kundathana moshitopolwa shika?

JEHOVA okwa li a wilike omuyapostoli Petrus a tse omuthindo uuyapuki mboka wa tumbulwa membo lyaLevitikus. Petrus okwa lombwelwa a nyolele Aakriste ya kale aayapuki mwaayihe mbyoka taya ningi. (Lesha 1 Petrus 1:14-16.) Jehova Kalunga ngoka e li ‘Omuyapuki,’ okwa hala aapiya ye ayehe, aagwayekwa nosho wo ‘oonzi dhilwe’ ya ninge ngaashi taya vulu ya kale aayapuki mwaayihe. Kaye na owala okukala aayapuki miinima yimwepo. —  Joh. 10:16.

2 Ngele ohatu konakona omaliko gopambepo ngoka ge li membo lyaLevitikus otatu ka mona uuwanawa owundji. Uuna tatu tula miilonga shoka tatu ilongo otashi ke tu kwathela tu kale aayapuki miinima ayihe. Moshitopolwa shika otatu ka kundathana omapulo taga landula. Omolwashike kaatu na okwiigandja tu yone oompango nosho wo omakotampango gOmbiimbeli? Oshike tatu ilongo membo lyaLevitikus shi na ko nasha nokwaambidhidha uunamapangelo waJehova? Oshike tatu ilongo komayambo ngoka Aaisraeli ya li haya gandja nale?

INO IGANDJA WU YONE OOMPANGO NOSHO WO OMAKOTAMPANGO GOMBIIMBELI

3, 4. (a) Omolwashike Aakriste kaaye na okwiigandja ya yone oompango nosho wo omakotampango gOmbiimbeli? (b) Omolwashike kaatu na okukala nondjahi nenge tu kwatele yamwe onkone?

3 Ngele otwa hala tu kale twa hokiwa kuJehova, otu na okuvulika  koompango dhe nokomakotampango gOmbiimbeli. Otu na okuyanda thiluthilu onyata kehe nokwiigandja tu yone. Aakriste kunena katu li kohi yOmpango yaMoses. Ihe nonando ongawo, iitegelelwa yayo otayi tu pe uunongo tu tseye shoka Kalunga a hokwa naashoka inaa hokwa. Pashiholelwa, Aaisraeli oya li ya lombwelwa taku ti: “Mukweni inamu kala mu mu nine iikonene noku mu tonda, ihe holeni mukweni, ngaashi mu ihole ne yene. Ongame Omuwa.” —  Lev. 19:18.

4 Jehova ina hala tu kale tu na ondjahi nokukwatela yamwe onkone. (Rom. 12:19) Ngele otwi ipwililikile oompango nomithikampango dhopakalunga, Ondiyapoli otayi ka kala ya nyanyukwa noonkondo. Otatu ka shekitha wo edhina lyaJehova. Nonando omuntu ngoka e tu ningila uuwinayi okwa ninga oshinima e shi shoka ta ningi, inatu pitika tu kale iiyuma yokupungula ondjahi. Kalunga okwe tu pa uuthembahenda wokukala “iiyuma yeloya” yokuhumbata eliko lya simana. Eliko ndyoka olyo uukalele wetu. (2 Kor. 4:1, 7) Ondjahi oyi li uuzigo mboka tawu vulu oku tu yona po. Inatu hala okukala twe yi humbata mutse.

5. Oshike tatu ilongo kuAaron nokeso lyoyana? (Tala kethano lyopetameko.)

5 MuLevitikus 10:1-10 omu na ehokololo linikitha oluhodhi tali popi shoka sha li sha ningilwa oyana yaAaron. Aanegumbo ye ayehe oya li ya nika oluhodhi sho omulilo gwa zi megulu e tagu lungunitha po oyanamati yaAaron, Nadab naAbihu, manga taya ningi omafikiloyambo metsalihangano. Ihe Jehova okwa li a lombwele aanegumbo ayehe kaaya lile. Mbela osha li ngaa oshipu kuyo? Mbela oho endathana nomunegumbo nenge nayalwe mboka ya kondwa? Ngele oho shi ningi, otashi ulike ngaa kutya ngoye omuyapuki? —  Lesha 1 Aakorinto 5:11.

6, 7. (a) Uuna twa hiywa tu ye kohango kongeleka, iinima yini tu na okukaleka momadhiladhilo? (Tala enyolo lyopevi.) (b) Ongiini tatu vulu okutompathana nomukwanezimo ngoka kee li moshili e na ohango, uuna te tu pula tu ye naye kongeleka?

6 Otashi vulika kaatu na siku tu iyadhe muudhigu wa fa mboka mwa li Aaron naanegumbo lye. Ihe ongiini ngele omukwanezimo ngoka kee shi Onzapo yaJehova oku na ohango note tu pula tu ye naye kongeleka? Odhoshili kutya kapu na enyolo lyokondandalunde ndyoka tali shi indike. Ihe opu na omakotampango gOmbiimbeli ngoka tage tu kwathele tu kale aayapuki, notu ninge etokolo ndyoka Jehova a hokwa. *

7 Aakwanezimo mboka kaaye li moshili otashi vulika ya kale ya kuminwa etokolo lyetu ndyoka twa ninga, opo tu kale aayapuki kuJehova. (1 Pet. 4:3, 4) Osha yela kutya ihatu kala twa hala oku yu uvitha nayi. Ihe oshi li nawa tu popye nayo nolukeno, nopwaahe na oku ya lila okathima koluko. Onawa tu shi ninge komeho yethimbo, omanga esiku lyohango inaali thika. Otatu vulu oku ya pandula tango sho ye tu hiya kohango yawo. Opo ihe tatu ya lombwele kutya otu uvite uuntsa nuunambano sho ye tu pula tu ka kale po. Opo nduno tatu ya tseyithile kutya ihatu kutha ombinga miinima mbyoka hayi ningwa mongeleka yawo. Onkee ano, itatu ka vula okuya pamwe nayo kongeleka. Uuna tatu shi ningi komeho yethimbo, nena itatu ki igandja tu yone po eitaalo lyetu.

NATU AMBIDHIDHE UUNAMAPANGELO WAJEHOVA

8. Embo lyaLevitikus otali popi uunamapangelo waJehova momukalo guni?

8 Embo lyaLevitikus otali tsu omuthindo uunamapangelo waJehova. Membo moka omwa popiwa lwiikando 30 kutya oompango ndhoka dhi li mo odha za kuJehova. Moses okwa li e shi shi, nokwa ningi ngaashi Jehova e mu lombwele. (Lev. 8:4, 5) Sha faathana, natse otu na aluhe okuninga shoka Jehova, Omupangeli gwetu a hala tu ninge. Ehangano lye otali ke tu kwathela moshinima shika. Ihe eitaalo lyetu otashi vulika li makelwe uuna tu li otse atuke, ngaashi sha ningililwe Jesus mombuga. (Luk. 4:1-13) Ngele otwi inekela muKalunga notatu ambidhidha uunamapangelo we, kapu na ngoka te ke tu ningitha tu igandje nosho wo tu yulwe komwigo gwaSatana ngoka gu li uumbanda wokutila aantu. —  Omayel. 29:25.

9. Omolwashike aapiya yaKalunga ye tondike miilongo yimwe?

 9 Miilongo yimwe muuyuni ohatu hepekwa. Omolwashike mbela? Ohashi ningwa, molwaashoka otu li Oonzapo dhaJehova naalanduli yaKristus. Jesus okwa lombwele aalongwa ye yi ilongekidhile omahepeko ngoka tage ke ya adha. Okwa ti: “Aantu otaye ke mu kwata notaye ke mu gandja, mu hepekwe, e taye mu dhipaga. One tamu ka tondwa kaantu ayehe omolwandje.” (Mat. 24:9) Nonando aantu oye tu tonde, otatu pula komeho niilonga yetu yokuuvitha Uukwaniilwa. Ohatu ihumbata wo momukalo ngoka tagu ulike kutya tse aayapuki momeho gaJehova. Otu li aanashili, twa yogoka palutu nopamikalo nohatu vulika wo komapangelo. Mbela omolwashike tu tondike? (Rom. 13:1-7) Omolwaashoka tse ohatu vulika kuunamapangelo waJehova. “Oye awike” hatu longele iilonga iiyapuki. Onkee ano, itatu ki igandja nando tu yone oompango dhe dhuuyuuki nosho wo omakotampango ge gOmbiimbeli. —  Mat. 4:10.

10. Oshike sha li sha ningwa po sho omumwatate gumwe i igandja a ninge omukwiita?

10 Ihatu kutha ombinga miita nosho wo mopolotika, molwaashoka tse ‘katu shi yomuuyuni.’ (Lesha Johannes 15:18-21; Jesaja 2:4.) Yamwe mboka yi iyapulila Kalunga oya li yi igandja e taya kutha ombinga miita nomiinima yopapolitika. Oyendji yomuyo oyi iyele ombedhi e taya tungulula ekwatathano lyawo naTate yetu gwomegulu ndyoka ya li ya teya po. (Eps. 51:17) Ihe aashona yomuyo inayi iyela ombedhi. Pethimbo lyIita Iitiyali yUuyuni, mboka ye na oonkondopangelo oya li ya gongele aamwatate 160 mboka ye na oomvula 45 okuuka pevi. Oya li ya tulwa mondholongo kaashi li pauyuuki. Oya gongelwa okuza moondholongo adhihe muHungary e taye etwa mondoolopa. Oya li ya lombwelwa ya ye metanga lyegameno. Aamwatate mboka aadhiginini oya nukile pomutenya. Ihe omugoyi yomuyo oya zimine ya ye metanga lyegameno e taya pewa oonguwo dhuukwiita. Konima owala yomimvo mbali, gumwe gwomwaamboka yi igandja okwa li mongundu yaakwiita mboka ya komandwa ya ka dhipage Oonzapo dhaJehova ndhoka dha kakatela kuJehova nuudhiginini. Omumwatate gumwe gwomwaamboka ye na okudhipagwa, ye nomulumentu ngoka i igandja a ninge omukwiita aantu naamwayina. Lagwenene, edhipago ndyoka inali ka ningwa we.

PA JEHOVA SHOKA OSHIWANAWELELA

11, 12. Aakriste kunena otayi ilongo shike komayambo ngoka Jehova a li a lombwele oshigwana shaIsraeli shonale shi gandje?

11 Pethimbo lyOmpango yaMoses, Aaisraeli oya li ya pulwa ya gandje omayambo ngoka ga popiwa kondandalunde. (Lev. 9:1-4, 15-21) Omayambo ngoka oga li ge na okukala kaage na oshipo, molwaashoka otaga thaneke eyambo lyaJesus lya gwanenena. Kehe oludhi lweyambo ndyoka li na okugandjwa, opwa li iinima yokondandalunde mbyoka yi na okulandulwa. Pashiholelwa, tala kwaashoka omukulukadhi ngoka opo a pulumutha a li a tegelelwa a gandje. Levitikus 12:6 ota ti: “Uuna ethimbo lyeiyopaleko lye tali pu, nongele omolwomumati nenge omukadhona, na fale komuyambi posheelo shetsalihangano onzigona yomumvo gumwe yi ninge efikilondjambo nokangutyona nenge onguti yeyonondjambo.” Iitegelelwa yaKalunga oya li tayi dhengele, ihe ompango otayi ulike kutya oyi li pandjele nosho wo pahole. Omukulukadhi ngele ita vulu okuyamba onzigona, okwa pitikwa e ete uungutyona uyali nenge oonguti mbali. (Lev. 12:8) Shika osha li euliko kutya nonando omulongelikalunga okwa hepa, oku holike, nokashona hoka a gandja oka pandulwa lela. Shika osha faathana wo naamboka ya li ye na oshindji shoka taya vulu okugandja shi li eyambo. Oshike tatu ilongo moshinima shika?

12 Omuyapostoli Paulus okwa li a ladhipike ooitaali ooyakwawo ya gandje ‘eyambo lyehambelelo kuKalunga.’ (Heb. 13:15) Otu na okulongitha omilungu dhetu tu hempulule montaneho edhina lyaJehova eyapuki. Aamwatate naamwameme oombolo ohaya longitha elaka lyokuudhika, opo ye mu hambelele. Aakriste mboka ihaaya vulu okwiinyenga ohaye mu hambelele mokunyolela  aantu oombapila, mokuuvitha okupitila mongodhi, mokuuvithila mboka taye ya tonatele nosho wo mboka taye ya talele po. Omayambo ngoka tatu vulu okugandja tu hambelele Jehova ogi ikolelela kokuvula kwetu nosho wo kuukolele wetu. Ihe nonando ongawo, omayambo getu oge na okukala omawanawelela. —  Rom. 12:1; 2 Tim. 2:15.

13. Omolwashike tu na okulopota ethimbo ndyoka twa longa miilonga yokuuvitha?

13 Otu hole Kalunga shili. Omayambo gehambelelo ngoka hatu mu pe oge na okukala taga zi komutima. (Mat. 22:37, 38) Omayambo ngoka hatu gandja, ogo olopota yiilonga yetu yuukalele. Mbela otu na okukala tu uvite ngiini ngele twa pulwa tu yi gandje? Otu na oku yi gandja nehalo ewanawa, molwaashoka iilonga mbyoka ohayi simanekitha Kalunga. (2 Pet. 1:7) Ihe katu na okukala tu uvite kutya otatu thiminikwa tu longe ethimbo ele muukalele, opo tu vule okulopota oowili odhindji. Omolwashike tatu tile ngawo? Omuuvithi gwUukwaniilwa ngoka a kulupa nenge a lemana ota vulu owala okulopota ominute 15, pehala lyokulopota owili yimwe. Jehova oha pandula iilonga iiwanawa yuudhiginini mbyoka ya longwa komuuvithi ngoka. Oyi li euliko kutya oku mu hole nonokutya okwa lenga uuthembahenda mboka e na wokuuvitha. Opwa li Aaisraeli yamwe mboka ya hepa nokaya li taya vulu okugandja omayambo gondilo. Ihe shoka inashi ya imba ya gandje omayambo. Kunena, aapiya yaJehova mboka ye na omangambeko ngele tashi ya pokuuvitha, nayo ohaya vulu okugandja olopota yawo. Olopota yetu ohayi tulwa mumwe noonkwawo ndhoka hadhi gandjwa kaantu ayehe muuyuni e tapu kala owala omwaalu gumwe. Shika ohashi kwathele ehangano li unganeke komeho yethimbo nkene iilonga yokuuvitha Uukwaniilwa tayi ka longwa monakuyiwa. Mbela ohatu pulwa tu ninge oshinima oshidhigu ngele tatu pulwa tu gandje olopota yetu?

OMUKALO GWETU GWOKUKONAKONA NOSHO WO OMAYAMBO GETU

14. Omolwashike tu na okutalulula omukalo gwetu gwokukonakona iinima yopambepo?

14 Membo lyaLevitikus otwa mona mo omaliko gopambepo gontumba. Otashi vulika wu uvite ko ‘nawa kutya omolwashike embo ndika lya kwatelwa mOohapu dhaKalunga dha nwethwa mo.’ (2 Tim. 3:16) Mbela owa tokola toko ngaa wu kale omuyapuki? Ino shi ninga owala, molwaashoka Jehova osho a hala wu ninge. Ihe shi ninga, molwaashoka wa hala okulonga shoka tashi nyanyudha omutima gwe. Iitopolwa mbika iyali tayi kundathana embo lyaLevitikus nayi kokeke ehalo lyoye wu kale ho konakona Omanyolo muule shi vulithe nale. (Lesha Omayeletumbulo 2:1-5.) Onkee ano, talulula omukalo gwoye gwokukonakona iinima yopambepo to shi ningi pamwe negalikano. Osha yela kutya owa hala Jehova a taambe ko omayambo ngoka to mu pe. Mbela oho etha o-TV, uudhano wuuvidio nosho wo omaudhano galwe, nenge omainyanyudho ga ye moshipala okuhuma kwoye komeho pambepo? Ngele osho, otashi ke ku etela uuwanawa owundji ngele owa tedhatedha kwaashoka omuyapostoli Paulus a nyola mAahebeli.

Mbela owa lenga ngaa ekonakonombiimbeli nosho wo Elongelokalunga lyUukwanegumbo monkalamwenyo yoye? (Tala okatendo 14)

15, 16. Omolwashike Paulus inaa popya iinima ya futama sho a nyolele Aakriste Aahebeli?

15 Paulus ka li a popi iinima ya futama sho a nyolele Aakriste Aahebeli. (Lesha Aahebeli 5:7, 11-14.) Pehala lyaashono, okwa li a popi iinima ya yela noya fatuka. Okwe ya lombwele a ti kutya ne  ihamu “uvu ko nuupu.” Oshike sha ningitha Paulus e ya lombwele shu ukilila? Okwe shi ningi, molwaashoka oku ya hole ngaashi Jehova e ya hole. Okwa li ti ipula unene nAakriste mboka ya li hayi ipalutha owala nomahini gopambepo. Okwa li e shi kutya osha simanenena ya tseye oshili yomuule. Opo eitaalo lyOmukriste li koke, okwa pumbwa okukala ha li “iikulya ya kola” yopambepo.

16 Aakriste Aahebeli oya li ya pumbwa okulongwa natango, pehala lyokukala oyo taya longo yalwe. Omolwashike mbela? Kaya li haya li “iikulya ya kola” yopambepo. Ipula to ti: ‘Mbela ohandi inyenge ngiini ngele nda mono iikulya ya kola yopambepo? Mbela ohandi yi li ngaa? Ohandi galikana ngaa nohandi konakona tuu Ombiimbeli muule? Ngele ihandi shi ningi, mbela oshe etithwa komukalo moka handi konakona?’ Tse ihatu uvithile owala aantu, ihe ohatu ya longo noku ya ninga aalongwa yaJesus. —  Mat. 28:19, 20.

17, 18. (a) Omolwashike tu na okukala hatu ipalutha niikulya ya kola yopambepo pandjigilile? (b) Otu na okukala twa tala ko ngiini okulongitha omalovu omanga inaatu ya kokugongala kwopaKriste?

17 Otashi vulika shi kale oshidhigu koyendji yomutse okukonakona Ombiimbeli. Jehova iha thiminike aapiya ye ya konakone moku ya ningitha ya kale yu uvite ye na ondjo ngele itaye shi ningi. Otu na okutsikila okukala hatu ipalutha niikulya ya kola yopambepo, kutya nduno otwi iyapulila Kalunga ethimbo ele, nenge opo twe mu iyapulile. Osha simanenena tu shi ninge ngele otwa hala okutsikila okukala aayapuki.

18 Opo tu kale aayapuki otu na okukonakona nawa Omanyolo, nokuninga shoka Kalunga te tu pula tu ninge. Ombiimbeli otayi tu lombwele ehokololo lyoyanamati yaAaron, Nadab naAbihu. Oya li ya dhipagwa sho ya yamba omulilo ngoka ‘kaagwa li omuyapuki,’ tashi vulika ye shi ningi nokuli ya nwa mo. (Lev. 10:1, 2) Kalunga okwa li a lombwele Aaron oshinima shontumba konima sho oyana ya dhipagwa. (Lesha Levitikus 10:8-11.) Mbela shino osha hala okutya, katu na okunwa omalovu gasha uuna tatu yi kokugongala kwopaKriste? Otu na okudhimbulukwa kutya tse katu li we kohi yOmpango yaMoses. (Rom. 10:4) Miilongo yimwe, aantu mboka ye li moshili ohaya longitha omalovu osheeleke uuna taya li manga inaaya ya kokugongala. Shimwe ishewe, pOpaasa opwa li hapu longithwa iitenga ine yomaviinu. Sho Jesus a toto po Edhimbuluko lyeso lye, okwa li a pe aalongwa ye ya nwe omaviinu ngoka taga thaneke ombinzi ye. (Mat. 26:27) Ihe Ombiimbeli itayi popile okufinyuna nosho wo uunkolwe. (1 Kor. 6:10; 1 Tim. 3:8) Aakriste oyendji ihaya nu omalovu uuna taya longo oshilonga kehe oshiyapuki, molwaashoka eiyuvo lyawo itali ya pitike ye shi ninge. Ihe oonkalo odha yoolokathana shi ikolelela kiilongo niilongo. Shoka sha simana kAakriste osho “okuyoolola pokati kaambyoka iiyapuki naambyoka inaayi yapuka.” Shika otashi ti kutya oye na okukala aayapuki mwaayihe mbyoka taya ningi, opo ya nyanyudhe Kalunga.

19. (a) Oshike tu na okukaleka momadhiladhilo ngele tashi ya pElongelokalunga lyUukwanegumbo nosho wo pekonakono lyopaumwene? (b) Oshike wa tokola okuninga ngele tashi ya pokukala omuyapuki mwaayihe mbyoka tatu ningi?

19 Omaliko ogendji gopambepo otatu ke ga mona owala ngele tatu ga kongo mOohapu dhaKalunga. Longitha iilongitho mbyoka wu na wu konge uuyelele, opo Elongelokalunga lyUukwanegumbo weni nosho wo ekonakono lyoye lyopaumwene li kale tali ti sha. Kokeka ontseyo yoye yokutseya Jehova nosho wo omalalakano ge. Hedha popepi lela naye. (Jak. 4:8) Galikana kuKalunga ngaashi omupisalomi ngoka i imbi a ti: “Tonatitha omeho gandje, opo ndi vule okumona iikumitha yomompango yoye.” (Eps. 119:18) Ino igandja nando wu yone oompango dhOmbiimbeli nomakotampango gayo. Kala wu na ehalo lyokuvulika kompango ya dhenga mbanda ‘yOmuyapuki,’ Jehova. Kutha ombinga nuulaadhi miilonga ‘yokuuvitha elaka etoye lya za kuKalunga.’ (1 Pet. 1:15; Rom. 15:16) Kala omuyapuki mwaayihe mbyoka to ningi sho tu li muudhigu womasiku gahugunina. Atuheni natu kaleni aayapuki mwaayihe mbyoka tatu ningi. Onkee ano, natu kale aluhe hatu ambidhidha uunamapangelo waJehova, Kalunga ketu Omuyapuki.

^ okat. 6 Tala “Omapulo ga za kaaleshi” mOshungonangelo ye 1 Juni 2002.