Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Oshungolangelo (yokukonakonwa)  |  Septemba 2014

Longela Kalunga wa mana mo, nonando owu na ‘uudhigu owindji’

Longela Kalunga wa mana mo, nonando owu na ‘uudhigu owindji’

“Mokuya moshilongo shaKalunga otu na okupitila muudhigu owindji.” —  IIL. 14:22.

1. Omolwashike aapiya yaKalunga ihaaya kala ya kumwa uuna taya adhika kuudhigu?

MBELA otashi ku kumitha sho wu na okupita “muudhigu owindji” manga inoo mona ondjambi yomwenyo gwaaluhe? Otapeya itaashi ku kumitha. Kutya nduno moshili owa kala mo ethimbo li thike peni, owa tseya kutya uupyakadhi oshitopolwa shonkalamwenyo muuyuni mbuka waSatana. —  Eh. 12:12.

2. (a) Kakele kuupyakadhi mboka hawu adha aantu ayehe inaaya gwanenena, uudhigu wulwe wuni hawu adha Aakriste? (Tala kethano lyopetameko.) (b) Olye he tu etele uudhigu, notu shi shi ngiini?

2 Kakele kuudhigu mboka hawu “adha aantu ayehe,” Aakriste ohaya adhika wo kuudhigu wulwe. (1 Kor. 10:13) Uudhigu mboka owuni? Omahepeko omanyanyalithi ngoka haya ningilwa, molwaashoka haya vulika koompango dhaKalunga. Jesus okwa lombwelele aalongwa ye a ti: “‘Omuyakuli ke shi omunene e vule mwene gwe.’ Ngele aantu oya tidhagana ndje, nena otaa ke mu tidhagana wo.” (Joh. 15:20) Omahepeko ohaga etithwa kulye? OkuSatana, ngoka Ombiimbeli tayi ti kutya ‘ota ndunduma a fa onime, a hala okuninagula po’ oshigwana shaKalunga. (1 Pet. 5:8) Satana  oha kambadhala a mana mo e tu makele, opo kaatu vulike kuJehova. Natu taleni kwaashoka sha ningilwa omuyapostoli Paulus.

UUDHIGU MULISTRA

3-5. (a) Paulus okwa piti muudhigu wuni muListra? (b) Omomukalo guni etumwalaka lye li nasha nuudhigu mboka tawu ka adha ooitaali tali hekeleke?

3 Paulus okwa li a hepekwa lwiikando yi vulithe pwiiyali, omolweitaalo lye. (2 Kor. 11:23-27) Oshikando shimwe omuListra. Konima sho Paulus a aludha omulumentu a valwa oshilema, ye naBarnabas, omulongi pamwe naye, oya li ya talika ko kaantu ya fa ookalunga. Oya li nokuli ye na okwiindila ongundu yaantu kaayi ya galikane. Ihe nziya aaleli yelongelokalunga lyOshijuda oya thiki moshilando e taya lundile Paulus naBarnabas. Ongundu yaantu oya pilukile Paulus noye mu dhenge nomamanya e taye mu kookololele pondje yoshilando, noya li ye shi okwa sa. —  Iil. 14:8-19.

4 Sho Paulus naBarnabas ya galuka kokutalela po oshilando Derbe, “oya shuna ishewe kuListra nokuIkonium nokuAntiokia shomuPisidia. Oyo oya tsu ooitaali omukumo noye ya longo noku ya kumagidha, ya dhiginine eitaalo, ya ti: ‘Mokuya moshilongo shaKalunga otu na okupitila muudhigu owindji.’” (Iil. 14:21, 22) Petameko otashi vulika omuntu a tye oohapu ndhoka itadhi tsu omukumo. Molwaashoka edhiladhilo lyokupita “muudhigu owindji” olya fa tali yemateke, pehala lyokutsa omukumo. Ihe omolwashike enyolo tali ti Paulus naBarnabas oya ‘tsu ooitaali omukumo,’ sho ya popi kutya ooitaali otaya ka adhika kuudhigu owindji?    

5 Eyamukulo otatu li adha moohapu dhaPaulus odho tuu ndhoka. Paulus ina tya owala: “Otu na okwiidhidhimikila uudhigu owindji.” Ihe okwa ti: ‘Mokuya moshilongo shaKalunga otu na okupitila muudhigu owindji.’ Ano Paulus okwa li ta tsu ooitaali omukumo mokupopya kombinga yondjambi ndjoka tayi ka pewa mboka taya dhiginine eitaalo lyawo. Ondjambi ndjoka kayi shi owala ondjodhi. Jesus okwa ti: ‘Ihe ngoka ti idhidhimike sigo ehulilo, oye ta hupithwa.’ —  Mat. 10:22.

6. Ondjambi yashike tayi ka pewa mboka tayi idhidhimike?

6 Ngele otwi idhidhimikile omahepeko otatu ka pewa ondjambi. Aakriste aagwayekwa otaya ka pewa ondjambi yomwenyo gwaa na ehulilo megulu notaya ka pangela pamwe naJesus. ‘Oonzi dhilwe’ otadhi ka kala nomwenyo sigo aluhe kombanda yevi hoka ‘taku ka kala uuyuuki.’ (Joh. 10:16; 2 Pet. 3:13) Ihe ngaashi Paulus a popi, otu na okupita muudhigu owindji. Natu taleni komayeleko gaali ngoka taga vulu oku tu adha.

OMATIDHAGANO

7. Oshike sha kwatelwa momatidhagano?

7 Jesus okwa hunganekele a ti: “Oshoka aantu otaye ke mu gandja koompangu notaye ke mu dhenga noongola moosinagoga dhawo. Otamu ka falwa kiipala yomalenga noyaakwaniilwa omolwandje.” (Mark. 13:9) Ngaashi Jesus e shi popile, Aakriste yamwe otaya ka adhika komahepeko ngoka tashi vulika ga ziilile kaaleli yomalongelokalunga nenge kaanapolotika. (Iil. 5:27, 28) Natu taleni ishewe koshiholelwa shaPaulus. Mbela okwa li a tila sho a dhiladhila komahepeko ngoka? Aawe. —  Lesha Iilonga 20:22, 23.

8, 9. Paulus oku ulikile ngiini kutya okwa tokola toko okwiidhidhimika, nongiini yamwe yopethimbo lyetu ya ningi sha faathana?

8 Paulus okwa kondjitha nuupenda omatidhagano gaSatana e ta ti: “Ihe ngame mokugwanitha eithano lyandje kandi na nando uutende nomwenyo gwandje. Onda hala ashike okutsakanitha oshilonga shoka nde shi pewa kOmuwa Jesus shokuuvitha elaka etoye tali hokolola esilohenda lyaKalunga.” (Iil. 20:24) Osha yela kutya Paulus ka li a tilithwa komahepeko ngoka tashi vulika ga li tage ke mu adha. Pehala lyaashono, okwa li a tokola kutya  tashi ya nashi ye. Ye okwa li owala ti ipula ‘nokuuvitha elaka etoye,’ kutya nduno ota hepekwa.

9 Kunena, aamwatate oya tokola toko okuninga sha faathana. Pashiholelwa, moshilongo shimwe Oonzapo dhimwe odha tulwa mondholongo uule woomvula konyala 20, sho inaadhi kutha ombinga miinima yopapolotika. Oshikoya shadho kasha li nando sha falwa kompangu, oshoka moshilongo moka kamwa li epopilo lyaamboka haya tindi okuya kiita omolweiyuvo lyawo. Kaya li ya pitikwa ya talelwe po nokuli nando okuyaandjawo, nayamwe yomaanandholongo oya li ya dhengwa noya hepekwa momikalo dhi ili nodhi ili.

10. Omolwashike kaatu na okutila uudhigu mboka hawu holoka po ombaadhilila?

10 Aamwameme oyendji momahala galwe ohaya idhidhimikile uudhigu mboka hawu holoka po ombaadhilila. Ngele nangoye owi iyadha monkalo ya tya ngaaka, ino tila. Dhiladhila kuJosef ngoka a landithilwe po muupika. Jehova ‘okwe mu hupitha mo momaudhigu ge agehe.’ (Iil. 7:9, 10) Nangoye Jehova ota vulu oku ku hupitha momaudhigu goye. Ino dhimbwa kutya “[Jehova] oku shi shi, nkene e na okuhupitha aantu ye momamakelo ngoka tage ya adha.” (2 Pet. 2:9) Owu na omatompelo omawanawa okukala wi inekela Jehova nokwiidhidhimikila omahepeko waa na uumbanda. Kala wi inekela kutya Jehova ota vulu oku ku hupitha noku ku pa omwenyo gwaaluhe. —  1 Pet. 5:8, 9.

OMAMAKELO NGOKA IHAAGA MONIKA NUUPU

11. Omamakelo ngoka ihaaga monika nuupu oga yooloka ko ngiini komamakelo galwe, ngaashi omatidhagano?

11 Uudhigu wulwe mboka tashi vulika tu pite muwo ihawu monika nuupu. Owa yooloka ko ngiini komaudhigu galwe, ngaashi omatidhagano? Omatidhagano oga fa ombepo yoshikungulu ndjoka hayi vulu okuhanagula po egumbo lyoye mepathimo lyeho. Ihe omamakelo galwe ngoka ihaaga monika nuupu oga fa uuhwa mboka hawu kala tawu li omiti dhegumbo lyoye kashona nakashona sigo lya teka po. Omamakelo ngaka omuntu otashi vulika a kale inee ga monena po sigo ge mu etele oshiponga.    

12. (a) Satana oha makele aantu nemakelo lini ihaali monika nuupu, nomolwashike hali kwata ko aantu nuupu? (b) Paulus okwa li u uvite ngiini sho a teka omukumo?

12 Satana okwa hala okuteya po ekwatathano lyoye naJehova. Otashi vulika e ku yeleke nomatidhagano nenge nomamakelo galwe ngoka ihaaga monika nuupu, ngaashi etekomukumo ndyoka ha kwata ko nalyo aantu nuupu. Omuyapostoli Paulus okwa zimine kutya okwa li a teka omukumo poompito dhimwe. (Lesha Aaroma 7:21-24.) Ihe omolwashike omulumentu ngoka a li e na uupambepo wa kolelela, ngoka tashi vulika nokuli a li oshilyo sholutuwiliki pethimbo ndiyaka, a li u uvite kutya ye “omuntu omukweyi”? Paulus okwa li u uvite ngaaka omolwokwaagwanenena kwe. Okwa li shili a hala okulonga shoka shi li mondjila, ihe kasha li aluhe oshipu. Ngele nangoye oho kala wu uvite ngawo, mbela itashi ku tsu omukumo okutseya kutya naPaulus osho a li ha kala u uvite?

13, 14. (a) Oshike hashi teya aapiya yaKalunga yamwe omukumo? (b) Olye a hala okunkundipaleka eitaalo lyetu, nomolwashike?

13 Aamwameme oyendji omathimbo gamwe ohaya kala ya teka omukumo, ya tila noyu uvite yaa na oshilonga shasha. Pashiholelwa, Deborah, omukokolindjila omudhiginini, ota ti: “Olundji ohandi kala tandi ipula nepuko lyontumba ndyoka nda ningile, noshikando kehe tandi shi ningi ohashi ehameke ndje. Uuna tandi dhiladhila kombinga yomapuko ngoka nda ninga monkalamwenyo, ohandi kala ndi wete kaapu na omuntu ta vulu okukala e hole ndje, kutya nduno oJehova.”

14 Oshike hashi teya aapiya yamwe yaJehova aalaadhi omukumo, ngaashi Deborah? Opu na  omatompelo gi ili nogi ili. Yamwe otashi vulika ye na omukalondjigilile gwokudhiladhila kutya kaye na oshilonga nenge kutya onkalamwenyo yawo ombwinayi. (Omayel. 15:15) Yalwe oye na uunkundi wopalutu mboka hawu gumu omadhiladhilo gawo. Kutya nduno etekomukumo ohali etwa kushike, natu dhimbulukweni kutya olye a hala oku tu teya omukumo. Mbela olye a hala tu teke omukumo, opo tu ethe po okulongela Jehova? Osha yela kutya oSatana. Satana okwa tokolelwa eso nokwa hala nangoye wu kale wu uvite waa na etegameno ngaashi ye. (Eh. 20:10) Satana okwa hala tu kale twa limbililwa nokaatu na uulaadhi. Kutya nduno Satana ota longitha omatidhagano nenge omamakelo galwe ngoka ihaaga monika nuupu, elalakano lye oku tu pilamenitha Kalunga. Osha yela kutya oshigwana shaKalunga otashi kondjo olugodhi lwopambepo!

15. Otatu ku ulika ngiini kutya otwa tokola toko twaa teke omukumo?

15 Kala wa tokola toko okutsikila nekondjo. Kala wa tala kondjambi. Paulus okwa nyolele Aakriste yomuKorinto a ti: “Onkee ano itatu si uunye. Omuntu gwetu gwokombanda uuna ta yonuka po, omuntu gwetu gwomeni ota ningwa omupe esiku kehe. Oshoka uudhigu mbuka tu na ngashingeyi, owokathimbo notau ke tu etela eadhimo enenenene lyaa shi kuyelekwa nolyaaluhe.” —  2 Kor. 4:16, 17.

ILONGEKIDHILA UUDHIGU NGASHINGEYI

Aakriste ayehe, aanona naakuluntu, ohayi idheula okupopila eitaalo lyawo (Tala okatendo 16)

16. Omolwashike sha simanenena tu ilongekidhile uudhigu ngashingeyi?

16 Ngaashi twe shi mono, Satana oha longitha “omakotokelo omawinayi” gi ili nogi ili. (Ef. 6:11) Otu na okulandula omayele ngoka taga adhika mu 1 Petrus 5:9, ngoka taga ti: “Kaleni mu na eitaalo lya kola, opo mu vule oku mu kondjitha.” Opo tu vule oku shi ninga, otwa pumbwa okudheula omadhiladhilo getu nomitima dhetu ngashingeyi, opo tu kale tu na ehalo lyokulonga shoka shi li mondjila.  Pashiholelwa, olundji aakwiita ohaya kala taya dheulwa, yi ilongekidhile olugodhi nopethimbo lyombili. Natse osho tu na okuninga, oshoka katu shi shoka shi li komeho. Onkee ano, otu na okwiidheula twa mana mo ngashingeyi, manga kaapu na uudhigu. Omuyapostoli Paulus okwa tsu Aakriste omukumo a ti: “Ikonakoneni, ne mu iyeleke, opo mu tale, ngele omu li tuu meitaalo.” —  2 Kor. 13:5.

17-19. (a) Otu na okwiikonakona ngiini? (b) Aagundjuka otaya vulu ngiini okwiidheula ya kale haya popile eitaalo lyawo kosikola?

17 Omukalo gumwe moka tatu vulu okulandula omayele gaPaulus, okwiikonakona nawa tse yene. Ipula omapulo ngaashi: ‘Mbela ohandi galikana ngaa ndaa na ezimbuko? Mbela ohandi vulika ngaa kuKalunga pehala lyokuvulika kaantu uuna tandi thiminikwa kuyakwetu ndi ninge sha sha puka? Ohandi yi ngaa aluhe kokugongala? Ondi na ngaa uulaadhi wokupopya kombinga yeitaalo lyandje? Ohandi idhidhimikile ngaa uunkundi wooitaali ooyakwetu ngaashi nayo hayi idhidhimikile wandje? Ohandi vulika ngaa kwaamboka taya wilike megongalo lyetu naamboka taya wilike ehangano lyaKalunga muuyuni awuhe?

18 Ndhindhilika kutya gaali gomomapulo otaga popi kombinga yokupopila eitaalo lyetu nokukondjitha omathiminiko goomakula. Aagundjuka oyendji ohaya popile eitaalo lyawo nuulaadhi kosikola. Ihaya kala ya tila nenge ya sa ohoni eitaalo lyawo. Pehala lyaashono, ohaye li popile nomukumo. Miifo yetu omwa nyanyangidhwa iileshwa yi na omaetopo omawanawa kombinga yankene tatu vulu oku shi ninga. Pashiholelwa, Oshungolangelo yo 15 Mei 2013, epandja 6, otayi popi nkene tatu vulu okukala tu na omukumo sho tatu popi nayalwe kombinga yeitaalo lyetu. Otayi tu ladhipike tu pule omapulo opo tu tompathane naanasikola ooyakwetu. Aavali, kaleni hamu idheula naanona yeni, opo ya kale yi ilongekidhila okupopila eitaalo lyawo kosikola.

19 Kashi shi aluhe oshipu okupopila eitaalo lyetu nenge okuninga shoka Jehova a hala tu ninge. Pashiholelwa, konima yiilonga otashi vulika tu kale tu uvite twaa na oonkondo dhokuya kokugongala. Nenge shi kale oshidhigu okupenduka ongulonene tu ye momapya. Ihe dhimbulukwa kutya ngele owa kala wu na omukalondjigilile omwaanawa gwokuninga iinima yopambepo ngashingeyi, oto ka kala wi ilongekidhila omashongo omanene monakuyiwa.

20, 21. (a) Okutedhatedha kekulilo otaku tu kwathele ngiini tu kondjithe omadhiladhilo omawinayi? (b) Otwa tokola toko okuninga shike?

20 Ihe ongiini tatu vulu okukondjitha omamakelo ngoka ihaaga monika nuupu? Pashiholelwa, ongiini tatu vulu okukondjitha etekomukumo? Omukalo gumwe moka tatu vulu oku shi ninga omokutedhatedha kekulilo. Omuyapostoli Paulus osho a li a ningi. Omathimbo gamwe okwa li ha kala a ninga omwenyo omwiinayi. Ihe okwa li wo e shi kutya Kristus ina sila aayuuki, ihe aalunde ngaashi ye. Okwa nyola nokuli a ti: ‘Otandi kala ndi itaala Omuna gwaKalunga, ngoka e hole ndje nokwa gandja omwenyo gwe molwandje.(Gal. 2:20) Eeno, Paulus okwa li a taamba ko ekulilo nokwa li i itaala kutya otali vulu oku mu mangulula muulunde.

21 Nangoye oto vulu okumona uuwanawa ngele owe shi taamba ko kutya ekulilo omagano goye mwene we ga pewa kuJehova. Shika itashi ti kutya etekomukumo otali ka kana po nziyanziya. Otashi vulika yamwe yomutse tu kale tatu li kondjitha sigo uuyuni uupe we ya. Ihe dhimbulukwa kutya otatu ka mona owala ondjambi ngele inatu sholola. Esiku kehe epe otali tu hedhitha popepi nesiku ndyoka uuna Uukwaniilwa waKalunga tawu ke ya. Ngele shoka sha ningwa, kombanda yevi otaku ka kala ombili, naantu ayehe otaya ka kala ya gwanenena. Kala wa tokola toko okuya mUukwaniilwa mboka, nonando oto pitile muudhigu owindji.