Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Kotoba 2014

One otamu ka ninga “onkwaniilwa yaayambi”

One otamu ka ninga “onkwaniilwa yaayambi”

‘Otamu ka ninga onkwaniilwa yaayambi.’ —  EKS. 19:6.

1, 2. Oluvalo lwomukiintu olwa li lu na okugamenwa kaalu ningilwe shike, nomolwashike?

EHUNGANEKO lyotango ndyoka lya nyolwa mOmbiimbeli olya simanenena. Otali tu kwathele tu uve ko nawa nkene elalakano lyaJehova tali ka gwanithwa po. Sho Kalunga a ningi euvaneko muEden okwa ti: “Otandi tula etondathano pokati [koye Satana] nomukiintu, nopokati koluvalo lwoye noluvalo lwe.” Uutondwe mbuno otawu ka kala uunene wu thike peni? Jehova okwa ti: “Oluvalo [lwomukiintu] otalu nyanyagula omutse [gwaSatana], ongoye noto mu tsu moshithi shompadhi ye.” (Gen. 3:15) Uutondwe mboka wu li pokati keyoka nomukiintu otawu ka kala wa yaga kegonga, sho Satana ta ka kondja a mana mo nelalakano lyokuhulitha po oluvalo lwomukiintu thiluthilu.

2 Itashi kumitha sho omupisalomi a galikana kombinga yoshigwana shaKalunga oshihogololwa a ti: “Tala, nkene mbo ye ku tonde ya kolokosha; tala, sho inaa hala okuvulika. Otaa ende aantu yoye mevi; otaa kotokele mbo ye li megameno lyoye. Otaa ti: ‘Ileni, tu halakanithii po oshigwana shawo.’” (Eps. 83:2-4) Onkee ano, ezimo moka mwa za oluvalo lwomukiintu olya li li na okugamenwa, opo kaali hanagulwe po thiluthilu noli nyatekwe. Opo elalakano lye li gwanithwe, Jehova okwa li a ningi natango omalongekidho gopampango.

 EHANGANO NDYOKA TALI GAMENE OLUVALO

3, 4. (a) Ehangano lyOmpango olya li lya tulwa miilonga uunake, noshigwana shaIsraeli osha li sha zimine okuninga shike? (b) Ompango oya li yi indike Aaisraeli okuninga shike?

3 Oluvalo lwaAbraham, Isak naJakob olwa li lwi indjipala sigo lwa ningi aantu omamiliyona. Jehova okwa li e yi ihogololele e teya ningi oshigwana she, shoka sha li Israeli shonale. Okupitila muMoses, Jehova okwa li a ningi ehangano lyOmpango li ikalekelwa noshigwana shoka. Oshigwana shaIsraeli osha li sha zimine okuvulika kehangano ndyoka. Ombiimbeli otayi ti: “Moses okwa yi e ta lombwele aantu iipango yaKalunga ayihe nomautho ge agehe, aantu ayehe noya yamukula ya ti: ‘Otatu ningi ayihe mbyoka Omuwa a popi.’ Nena Moses okwa kutha ombinzi miiyaha e te yi shashamine aantu ta ti: ‘Ombinzi ndjika oyehangano ndyoka Omuwa a hangana nane, sho a gandja iipango mbika ayihe.’” —  Eks. 24:3-8.

4 Ehangano lyOmpango olya li lya tulwa miilonga momumvo 1513 K.E.N., pondundu yaSinai. Oshigwana shaIsraeli shonale osha li sha ningi oshigwana shaKalunga oshihogololwa okupitila mehangano ndyoka. Jehova okwa li a ningi ‘Omukwaniilwa, Omuleli nosho wo Omugameni gwasho.’ (Jes. 33:22-23) Ihe ondjokonona yoshigwana shaIsraeli oyu ulika shoka sha li hashi shi ningilwa uuna tashi landula omithikampango dhaKalunga dhuuyuuki, nuuna tashi dhi ipwililikile. Ompango oya li yi indika Aaisraeli ya hokane naapagani nosho wo ya galikane iikalunga. Shoka osha li sha ningwa nelalakano, opo oluvalo lwatatekulululwa Abraham kaalu nyatekwe kiigwana yilwe. —  Eks. 20:4-6; 34:12-16.

5. (a) Ehangano lyOmpango olya li lye egululile Aaisraeli ompito yini? (b) Omolwashike Kalunga a li e ekelehi oshigwana shaIsraeli?

5 Okupitila mehangano lyOmpango, aasaaseri oya li ya langekwa po mokati koshigwana shaIsraeli. Aasaaseri mboka oya li taya thaneke elongekidho enene ndyoka tali ka ningwa komeho. (Heb. 7:11; 10:1) Osha yela kutya Aaisraeli oya li ye na ompito yi ikalekelwa yokuninga “onkwaniilwa yaayambi” okupitila mehangano lyOmpango. Ihe ongele owala ya li taya vulika koompango dhaJehova. (Lesha Eksodus 19:5, 6.) Aaisraeli kaya li ya vulika kudho. Oya li ye ekelehi nokuli Mesiasa, ngoka e li oshitopolwa shotango sholuvalo lwaAbraham. Shoka osha li sha ningitha Kalunga e ya ekelehi wo, molwaashoka kaya li ya lenga Jesus.

Sho oshigwana shaIsraeli inaashi vulika itashi ti kutya Ompango kaya li we tayi ti sha (Tala okatendo 3-6)

6. Elalakano lyOmpango olya li lyashike?

6 Oshigwana shaIsraeli inashi kala oshidhiginini kuJehova. Shoka osha li she shi ningitha kaashi ninge we onkwaniilwa yaayambi. Ihe shika itashi ti kutya Ompango kaya li we tayi ti sha. Oya li yi na okugamena oluvalo lu uvanekwa nosho wo okukwathela aantu ya dhimbulule mo Mesiasa. Ompango oya li ya gwanithwa po sho Kristus e ya kombanda yevi, naasho aantu ye mu dhimbulula mo. Ombiimbeli otayi ti: “Ompango oya hulu, sho Kristus e ya.” (Rom. 10:4) Oolye nduno ya li taya ka kala ye na ompito yokuninga  onkwaniilwa yaayambi? Jehova Kalunga okwa li a toto po ishewe ehangano lilwe lyopampango a hogolole oshigwana oshipe.

OSHIGWANA OSHIPE SHA TOTWA PO

7. Jehova okwa li a hunganeke shike okupitila momupolofeti Jeremia shi na ko nasha nehangano epe?

7 Jehova okwa li a hunganeke okupitila momupolofeti Jeremia kutya ota ka ninga “ehangano epe” noshigwana shaIsraeli. Shika okwa li e shi ningi komeho yethimbo manga ehangano lyOmpango inaali hulithwa po. (Lesha Jeremia 31:31-33.) Ehangano ndyoka olya li tali ka kala lya yooloka ko kehangano lyOmpango. Olya li lye shi ningi tashi wapa aantu ya dhiminwe po nopwaahe na okugandja omayambo giinamwenyo. Ngiini mbela?

8, 9. (a) Aantu oya li taya vulu okuningilwa shike omolwombinzi yaJesus ndjoka ya tika? (b) Mboka ye li mehangano epe oye na ompito yashike? (Tala kethano lyopetameko.)

8 Konima yomathelemimvo gontumba, Jesus okwa toto po Uulalelo wOmuwa mo 14 Nisan 33 E.N. Jesus okwa lombwele aayapostoli ye aadhiginini 11, a ti: “Oshitenga shika osho ehangano epe lyomombinzi yandje ndjoka tayi tilwahi molweni.” (Luk. 22:20) Jesus okwa popile ishewe kombinga yomaviinu muMateus, a ti: “Shika osho ombinzi yandje, ombinzi yehangano, tayi tilwahi omolwoyendji oyokudhima po oondjo.” —  Mat. 26:27, 28.

9 Ombinzi yaJesus ndjoka ya tika oya li ya koleke ehangano epe. Omolwayo aantu otaya vulu okudhiminwa po oondjo dhawo palumwe aluke, sigo aluhe. Jesus ina kwatelwa mo mehangano epe. Ye ina pumbwa edhiminopo lyoondjo, molwaashoka ke na ondjo yasha. Kalunga okwa longitha ongushu yombinzi yaJesus ndjoka ya tika e etele aantu yomoluvalo lwaAdam uuwanawa. Kalunga okwa longitha ombepo ondjapuki a gwayeke aantu yamwe ya ninge “oyana.” (Lesha Aaroma 8:14-17.) Molwaashoka okwe ya tala ko kaaye shi aalunde, otaya ka kala ya fa Jesus, Omwana gwaKalunga, ngoka kee na uulunde washa. Aagwayekwa oya li taya ka ninga ‘aathigululi pamwe naKristus.’ (OB-1954) Oye na wo ompito nosho wo uuthembahenda mboka oshigwana shaIsraeli sha li shi na pethimbo lyOmpango. Omuyapostoli Petrus okwa li a popi shi na ko nasha ‘naathigululi pamwe naKristus.’ Okwa ti: “Ihe one ezimo lya hogololwa, aayambi yOmukwaniilwa, oshigwana oshiyapuki, aantu yaKalunga mwene mwa hogololwa, mu hokolole iilonga ye iinene. Kalunga okwe mu ithana mo momilema, mu ye muuyelele we uukumithi.” (1 Pet. 2:9) Osha yela kutya ehangano epe olya simanenena. Otali kwathele aalongwa yaJesus ya ninge oshitopolwa oshitiyali sholuvalo lwaAbraham.

EHANGANO EPE TALI TULWA MIILONGA

10. Uunake ehangano epe lya li lya tulwa miilonga, nomolwashike lya li li na okutegelela sigo ethimbo ndyoka?

10 Uunake ehangano epe lya li lya tulwa miilonga? Olya li lya tulwa miilonga mOpentekoste 33 E.N., sho aalongwa yaJesus aadhiginini ya li ya gwayekwa nombepo ondjapuki. Onkee ano, inali tulwa miilonga sho Jesus a popi kombinga yalyo mongulohi ye yahugunina kombanda yevi. Opo li ye miilonga ombinzi yaJesus oya li yi na okutika manga, nongushu yayo oya li yi na okugandjwa kuJehova megulu. Shimwe ishewe, ombepo ondjapuki oya li yi na okutililwa kombanda yaamboka taya ka ninga ‘aathigululi pamwe naKristus.’

11. Ehangano epe olya li lye shi ningi ngiini tashi wapa, opo Aajuda naamboka kaaye shi Aajuda ya ninge iilyo yaIsraeli shopambepo, noye li yangapi?

11 Ompango oya li ya hulu sho ehangano epe lya tulwa miilonga. Ihe sho Jehova a tseyitha okupitila momupolofeti Jeremia kutya ota ka ninga ehangano epe noshigwana shaIsraeli, ehangano lyOmpango lyonale kalya li we lya pumbiwa. Kungawo olya li lya “kulupa.” (Heb. 8:13) Sho sha ningwa, Kalunga okwa li a tala ko Aajuda naamboka kaaye shi Aajuda inaaya pita etanda ye thike pamwe. Ayehe oya li taya vulu  ‘okufukalekwa momitima dhawo. Shika kashi shi oshilonga shompango, ihe oshilonga shombepo yaKalunga.’ (Rom. 2:29) Kalunga okwa li a ningi ehangano epe nayo. Okwa li a ‘tula oompango dhe momadhiladhilo gawo, nokwe dhi nyolele momitima dhawo.’ (Heb. 8:10) Mboka ye li mehangano epe oye li 144 000. Oye li oshigwana oshipe shoka shi li “Israeli yaKalunga,” nenge tu tye Israeli shopambepo. —  Gal. 6:16, NW; Eh. 14:1, 4.

12. Omafaathano geni ge li pokati kehangano lyOmpango nehangano epe?

12 Efaathano lini li li pokati kehangano lyOmpango nehangano epe? Shotango, ehangano lyOmpango olya li pokati kaJehova nAaisraeli yopanyama, omanga ehangano epe li li pokati kaJehova naIsraeli shopambepo. Mehangano ekulu, Moses oye a li omupokati pokati koshigwana naJehova, omanga mehangano epe, Jesus oye e li Omupokati. Ehangano lyOmpango olya li lya tulwa miilonga okupitila mombinzi yiinamwenyo, omanga ehangano epe lya li lya tulwa miilonga sho ombinzi yaJesus ya tika. Pethimbo lyehangano lyOmpango Moses oye a li omuwiliki gwoshigwana shaIsraeli, omanga Jesus, Omutse gwegongalo, oye omuwiliki gwaamboka ye li oshitopolwa shehangano epe. —  Ef. 1:22.

13, 14. (a) Ehangano epe olya pambathana ngiini nUukwaniilwa? (b) Oshike sha li sha pumbiwa, opo Israeli shopambepo shi vule oku ka pangela pamwe naKristus megulu?

13 Ehangano epe olya pambathana ngiini nUukwaniilwa? Mulyo omo mwa za oshigwana oshiyapuki, shoka shi na uuthembahenda woku ka ninga aakwaniilwa naasaaseri mUukwaniilwa womegulu. Oshigwana shoka oshi li oshitopolwa oshitiyali sholuvalo lwaAbraham. (Gal. 3:29) Onkee ano, ehangano epe otali koleke ehangano ndyoka Kalunga a ningi naAbraham.

14 Opu na oshinima shimwe sha pambathana nUukwaniilwa, ihe inashi gwanithwa natango. Oshini mbela? Ehangano epe mulyo omo mwa za Israeli shopambepo, nolye ya pa uuthemba ya ka ninge ‘aathigululi pamwe naKristus.’ Elongekidho lyopampango olya li lya pumbiwa, opo li ya hanganithe ya ka pangele ye li aakwaniilwa naasaaseri pamwe naJesus mUukwaniilwa mboka womegulu.

EHANGANO NDYOKA TALI PITIKE YALWE YA KA PANGELE PAMWE NAKRISTUS

15. Jesus okwa li a ningi ehangano lini ndyoka li li owala pokati ke naalongwa ye aadhiginini?

15 Konima sho Jesus a dhike po Uulalelo wOmuwa, okwa ningi ehangano naalongwa ye aadhiginini. Okwe li ithana ehangano lyUukwaniilwa. (Lesha Lukas 22:28-30.) Ehangano ndika oli li owala pokati ke naagwayekwa. Jehova ina kwatelwa mo mulyo, ngaashi momahangano galwe. Jesus olyo a li ta popi sho a ti: “Ngaashi Tate a pe ndje epitikilo lyokupangela [a ninga ehangano nangame, NW]” okwa li ta popi ehangano ndyoka Jehova a ningi naye, opo a kale “omuyambi gwaaluhe palandulathano lyaMelkisedek.” —  Heb. 5:5, 6.

16. Ehangano lyUukwaniilwa olya ninga shike tashi wapa kAakriste aagwayekwa?

16 Aayapostoli aadhiginini yaJesus 11 oya li ya kala ‘pamwe naye momamakelo ge agehe.’ Ehangano lyUukwaniilwa oli li eshilipaleko kuyo kutya otaya ka kala pamwe naye megulu, notaya ka kuutumba kiipangelapundi ya pangele ye li aakwaniilwa naasaaseri. Ihe hayo owala taya ka pewa uuthembahenda mboka. Jesus okwa li a holokele omuyapostoli Johannes oshikando shimwe memoniko. Okwe mu lombwele a ti: “Oongoka ta sindana, otandi mu kuutumbike pungame koshipangelapundi shandje, naanaa ngaashi ngame nda sindana e te kuutumba puTate koshipangelapundi she.” (Eh. 3:21) Onkee ano, ehangano lyUukwaniilwa olya thikama po mAakriste aagwayekwa 144 000. (Eh. 5:9, 10; 7:4) Ehangano ndika lyopampango oli li eshilipaleko kutya otaya ka pangela pamwe naJesus megulu. Elongekidho ndika olya fa owala omufuko ta hokanwa  mezimo lyaakwaniilwa. Uuna a hokanwa oha ningi omunyekadhi, noha kala e na ombinga miinima yuuwa. Itashi kumitha sho Ombiimbeli tayi ithana aagwayekwa ye li “omufuko” gwaKristus, nenge “omukadhona omuyelele” ngoka ta ka hokanwa kuKristus. —  Eh. 19:7, 8; 21:9; 2 Kor. 11:2.

KALA WU NA EITAALO IHAALI TENGAUKA MUUKWANIILWA WAKALUNGA

17, 18. (a) Tumbula omahangano gahamano ngoka twa kundathana ga pamba Uukwaniilwa. (b) Omolwashike tu na okukala neitaalo lya kola mUukwaniilwa?

17 Omahangano ngoka twa kundathana moshitopolwa shika nosho wo shoka sha tetekele oga pambathana, notaga dhana onkandangala ya simanenena mUukwaniilwa. (Tala oshimpungu “Nkene Kalunga ta ka gwanitha po elalakano lye” moshitopolwa sha tetekele.) Uushili mbuka owu li euliko lya kola kutya omalongekidho gUukwaniilwa oga kankamena kiinima yopampango. Onkee ano, otu na omatompelo ga kola gokwiinekela Uukwaniilwa wopaMesiasa. Kalunga owo ta ka longitha a gwanithe po elalakano lye lyopetameko li na ko nasha nevi nosho wo naantu. —  Eh. 11:15.

Jehova ota ka gwanitha po shili elalakano lye li na ko nasha nevi, okupitila mUukwaniilwa wopaMesiasa (Tala okatendo 15-18)

18 Kapu na omalimbililo kutya Uukwaniilwa waKalunga otawu ke etela aantu ayehe omalaleko nuuyamba taga kalelele nogaaluhe. Otu na einekelo lya kola kutya Uukwaniilwa waKalunga owo owala tawu ka hulitha po thiluthilu omaupyakadhi ngoka aantu ye na kunena. Mbela shino oshi na oku tu inyengitha tu ninge shike? Otu uvithe nuulaadhi kombinga yoshili ndjoka yi li mOohapu dhaKalunga. —  Mat. 24:14.