Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Novomba 2014

Eyumuko lyaJesus otali ti shike kutse?

Eyumuko lyaJesus otali ti shike kutse?

“Okwa yumudhwa kuusi.” —  MAT. 28:6.

1, 2. (a) Aawiliki yamwe yelongelokalunga lyOshijuda oya li ya hala okutseya shike, na Petrus okwa li i inyenge ngiini? (Tala kethano lyopetameko.) (b) Oshike sha li sha kwathele Petrus a kale a nyatipala?

OMASIKU omashona konima yeso lyaJesus, omuyapostoli Petrus okwa li a taalelwa kongundu yaalumentu Aajuda ya geya noya lya moonyandi. Aalumentu mboka oya li aawiliki ya simana yelongelokalunga lyOshijuda. Oyo ngaa ya li yu unganeke edhipago lyaJesus. Petrus okwa li a aludha omulumentu gumwe ngoka a valwa oshilema. Ihe Aajuda oya li ya hala okuuva kutya okwe mu aludha koonkondo dhalye nokwe shi ningi medhina lyalye. Aajuda oya kala nokuthiminika Petrus e ya yelithile nkene e shi ningi. Okwe ya yamukula nuulaadhi nonomukumo a ti: “Okwa aludhwa koonkondo dhedhina lyaJesus Kristus Omunasareti. Jesus ngoka mwe mu alele [komuti gwomahepeko, NW] Kalunga okwe mu yumudha kuusi.” —  Iil. 4:5-10.

2 Sho Jesus e li pokudhipagwa, Petrus okwa li e mu idhimbike lwiikando itatu omolwuumbanda. (Mark. 14:66-72) Ihe oshike nduno sha li she mu nyatipaleke a vule okupopya komeho gaawiliki yelongelokalunga lyOshijuda? Ombepo ondjapuki oyo ya li ye mu kwathele unene. Kakele kaashono, Petrus okwa li wo e na uushili kutya Jesus okwa yumudhwa. Oshike sha li she mu tompo kutya Jesus oku na omwenyo? Omolwashike natse tu na okukala neitaalo kutya Jesus okwa yumudhwa?

3, 4. (a) Hokolola omayumuko ngoka ga li ga ningwa manga aayapostoli yaJesus inaaya valwa. (b) Tumbula aantu mboka ya li ya yumudhwa kuJesus.

 3 Okuza kuunona wawo, aayapostoli yaJesus oya li hayu uvu omahokololo gaantu mboka ya li ko nalenale ya yumudhwa. Oya li yu uva kutya Kalunga okwa li a pe omupolofeti Elia naElisa oonkondo dhokulonga iikumithalonga. (1 Aak. 17:17-24; 2 Aak. 4:32-37) Oya li yu uvu kombinga yomulumentu ngoka a yumudhwa, sho omudhimba gwe gwa gumu iipongo yaElisa. (2 Aak. 13:20, 21) Mbela Aakriste yonale oya li ngaa yi itaala momahokololo ngoka ge li mOmbiimbeli? Eeno, oya li ye gi itaala ngaashi owala natse kunena.

4 Oyendji yomutse ohatu kala twa kumwa noonkondo uuna tatu lesha omahokololo gaantu mboka ya li ya yumudhwa kuJesus. Oshikando shimwe Jesus okwa li a yumudha omwanamati gwomuselekadhi. Sho sha ningwa omuselekadhi ngoka okwa li a kumwa shili. (Luk. 7:11-15) Jesus okwa li wo a yumudha okakadhona koomvula 12. Aavali yako oya li ya gwililwa po koluhodhi, ihe olwa ka shituka enyanyu enene sho ka yumudhwa. (Luk. 8:49-56) Mboka ya li po sho Lasarus ta zi mombila, oya li ya kumwa unene sho a zi mo te ende noku li nawa. —  Joh. 11:38-44.

OMOLWASHIKE EYUMUKO LYAJESUS LYA LI LYI IKALEKELWA?

5. Eyumuko lyaJesus olya yooloka ko ngiini kugalwe ngoka ga ningwa metetekelo?

5 Aayapostoli oya li ye shi shi nawa kutya eyumuko lyaJesus olya yooloka ko thiluthilu komayumuko galwe ngoka ga ningwa metetekelo. Aantu mboka ya yumudhwa nalenale, oya yumudhilwe nomalutu gopanyama. Ihe konima yethimbo, oya ka sa ngaa ishewe. Jesus okwa yumudhwa nolutu lwopambepo, olutu ndoka ihaalu yonuka. (Lesha Iilonga 13:34.) Petrus okwa nyola a ti kutya Jesus “okwa dhipagwa palutu nokwa tulwa omwenyo pambepo.” Okwa ti ishewe, oku “li kolulyo lwaKalunga ta pangele aayengeli, aapangeli yomegulu naanankondo.” (1 Pet. 3:18-22) Omayumuko ngoka ga ningwa manga aayapostoli inaaya valwa oga li ga ningwa pashikumithalonga noga li taga kumitha shili. Ihe kapu na nando olimwe lyomugo tali vulu okuyelekanithwa neyumuko lyaJesus.   

6. Eyumuko lyaJesus olya li lya gumu ngiini aalongwa ye?

6 Eyumuko lyaJesus olya li lya gumu unene aalongwa ye. Oya li ya nika oluhodhi noonkondo omolweso lye, ihe oya ka kala ishewe ya nyanyukwa sho a yumudhwa. Sho a yumuka e li oshishitwa shopambepo oshinankondo, kapwa li omuntu gwohoni ta vulu oku mu etela oshiponga. Ka li we a sa, ngaashi aatondi ye ya li yi itaala. Eyumuko lye olya li lye shi holola puuyelele kutya ye Omwana gwaKalunga. Aalongwa ye nayo kaya li we nokuli ya kwatwa kuumbanda washa. Eyumuko lyaJesus olya simanenena ngele tashi ya pokugwanithwa po kwelalakano lyaJehova nosho wo konkundana ombwanawa ndjoka aalongwa ya li ye na okuuvitha sigo okooha dhuuyuni.

7. Jesus ota ningi shike ngashingeyi, nomapulo geni tu na okwiipula?

7 Tu li aapiya yaJehova, otwa tseya nawa kutya Jesus ka li owala omuntu a simana. Oku na omwenyo ngashingeyi nota wilike iilonga mbyoka ya kwatela mo aantu ayehe kombanda yevi. Jesus Kristus oku li wo Omukwaniilwa gwUukwaniilwa waKalunga womegulu. Masiku ota ka opaleka ombanda yevi ndjika yu udha uukolokoshi, e te yi ningi oparadisa moka aantu taya ka kala sigo aluhe. (Luk. 23:43) Andola Jesus okwa li inaa yumuka shili, ando ina vula okuninga Omukwaniilwa gwUukwaniilwa waKalunga womegulu. Shimwe ishewe, ando ita vulu oku ka ninga evi alihe oparadisa. Omolwashike tu na okwiitaala kutya Jesus okwa yumuka? Eyumuko lye otali ti shike kutse?

JEHOVA OKU NA OONKONDO DHOKUPANGELA ESO

8, 9. (a) Omolwashike aawiliki yelongelokalunga lyOshijuda ya li ya tula po aalangeli pombila yaJesus? (b) Oshike sha ningwa po sho Maria Magdalena naMaria omukwawo ye ya kombila yaJesus?

8 Konima sho Jesus a dhipagwa, aayambi aakuluntu nAafarisayi oye ya kuPilatus e taya ti: “Tatekulu, otwa dhimbulukwa kutya omukotokeli  ngwiyaka manga a li e na omwenyo, okwa tile: ‘Ngele pwa piti omasiku gatatu, otandi ka yumuka.’ Lombwela ano aantu, ya langele nawa ombila sigo esiku etitatu, aalongwa ye opo kaaye mu yake mo; yo ya lombwele aantu kutya okwa yumudhwa kuusi. Nena epukitho [lyahugunina] otali ningi ewinayi noonkondo li vule lyotango.” Pilatus okwa ti kuyo: “Aalangeli oyo mbaka, indeni, mu ke yi langele nawa, ngaashi mu shi shi.” Shoka osho naanaa ya ningi. —  Mat. 27:62-66.

9 Olutu lwaJesus olwa li lwa tulwa mombila ya hokwa memanya, e tayi siikilwa nemanya lya hotelwa ko noshihotekitho. Aawiliki yelongelokalunga lyOshijuda oya li ya hala Jesus a kale mombila sigo aluhe. Ihe edhiladhilo lyaJehova olya li lya yooloka ko thiluthilu kulyawo. Sho Maria Magdalena naMaria omukwawo ye ya kombila yaJesus mesiku etitatu oya adha emanya lya kandulwa po. Opwa li wo omuyengeli a kuutumba kulyo. Omuyengeli ngoka okwa li a lombwele aakiintu mboka ya tale meni, opo ya mone kutya ke mo. Okwa ti kuyo: “Ke mo muka, okwa yumudhwa kuusi.” (Mat. 28:1-6) Onkee ano, Jesus ka li mombila, ihe okwa yumudhwa.

10. Paulus okwa li a nyola kombinga yiiningwanima yini, mbyoka tayi ulike sha yela kutya Jesus okwa yumuka?

10 Iiningwanima mbyoka ya ka ningwa omasiku 40 ga landula ko, oye shi holola puuyelele kutya Jesus okwa yumuka. Omuyapostoli Paulus okwa li a nyolele egongalo lyomuKorinto kombinga yiiningwanima mbyoka. Okwa ti: “Ngame onde mu tseyithile oshinima shi vule ayihe, ngaashi ngame nde shi pewa wo kutya Kristus okwa si omolwoondjo dhetu, ongaashi sha nyolwa mOmanyolo; Okwa fumvikwa e ta yumudhwa kuusi mesiku etitatu, ngaashi kwa nyolwa mOmanyolo; okwi ihololele Petrus, nokonima aayapostoli ayehe omulongo nayaali. Nena okwi ihololele ishewe aalanduli ye ye vule omathele gatano polumwe. Oyendji yomuyo oye na omwenyo natango, nonando yamwe oya sa. Nena okwi ihololele Jakob nokonima aayapostoli ayehe. Hugunina okwi ihololele ndje wo, nonando ngame onda fa omuntu ngoka a pononwa.” —  1 Kor. 15:3-8.

OTU SHI SHI NGIINI KUTYA JESUS OKWA YUMUDHWA?

11. Ongiini eyumuko lyaJesus lya li lya ningwa naanaa ‘ngaashi sha nyolwa mOmanyolo?’

11 Etompelo lyotango. Otu shi shi kutya Jesus okwa yumudhwa kuusi, molwaashoka eyumuko lye olya ningwa naanaa ‘ngaashi sha nyolwa mOmanyolo.’ Oohapu dhaKalunga odha kala dha hunganeka nale kombinga yeyumuko ndyoka. Pashiholelwa, David okwa nyola kutya Omunene gwaKalunga, Jesus Kristus, ngoka e li wo omuntu gwe “omuholike,” ite mu ethele moshaasi. (Lesha Omapisalomi 16:10.) Mesiku lyoPentekoste yomo 33 E.N., omuyapostoli Petrus okwa li a popi oohapu dhopahunganeko ndhoka dha popiwa kuDavid kombinga yaJesus. Okwa ti: “David okwa mono shoka Kalunga ta ka ninga, onkee [ano] okwa popi eyumuko lyaKristus sho a ti: ‘Kalunga ine mu ethela maasi, olutu lwe inalu vula okwoola.’” —  Iil. 2:23-27, 31.

12. Oolye ya li ya mono Jesus konima sho a yumudhwa?

12 Etompelo etiyali. Otu shi shi kutya Jesus okwa yumuka, molwaashoka opu na oonzapo odhindji ndhoka dha mona kutya okwa yumuka shili. Momukokomoko guule womasiku 40, Jesus okwa holokelele aalongwa ye moshikunino moka mwa li ombila moka a fumvikwa. Okwe shi ningi wo nomondjila yokuya kuEmmaus nosho wo pomahala galwe. (Luk. 24:13-15) Okwa li a popi naalongwa ye pauhandimwe, ngaashi Petrus, nokwa li wo a popi nayo ye li ongundu. Oshikando shimwe, Jesus okwa li i ihololele ongundu yaantu ye vulithe po 500. Onkee ano, itatu vulu okutinda uushili kutya okwa yumudhwa, molwaashoka opu na oonzapo odhindji ndhoka tadhi shi koleke.

13. Uulaadhi mboka aalongwa ya li ye na, owu ulike ngiini kutya oyi itaala shili meyumuko lyaJesus?

13 Etompelo etitatu. Otu shi shi kutya Jesus okwa yumudhwa kuusi, molwaashoka aalongwa ye oya li yu uvitha nuulaadhi kombinga yoshinima shoka. Sho ya li tayu uvitha kombinga yeyumuko lyaKristus oya hepekwa, oya monithwa iihuna nayamwe yomuyo oya li ya dhipagwa  nokuli. Ngele eyumuko lyaJesus inali ningwa shili noli li owala omashendjo, omolwashike Petrus a li e na okutula omwenyo gwe moshiponga? Omolwashike a li a lombwele aawiliki yelongelokalunga lyOshijuda kutya Jesus okwa yumuka shili, nonando oyo ngaa ye mu dhipagitha? Petrus naayapostoli ooyakwawo oye shi ningi, molwaashoka oya li ye na uushili kutya Jesus oku na omwenyo, noye ta wilike iilonga mbyoka Kalunga a li a hala yi longwe. Shimwe ishewe, eyumuko lyaJesus olya li lya shilipaleke aalanduli ye kutya nayo otaya ka yumudhwa. Pashiholelwa, Stefanus okwa si a tompwa kutya otaku ka kala eyumuko lyaasi. —  Iil. 7:55-60.

14. Omolwashike wi itaala kutya Jesus oku na omwenyo ngashingeyi?

14 Etompelo etine. Otu shi shi kutya Jesus okwa yumuka kuusi, molwaashoka otu na uushili kutya ota pangele e li Omukwaniilwa megulu noku li wo Omutse gwegongalo lyopaKriste. Omolwetompelo ndyoka elongelokalunga lyashili otali humu komeho. Mbela shika otashi wapa ngaa ando Jesus okwa li inaa yumudhwa shili kuusi? Aawe. Uushili owo kutya otashi vulika nokuli inaatu uva nando osha kombinga yaJesus. Ihe tse otu na omatompelo ga kola gokwiitaala kutya Jesus oku na omwenyo. Ngashingeyi oye te tu wilike note tu kwatele komeho sho tatu uvitha onkundana ombwanawa popepi sigo okooha dhuuyuni.

EYUMUKO LYAJESUS OTALI TI SHIKE KUTSE?

15. Omolwashike eyumuko lyaJesus tali tu tsu omukumo, opo tu uvithe?

15 Eyumuko lyaKristus otali tu tsu omukumo, opo tu uvithe. Aatondi yaKalunga oya kala uule womimvo 2 000 taya longitha iikondjitho yi ili noyi ili ya hulithe po iilonga yokuuvitha onkundana ombwanawa. Oya longitha uushunimonima, omasheko, okuponokelwa kongundu yaantu, okwiindika iilonga yetu nosho wo omahepeko. Aapiya yaJehova yamwe ohaya dhipagwa nokuli. Ihe nonando ongaaka, “oshikondjitho kehe tashi hambulwa shi tu kondjithe,” inashi tompola sha oku tu keelela kaatu uvithe kombinga yUukwaniilwa nokaatu ninge aantu aalongwa. (Jes. 54:17) Katu na okukala twa tila aalanduli yaSatana nenge aapiya ye. Jesus oku li pamwe natse, note tu kwathele ngaashi e tu uvanekela. (Mat. 28:20) Onkee ano, katu na okukakama nokutila omolwuumbanda. Kutya nduno aatondi yetu oya kambadhale oku tu tilitha shi thike peni, otaya ka hulila muunyengwi.

Eyumuko lyaJesus otali tu pe uulaadhi tu uvithe (Tala okatendo 15)

16, 17. (a) Eyumuko lyaJesus otali tu shilipaleke ngiini kutya shoka a longa aantu oshoshili? (b) Kalunga okwa pa Jesus oonkondo dhokuninga shike, ngaashi sha nyolwa muJohannes 11:25?

16 Eyumuko lyaJesus otali shilipaleke kutya ashihe shoka a longa aantu oshoshili. Paulus okwa nyola kutya ngele Kristus ina yumudhwa kuusi, nena eitaalo lyAakriste nokuuvitha kwawo osima yowala. Omulongwantu gumwe gwOmbimbeli okwa nyola a ti: “Ngele Kristus ina yumudhwa, . . . nena Aakriste omagoya go genegene noya kengelelwa thiluthilu.” Andola Jesus ka li a yumudhwa, ando omahokololo gOmavaangeli oge li owala ehokololo liyemateka kombinga yomulumentu e na omwenyo omwaanawa nomunandunge, ngoka a dhipagwa kaatondi ye. Ihe Kristus okwa yumuka lela. Shoka otashi koleke uushili waashoka a longa aantu, mwa kwatelwa shoka a popya kombinga yonakuyiwa. —  Lesha 1 Aakorinto 15:14, 15, 20.

17 Jesus okwa ti: “Ongame eyumuko nomwenyo. Oongoka i itaala ndje, ota kala e na omwenyo nando ona se.” (Joh. 11:25) Oohapu ndhoka oonkumithi otadhi ka gwanithwa shili. Jehova okwa pa Jesus oonkondo dhokuyumudha aantu. Ita ka yumudha owala mboka taya ka kala nomwenyo gwopambepo megulu. Ihe ota ka yumudha wo omamiliyona gaantu mboka taya ka kala nomwenyo sigo aluhe kombanda yevi. Ekuliloyambo lyaJesus nosho wo eyumuko lye otali tu shilipaleke kutya eso otali ka hulithwa po. Mbela shoka itashi ku kwathele wu kale wu na omukumo nokwiidhidhimikila omahepeko agehe ngoka tage ku adha? Onkee ano, natu idhidhimikeni kutya nduno aatondi yetu oya kale ya hala oku tu dhipaga.

18. Eyumuko lyaJesus otali tu shilipalekele shike?

18 Eyumuko lyaJesus olye tu shilipalekela kutya  oonakukala kombanda yevi otaya ka pangulwa shi ikolelela komithikampango dhaJehova dhopahole. Paulus okwa li a lombwele ongundu yaalumentu naakiintu yomuAtena a ti: “[Kalunga] oku utha nale esiku, uuna ndoka ta ka pangula uuyuni pauyuuki, note ke u pangulitha omulumentu ngoka e mu hogolola. Oye okwa hololele aantu ayehe oshinima shika puuyelele, sho a yumudha omulumentu ngoka kuusi.” (Iil. 17:31) Eeno, Jesus okwa langekwa po kuKalunga a kale Omupanguli, notu na uushili kutya ota ka pangula pauyuuki nopahole. —  Lesha Jesaja 11:2-4.        

19. Eitaalo meyumuko lyaJesus ohali tu inyengitha tu ninge shike?

19 Eitaalo meyumuko lyaJesus ohali tu inyengitha tu longe ehalo lyaKalunga. Andola Jesus ka li a gandja omwenyo gwe gu li eyambo nokuyumuka, ando otatu ka kala tatu pangelwa kuulunde nokeso sigo aluhe. (Rom. 5:12; 6:23) Ngele Jesus ina yumudhwa, otashi vulika owala natse tu kale niikala yokutya: “Tu lyeni tse tu nweni, oshoka ngula otatu si.” (1 Kor. 15:32) Ihe nonando ongawo, ihatu gandja eitulomo komainyanyudho gomonkalamwenyo. Pehala lyaashono, otwa lenga etegameno lyeyumuko nokukala tu na omatompelo gokuvulika kewiliko lyaJehova miinima ayihe.

20. Eyumuko lyaJesus otali gandja ngiini uunzapo wa yela kutya Jehova Omunene?

20 Eyumuko lyaJesus otali gandja uunzapo wa yela kutya Jehova Kalunga Omunene, nota “futu ayehe mboka taye mu kongo.” (Heb. 11:6) Jehova okuulika oonkondo nuunongo kaawu shi okuyelekwa nasha, sho a yumudha Jesus a kale nomwenyo megulu ihaagu si. Kalunga okuulika wo kutya ota vulu okugwanitha po omauvaneko ge agehe ngoka u uvaneka. Shika osha kwatela mo ehunganeko ndyoka lyi ikalekelwa kombinga “yoluvalo” lwu uvanekwa. Euvaneko ndyoka otali dhana onkandangala ya simana mokuyamukula ompata yi na ko nasha nuuthemba waKalunga wokupangela eshito alihe. Opo ehunganeko ndyoka li gwanithwe po, Jesus okwa li e na okusa nokuyumudhwa. —  Gen. 3:15.

21. Etegameno lyeyumuko otali ti shike kungoye?

21 Mbela ino pandula sho Jehova e tu pa etegameno lya kola lyeyumuko? Ombiimbeli otayi gandja eshilipaleko ndika tali ti: “Ngashingeyi egumbo lyaKalunga oli li paantu! Oye ota ka kala pamwe nayo, notaa ka ninga aantu ye. Kalunga mwene ota ka kala pamwe nayo nota ka ninga Kalunga kawo. Oye ota ka theta omahodhi agehe momeho gawo. Oko noitaku ka kala we eso, oluhodhi, [elilo] nenge uuwehame. Oshoka iikulu oya hula po.” Omuyapostoli omudhiginini Johannes okwa li a lombwelwa etegameno ndyoka ekumithi. Okwa lombwelwa taku ti: “Nyola oohapu ndhika, oshoka odhoshili nodhi shi okwiinekelwa.” Olye mbela a li e mu lombwele oohapu ndhoka dha nwethwa mo? OJesus Kristus ngoka a yumudhwa. —  Eh. 1:1; 21:3-5.