Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Kotoba 2014

Oyi igandja nehalo ewanawa ya ka longe —  koTaiwan

Oyi igandja nehalo ewanawa ya ka longe —  koTaiwan

OMUMWATATE Choong Keon nomukadhi Julie oya kala miilonga yuukokolindjila wondjigilile moSydney, moAustralia oomvula ntano dha ka pita. Ayehe oye na oomvula 30 nasha. Choong Keon ota hokolola ta ti: “Otwa li tu na iilonga mbyoka hatu yi ko owala omathimbo gamwe, nonkalamwenyo yetu oya li yi li nawa. Mondoolopa moka twa li, onkalo yombepo ito yi pewa komuntu nonkalamwenyo yetu oya li yuuzeko. Otwa li popepi naakwanezimo yetu nosho wo nookuume ketu.” Ihe nonando ongaaka, opwa li pu na oshinima shimwe shoka tashi piyaganeke Choong Keon naJulie. Oshike shono? Oya li ye shi kutya otaya vulu okuninga oshindji miilonga yaJehova. Ihe oya li taya kwatakwata, yo iikwatakwata ohayi nika edhilo.

Poshigongi shoshitopolwa shomo 2009, opwa gandjwa oshipopiwa shoka sha gumu omitima dhawo noonkondo. Omupopi okwa li o odheka unene mboka taya vulu okutamununa mo uukalele wawo. Okwa gandja ethaneko a ti: “Omuhingi gwoshihauto ota vulu owala oku shi ukitha kolulyo nenge kolumoho ngele otashi ende. Sha faafana, Jesus ote ke tu wilika owala tu tamunune mo uukalele wetu ngele otatu inyenge, nenge tatu katuka oonkatu twa mana mo tu adhe elalakano ndyoka.” * Choong Keon nomukadhi oya li ye wete ya fa oyo taya lombwela. Poshigongi mpoka, opwa li pwa pulapulwa aaihokani aatumwa mboka taya kwathele moTaiwan. Oya hokolola nkene haya tyapula uukalele, nokutsa omuthindo ompumbwe onene yaauvithi ndjoka yi li koTaiwan. Choong Keon nomukadhi oya li ye wete natango ya fa oyo taya lombwela.

Julie okwa ti: “Konima yoshigongi shoka, otwa galikana Jehova e tu pe uulaadhi tu katuke oonkatu tu tembukile koTaiwan. Ihe otwa li twa tila. Tango onda li ndi wete twa fa tatu iyumbile mondama yomeya omale.” Opo yi “iyumbile” mondama yomeya omale yopathaneko, oya li ya kwathelwa koohapu dhi li mOmuuvithi 11:4, tadhi ti: “Oongoka ha tala ombepo, ita kunu; naangoka ha tala iikogo, ita teya.” Choong Keon okwa ti: “Otwa li twa lundulula omadhiladhilo getu. Pehala lyokukala twa ‘tala ombepo,’ otwa tameke ‘okukuna nokuteya.’” Oya kala nokugalikana kombinga yoshinima shoka iikando oyindji. Oya kala wo haya lesha iimoniwa  yaatumwa noya kala hayi itumine omatumwalaka naamboka taya longo nale koTaiwan. Oya tokola ya landithe po iihauto yawo nosho wo iipundi yawo. Konima yoomwedhi ndatu oya yi koTaiwan.

ENYANYU NDYOKA HALI ZI MOKUUVITHA

MoTaiwan omu na aamwatate naamwameme 100 ya za kiilongo yilwe taya longo miitopolwa moka mu na ompumbwe onene yaauvithi yUukwaniilwa. Yamwe oya za koAustralia, Britania, Kanada, Fulaanisa, Japani, Korea, Spania nosho wo kIilongo ya Hangana. Oye na oomvula dhi li pokati ko 21 sigo 73. Mokati kawo omu na aamwameme 50 nasha inaaya hokanwa. Oshike sha kwathela aamwatate naamwameme mboka ya kale nokulonga nuuladhi moshilongo moka hamo ya valelwa? Natu pulakene shoka taya ti.

Laura

Omumwameme Laura, Omukanada. Ina hokanwa, ihe ota longo miitopolwa mbyoka yi li muuninginino waTaiwan. Omimvo omulongo dha ka pita sho a li moKanada, ka li e hole iilonga yokuuvitha nando okashona. Ota ti: “Molwaashoka kanda li handi kala muukalele ethimbo lyagwana, inandi kala ndi wu hole nokanda li nda pyokoka muwo.” Ookuume ke moKanada oya li ye mu pula a ye nayo, ya ka uvithile koMeksiko uule womwedhi gumwe. Okwa ti: “Osha li oshikando shandje shotango nda longa ethimbo ele muukalele, nonda li nda kumwa molwaashoka oshe endela ndje nawa.”

Enyanyu ndyoka Laura a li a mono, olye mu inyengitha a tembukile kegongalo lyOshichiina ndyoka li li moKanada. Okwa tameke okwiilonga Oshichiina, nokwa kala ha longo nongundu yelaka ndyoka. Okwi itulile po elalakano a tembukile koTaiwan, nokwe shi ningi muSeptemba 2008. Okwa ti: “Osha pula ndje konyala omumvo aguhe, opo ndi igilile onkalo ndjika ompe. Ihe ihandi dhiladhila ndi shune koKanada.” Mbela Laura ota tyapula ngaa iilonga yokuuvitha? Okwa ti: “Otandi yi tyapula noonkondo. Kapu na oshinima shi nyanyudha shi vulithe okumona aakonakonimbiimbeli taye ende taya lundulula onkalamwenyo yawo, sho taya tseya Jehova. Okuuvithila moTaiwan okwa pandje ompito ndi makele enyanyu ndika enene iikando oyindji.”

 OMASHONGO GOKWIILONGA ELAKA EPE

Brian nomukadhi Michelle

Omumwatate Brian nomukadhi Michelle, aaihokani ye na oomvula 30 nasha. Oya za koAmerika, ihe omimvo hetatu dha ka pita oya tembukile koTaiwan. Petameko oya li ye wete uukalele wawo wa fa itawu ti sha. Ihe omumwatate gumwe omutumwa a pyokoka, okwe ya lombwele ta ti: “Nonando owa gandja owala okatraktate kamwe komuntu, dhimbulukwa kutya otashi vulika shi kale osho oshikando shotango omuntu ngoka ta mono etumwalaka tali popi kombinga yaJehova. Shoka otashi ulike kutya oto dhana onkandangala onene muukalele!” Oohapu ndhoka dheladhipiko odha kwathele Brian nomukadhi, opo kaaya shune omitse miipeta. Omumwatate gumwe okwe ya lombwele ta ti: “Opo wu yande etekomukumo, yelekanitha ehumokomeho lyoye sho to ilongo Oshichiina okuza poshigongi shomumvo gwa pita sigo oposhigongi shomumvo tagu landula. Ihe ino yelakanitha ehumokomeho lyoye esiku nesiku, molwaashoka oto ka kala owala wu wete wa fa itoo ningi ehumokomeho lyasha.” Ngashingeyi aaihokani mboka oya hwepopala lela notaya ulike kutya oye li aakokolindjila yondjigilile taya pondola.

Oshike tashi vulu oku ku inyengitha wu ilonge elaka lyoshikwiilongo? Kambadhala wu ka talele po koshilongo hoka wa hala oku ku uvithila. Inda kokugongala kehe kwetu, endathana naamwatate nosho wo naamwameme yomegongalo ndyoka. Kala ho longo pamwe nayo muukalele. Brian ota ti: “Ngele owa mono nkene aantu oyendji tayi inyenge nawa ketumwalaka lyUukwaniilwa, nohole ndjoka to ulukilwa kaamwatate naamwameme, oto ki inyengithwa wu palamene omashongo goku ka longa koshilongo shilwe.”

IILONGA YOKWIIKONGELA OMBOLOTO

Kristin nomukadhi Michelle

Mboka ya tembukila koTaiwan hoka ku na “ompumbwe onene,” ohayi iyambidhidha mokukala taya longo aantu Oshiingilisa. Omumwatate Kristin nomukadhi Michelle, ohaya landitha iipuka yomomeya. Kristin ota ti: ‘Shivalelwe ndi landithe iipuka yomomeya, ihe oku shi ninga okwa kwathele ndje ndi vule okukala moTaiwan.’ Mokweendela ko kwethimbo, Kristin okwa mono ookasitoma ndhoka hadhi ya okulanda aluhe puye. Kungeyi ohi ikwathele ye mwene pashimaliwa nosho wo omukadhi, mokulanditha iipuka yomomeya omathimbo gamwe. Ohaya kala ye na ethimbo lya gwana okukokolondjila, iilonga mbyoka ya simana noonkondo. Onkee ano, oye li aakalele aakokolindjila, nenge tu tye, aayuli yaantu.

“KALA WU HOLE IILONGA YOYE”

Omumwatate William nomukadhi Jennifer oya za koAmerika. Ihe omimvo heyali lwaampono oya kala taya kokolondjila moTaiwan. William okwa ti: “Okwiilonga elaka epe, okukokolindjila, okusiloshimpwiyu egongalo, nokulonga opo tu mone oshimaliwa, iinima mbyoka ohayi vulitha omathimbo gamwe.” Oshike she ya kwathele ya pondole nokukala ya nyanyukwa? Oyi itulila po omalalakano ge li pandjele. Pashiholelwa, sho tayi ilongo Oshichiina inaya kala taya kondjitha unene ye shi tseye meni lyethimbo efupi. Shono oshe ya kwathele kaaya teke omukumo unene sho sha li she ya pula ethimbo ele ye shi ilonge.

William nomukadhi Jennifer

William ota dhimbulukwa oohapu dhomutonateli omweendi gumwe ngoka a li e mu lombwele ta ti: “Kala wu hole iilonga yoye, ihe hawuwanawa owala mboka hawu zi mo.” Niitya yimwe, ngele otwi itulile po elalakano lyopambepo, natu katuke oonkatu tu li gwanithe po. Sho William a tula miilonga omayele ngoka, oge mu kwathele nomukadhi, opo ya kale haya tifuka. Oge ya kwathela ya kale haya pulakene komayele gaakuluntugongalo nokulundulula omukalo gwawo gwokuungaunga niinima, opo ya pondole muukalele moTaiwan. Okwa ti ishewe: “Otwa kwathelwa wo tu dhimbulukwe okukala hatu kutha ethimbo tu nyanyukilwe eshito ewanawa ndyoka li li mokantuntu moka tatu longo.”

Omumwameme Megan, omukokolindjila inaa hokanwa a za koAmerika. Ngaashi William nomukadhi Jennifer, Megan naye ‘oku hole iilonga ye.’ Ota ningi oonkambadhala a kale e shi Oshichiina nawa. Ehuliloshiwike kehe, oha longo pamwe nongundu yaauvithi moshitopolwa oshiwanawa noonkondo, shi li petulilosikepa enene moTaiwan hali ithanwa Kaohsiung. Megan okuuvithila onkundana ombwanawa aanasikepa naayuli yoohi ya za koBangladesh, India, Indonesia, Filipine, Thailand nosho wo Vanuatu. Okwa ti: “Molwaashoka aayuli yoohi ohaya kala po owala ethimbo efupi pomatulilosikepa, ohatu tameke nayo ekonakonombiimbeli pethimbo opo tuu mpoka. Opo ndi ya mane ko,  ohandi konakona naantu yane nenge yatano poshikando.” Ote shi enditha ngiini nokwiilonga Oshichiina? Okwa ti: “Onda li ndi shi otandi ke shi ilonga nziya, ihe otandi dhimbulukwa shoka omumwatate gumwe a lombwele ndje a ti: ‘Ninga ngaashi to vulu, na Jehova ote ke ku laleka nuuyamba.’”

Megan

MOTAIWAN OMU NA EGAMENO NONDA HOKWA MO

Omumwameme Cathy okwa za koBritania. Ihe manga inaaya a ka kwathele koshilongo shilwe, okwa ningi omakonakono a mone kutya omoshilongo shini mu na egameno moka omumwameme inaa hokanwa ta vulu okulonga. Okwa lombwele Jehova megalikano kombinga yomaipulo ge nokwa nyolele iitayimbelewa yontumba, a pule kombinga yiiponga mbyoka tashi vulika yi ningilwe aamwameme mboka inaaya hokanwa. Lwanima okwa konakona nawa omayamukulo ngoka a mono moombapila dhe. Okwa li a thiki pehulithodhiladhilo kutya ehala tali opalele okoTaiwan.

Mo 2004, Cathy okwa li a tembukile koTaiwan sho e na oomvula 31. Okwa kala nonkalamwenyo yi li paunathangwa lela. Okwa ti: “Onda li nda pula aamwatate naamwameme mpoka tandi vulu okulanda iiyimati niikwamboga kombiliha. Omayele gawo omawanawa oga kwathele ndje ndi kale ndi na iimaliwa ethimbo ele.” Oshike she mu kwathele a kale nonkalamwenyo yanathangwa? Okwa ti: “Ohandi galikana aluhe kuJehova, opo a kwathele ndje ndi kale nda gwanenwa kiikulya mbyoka handi li nokoonguwo ndhoka handi zala dho opala nawa. Ondu uvite kutya Jehova oha yamukula omagalikano gandje mokulonga ndje shoka nda pumbwa lela. Oha kwathele ndje ndi kale nda gwanenwa, nonando kandi na ashihe shoka nda hala. Ondi hole onkalamwenyo yi li paunathangwa, molwaashoka ohayi kwathele ndje ndi gandje eitulomo kiinima yopambepo.”

Cathy

Onkalamwenyo yaCathy kayi li owala paunathangwa, ihe oyituntula wo. Ota ti: “Ohandi kala nda nyanyukwa. Ohandi ka uvithila koshitopolwa hoka ku na aantu oyendji ye hole okupulakena onkundana ombwanawa.” Sho a thiki moTaiwan, moshilando moka a tameke okulonga e li omukokolindjila omwa li owala mu na omagongalo gaali gOshichiina. Ihe ngashingeyi omu na omagongalo gaheyali. Cathy okwa ti: ‘Okumona nomeho gokomutse eindjipalo ndika noku kutha ombinga meteyo lyopathaneko, ohashi nyanyudha ndje esiku kehe!’

“OYA LI YA PUMBWA NDJE LELA!”

Iinima otayi endele ngiini Choong Keon nomukadhi Julie, mboka ya popiwa metetekelo? Choong Keon ka li e shi nawa Oshichiina. Okwa tameke okukala u uvite kutya ke na oshilonga megongalo. Ihe aamwahe megongalo hasho ya li yu uvite ngawo. Okwa ti: “Sho egongalo lya topolwa momagongalo gaali, onda pewa iinakugwanithwa ya gwedhwa po, nonando onda li owala omuyakuligongalo. Sho sha ningwa, onda li ndu uvite lela kutya otandi kwathele mpoka pu na ompumbwe onene.” Okwa tsikile ko ti imemeha ta ti: “Onda nyanyukwa okumona kutya oya li ya pumbwa ndje lela!” Ngashingeyi Choong Keon omukuluntugongalo. Omukadhi gwe Julie okwa ti: “Ohatu kala tu uvite etumba, twa nyanyukwa notu na ombili kaayi shi ku yelekwa nasha. Otwe ya huka tu gandje ekwatho, ihe otu uvite kutya otse twa kwathelwa kiimoniwa mbika iiwanawa. Ohatu pandula Jehova sho e tu pitike tu ye koTaiwan!”

Miilongo oyindji omu na natango ompumbwe onene yaauvithi. Mbela owu li pokumana osikola, noto ipula kutya oto ka ninga shike monkalamwenyo yoye? Mbela owu li inoo hokana nenge inoo hokanwa? Owu na ehalo okulonga oshindji mehangano lyaJehova? Mbela owa hala aanegumbo yoye ya kale nondjokonona oyindji yiinima yopambepo? Mbela owa penzelwa nowuna iimoniwa iiwanawa to vulu oku yi lombwela yalwe? Odhoshili kutya oto ka mona omalaleko nuuyamba ogendji, ngele owa tokola wu tamunune mo uukalele woye mokukakwathela hoka ku na ompumbwe onene yaauvithi yUukwaniilwa.

^ okat. 3 Tala membo ‘Yandja oundombwedi nawanawa’ kombinga yOuhamba waKalunga, ontopolwa 16, okatendo 5-6.